1. Ngenyi Cirangarijo ndi ciitiko cinosisira maningi cinoithwa njiku imwe pa gore? (Ruka 22:19, 20)

 NJIKU yo Cirangarijo co kufa ka Jesu, inosisira maningi ku vandhu va Jehovha. Ndi cimwe co ciitiko cakanangwa ndi Jesu kuti vateveri vake vaenderere mberi veciceukija. (Verenganyi Ruka 22:19, 20.) Itusu tinomathangwe akawanda anotiita kuti tive no cidaka-daka cinotiita kuti tide kuvona njiku iyi yo Cirangarijo. Ngatende tivone amweni akona.

2. Mathangwe api anoita kuti njiku iyi yo Cirangarijo ive inosisira maningi kwatiri?

² Cirangarijo cinotibesera kuceukija kuti muripo wa Jesu unosisira zvakadini. Cimwenizve, cinoticeukija manera atingakhombijira kubongesera ngo muripo uwu wa Jesu. (2 Vakorinte 5:14, 15) Kunja kwa izvi, Cirangarijo ndi mukana wokuti “tivangisane” no hama no hambzaji. (Varoma 1:12) Makore ese hama no hambzaji jakasiyana-siyana jakasiya Jehovha, jinoviya pa Cirangarijo. Vamweni vakona ngo manera avanoashihwa ngo njira yo rudo vanotema civaringo cokuhwirirazve kuna Jehovha. Vazinji vanotema civaringo cokujija Bhaibheri pavanopera kuzwa no kuvona Cirangarijo. Zvese izvi zvinoita kuti Cirangarijo cive cinosisira maningi kwatiri.

3. Ngenyi itusu tinoungana pa njiku yo Cirangarijo? (Vonanyi foto.)

³ Rangariranyivo ngo manera atinonga takaungana kutenderera pasi pese pa njiku yo Cirangarijo. Pa njiku iyi, Zvapupu zva Jehovha zvinonga zvakaungana pamwepo zuva parinonga ravira pa njiku iyi yo Cirangarijo. Tese tinopurukira hurukuro inokhombija kusisira ko muripo wo kufa ka Jesu. Tinoimba ndumbo mbiri, nokufambisa pau no vhinyu perapo nokuita “ameni” ngo mwoyo wese pa mukumbiro murongomuna jinoithwa pondhopo. Pausiku hwondhowo, ungano jese jinonga jeciita zviro zvakaezana. Munokwanisa kurangarira mudakaro  unova na Jehovha na Jesu pavanotivona takaungana pamwepo kutenderera pasi pese kuti tipe rukujo kwavari ngo njira iyi?

4. Ngozvapi zvaticazovona mu cijijo ici?

⁴ Mu cijijo cino, tiri kuda kubhuisana ngo pamusoro po muvhunjo iji: Tinganasiririsa kudini mwoyo wedu kuitira Cirangarijo? Tingaitisa kudini kuti tibesere vamweni kuti vajije zviri zvese pa ciitiko ici? Nokuvona kuti tingaitisa kudini kuti tibesere vaya vakasiya Jehovha. Mupinguro jo muvhunjo iji jinotibesera kuti tive takanasiririka kuitira njiku iyi inosisirari maningi.

TINGANASIRIRISA KUDINI MWOYO WEDU KUITIRA CIRANGARIJO?

5. (a) Ngenyi tinoda kurangarijisisa ngo pamusoro pokusisira ko muripo? (Nduyo 49:8, 9) (b) Ngozvapi zvamajija pa vhidhiyo ino musoro unoti Ngenyi Jesu Wakafa?

⁵ Njira imwe inosisira maningi ingatibesera kunasirira mwoyo wedu kuitira Cirangarijo ngo yokurangarira ngo pamusoro po kusisira ko muripo wa Jesu Kristu. Apana cataizokwanisa kuita tega kuti tijisujunure ku cishaishi no rufu. (Verenganyi Nduyo 49:8, 9; no kuvona vhidhiyo inoti Ngenyi Jesu Wakafa?) a Jehovha wakatumira Jesu kuti azopira upenyu hwake kuitira kutiponesa, Jehovha na Jesu vakaita zviro zvikuru maningi kwatiri. (Varoma 6:23) Patinorangarijisisa maningi ngo pamusoro po zvakatiitira Jehovha na Jesu zvinozotiita kuti tide kubongesera maningi ngo pamusoro po zvavakatiitira. Tiri kuda kuvona zviro zvinonesa maningi zvatakaitihwa ndi Jehovha na Jesu. Asi ticito tabhuya ngo pamusoro po zviro izvi, ngatitange tavona kuti icinyi muripo?

6. Ngozvapi zvinobatanijwa pa muripo?

⁶ Muripo ndi mutengo unopagahwi kuitira kuwanazve ciro ciya catinongaya taruza. Mwanarume wokutanga Adhamu paakasikwa iyena wainga akakwana. Paakandotama kuzwira oshaisha, iyena kubatanija no mubarihwana wake wese vakaruza mukana wokupona kwenda no kwenda. Ngo kudaro, kuti tiwane zvakaruziwaya ndi Adhamu Jesu wakapira upenyu hwake hwakakwana inga muripo. Jesu paainga ari pasi pano “aazivi kuita cishaishi, pamuromo pake apazivi kumbobuda manyepo.” (1 Pedhru 2:22) Asi Jesu paakafa wainga akakwana inga manera aaingaya Adhamu acito ashaisha, ndiyo ndava paakapira upenyu hwake iyena wakakwanisa kuripa mutengo unokwana kuitira upenyu hwakakwana wakaruzwaya ndi Adhamu.—1 Vakorinte 15:45; 1 Timoti 2:6.

7. Ngojapi muejo jakasongana na Jesu paainga pasi pano?

⁷ Paainga ari pasi pano Jesu wakazwira Baba wake pa zvese zvaaita pikija paya pazvainesa. Jesu wainga mwana wakakwana asi vabari vake avacaingepi vakakwana, asi pikija zvakadaro iyena waidikana kuvazwira. (Ruka 2:51) Jesu paainga akura wakadikana kucungirira muejo waizosongana nawo waizomuita kuti iyena atame kuzwira vabari vake no kutama kuva akagondeka kuna Jehovha. Paainga aadhodha, Jesu wakadikana kucungirirazve muejo jaaiejwa ndi Sathana uwo waida kuti iyena atame kuzwira Jehovha. (Mateu 4:1-11) Sathana wainga akanasiririka kuti aite kuti Jesu apose kuti azotame kukwanisa kupira upenyu hwake inga muripo.

8. Ngozvapi zvineso zvakahwisana na Jesu paainga pasi pano?

⁸ Paaita basa rake pasi pano, Jesu wakadikana kuhwisana no zvineso zvimweni. Vavengi vake vakamuteverera mbhera kuda kumuuraya. (Ruka 4:28, 29; 13:31) Kunja kwa zvondhozvo, iyena wakadikana kuhwisana no kutama kukwana ko vajiji vake. (Marko 9:33, 34) Paainga ecitongwa ngo pamusoro po upenyu hwake, Jesu wakatambujwa no kushohwa. Pakupejisira iyena wakafa ngo njira inosuruvarisa no inohwaja  maningi. (Vahebheru 12:1-3) Iyena wakadikana kucungirira divi rokupejisira ro kutongwa kwake ecijiimirira ega pacina jiviriro ya Jehovha. b—Mateu 27:46.

9. Munozwa kudini pamunorangarijisisa ngo muripo wa Jesu? (1 Pedhru 1:8)

⁹ Ngozvokadi kuti Jesu wakatambujika maningi kuti apire upenyu hwake kwatiri. Patinorangarijisisa ngo zvese zvakaithwa ndi Jesu nokuva kwake akanasiririka kuti atiitire zvondhozvo, zvinotiita kuti tide kumukhombijira rudo hwakakura. Verenganyi—1 Pedhru 1:8.

10. Muripo wakaita kuti Jehovha aruzenyi?

¹⁰ Waro tingativo kudini ndi Jehovha? Jehovha ngozvapi zvaakaitavo kuitira kuti Jesu akwanise kupira upenyu hwake inga muripo? Jehovha na Jesu vano ushamwari hwophedo maningi inga baba no mwana. (Mazwi Akangwara 8:30) Ejanyi kurangarira manera azvakanesera Jehovha kuvona mwana wake ecisongana no zvineso zvizinji pasi pano. Ngozvokadi kuti Jehovha wakaneseka maningi ngokuvona mwana wake ecishaishwa kutajwa, kurambhwa no kutambujika maningi.

11. Ngozvapi zvingatibesera kuzwisisa kuti Jehovha wakazwa kudini Jesu paakafa?

¹¹ Baba kana kuti mai varuza mwana wavo, vanonasa kuziva ushoni kuhwajihwa ngo matambujiko anoviiswa ngo kuruza mwana kwavanongaro vaita. Itusu tinothemba rumuko asi pikija zvakadaro, itusu tinohwajihwa maningi patinoruza ari wese. Izvi zvinotibesera kuzwisisa manera Jehovha akazwa kuhwajihwa paaivona mwana wake ecitambujika no kufa. c—Mateu 3:17.

12. Ngozvapi zvatinodikana kuita pecicota sumana imwe kuti Cirangarijo ciithwe?

¹² Kutangira wari munovona kudini ngokujija ngo pamusoro po muripo pa jijo yenyu yo mundhu ega kana pakunamata ko mbhuri? Shandisanyi Bhuku ro Kupsakisisa ro Zvapupu zva Jehovha kana bhuku riri rese rakacijikira mu Bhaibheri ringamubesera kuti muzive zvizinji ngo pamusoro po muripo. d Cimwenizve, tevereranyi urongwa hwo kuverenga Bhaibheri ngo pamusoro po Cirangarijo unowanika pa Co Kutarira Zvo Musongano Upenyu No Mushando. Pa njiku yo Cirangarijo mucakanganwa kuvona vhidhiyo Yokunamata ko Mangwanani kunosisira maningi. Kudari tikanasirira mwoyo wedu kuitira Cirangarijo tinozokwanisa kubesera vamweni kuti vajije zviri zvese pa ciitiko ici.—Esdra 7:10.

 BESERANYI VAMWENI

13. Ngocapi ciro cokutanga catinodikana kuita kuti tibesere vamweni kuti vaende kovona Cirangarijo?

¹³ Tingaitisa kudini kuti tibesere vamweni kuti vajije zviri zvese pa Cirangarijo? Mucito maita zviri zvese ngo zvaushoni kukoka vamweni. Kunja ko kukoka basi vaya vatinosongana navo mu basa ro kucumaera itusu tingaita rista yo mazina o vaya vatinoda kukoka. Vakadari inga ukama, vadoni vokubasa, vadoni vokucikora kubatanijavo no vamweni. Pikija mukoka jo munyara jikatama kukwana, tingashandisa link kana kuvatumira mukokewo tecishandisa foni. Tinozoshamaisika ngokuvona vandhu vanonga vecitendera mukoka uwu.—Mucumaeri 11:6.

14. Ipanyi muezaniso unovonesa kuti mukoka wo munyara ungadakajisa mundhu.

¹⁴ Kupekeja mundhu mukoka wo munyara izvi zvingamudakajisa maningi. Hambzaji imweni yakashamaisika maningi payakavona mwamuna wayo wainga aciripi capupu ecinanga kuti waizoenda ku Cirangarijo. Ngenyi iyona yakashamaisika? Ngokuti iyona yainga yakamukoka ko vhaza jakawanda kuti aende ku Cirangarijo asi yena aacaitoendepi. Ngozvapi zvakaitika pa vhaza iyi? Mwamunewo wakati: “Ndakaashira mukoka wo munyara.” Iyena wakanangazve kuti umwe mukuru waaizivana naye wakamukoka, iyena woenda ku Cirangarijo. Wakaita zvondhozvo ko makore ese akazotevera.

15. Ngozvapi zvatinodikana kurangarira patinokoka mundhu kuti aviye ku Cirangarijo?

¹⁵ Ceukijanyi kuti vaya vamunokoka vangaita muvhunjo, maningi-ningi kudari vainga vacito vamboenda ku Nyumba yo Umambo. Zvaizova zvaushoni kurangarira ngo pamusoro po muvhunjo javanozoita nokuva makanasiririka kuti muzodavira. (Vakorose 4:6) Inga muezaniso, vamweni vangatovhunjisa kudari: ‘Zvicinyi zvinozoitika pamusongano uwu?’ ‘Iwona unopeja nguva ngana?’ ‘Ngowapi mukhaindi wo masimirire o kondhoyo?’ ‘Ndinodikana kupagari zviri zvese?’ ‘Kunoithwa muhengo-muhengo wo mare?’ Patinokoka ari wese kuti aviye ku Cirangarijo itusu tingamuvhunjisa kudari: “Uno muvhunjo uri wese?” Perapo tomupekeja mupinguro  wo zviro zvaari kudaro kuziva. Cimwenizve, tingashandisa vhidhiyo jakadari inga iji: Kuceukija Kufa ka Jesu no Zvicinyi Zvinoitwa mu Nyumba yo Umambo? Kuitira kuti tibesere mundhu kuitira kuzwisisa kuti musongano jedu jakagara kudini. Kunja kwa zvondhozvo cijijo 28 co bhuku Mungadakara Kwenda no Kwenda! cino mafundo anosisira amungashandisa.

16. Muvhunjo japi jokuti vandhu vakavona Cirangarijo vangava najo?

¹⁶ Pakupera kuvona Cirangarijo, vazinji vakakokwaro vangaita muvhunjo jimweni. Inga muezaniso, ivona vangavhunjisa kuti ngenyi vamweni avazivi kuha pau no kumwa vhinyu kuveni vamweni vaita zvondhozvo. Kangaije ivona vangavhunjisazve kuti Cirangarijo cingapeja mukuvo wakadini. Cimwenizve, vangada kuziva kuti kureva kuti musongano jo Zvapupu zva Jehovha jakadaroko mukuvo wese. Pikija kuti mafundo aya angabhuyiwa pa Cirangarijo asi ivona vangada kuzivazve ngo pamusoro po zviro zvimweni. Musoro unowanika mu jw.org unobhuya ngo pamusoro pokuti “Ngenyi Zvapupu zva Jehovha Zvinoreremeja Maningi Cirariro ca Tenji Kupinda Zvinoita Zviara Zvimweni?” ungabesera kuti mukwanise kudavira muvhunjo iji. Itusu tinoda kuita zvese zvatinokwanisa Cirangarijo cicito catanga, pacinonga ceciithwa no pacinonga capera kuti tikwanise kubesera vandhu vamweni “vese vanonga no cido” cokuti vazwe kuti vajije zviri zvese pamusongano uwu.—Mabasa o Vapostori 13:48.

BESERANYI VAKASIYA JEHOVHA

17. Vakuru vangabeseresa kudini vaya vakasiya Jehovha? (Ezekieli 34:12, 16)

¹⁷ Pamukuvo wo Cirangarijo vakuru vanoitisa kudini kuti vabesere vaya vakasiya Jehovha? Khombijanyi kuti imwimwi munoneseka ndivona. (Verenganyi Ezekieli 34:12, 16.) Cirangarijo cicito caithwa psakanyi kubhuya na vaya vakasiya Jehovha. Vajekeserenyi kuti ivona vanodiwa maningi no kuvavhunja kuti imwimwi makanasiririka kuti muvabesere pa zvese zvavanoda. Vapenyi mukoka wokwenda ku Cirangarijo. Kudari ivona vakaviya ku Cirangarijo vaashirenyi ngo njira yokunaka mwoyo. Panopera Cirangarijo, endereranyi mberi mecibhuya no hama iji jinodiwari. Garanyi mecivabesera  pa zvese zvavanoda kuti vazokwanisa kuhwirira kuna Jehovha.—1 Pedhru 2:25.

18. Kuitisa kudini itusu tese tingabesera vaya vakasiya Jehovha? (Varoma 12:10)

¹⁸ Kuitisa kudini vese vo mu ungano vangabesera vaya vakasiya Jehovha pavanoviya ku Cirangarijo? Vangaita zvondhozvo ngokukhombija kunaka mwoyo, rudo no nderemejo. (Verenganyi Varoma 12:10.) Rangariranyi manera azvingavanesera hama no hambzaji iji jakasiyari Jehovha kuti jiviyezve kumusongano. Kangaije vangagara vecithya vecirangarira kuti avazoashihwi. e Mucavavhunja magama angavasiya vano nyowa kana kuti vecijizwa inga vashohwa. (1 Vatesaronika 5:11) Hama iji no hambzaji jinodavo Jehovha inga manera atinomudarovo. Itusu tinodakara patinova navo pamwepo tecinamata Jehovha.—Nduyo 119:176; Mabasa o Vapostori 20:35.

19. Tinobesereka kudini ngo kuceukija muripo wo kufa ka Jesu?

¹⁹ Tinobongesera maningi Jesu ngokuita kwake kuti itusu ticeukije kufa kwake kamwe pagore. Cimwenizve, tinozwisisa kuti ngenyi zvondhozvo zvinosisira. Kunasa kunanga itusu kubatanijavo no vandhu vamweni tinobesereka maningi patinoita zvondhozvo. (Isaia 48:17, 18) Inga muezaniso, rudo hwedu na Jehovha na Jesu unozovanga maningi. Tinomukana wokukhombijira kubongesera ngo zvese zvavakatiitirari. Cimwenizve, ndi mukana wokuti tikhwedere phedo no hama no hambzaji jedu, tino mukana wokujijisa vandhu ngo pamusoro po muripo uwu kuti vawane mukana wokuzoashira makomborero atinozoashiravo ecivha kuna Jehovha. Ngo kudaro, tinoita zvese zvatinokwanisa kuti tive takanasiririka kuitira njiku iyi inosisira maningi yo gore.