1. Mujimu wo kuphikizana unopsasisa kudini vamweni?

MU NYIKA ino, vandhu vazinji ngari yese vanoda maningi kuvoniwa inga vanosisira maningi kupinda vamweni. Cimwenizve, ivona avatoneseki kuti zviro zvavanoitaro zvinopsasa kudini vamweni. Inga muezaniso, umwe mutengesi angada maningi kubudirira kupinda mutengesi umweni. Ngo kudaro, iyena anoita zvese zvaanokwanisa kuti akhuvaze vamweni. Umwe mugogomi anokhungunya mugogomi umweni ngo cabomo, kuti akwanise kuwina mutambo wo vari kuitaro. Umwe mujiji angaphikizana no vamweni kuti akwanise kunghwina pa univhersidhadhi inozivika maningi. Inga Makristu, itusu tinoziva kuti izvi zvakashata maningi, izvona zvinoita divi ro “mabasa o nyama.” (Vagaratiya 5:19-21) Asi zvinokwanisika hama no hambzaji mu ungano voita zviro zvokuti zvinokhwijirija mujimu wo kuphikizana kana kuti voita kuti vamweni varangarire kudaro vacikazvizivi here? Muvhunjo uwu unosisira ngokuti mujimu uwu wokuphikizana, unoita kuti hama no hambzaji jitame kuva jakabatana.

2. Zvicinyi zvatinozovona pa jijo iyi?

² Pa musoro uwu, tinozovona mugariro munganani jakashata jingatiita kuti tide kuphikizana no hama jedu. Tinozovonazve muezaniso jo vashandiri vakagondeka va Jehovha vo mu nguva jokare, vacikazivi kuva no mujimu wo kuphikizana. Pokutanga, ngatende tivone kuti zvicinyi zvingatiitisaro kuti itusu tide kuphikizana no vamweni.

3. Ngojapi muvhunjo jatinodikana kujiita?

³ Nguva jese zvaushoni maningi kusotesesa kuti zvicinyi zviri kutiitisaro kuti tide kuphikizana no vamweni. Tingajivhunjisa  kudari: ‘Ndinojizwa ushoni pandinojiezanisa no vamweni here? Ndinoshanda ngo simba mu ungano kuti ndivoniwe inga ndinosisira kupinda vamweni here? Kana ndinoita zvese zvandinokwanisa kuti ndidakajise Jehovha?’ Ngenyi kujiita muvhunjo iji kunosisira? Vonanyi basi zvinonanga Bhaibheri.

4. Inga zvinonangwa pana Vagaratiya 6:3, 4, ngenyi atidikani kujiezanisa no vamweni?

⁴ Bhaibheri rinotingwanja kuti itusu atidikani kujiezanisa no vamweni. (Verenganyi Vagaratiya 6:3, 4.) Ngenyi? Thangwe rimwe rinoitisa zvondhozvo ngo ro kuti, kudari tikarangarira kuti tinosisira maningi kupinda hama jedu, tingatoguma pa kujikuja. Ngo divi rimweni, kudari tikajivona kuti itusu atisisiri kupinda vamweni, tangaguma pa kusuruvara. Azvinenyi hazvo, manera aya okurangarira asipi aushoni. (Varoma 12:3) Hambzaji imweni inodanwa Katarina * inogara Gresiya, yakati: “Ndainga no mukhuva wo kujiezanisa no vamweni vainga vakanyara maningi, vaibudirira mu basa ro kucumaera no vaya vaikwanisa maningi kuita ushamwari. Izvo zvakandiita kuti ndijizwe ndakaderera.” Tinodikana kuceukija kuti Jehovha aazivi kutikwevera kwaari ngo ndava yo kuseja kwedu, kubhuya ushoni kana kuzivika kwedu. Iyena wakatiwevera kwaari ngokuti wakavona kuti itusu tinoda kumushandira no kuda kuzwira Mwana wake.—Johani 6:44; 1 VaKorinte 1:26-31.

5. Ngozvapi zvatinojija ngo zvakaitika na hama Yuni?

⁵ Muvhunjo umweni watinodikana kujiita nga uwu: ‘Ndinozivika inga mundhu anoita runyararo, kana mundhu acikazwani no vamweni?’ Vonanyi basi muezaniso wa hama Yuni vanogara Koreya dhu Suri. Nguva jimweni ivona vaivona vese vaiita mabasa mu sangano inga vavengi vavo. Ivona vakati: “Inini ndaishora hama iji. Cimwenizve andicaiwirirana no zviro zvovainanga.” Ngowapi wakava muviyo wakona? Ivona vakati: “Zvandaiitari zvakaita kuti ungano iparajane.” Hama jimweni jakabesera hama Yuni kuti vazwisise zvovaingaro veciita. Ivona vakadikana kuita cinjo, wari vari kushanda inga mukuru wo ungano. Kudari tikavona kuti tiri vandhu vano mujimu wo kuphikizana, tinodikana kucinja ngo kukasika tova vandhu vanomusijira runyararo.

6. Mukuzwirana no Vagaratiya 5:26, ngojapi mugariro jicikabeseri jingatiita kuti tive no mujimu wo kuphikizana?

⁶ Verenganyi Vagaratiya 5:26. Ngojapi mugariro jicikabeseri jingatiita kuti tive no mujimu wo kuphikizana? Umwe wakona i kujikuja. Mundhu anojikuja anopsaka maningi zviro zvinomudakajisa basi. Mugariro umweni ucikaripi waushoni i cishatihwa. Mundhu anocishatihwa aadi basi zviro zvina mundhu umweni, asi anotoda kumuvhisira zviro zvaanazvo waro. Ngo kudaro, mundhu anocishatihwa anotonyenya kamare mundhu umweni. Itusu atidi kuva no mugariro iji jakashatari!

7. Ngowapi muezaniso unokhombija kuti kujikuja no kuva no cishatihwa kwakashata?

⁷ Kujikuja no cishatihwa kungaezaniswa no svina inoghwina mu mafuta anoshandiswa mu ndeki. Ndeki iyi ingatokwanisa kumburuka asi svina iyana ingatoenda koofunga tubu jinofambaya mafuta zvoita kuti iyona inyarare, yotowa pasi. Mukufananavo, mundhu angashandira hake Jehovha ko mukuvo wakati kuti. Asi kudari iyena aciita zvondhozvo ngo kujikuja no cishatihwa, iyena aazogumi ndhambo. (Mazwi Akangwara 16:18) Iyena anozoima kushandira Jehovha, wojikhuvaza pacake no kukhuvazavo vamweni. Tingaitisa  kudini kuti titame kuva vandhu vanojikuja no vano cishatihwa?

8. Tingaitisa kudini kuti titame kuva vandhu vanojikuja?

⁸ Tingava vandhu vacikajikuji ngo kurangarira mbhangiro yakapa mupostori Pauro ku ungano yo Firipo, yokuti: “Mucaita ciricese ngo kuphikizana kana ngo kujikuja, asi no kujidodokesa, vonanyi vamweni inga vakuru komuri.” (Vafiripi 2:3) Kudari tikavona vamweni inga vakuru kupinda itusu, atizophikizani na ivona ngo ndava yo kukwanisa kwavo kuita ushoni zvimweni kupinda itusu. Mukusiyana, tinozodakara naivona. Izvo zvinosisira maningi kudari ivona vari kushandisa zvavanokwanisaro kuita kuti vakuje Jehovha mu basa rake. Cimwenizve, kudari hama jinokwanisaro kuita zvizinji jikashandisa mbhangiro ya Pauro, jinozokwanisavo kuvona mugariro jedu jaushoni. Inga muviyo, tese tinozomusijira runyararo no rubatano mu ungano.

9. Tingaitisa kudini kuti titame kuva vandhu vano cishatihwa?

⁹ Tingatama kuva vandhu vano cishatihwa, ngo kuziva kuti itusu tinopatinogumira. Kudari tikajidodokesa, atizoeji kuvonesa kuti itusu tinosisira maningi kupinda vamweni. Kusiyapo zvondhozvo, itusu tingajija zviri zvese kuvha kwa vaya vanokwanisa kuita zviro zvizinji kupinda itusu. Inga muezaniso, ngatiti hama inokwanisa ushoni kuita hurukuru mu ungano. Itusu tingaikumbira kuti iyona itivhunje manera ainonasirira kuti iite hurukuru jayo. Kudari hambzaji inokwanisa ushoni kubika, itusu tingaikumbira mazano kuti itusu tikwanise kuitisa nane mu divi rondhoro. Kudari mujaha anonesehwa kuita ushamwari, iyena angakumbira ari wese anokwanisa ushoni kuita ushamwari. Tikaita izvi tinokwanisa kamare kuva vandhu vacina cishatihwa no kuitisa nane mugariro jedu.

10. Ngocapi cineso cakasongana na Gidhiyoni?

¹⁰ Ngativone zvakaitika na Gidhiyoni, wo jinja ra Manasa no vanarume vo jinja ro Efraimi. Jehovha wakabesera Gidhiyoni no vanarume vake vanokwana kuita 300 kuti vawine ku hondo. Zviro zvaizovaita kuti ivona vajikuje maningi. Vanarume vo Efraimi vakaenda kosongana na Gidhiyoni, asi avacaienda  komusimba, vakaenda kovereketesana naye. Zvinovoneka inga kuti kujikuja kwavo kwakavaita kuti vanyangajwe maningi, ngokuti kuvhira pakutanga, Gidhiyoni aazivi kuvakoka kuti vaende kohwisana no vavengi va Mwari. Ivona vaida maningi kuti vandhu vareremeje jinja ravo. Asi vainga vecikanganwa kuti zvaisisira maningi kuna Gidhiyoni kwainga kukuja zina ra Jehovha no kujivirira vandhu vake.—Vatongi 8:1.

11. Gidhiyoni wakanangenyi kuno vanarume vo Efraimi?

¹¹ Ngo kujidodokesa kwese Gidhiyoni wakati kuno vanarume vo Efraimi: “Ndaitenyi inini, cakaezana na ico co makaita imwimwi?” Perapo iyena wakapa muezaniso waivonesa kamare kuti Jehovha wainga ecivakomborera. “Pakuzwa mazwi aya kupopera kwavo kwakanyarara.” (Vatongi 8:2, 3) Gidhiyoni wakajidodokesa kuti akwanise kumusijira runyararo pakati po vandhu va Jehovha.

12. Ngozvapi zvatinojija ngo muezaniso wo Vaefraimi no wa Gidhiyoni?

¹² Tingajijenyi ngo ciitiko ici? Kuvha ku muezaniso wo Vaefraimi, tinojija kuti atidikani kujipsakira rukujo asi tinodikana kupsaka kukuja Jehovha. Musoro jo mbhuri no vakuru, vangajija zvimweni ngo muezaniso wa Gidhiyoni. Kudari ari wese akanyangajwa ngo zviro zvotaita, tinodikana kupsaka kuzwisisa kuti ngenyi iyena wanyangajwa. Cimwenizve, tingatomusimba ngo zviro zvaushoni zvaakaita. Asi kuti tiite izvi, tinodikana kuva vandhu vanojidodokesa, maningi-ningi kudari mundhu umweniwo ndiyena waposaro. Kuva no runyararo kunosisira maningi kupinda kuva mundhu anojikuja.

13. Ngocapi cineso cakasongana na Ana. Iyena wakaitenyi kuti akwanise kucinyisa?

¹³ Vonanyivo muezaniso wa Ana. Iyena wainga wakarovohwa ngo Murevhi waidanwa Erikana, uwo waimuda maningi. Asi Erikana wainga no mukaji umweni, waidanwa Penina. Iyena waida maningi Ana kupinda kuda Penina. Asi “Penina wainga no vana . . . kaveta Ana wainga acina mwana.” Ngo ndaya yazvo, Penina “yaimunyangajisa no kumurunja.” Ana wakajizwa kudini? Iyena wakanyangajwa maningi! “Ana waicema, aacaihepi.” (1 Samueli 1:2, 6, 7) Bhem, Bhaibheri apana parinonanga kuti Ana wakaeja kuita zviri zvese kuti ahwirijire Penina ngo zvaaengari eciita. Kusiyapo zvondhozvo, iyena wakavhunja Jehovha zvese zvaainga ecizwa, wothemba kuti iyena waizoitisa nane mugariroo. Kunanga kuti Penina wakacinja manera aaitajari Ana? Bhaibheri arinangi. Asi catinoziva ngo co kuti Ana wakawanazve runyararo wake, woramba anahwo. “Hope yake aizivi kuzocamwabze.”—1 Samueli 1:10, 18.

14. Tinojijenyi ngo muezaniso wa Ana?

¹⁴ Tingajijenyi ngo muezaniso wa Ana? Kudari mundhu umweni akaeja kuphikizana na imwimwi mu njira iri yese, ceukijanyi kuti  imwimwi mungakwanisa kuita zviri zvese pa mugariro wondhowo. Imwimwi amudikani kueja kuphikizana no mundhu wondhowo. Kusiyapo kuhwirijira cishatihwa ngo cishatihwa, ejanyi kuita runyararo no mundhuwo. (Varoma 12:17-21) Pikija iyena akaramba kucinja, imwimwi munozoenderera mberi muno runyararo hwo mukati.

15. Ngozvapi zviro zvakaezana zvainga na Aporo na Pauro?

¹⁵ Pejisire, ngativone zvatingajija ngo muezaniso wo mujiji Aporo no mupostori Pauro. Vovaviri vainasa kuziva ushoni Matahwa. Cimwenizve, ivona vainasa kuzivika i vainga vajijisi vaushoni. Ivona vakabesera vandhu vakawanda kuti vave vajiji. Asi avacaivonana inga vavengi.

16. Aporo wainga mundhu wo mushovonyi?

¹⁶ Aporo “wakabarihwa Areshandriya,” irona rainga dhorobha rainga no nduma ngo kuti pa mukuvo uwu vandhu vazinji vaienda kojija kondhoyo. Iyena wainga no cipo co kuvereketa, “ecinasa kuziva Matahwa.” (Mabasa o Vapostori 18:24) Aporo paaishandira ku dhorobha ro Korinte, hama jimweni jo ungano yo kondhoyo jaimuda maningi, kupinda kuda kwajaiita hama jimweni, kubatanijavo Pauro. (1 VaKorinte 1:12, 13) Kunanga kuti Aporo wakabesera pa kuparajana uku? Kangaije haiwa. Ngokuti pa kufamba ko nguva, Aporo paakabuda ku dhorobha ro Korinte, Pauro wakamukumbira kuti iyena ahwirire kondhoyo. (1 VaKorinte 16:12) Pauro aacaizoita zvondhozvo kudari iyena waivona kuti Aporo wainga eciparajanisa ungano. Zvakajeka kuti Aporo wakashandisa zvaaikwanisari kuita mu njira yo kuti iyena akwanise kucumaera masoko akanaka no kuvangisa hama jake. Tingava no cokwadi co kuti Aporo wainga mundhu anojidodokesa. Inga muezaniso, mu Bhaibheri  apana panokhombija kuti iyena wakanyangajwa Akira na Prisira ‘povakamudurujira gwanja ra Mwari.’—Mabasa o Vapostori 18:24-28.

17. Pauro wakaitisa kudini kuti amusijire runyararo?

¹⁷ Mupostori Pauro waiziva zvese zvakaitwa ndi Aporo. Asi Pauro aacaithya kuti vandhu vaizonanga kuti Aporo wakaita zvizinji kupinda iyena. Patinoverenga zvaakatarira ku ungano yo Korinte tinokwanisa kuvona kuti Pauro wainga mundhu waijidodokesa no kuezanana. Iyena aacaidakara paaizwa vandhu vacinanga kuti “inini ndiri wa Pauro.” Kusiyapo zvondhozvo, iyena waipa rukujo hwese kuna Jehovha Mwari na Jesu Kristu.—1 VaKorinte 3:3-6.

18. Takacijikira pa 1 VaKorinte 4:6, 7, tinojijenyi ngo muezaniso wa Aporo na Pauro?

¹⁸ Zvicinyi zvatingajija ngo muezaniso wa Aporo na Pauro? Itusu tingatoshanda ngo simba kuna Jehovha no kubesera vandhu vakawanda kuti vagumire pa kubhabhatijwa. Asi tinodikana kuzwisisa kuti kubudirira kwese kwatiri kuva nako, kuri kuitika ngokuti Jehovha ari kutibesera. Ciro cimweni catingajija ngo muezaniso wa Aporo na Pauro ngo co kuti, patinova no mabasa akawanda mu ungano, mukana wo kumusijira runyararo unoegejekavo. Tinobonga maningi vakuru no vabeseri vo ungano vanobesera kuti tive no rubatano pomwe no runyararo no vamweni. Ivona vanoita zvondhozvo ngo kupa mbhangiro jecivha mu Bhaibheri. Ivona avaeji kuva vandhu vanosisira maningi, asi vanobesera vese kuti vazwire Jesu no kutevejera muezaniso wake.—Verenganyi 1 VaKorinte 4:6, 7.

19. Umwe nga umwe wedu anodikana kuitenyi? (Vonanyi bhokiso rinoti: “ Ngatiregere Kuphikizana.”)

¹⁹ Umwe nga umwe wedu ano cipo caakapuwa ndi Mwari. Itusu tingashandisa cipo condhoco “pa kushandira vamweni.” (1 Pedhru 4:10) Nguva jimweni tingatovona kuti zvatiri kuitaro azvitosisiri maningi. Asi tinodikana kuceukija kuti zimiti rimwe nga rimwe, rinobesera kuti nyumba ivakwe. Ngo kudaro, ciro cese catinoita cinobesera kuti ungano ive yakabatana. Tese tinodikana kwenderera mberi tecishanda ngo simba kuti titame kuva no mujimu wo kuphikizana. Ngatiteme civaringo co kuita zvese zvatinokwanisa kuti timusijire runyararo no rubatano mu ungano.—Vaefeso 4:3.