1-2. Ngozvapi zvakanangwa ngo mutari umweni, i tinozovonenyi pa musoro uno?

NYAMASI uno, mamiriyau o vandhu vanonanga kuti tinotenda Jesu, asi ivona avaiti zviro zvaakajijisa. (2 Timoti 4:3, 4) Ngativonenyi basi zvakatahwa ngo mutari umweni, iyena wakati: “Kudari kwakawanika mundhu pakati pedu wakatojana na Jesu, anobhuya zviro ngo manera aibhuya Jesu, kunanga kuti anodikana kunyenyiwa inga manera vandhu vakaramba Jesu pa zviuru zviviri zvo makore apinda? . . . Vandhu vazinji vakadavira kuti hina. Tinodikana kuita kudaro.”

² Vandhu vazinji vo mu njiku ja Jesu, vakazwa Jesu ecijijisa no kumuvona eciita mushamaiso asi pikija zvakadaro, ivona avazivi kumutenda. Ngenyi? Pa musoro wakaperaya, takavona mathangwe marongomuna akaitisa kuti vandhu vakhugunyike ngo ndava ya Jesu ngo pamusoro po zvaiita no zvaainanga. Wari ngativonezve mathangwe marongomuna. Tinozovonazve kuti ngenyi nyamasi uno vandhu vanonyenya vateveri va Jesu, nokuti tingaitenyi kuti titame kukhugunyika.

3. Ngozvapi zvakaita Jesu zvakaita kuti vandhu vamweni vakhugunyike?

³ Jesu paainga pasi pano, iyena waipeja nguva no vandhu vo mukhaindi wese. Iyena, waiha no vakhupuki no vandhu vano zvigaro asi waipejazve nguva no vandhu vainga vari varombo no vaibzinyirihwa. Mukuengejera, iyena waitira pena vandhu vaya vaivoniwa ngo vandhu vamweni kuti i “vaxaixi.” Vandhu vaijikuja vakakhugunyika ngo ndava ya Jesu ngo pamusoro po  zviro zvaaita. Ivona vakavhunjisa vajiji va Jesu kudari: “Ngenyi munoha no kumwira pondhopo no vaxabisi no vaxaixi?” Jesu wakati kovari: Asipi “vakavanga vanoda murapi kaveta vanohwara. Inini andizivi kuviira vanasi, kaveta vaxaixi kuti vatenderuke.”—Luka 5:29-32.

4. Mukuzwirana no ciporofita ca Isaya, Vajudha vaizivenyi ngo pamusoro pa Mesiya?

⁴ Matahwa anonanga kudini? Mesiya acito aviya, ciporofita ca Isaya cakabhuya ngo pamusoro pake kuti iyena waizova mundhu anonyenywa ngo nyika. Icona cakati: “Waixohwa no kusiiwa ngo vandhu . . . Inga mundhu wo vanofindarisa hope pambeji pake. Wakaxohwa, apana waimutaja.” (Isaia 53:3) Ciporofita ca Isaya cakananga kuti Mesiya waizonyenyiwa “ngo vandhu.” Vajudha vo mu njiku ja Jesu, vaizviziva kuti iyena waizonyenyiwa.

5. Vandhu vazinji nyamasi uno vano mavonero api ngo pamusoro po vateveri va Jesu?

⁵ Muri kuvona cineso condhoco nyamasi? Hina. Vatungamiriri vazinji vo magerejha, vanodakara pavanovona vandhu vazinji vaciviya mu gerejha ravo, vecivoniwa inga vanosisira, vakakhupuka, vakangwara mu uzivi wo nyika ino. Vatungamiriri ava vo magerejha, vanotendera vandhu vese mu gerejha ravo vanoita zviro zvinonyenyiwa ndi Jehovha. Ivona, vano mavonero akashata ngo pamusoro po kuvangisira ko vandhu va Jehovha no mugariro wavo wakacena, ngokuti vandhu vazinji, vanovavona inga kuti avazivi kungwara. Mupostori Pauro wakananga kuti, Mwari wakasana ‘vandhu vanonyenywa ngo nyika.’ (1 VaKorinto 1:26- 29) Ngo kudaro, kuna Jehovha, vashandiri vake vese vakagondeka vanosisira maningi.

6. Tingatevejeresa kudini muezaniso wa Jesu inga zvinonangwa pana Mateu 11:25, 26?

⁶ Tingaitenyi kuti titame kukhugunyika? (Verenganyi Mateu 11:25, 26.) Ativhiri kucengejwa ngo mavonero anoita nyika vandhu va Mwari. Ceukijanyi kuti Jehovha anoshandisa basi vandhu vanojidodokesa kuti vaite kuda kwake. (Nduyo 138:6) Amborangariranyi ngo zviri kuita Jehovha ecishandisa vandhu vanovoniwa ngo nyika kuti avazivi kungwara.

7. Ngenyi Jesu wakavhunja Vafarisi kuti vaiita zviro zvakashata? Ivona vakajizwa kudini?

⁷ Jesu ngo kucunga kwese wakavhisa pambhene maitiro akashata o vatungamiriri vo magerejha vo mu njiku jake, ngokuti ivona vaijijsa vandhu kunamata Jehovha ngo njira yakashata. Inga muezaniso, iyena wakavhisa pambhene maitiro akashata o Vafarisi okubatisisa zvirovejeso zvavaiita ngo pamusoro ngo kusamba nyara, kusiyapo kutaja ukama hwavo. (Mateu 15:1-11) Vajiji va Jesu vakashamaisika maningi ngo magama aya. Zvokadi vajiji vake vakamuvhunjisa kudari: “Munoziva kuti vaFarisi vakapsipa mwoyo ngo kuzwa mazwi enyu?” Jesu wakavadavira kuti: “Muti wese ucikazivi kusimwa ndi Baba wangu vo mugore, unozobvitwa. Varegerenyi! Mapofu anoperekeja mapofudoni. Bofu, rikaseseja bofudoni, ese anowira mu rindi.” (Mateu 15:12-14) Pikija vatungamiriri vo magerejha vainyangajwa ngo zvainangari Jesu, iyena aacaizosiya kubhuya cokwadi.

8. Jesu wakakhombijisa kudini kuti magerejha ese aaiti zvinodakajisa Mwari?

⁸ Cimwenizve, Jesu wakavonesa pambhene kuti majijisiro o magerejha ainga okunyepa. Iyena aazivi kumbonanga kuti zvese zvinoitwa ngo magerejha zvinotendwa ndi Mwari. Kusiyapo zvondhozvo, Jesu wakananga kuti vandhu vazinji vari mugwanja rakakura  rinotungamirira mukuparajwa. Vandhu vashoma vari mugwanja rinotungamirira ku upenyu. (Mateu 7:13, 14) Iyena wakajekesa kamare kuti ivona vaiita inga vaishandira Mwari, asi avacaimushandira. Iyena wakangwaja vajiji vake eciti: “Basopanyi vaporofeti vokunyepa: vanoza komuri vakasimira dovo ro mabvuta, mukati mavo vari mapumphi. Munozovaziva ngo micero yavo.”—Mateu 7:15-20.

9. Jesu wakavhisa majijisiro api akashata aiithwa ngo magerejha?

⁹ Matahwa anonanga kudini? Ciporofita co Bhaibheri cakananga kuti Mesiya waizova mundhu anovangisira mu nyumba ya Jehovha. (Nduyo 69:10; Johani 2:14-17) Kuvangisira uku ndikona kwaiita kuti Jesu avhise zviito zvakashata zvaiitwa ngo magerejha. Inga muezaniso, Vafarisi vaitenda kuti mundhu aafi, kuveni Jesu wakajijisa kuti vakafa, vakadari inga vakavata. (Johani 11:11) Vasadhusi vainga vandhu vacikatendi kuti vandhu vanozomuswa, kuveni Jesu wakamusa shamwari yake Razaro. (Johani 11:43, 44; Maitiro o Vapostori 23:8) Vafarisi vainanga kuti ciro cese cinoitika cainga cakaemesehwa ndi Mwari, kuveni Jesu waijijisa kuti mundhu ndiyena anosana ega kushandira Mwari kana kutama kumushandira.—Mateu 11:28.

10. Ngenyi vandhu vazinji vanokhugunyika ngo jijiso jedu?

¹⁰ Muri kuvona cineso condhoco nyamasi? Hina. Vandhu vazinji vanokhugunyika ngokuti zvatinojijisa zvakacijikira mu Bhaibheri i zvinovhisa pambhene majijisiro akashata omagerejha. Vatungamiriri vo magerejha vanojijisa vandhu kuti Mwari anopisa vandhu vakashata. Ivona vanoshandisa jijiso iyi yokunyepa kuti vakwanise kungwarira vandhu vavo. Inga vashandiri va Jehovha itusu tinonamata Mwari ano rudo i tinovhisa pambhene jijiso iyi yo kunyepa. Vatungamiriri vo magerejha vanojijisazve kuti mundhu aafi. Itusu tinonanga pambhene kuti jijiso iyi ngo yo kunyepa ngo kubhuya cokwadi ngo pamusoro po rumuko. Mukusiyana no zvinotendwa ngo magerejha mazinji, kuti zvese zvakaemesehwa ndi Mwari, itusu tinojijisa vandhu kuti  ivona vakasujunuka kuti vasane kushandira Mwari. Vatungamiriri vo magerejha vanozwa kudini? Ivona vanonyangajwa maningi!

11. Mukuzwirana no masoko a Jesu anowanika pana Johani 8:45-47, Mwari anodenyi ku vandhu vake?

¹¹ Tingaitenyi kuti titame kukhugunyika? Kudari tinoda cokwadi, tinodikana kutendera zvinonanga Mwari. (Verenganyi Johani 8:45-47.) Mukusiyana na Sathana Dhiyabhu, itusu tinobatisisa cokwadi. Itusu atizosiyi ciri cese kuti citiphingaije pa zvatinotenda. (Johani 8:44) Mwari anoda kuti vandhu vake ‘varambe ushaishi, voteveja zvaushoni,’ inga zvakaitwa ndi Jesu.—VaRoma 12:9; Vaheberi 1:9.

12. Ngenyi manera akafa Jesu akakhugunya Vajudha vazinji?

¹² Ngocapi ciro cimweni cakakhugunya Vajudha mu njiku ja Jesu? Pauro wakati: “Kaveta itisu tinotokotesa Kristu wakakohomehwa. Rupserujo ku vaJuda no upenji ku vagrego.” (1 VaKorinto 1:23) Ngenyi Vajudha vazinji vakakhugunyika ngo ndava yo kufa ka Jesu pa mutanda wokutambujikira? Kovari kufa ka Jesu pa mutanda zvakaita kuti vamuvone inga mbavha kana mushaishi, votama kumuvona inga Mesiya.—Deuteronómio 21:22, 23.

13. Zvicinyi zvicizivi kutendiwa nga vayani vakakhugunyika ngo pamusoro pa Jesu?

¹³ Vajudha vakakhugunyikaya ngo ndava ya Jesu, vakakonehwa kuziva kuti iyena wainga acina ndava. Asi wainga wakapumbhwa zvabiresi no kushaishwa kutajwa. Vaya vakatonga shwiro ya Jesu, vakatonga mu njira icizivi kurungama. Dare rokutonga ro Vajudha, rakakasika kuungana pamwepo kuti ritonge Jesu, asi irona arizivi kutonga mukuzwirana no mutemo. (Luka 22:54; Johani 18:24) Vatongi vakashaisha kutonga pavakazwa masoko akashata ngo pamusoro pa Jesu, ivona vakaeja ‘kupsanga ufakazi hwokunyepa kuti vatongere Jesu kufa.’ Povakakonehwa, mupiri mukuru wakeja kuti Jesu anange masoko akashata kuti vawane kumupumbha. Izvi zvainga zvicikazwirani kamare no mutemo. (Mateu 26:59; Marco 14:55-64) Jesu naapera kumuswa, vaya vakashaishaya kumutonga vakapekeja ‘mare’  masoca o Ciroma kuti andhandhanise manyepo aisanangura kuti ngenyi guva rake aricina mutembo.—Mateu 28:11-15.

14. Matahwa ainga akanangenyi ngo pamusoro po rufu wa Mesiya?

¹⁴ Matahwa anonanga kudini? Pikija Vajudha vazinji vo mu nguya ya Jesu, avacaivetera kuti Mesiya waidikana kufa, asi vonanyi zvainga zvakanangwa ngo Matahwa: “Ngo bzokadikadi yena wakajipa ku rufu, wakatendehwa kutongwa nyatwa inga muxaixi. Asi, ngo bzokadikadi, wakathwara bzixaixi bzo vazinji, wokumbirira vaxaixi.” (Isaia 53:12) Ngo kudaro, Vajudha avacainga no thangwe rokukhugunyika Jesu paakauraiwa inga mushaishi.

15. Ngozvapi zviri kupumbhwa Zvapupu zva Jehovha zvinoita kuti vandhu vamweni vakhugunyike?

¹⁵ Muri kuvona cineso condhoco nyamasi? Eya. Jesu wakapumbhwa zvokunyepa opuwa ndava. Nyamasi Zvapupu zva Jehovha, zviri kusongana no mugariro wakadaro. Vonanyi muezaniso munganani. Kuvhira mu gore ro 1930 mbhera 1940, ku Estadhos Unidhus, rusujunuko hwedu hwo kunamata Mwari hwainga hwecinesa maningi. Vatongi vamweni vainga vecida kutikhuvaza kamare. Mu nyika yo Kebheki ku Kanadhaa, gerejha no utongi zvakabatana pamwepo kuti vakwanise kuimisa basa redu. Vacumairi vazinji vakasungwa ngo ndava yo kubhuya no vocigarisano ngo pamusoro po Umambo hwa Mwari. Ku Aremanya Nazista, hama jedu zinji jakagondeka jainga majaha, jakaurawa. Mu makore ano, hama jedu zinji ku Rusiya jakavhunjwa kuti jino ndava no kufungihwa mukadheya ngo ndava yo kubhuya ngo pamusoro po Bhaibheri. Kuveni utongi wainga wananga kuti basa iri “ndhoubhandidhu.” Pikija Shanduro yeNyika Itsva mu ndumi yo Cirusiya, yakarambijwa yonangwa kuti i Bhaibheri ro “mabhandidhu” ngokuti rinoshandisa zina ra Jehovha.

16. Inga zvinonangwa pana 1 Johani 4:1, ngenyi atidikanyi kucengejwa ngo masoko akashata anopumbhwa vandhu va Mwari?

¹⁶ Tingaitenyi kuti titame kukhugunyika? Zivanyi zvese zvinobatanijwepo. Pa hurukuro yake yo padundhu, Jesu wakavhunja vajiji vake kuti vandhu ‘vanozomutuka, vecimuteverera, vecinanga bzakaxata bzese ndimwi.’ (Mateu 5:11) Manyepo aya anovha ka Sathana. Iyena anoita kuti vavengi vandhandhanise masoko akashata ngo pamusoro pa vaya vanoda cokwadi. (Apokalipsi 12:9, 10) Itusu tinodikana kuramba manyepo anobhuiwa ngo vavengi vedu. Ticadosiya kuti manyepo aya atithyise kana kurembesa rutendo hwedu.—Verenganyi 1 Johani 4:1.

17. Ngozvapi zvakaitika Jesu acito afa, zvakaita kuti vamweni vakhugunyike?

¹⁷ Acito afa, Jesu wakatengeswa ngo umwe wo gumi na vaviri vo vapostori vake. Mupostori umweni wakaramba Jesu katatu. Vapostori vese vakamutiza vomusiya ari ega pa usiku wondhowo acito afa. (Mateu 26:14-16, 47, 56, 75) Jesu aazivi kushamaisika. Iyena wainga wakananga kuti izvi zvaizoitika. (Johani 6:64; 13:21, 26, 38; 16:32) Pavakavona izvi zveciitika, vamweni vakhona vakakugunyika votanga kurangarira kudari: ‘Inini andizovi mujiji wa Jesu!’

18. Zviporofita zvapi zvakakwanirisika Jesu acito afa?

¹⁸ Matahwa anonanga kudini? Mazana o makore Jesu acito aviya pasi pano, Jehovha wakakhombija mu Soko rake kuti Mesiya waizotengeswa ngo makumatatu o mangwenjere o sirivha. (Zakaria 11:12, 13) Iyena waizotengeswa ngo umwe wo mujiji wake wainga phedo naiyena. (Nduyo 41:10) Muporofita Zakariya wakatarazve kudari: “Urayai muhavisi, mabvuta andhandhanike.” (Zakaria 13:7) Vandhu  vano mwoyo yakanaka avazivi kukhugunyika pavakavona zviitiko izvi. Kusiyapo izvo, ivona vakavangisa rutendo hwavo vecivona zviporofita zvecikwanirisika kuna Jesu.

19. Vandhu vakanaka mwoyo, vanozwisisenyi?

¹⁹ Muri kuvona cineso condhoco nyamasi? Hina. Mu mazuva ano, kashoma kwatinozwa kuti Capupu casiya cokwadi, cova mupanduki, copandusavo vamweni. Ivona vangandhandhanisa masoko aciripi iwona, masoko acikazivi kukwana ngo pamusoro po Zvapupu zva Jehovha vecishandisa terevhizau, jhoronari no Interneti. Asi vandhu vakanaka mwoyo avakhugunyiki ndizvona. Mukusiyana ivona vanozwisisa kuti Bhaibheri rainga rakananga kuti zviro zvakadari zvaizoitika.—Mateu 24:24; 2 Pedru 2:18-22.

20. Tingaitenyi kuti titame kukhugunyika vamweni pavanosiya cokwadi? (2 Timoti 4:4, 5)

²⁰ Tingaitenyi kuti titame kukhugunyika? Tinodikana kuvangisa rutendo hwedu ngo kujija Bhaibheri mukuwo wese, kuita mukumbiro mukuvo wese no kuva takabatikana mu basa rotakapuwa ndi Jehovha kuti tiite. (Verenganyi 2 Timoti 4:4, 5.) Kudari tikava no rutendo atizothyi patinozwa masoko okunyepa. (Isaia 28:16) Rudo hwedu kuna Jehovha, Soko rake no hama jedu hunozotibesera kuti titame kukhugunyika vamweni pavanosiya cokwadi.

21. Pikija vandhu vazinji vanoramba masoko edu nyamasi, tingava no cokwadi cenyi?

²¹ Muzana rokutanga, vandhu vazinji vakakhugunyika, voramba Jesu. Asi vandhu vamweni vakamutenda. Pa vandhu vakamutenda waingepovo umwe wo dare ro Sinedhriyo no “vapiri vazinji vaidaviravo kutenda.” (Maitiro o Vapostori 6:7; Mateu 27:57-60; Marco 15:43) Ndizvonavo zvondhozvo na nyamasi. Mamiriyau mazinji nyamasi avaripi kukhugunyika. Ngenyi? Ngokuti ivona vanoziva no kuda zvokadi zvinowanika mu Bhaibheri. Soko ra Mwari rinoti: “Kunyara kwa vaya vanoda mupango wenyu, kwakakura; kovari akuna cikhugu.”—Nduyo 119:165.