1. Ngozvapi zvatakaashira pa musongano wo gore ra 2023?

 PA MUSONGANO wo gore ra 2023, a itusu takaashira zwisiso imbza jinoshamaisa. Takashirazve zviziviso zvinoshamaisa ngo pamusoro po basa redu. Inga muezaniso, takajija kuti vamweni vangawana mukana wokugara ku divi ro vandhu va Jehovha pikija pakupera kuparajwa ko Bhabhironiya Guru. Takavhunjwazve kuti kutangira mu njiku yokutanga yo mweji wa Novembro wo 2023, panozova no cinjo ngo manera atinotarira zvatinoita mu basa rokucumaera. Kureva kuti ngo pamusoro po cinjo iji, basa redu ro kucumaera aricaripi rinosisira no rokukasika? Haiwa.

2. Ngenyi basa redu rokucumaera njiku no njiku riri kuva rokukasika? (Marko 13:10)

² Njiku no njiku basa redu riri kuva rokukasika. Ngenyi? Ngokuti nguva iri kupera. Vonanyi zvakanangwa ndi Jesu ngo pamusoro po basa rokucumaera mu njiku jo kupejisira jino. (Verenganyi Marko 13:10) Mukuzwirana na Mateu, Jesu wakananga kuti masoko akanaka aizocumaehwa pasi pese ‘mugumo’ ucito waguma. (Mateu 24:14) Gama rokuti mugumo riri kunangira mugumo kamare wo nyika ino yakashata iri kutungamirihwa ndi Sathana. Jehovha wapera kugaja “njiku no nguva” yaunozoviya mugumo uwu. (Mateu 24:36; 25:13; Mabasa o Vapostori 1:7) Njiku pajinonga jecidarika, mugumo uri kukhwederavo. (Varoma  13:11) Mbhera njiku iyi igume, itusu tinodikana kwenderera mberi tecicumaera masoko akanaka.

3. Zvicinyi zvinotindundira kuti tide kucumaera?

³ Patinorangarira ngo pamusoro po basa rokucumaera tinodikana kujiita muvhunjo umweni unosisira maningi: Ngenyi tinocumaera masoko akanaka aya? Ngo njira yakareruka, itusu tinocumaera ngo ndava yo rudo. Patinocumaera tinoita izvi ngo ndava yo rudo hwedu hwatinahwo pa masoko akanaka maningi-ningi ngo pamusoro po rudo hwedu kuna Jehovha no zina rake. Ngatende tivone fundo rimwe nga rimwe.

TINOCUMAERA NGOKUTI TINODA MASOKO AKANAKA

4. Tinoitenyi patinoashira masoko akanaka?

⁴ Imwimwi muciri kuceukija pakupejisira pamaakashira masoko akanaka kuti makajizwa kudini, kangaije masoko okuti kwa bahwa mwana, masoko o pa mbhuri kana kuti pamakawana basa ramaida maningi? Kangaije makagara no cidaka-daka cokuda kuverenga masoko aya ku mbhuri jenyu no shamwari. Kunanga kuti izvi ngozvakaitikavo na imwimwi pamakaashira masoko akanaka kupinda ese, masoko akanaka o Umambo hwa Mwari?

5. Makajizwa kudini pamakaashira cokwadi co Soko ra Mwari pa vhaza yokutanga? (Vonanyi foto.)

⁵ Amborangariranyi kuti makajizwa kudini pamakatanga kuashira cokwadi co Soko ra Mwari. Imwimwi makajijira kuti Baba wenyu vo kudenga vanomuda maningi vanoda kuti muite divi ro mbhuri yavo yo vanamati. Imwimwi makajijirazve kuti iyena anogondesa kuti anozopeja matambujiko ese nokutizve munozokwanisa kuvonazve vandhu vamunoda vecimuswa mu nyika imbza. Izvi i zviro zvokutanga zvamakajija. (Marko 10:​29, 30; Johani 5:​28, 29; Varoma 8:​38, 39; Apokaripsi 21:​3, 4) Imwimwi makadakara maningi pamakajija zvokadi izvi. (Ruka 24:32) Imwimwi makadakarira kujija zviro zvese izvi nokutizve makadakariravo kovhunja vamweni masoko aya.—Ezanisanyi na Jeremia 20:9.

6. Majijenyi kuvha ku muezaniso wa hama Ernesto no mukaji wavo Rozi?

 ⁶ Vonanyi zvakaitika no hama imweni inodanijwa Ernesto b. Ivona pavainga no gumi ro makore baba wavo vakafa. Ivona vanonanga kudari: “Inini ndaijivhunjisa kuti: ‘Kureva kuti baba wangu vaenda kudenga? Kureva kuti njiku iri yese ndinozovonazve baba wangu?’ Inini ndaihwajihwa pandaivona vana vamweni vano majibaba avo.” Mukuvo wese hama Ernesto vaienda ku guva ra baba wavo vecigwadama pambeji paro veciita mukumbiro veciti: “Ndapota Mwari, ndiri kuda kuziva kuti baba vangu vari kwapi.” No padarika makore anokwana kuita 17, hama Ernesto avazivi kurangarira kaviri pavakaashira masoko akanaka, ivona vakamatendera. Vakashamaisika maningi pavakajija kuti vakafa apanazve cavanoziva nokutizve Bhaibheri rinonanga kuti kunozowanika rumuko. (Mucumaeri 9:​5, 10; Mabasa o Vapostori 24:15) Pejisire, ivona vakawana mupinguro javaida maningi kuziva. Hama Ernesto vaishamaisika maningi ngo cokwadi co mu Bhaibheri cavainga vecijija. Mukaji wavo Rozi, wakatangavo kujija, ovonavo rudo hwondhowo ngo pamusoro po masoko akanaka o Umambo. Mu gore ra 1978, vovaviri vakabhabhatijwa. Kuvhira iponapo vakatanga kubhuya no ukama, shamwari no vamwenivo ngo pamusoro po cokwadi cinoshamisa cavainga vajija. Inga muviyo, hama Ernesto no mukaji wavo Rozi vakabeserazve vandhu vanokwana kuita 70 mbhera vogumiravo pakubhabhatijwa.

7. Rudo wo cokwadi co Bhaibheri paunocira miji mu mwoyo medu, ngozvapi zvinoitika? (Ruka 6:45)

⁷ Patinoda cokwadi co Bhaibheri tinojizwa tecida kuverengera vamweni ngo pamusoro pazvo. (Verenganyi Ruka 6:45.) Tinojizwa inga vajiji va Jesu vakanangaya kudari: “Asi itusu atikwanisi kuregera kuvereketa zviro zvatakavona no zvatakazwa.” (Mabasa o Vapostori 4:20) Itusu tinoda cokwadi zvokuti tinodavo kuvhunja vamweni mbhera patinokwanisa.

TINOCUMAERA NGOKUTI TINODA VANDHU

8. Ngozvapi zvinotindundira kuti ticumaere masoko akanaka? (Vonanyi bhokiso rinoti: “ Idanyi Vandhu.”) (Vonanyi foto.)

⁸ Inga ndi Jehovha no Mwana wake, itusu tinoda vandhu. (Mazwi Akangwara 8:31; Johani 3:16) Itusu tinozwira maningi pena vandhu vokuti ‘avana Mwari’ nee ‘avana vetero.’ (Vaefeso 2:12) Ngo ndava yo zvineso zvavo, ivona vari kujizwa inga vari mu mwimbo wakajika, itusu tino bote rakareba kuitira kuvakweva kuti tivabudise kunja, ro masoko akanaka o Umambo hwa Mwari. Rudo no pena zvatinozwa kuno vandhu ava zvinotindundira kuti tide kuvacumaera masoko akanaka. Vandhu pavanozwa masoko akanaka, izvi zvinovabesera kuti  vave no vetero yokumbeji nokuti vave no mudakaro wari no “upenyu hwokadi” mu nyika imbza.—1 Timoti 6:19.

9. Ngoyapi ngwajo yatinopa ngo pamusoro po kumbeji, ngenyi? (Ezekieli 33:​7, 8)

⁹ Rudo hwedu kuno vandhu unotivangisa kuti tivangwaje kuti mugumo wo nyika ino waaphedo. (Verenganyi Ezekieli 33:​7, 8.) Itusu tinozwira pena vandhu vese kubatanijavo no ukama hwedu hucikashandiri Jehovha. Vamweni vakabatikana ngo mabasa o njiku no njiku nee avarangariri zviri kuguma “dambujiko guru ricizivi kumboitika kuvhira pa kusikwa ko nyika mbhera wari, rikapera, aricazoitikizve.” (Mateu 24:21) Tinoda kuti vandhu vazive zviro zvinozoitika pa mukuvo wokutongwa, apo ciyara cokunyepa cinozoparajwa, perapo zviro zvimweni zvinozosara zvo mu nyika ino yakashata izvona zvinozoparajwa pa hondo yo Armagedhoni. (Apokaripsi 16:​14, 16; 17:​16, 17; 19:​11, 19, 20) Itusu tinoita mukumbiro kuitira kuti vandhu vazinji vapurukire masoko edu no kutema civaringo cokushandira Jehovha pamwepo na itusu. Asi tingati kudini ngo pamusoro po vandhu vamweni kubatanijavo no ukama hwedu vacikatipurukiri wari?

10. Ngenyi zvinosisira kuti tienderere mberi tecivhunja vandhu ngo pamusoro po zvinozoitika sambiri pano?

¹⁰ Inga zvatavona mu cijijo caperari, zvingaita kuti vandhu pavanozovona kuparajwa ko Bhabhironiya Guru, votanga kuva no rutendo kuna Jehovha, voponeswa ndiyena. Kudari zvakadaro, zvaushoni kutanga wari kucumaera vandhu tecivazivisa zvinozoitika kumbejiyo. Rangariranyi pamukuvo wokuti vandhu vanozoceukija zvese zvatakavavhunja. (Ezanisanyi na Ezekieli 33:33) Kangaije ivona vangaceukija ngwajo jatakavapa vondundihwa kuti vade kushandira Jehovha pamwepo na itusu nguva icito yapera. Inga mungwariri wo kadheya yo Kufiripo, wakazova no rutendo pakupera kuzungunyika ko nyika kukuru kwakaitika. Kangaije vandhu vokuti avaripi kupurukira masoko akanaka nyamasi uno, vanozocinja maitiro avo pakupera kuparajwa ko Bhabhironiya Guru kunozoitika ngo civhumbu.—Mabasa o Vapostori 16:​25-34.

TINOCUMAERA NGOKUTI TINODA JEHOVHA NO ZINA RAKE

11. Tinopekejesa kudini nderemejo, rukujo no simba Jehovha? (Apokaripsi 4:11) (Vonanyi foto.)

¹¹ Thangwe guru rinosisira rinotiita kuti tide kucumaera masoko akanaka ngorokuti tinoda Jehovha no zina rake rakacena. Kucumaera i njira yokukuja Mwari wedu watinoda. (Verenganyi Apokaripsi 4:11.) Itusu tinotenderana no masoko okuti: Jehovha ndimwi munofanera kukujwa, kureremejwa no kusimbhwa ngo vashandiri venyu vakagondeka. Tinopa nderemejo no rukujo kuna Jehovha patinobhuisana no vandhu ngo pamusoro pokuti ndiyena  “wakasika zviro zvese” kubatanijavo na itusu. Tinopa rukujo Jehovha ngo kushandisa nguva yedu, simba nokuita zvese zvatinokwanisa kuti ticumaere azvinenyi no mugariro watiri. (Mateu 6:33; Ruka 13:24; Vakorose 3:23) Ngo magama mashoma, itusu tinoda kubhuya ngo pamusoro pa Mwari wedu watinoda. Tinoda kubhuya no vamweni ngo pamusoro pa Jehovha no kuvavhunja manera aari. Ngenyi?

12. Tinocenesa kudini zina ra Jehovha mu basa redu?

¹² Rudo hwedu kuna Jehovha unotiita kuti tide kucenesa zina rake. (Mateu 6:9) Izvi zvinoreva kuti tinoda kuvhunja vamweni kuti zviro zvese zvakabhuiwa ndi Sathana ngo pamusoro pa Mwari ngo zvokunyepa. (Genesi 3:​1-5; Jobe 2:4; Johani 8:44) Patinocumaera, tinoda kuvhunja vese vanoda kupurukira cokwadi ngo pamusoro pake, tinoda kuti vandhu vese vazive kuti mugariro wa Jehovha mukuru i rudo. Tinodazve kuvavhunja kuti manera ake okutonga mukuvo wese akarurama nokutizve Umambo hwake sambiri pano unozopeja matambujiko ese nokuzoviisa mudakaro no runyararo ku vandhu vese. (Nduyo 37:​10, 11, 29; 1 Johani 4:8) Patinobhuya cokwadi ngo pamusoro pa Jehovha tinonga tecicenesa zina rake. Itusu tinodakara ngokuziva kuti tiri kuita zviya zvaivetehwa kuti Zvapupu zva Jehovha zviite. Kuitisa kudini?

13. Ngenyi tinojikuja ngo kudanijwa kuti Zvapupu zva Jehovha? (Isaia 43:​10-12)

¹³ Jehovha wakatisana kuti tive “zvapupu zvake.” (Verenganyi Isaia 43:​10-12.) Pamakore adarika, karata yo Mukhumbi Unotonga yainanga kudari: “Rukujo wokuti umwe nga umwe wedu anawo, ngo wokudanijwa kuti Capupu ca Jehovha.” c Ngenyi tinonanga kudaro? Vonanyi muezaniso uwu. Kudari imwimwi munoda ari wese kuti ave capupu cenyu ku tiribhunari, pacina kukana-kana imwimwi maizosana ari wese wamunothemba no ano mufambiro  waushoni. Ndizvonavo zvaakaita Jehovha paakatikheta kuti tiite Zvapupu zvake, iyena wakavonesa kuti anotiziva ushoni nokutizve waithemba kuti itusu taizovhunja vamweni kuti iyena ndi Mwari umwe basi wokadi. Kwatiri i rukujo wakakura maningi kuva Zvapupu zva Mwari, ndiyo ndava tinoda kushandisa mukana wese watinawo kuti tivhunje vamweni zina ra Mwari nokuvonesa kuti zviro zvese zvakashata zvinobhuiwa ngo pamusoro pake ngo zvokunyepa. Patinoita izvi kamare, tinovonesa kuti tiri Zvapupu zva Jehovha.—Nduyo 83:18; Varoma 10:​13-15.

NGATIENDERERE MBERI TECICUMAERA MBHERA KU MUGUMO WO NYIKA

14. I zviro zvapi zvinoshamaisa zvinozoitika kumbejiyo?

¹⁴ Kurangarijisisa basi ngo pamusoro po zviro zvinozoitika kumbejiyo zvinotipa mudakaro mukuru. Ngo makomborero a Jehovha, tinovetera kuti vandhu vakawanda vatende cokwadi ngo pamusoro pa Jehovha dambujiko guru ricito ratanga. Itusu tinodakara maningi kuziva kuti pikija mukati mo dambujiko guru mukuvo unozonesa maningi ku vandhu, tinozovona vandhu vakawanda vanozokheta kubuda mu nyika ya Sathana vobatana na itusu kuti vakuje Jehovha.—Mabasa o Vapostori 13:48.

15-16. Ngozvapi zvatinozoenderera mberi teciita, mbhera rini?

¹⁵ Zvicito zvaitika izvi, itusu tinobasa rakawanda rokuita. Tino cidakajiso cokuita basa rokuzivisa rokuti narini aricazophindhwizve, kucumaera masoko akanaka o Umambo hwa Mwari mu nyika yese. Mukuvo umwewo, itusu tinozoenderera mberi tecingwaja vandhu. Ivona vanodikana kuziva kuti mugumo wo nyika ino yakashata unozoitika sambiri pano. Mukuvo uwu wokutonga ukaguma, ivona vanozoceukija kuti masoko ataivacumaeraya aivha kuna Jehovha.—Ezekieli 38:23.

¹⁶ Ngo kudaro, tese tatema civaringo cokuitenyi? Itusu tinoda kwenderera mberi tecivangisira no kukasika tecicumaera masoko akanaka ngo ndava yo rudo hwedu ku masokowo, rudo hwedu ku vandhu, maningi-ningi rudo hwedu kuna Jehovha no zina rake mbhera Jehovha anange kuti “zvakwana.”