1. Ngenyi tingananga kuti tiri kupona mu mukuvo unoshamaisa?

 TIRI kupona mu mukuvo unoshamaisa maningi. Zviporofita zviri mu Bhaibheri zviri kukwanirisika njiku no njiku tecizvivona ngo meso edu kamare. Inga muezaniso, tiri kuvona “mambo wo kakusi” na “mambo wo kanjikazi” vecihwisana kuti vakwanise kutonga nyika. (Dhanyeri 11:40) Cimwenizve, tiri kuvona masoko akanaka o Umambo hwa Mwari ecicumaehwa mu njira inoshamaisa maningi yaticito tambovona, nokutizve zviuru no zviuru zvo vandhu zviri kusana kushandira Jehovha. (Isaia 60:22; Mateu 24:14) Ticingabhuyi ngo pamusoro po zvokuha zvokumujimu zvatiri kuashira “ngo nguva kwayo.”—Mateu 24:​45-47.

2. Tingava no cokwadi cenyi, ngozvapi zvatinodikana kuziva?

² Jehovha ari kwenderera mberi ecitibesera kuti tizwisise zviro zvinosisira zviri kuda kukwanirisika sambiri pano. (Mazwi Akangwara 4:18; Dhanyeri 2:28) Itusu tino cokwadi cokuti dambujiko guru parinozotanga, itusu tinonga teciziva zvokuita kuti tienderere mberi takagondeka kuna Jehovha notakabatana. Asi ngo zvaushoni kutendera kuti zviro zvimweni ngo pamusoro po kumbeji itusu atito tazviziva. Mu cijijo cino, tiri kuda kuvona cinjo jakaithwa pa zwisiso jedu, perapo tinozovona zviro zvimweni zvatinoziva ngo pamusoro po kumbeji nokuvona manera Jehovha Baba wedu vokudenga vanozoita.

ZVIRO ZVATICIKAZIVI

3. Pa mukuvo wakapera tainangenyi ngo pamusoro po vandhu vaizoponeswa pakupera ko dambujiko guru, ngenyi?

³ Pamukuvo wakapera, tainanga kuti dambujiko guru parinozotanga apana na umwe anozowana mukana wokusana kujija  ngo pamusoro pa Jehovha no kupona pa Armagedhoni. Taiguma pambhejiso iyi ngokuti tainga tecirangarira kuti zvaingaya zvakaitika pa Ndambi zvaikhombija zviro zvaizoitika kumbeji. Inga muezaniso, itusu tairangarira kuti inga manera Jehovha akafunga musuvo wo arka Ndambi huru icito yatanga vandhu vokonehwa kunghwina mukatimo, apanavo waizokwanisavo kujija ngo pamusoro pa Jehovha no kuponeswa dambujiko guru paraizotanga.—Mateu 24:​37-39.

4. Ngenyi atinangi kuti zviro zvakaitika mu njiku ja Nowa zvaizokwanirisa zviri zvese kumbejiyo? Sananguranyi.

⁴ Kureva kuti ngo zvaushoni kunanga kuti ciro cimwe nga cimwe cakaitika pa Ndambi caivonesa zvaizotikavo kumbeji? Mupinguro ngo wokuti haiwa. Ngenyi? Ngokuti Bhaibheri arinangi zvondhozvo. a Ngozvokadi kuti Jesu wakaezanisa njiku ja Nowa no mukuwo wo kuviya kwake, asi iyena aazivi kunanga kuti ciro cimwe nga cimwe cakaitika mu njiku ja Nowa, inga muezaniso, kufungwa ko musuvo wo arka, zvaizokwanirisa zviro zvaizoitika kumbeji. Itusu tingajija zvakawanda ngo muezaniso wa Nowa no zvakaitika pa Ndambi.

5. (a) Nowa wakakhombijisa kudini rutendo? (Vahebheru 11:7; 1 Pedhru 3:20) (b) Ngo manera api kucumaera kwatinoita nyamasi uno kwakaezana no kucumaera kwakaithwa ndi Nowa?

⁵ Nowa paakashira masoko o ngwajo aivha kuna Jehovha, iyena wakakhombija kuti wainga no rutendo ngokutotanga kuvaka arka. (Verenganyi Vahebheru 11:7; 1 Pedhru 3:20.) Mu njira yakaezana, vandhu pavanoashira masoko akanaka o Umambo hwa Mwari ivona vanotanga kuda kushandisa zvavanongaro vajija. (Mabasa o Vapostori 3:​17-20) Pedhru wakadaninja Nowa kuti “mucumaeri wo ururami.” (2 Pedhru 2:5) Inga zvatapera kuvona  mu cijijo cakapera, itusu atinasi kuzviziva kuti Nowa wakakwanisa kucumaera ngo njira yakarongeka ku vandhu vese vaigara mu nyika iya Ndambi icito yaitika. Itusuvo nyamasi uno, tinodikana kucumaera vandhu vakawanda maningi, kudari zvecikwanisika mu nyika yese. Tinoita izvi paya pazvinonga zvecikwanisika, asi azvinenyi no manera atingaita kuti ticumare, itusu atizokwanisi kucumaera vandhu vese mugumo ucito waguma. Ngenyi?

6-7. Ngenyi tingananga kuti atizokwanisi kucumaera vandhu vese mugumo ucito waguma? Sananguranyi.

⁶ Rangariranyi ngo zvakanangwa ndi Jesu ngo pamusoro po basa rokucumaera. Iyena wakananga kuti “masoko akanaka o Umambo aya, anozocumaehwa pasi pese, kuti vandhu vese vamazwe.” (Mateu 24:14) Nyamasi uno ciporofita ici ciri kunasa kukwanirisika kamare. Masoko akanaka ari kuwanika mu ndimi inopindirija 1.000, cimwenizve, ngo ndava yo saiti jw.org, vandhu vakawanda pa nyika vangakwanisa kujija ngo pamusoro pa Jehovha.

⁷ Jesu wakavhunja vajiji vake kuti avacaizokwanisepi ‘kupeja kutenderera madhorobha ese’ kana kuti ivona avacaizokwanisepi kucumaera vandhu vese mugumo ucito waguma. (Mateu 10:23; 25:​31-33) Magama a Jesu anoshandavo kwatiri nyamasi uno. Zviuru no zviuru zvo vandhu zvinogara mu ndau jokuti itusu atikwanisi kucumaeremo takasujunuka. Kunja kwa zvondhozvo, pa museswa umwe nga umwe pari kubahwa vana vakawanda maningi. Ngo kudaro, itusu tinoita zvese zvatinokwanisa kuti ticumaere “vo majinja ese, vo mavhumbo ese, vo ndimi jese.” (Apokaripsi 14:6) Asi cokwadi ngocokuti itusu atizokwanisi kucumaera vandhu vese vari mu nyika mugumo ucito waguma.

8. Muvhunjo wapi ungamuka ngo manera Jehovha anozotonga vandhu kumbejiyo? (Vonanyi foto.)

⁸ Asi panomuka muvhunjo muviri iji: Tingati kudini no vandhu vaya vokuti kangaije avazowani mukana wokujija ngo pamusoro pa Jehovha dambujiko guru ricito ratanga? Jehovha no Mwana wake wiya waakagaja kuti aite rutongeso uhu, vanozotongesa kudini vandhu ava? (Johani 5:​19, 22, 27; Mabasa o Vapostori 17:31) Vhesi yakacijikira musoro uno yananga kuti Jehovha “aadi kuti vandhu vafe.” Kunja kwa zvondhozvo, iyena “anoda kuti vese vakhauye.” (2 Pedhru 3:9; 1 Timoti 2:4) Ngo zvaushoni kuziva kuti Jehovha aato atisanangurira manera aanozotonga vandhu vaya vokuti avazivi kuwana mukana wokujija ngo pamusoro pake. Zvakajeka kuti Jehovha aajizwi ecivangirijwa kuti ativhunje zvaakapera kuita no zvaanozoita.

9. Jehovha anozoitenyi kumbejiyo?

⁹ Ecishandisa Bhaibheri, Jehovha anotivhunja zviro zvimweni zvaari kuda kuzoita. Inga muezaniso, mu Bhaibheri tinoverenga kuti Jehovha anozomusa vandhu “vacizivi kururama” kana kuti vandhu vaya vokuti avazivi kumbowana mukana wokujija ngo pamusoro pa Jehovha kuti vazocinje undhu hwavo. (Mabasa o Vapostori 24:15; Ruka 23:​42, 43) Izvi zvinomusa muvhunjo umweni unosisira maningi.

10. Muvhunjo japi jimweni jingamuka?

¹⁰ Kureva kuti vese vanonga vapera kufa mukati mo dambujiko guru vanozoparajwa mbhera narini avazowanizve vetero yokuzomuswa? Bhaibheri rinonasa kujekesa kuti vandhu vanozohwisana na Jehovha vanozoparajwa pa hondo yo Armagedhoni nee avazowanizve mukana wokuzomuswa. (2 Vatesaronika 1:​6-10) Asi vandhu vamweni mukati mo dambujiko guru, kangaije vangafa ngo ndava yo mathangwe amweni, inga muezaniso, ndhendha, ukarahwa, asidhenti kana kutouraiwa ngo mundhu umweni. Pa mugariro uwu zvicinyi zvinozoitika na ivona? (Mucumaeri 9:11;  Zakaria 14:13) Kureva kuti vandhu ava vangawanika pa cikwata co vandhu “vacizivi kururama” vanozomuswa mu nyika imbza? Kunasa kunanga atiuzivi mupinguro wakona.

ZVIRO ZVATINOZIVA

11. Vandhu vanozotongwa pa hondo yo Armagedhoni, vanozotongwa mukuzwirana nenyi?

¹¹ Itusu tinoziva zviro zvimweni zvinozoitika kumbejiyo. Inga muezaniso, tinoziva kuti pa hondo yo Armagedhoni vandhu vanozotongwa mukuzwirana no zvavakaitira hama ja Kristu. (Mateu 25:40) Vaya vakabesera vokuzojwa pamwepo na Jesu Kristu vanozotongwa inga mavhuta. Cimwenizve, tinozviziva kuti vamweni vokuzojwa vanozonga vari pasi pano dambujiko guru parinozotanga, vanozotohwa basi kuti vaende kudenga pecicota mukuvo mushomani kuti hondo yo Armagedhoni itange. Zvecivoneka kuti vokuzojwa vanonga vaciri pasi pano, zvinozokwanisika kuti vandhu vamweni vakanaka vakwanise kubesera ivona nokuvabesera pa basa ravanonga veciita. (Mateu 25:​31, 32; Apokaripsi 12:17) Ngenyi zviro izvi zvinosisira?

12-13. Kangaije vandhu vamweni vanozoitenyi pavanozopera kuvona kuparajwa ko “Bhabhironiya Guru”? (Vonanyi foto.)

¹² Dambujiko guru parinozotanga, kangaije vandhu vamweni vakavona kuparajwa ko “Bhabhironiya Guru” vanozoceukija kuti Zvapupu zva Jehovha ko makore akawanda vakananga kuti izvi zvaizoitika. Kureva kuti vamweni vo vandhu ava vaizotanga kuva no rutendo kuna Jehovha?—Apokaripsi 17:5; Ezekieli 33:33.

¹³ Kudari izvi zvikaitika zvinozoticeukija zvakaitika mu nguva ja Mosi ku Ejipita. Ceukijanyi kuti cikwata co vandhu vakasiyana-siyana cakaendavo no Vaiziraeri povakabuda ku Ejipita. Zvingaita kuti vandhu ava vakatanga kuva no rutendo kuna Jehovha paya pavakavonaya Gumi ro Matambujiko ainga akanangwa ndi Mosi eciitika. (Exodo 12:38) Kudari zviro zvakaezana zvikaitikavo pakupera kuparajwa Bhabhironiya Guru, kureva kuti taizobararikavo hwiru nokuvona inga kuti azvizivi kurungama vandhu vamweni kubatana na itusu pamwepo mugumo ucito waguma? Zvakajeka kuti haiwa. Itusu tinoda kuva inga ndi Baba wedu  vokudenga vano “usizi no unyasha, vanononoka kunyangajwa, vakazara ngo rudo hucikacinji no wo cokwadi.” b—Exodo 34:6.

14-15. Kuti mundhu apone kwenda no kwenda, zvinofira ku ndau yaaigara kana mukuvo waakafa? Sananguranyi. (Nduyo 33:​4, 5)

¹⁴ Kazinji tinozwa ari wese ecinanga kudari ngo pamusoro po ukama hwake: “Zvaizova zvaushoni maningi kudari iyena akafa dambujiko guru ricito ratanga ngokuti anozowana mukana wokuzomuswa.” Mundhu paanobhuya masoko aya anonga ano mazwiro aushoni. Asi kuti mundhu awane kumbeji kucikaperi azvifiri pa mukuvo waanozofa. Jehovha ndi mutongi wakakwana, zvivaringo zvake mukuvo wese zvakarungama nokutizve zvakanaka. (Verenganyi Nduyo 33:​4, 5.) Asi tingava no cokwadi cokuti “Mutongi wo nyika yese” mukuvo wese anozoita zvakarurama.—Genesi 18:25.

¹⁵ Cimwenizve, tingaguma pa mbhejiso yokuti mundhu awane kumbeji kucikaperi azvifiri kwaanogara. Jehovha narini aacaizoparejepi zviuru no zviuru zvo vandhu kana kuzvivona inga “mbuji” ngokuti kwazvinogara akuzivi kumbocumaehwa masoko akanaka Umambo. (Mateu 25:46) Mutongi wakarurama wo nyika yese anoneseka maningi ngo pamusoro po vandhu ava kupinda itusu. Itusu atina manera okuziva kuti Jehovha anozoitisa kudini ngo pamusoro po shwiro iji mukati mo dambujiko guru. Kangaije vamweni vo vandhu ava vacino mukana wokujija ngo pamusoro pa Jehovha, nokuva  no rutendo kwaari no kutema civaringo cokuzogara ku divi rake paya paanozocenesa zina rake mu nyika yese.—Ezekieli 38:16.

16. Ngozvapi zvatinoziva ngo pamusoro pa Jehovha? (Vonanyi foto.)

¹⁶ Patinonga tecijija Bhaibheri, tinokwanisa kuvona kuti mundhu umwe nga umwe anosisira maningi kuna Jehovha. Iyena wakapa upenyu hwo Mwana wake kuti tese tiwane mukana wokuzopona no kucikaperi. (Johani 3:16) Itusu tese tinokwanisa kuzwa rudo watinokhombijihwa ndi Jehovha. (Isaia 49:15) Iyena anoziva zina ro mundhu umwe nga umwe wedu. Iyena anonasa kutiziva zvokuti nee tikafa anokwanisa kutimusa ngo manera atainga tiri cimwe nga cimwe, nokutomusijira murangariro jedu. (Mateu 10:​29-31) Itusu atidikani kukana-kana kuti Baba wedu vano rudo vanozotonga mundhu umwe nga umwe ngo njira yakakwana, yakarungama no yo unyasha.—Jakobo 2:13.

17. Ngozvapi zvatinozovona mu cijijo cinotevera?

¹⁷ Wari uno taanozwisiso imbza, taakuzwisisa kamare kuti basa ro kucumaera ngo rokukasika maningi kupinda kare. Ngenyi tingananga kudaro? Icinyi cinotindundira kuti tienderere mberi tecivangisira pa kucumaera masoko akanaka o Umambo? Mu cijijo cinotevera, tinozovona mupinguro jo muvhunjo iji.