1. Zvicinyi zvatingananga ngo pamusoro po majaha?

MAJAHA, imwimwi mungakwanisa kuita zvizinji mu ungano. Vazinji venyu vakavanga i vano simba maningi. (Mazwi Akangwara 20:29) Mungaita zvizinji kuti mubesere hama no hambzaji jenyu. Kangaije kumbejiyo mungatokwanisa kugajwa inga mubeseri wo ungano. Asi, zvingaita kuti imwimwi munojizwa inga kuti muciri mujaha kana vamweni vanomuvona inga amuna zvikwaniriso kuti muthembiwe pa kuita basa rinosisira. Pikija muciri mujaha, kuno zviro zvamungaita wari kuti mukwanise kuthembiwa no kureremejwa ngo hama no hambzaji jo mu ungano yenyu.

2. Zvicinyi zvatinozovona pa jijo iyi?

² Pa jijo iyi, tinozobhuya maningi ngo muezaniso wa Mambo Dhavhidhi. Tinozobhuyazve padoko ngo muezaniso wo majimambo maviri o Judha, Aza na Jehozafati. Tinozovona zvineso zvakasongana no vanarume vatatu ava, tovonazve kuti zvicinyi zvavakaita kuti vazvinyise. Perapo, tovona kuti majaha nyamasi uno vangajijenyi ngo muezaniso wavo.

3. Majaha angabeseresa kudini hama jaavasharuka jiri mu ungano?

³ Pikija paainga mujaha, Dhavhidhi waikwanisa kuita zviro zvaidakarihwa ngo vamweni. Zvaijeka kamare kuti iyena wainga no ushamwari wo phedo na Jehovha. Cimwenizve, wakashanda ngo simba kuti akwanise ushoni kuimba. I wakashandisa zvaaikwanisaro kuti abesere Sauri, mambo wakagajwa ndi Mwari. (1 Samueli 16:16, 23) Imwimwi muri wari mujaha, zviripo zvamunokwanisa kuita zvingabesera vamweni mu ungano yenyu? Vazinji venyu vano zvizinji zvavanokwanisa kuita. Inga muezaniso, mungakwanisa kuvona kuti vasharuka  vazinji vanodakara maningi pamunovabesera kushandisa tabhereti, foni no komputadhori javo kuti vakwanise kuita jijo yo mundhu ega kana kuzvishandisa pa musongano. Kuziva kwenyu kushandisa zvimucini izvi, kungabesera maningi hama jaavasharuka.

4. Inga ndi Dhavhidhi, ngojapi mugariro jinodikana kuva no majaha? (Vonanyi pikica yo pa kapa.)

⁴ Mu upenyu hwake hwo njiku ngo njiku, Dhavhidhi wakakhombija kuti wainga no mabasa okuita i waithembeka. Inga muezaniso, paainga mujaha, waishanda ngo simba kuti akorondhe mavhuta a babake. Iri rainga basa raidira pa ngozi kamare. Dhavhidhi wakavhunja kudari Mambo Sauri ngo pamusoro po basa rake: “Apo muranda wenyu waihavisa muxambi wa baba wake, kukavia mbondoro nokuti khamba kuti bzirume bvuta ro muxambi, inini ndaibziteverera, no kubziambira, no kubvukira bvuta pa muromo pabzo.” (1 Samueli 17:34, 35) Dhavhidhi waizviziva kuti iyena waidikana kukorondha mavhuta i no cicunge cese waidikana kurhwa kuti akwanise kumajivirira. Hama jiri majaha jingatevejera muezaniso wa Dhavhidhi ngo kushanda ngo simba kuti vakwanise kuita basa ro vakapuwa.

5. Mukuzwirana na Nduyo 25:14, ngocapi ciro cinosisira maningi cingaizwa ngo majaha?

⁵ Mujaha Dhavhidhi wainga no ushamwari wo phedo na Jehovha. Ushamwari uwu, waisisira maningi kupinda cicunge caainga naco pomwe no cikwaniriso cake co kurija arpa. Jehovha aacaengepi basi Mwari wa Dhavhidhi, asi waingavo shamwari yake yo phedo. (Verenganyi Nduyo 25:14.) Majaha, ciro cinosisira maningi camungava naco, i kuvangisa ushamwari hwenyu na Baba wenyu vo mugore. Kuita zvondhozvo, kunozomuita kuti muashire mabasa akawanda.

6. Vandhu vamweni vaivona kudini Dhavhidhi?

⁶ Cineso cimwe cakadikana kuhwisana na Dhavhidhi, ngo co kuti vandhu vamweni vaimuvona inga mundhu acikakwanisi kuita ciri cese. Inga muezaniso, Dhavhidhi paakajipira kuti ahwisane na Goriyati, Mambo Sauri wakaeja kumurembesa ngo kumuvhunja kudari: “Iwewe uri mwana mudoko.” (1 Samueli 17:31-33) Acito avhunjwa izvi ndi Mambo Sauri, hama yake kamare yainga yakamuvhunja kuti iyena aacaikwanirisa kuti aite zvondhozo. (1 Samueli 17:26-30) Asi, Jehovha aacaivona Dhavhidhi inga cimujaha cicikakwanirisi. Iyena wainasa kuziva Dhavhidhi.  I Dhavhidhi wakakwanisa kuuraya Goriyati ngokuti waithemba Jehovha, shamwari yake.—1 Samueli 17:45, 48-51.

7. Zvicinyi zvamajija ngo zvakaitika na Dhavhidhi?

⁷ Mungajijenyi ngo zvakaitikari na Dhavhidhi? Tinojija kuti tinodikana kuva vandhu vanosengerera. Zvinotora nguva yakareba maningi kuti vaya vainga varoveja kumuvona inga mwana mudoko, vatange kumuvona inga mujaha wakakura. Mungava no cokwadi co kuti Jehovha anokwanisa kuvona zvizinji zvicikakwanisi kuvoniwa ngo vandhu. Iyena anoziva kamare kuti ndimwi ani i zvicinyi zvamunokwanisa kuita. (1 Samueli 16:7) Vangisanyi ushamwari hwenyu na Jehovha. Dhavhidhi wakaita zvondhozvo ngo kuvona zviro zvakasikwa ndi Jehovha. Dhavhidhi wakanasa kuvona ngo phedo kuti zviro izvi, zvaimujijisenyi ngo pamusoro po Musiki wake. (Nduyo 8:4, 5; 139:14; VaRoma 1:20) Ciro cimweni camungaita, ngo co kukumbira Jehovha kuti amubesere. Inga muezaniso, kunanga kuti shamwari jenyu jo kucikora jinomushora ngo kuva kwenyu umwe wo Zvapupu zva Jehovha? Kudari ndizvona, kumbiranyi Jehovha kuti amubesere kuhwisana no cineso condhoco. Cimwenizve, shandisanyi mazano amunowana mu Bhaibheri no mabhuku amweni akacijikira mu Bhaibheri pomwe no mavhidhiyo. Pa vhaza imwe nga imwe yo munozovona kuti Jehovha ari kumubesera kuhwisana no zvineso zvenyu, kuthemba kwamunomuita kunoengejeka. I vamweni pavanovona kuti imwimwi munothemba Jehovha, ivona vanozomuthembavo.

8-9. Zvicinyi zvakabesera Dhavhidhi kuti avetere ngo kusengerera mbhera kuva mambo? Majaha angajijenyi ngo muezaniso wake?

⁸ Vonanyi cineso cimweni cakasongana na Dhavhidhi. Paakapera kuzojwa kuti ave mambo, iyena wakadikana kuvetera makore akawanda kuti atange kutonga inga mambo wo Judha. (1 Samueli 16:13; 2 Samueli 2:3, 4) Waro, zvicinyi zvakabesera Dhavhidhi pamukuvo uwu? Kusiyapo kugara akasuruvara kuti ngenyi aaripi kutonga, iyena wakabatikana ngo zvaaikwanisa kuita. Inga muezaniso, paainga mu nyika yo Vafiristi ecitiza mambo Sauri, wakashandisa mukana wondhowo kuti aite hondo no vavengi vo Vaiziraeri. Ngo kuita kwake kudaro, iyena wakakwanisa kujivirira Vaiziraeri ku vavengi vavo.—1 Samueli 27:1-12.

⁹ Majaha angajijenyi ngo muezaniso wa Dhavhidhi? Shandisanyi mukana wamunawo kuti mushandire hama jenyu. Vonanyi muezaniso wo mujaha anodanwa Rikardho. * Ko mukuvo wakareba, iyena waida kushanda inga piyona wo nguva jese. Asi vakuru vakananga kuti iyena wainga acikazivi kunasiririka. Kusiyapo kuramwija kana kutotama kuitisa nane, Rikardho vakazovangisira ngo kupeja nguva yakawanda ecicumaera. Iyena wakati: “Ndikasota sure, ndingakwanisa kuvona kuti ndakaita ushoni ngo kuita cinjo jaidikana. Ndakatema civaringo co kuhwiririra vese vakakhombija kudakarira no kunasa kunasirira kuitira hwiririro imwe nga imwe. Ndakakwanisa kutanga jijo yo Bhaibheri. Pondaibuda maningi mu basa ro kucumaera, kuthya kwangu kwaiperavo.” Rikardho wari ari kushanda inga piyona wo nguva jese i ari kushandazve inga mubeseri wo ungano.

10. Pa vhaza imweni, zvicinyi zvakaita Dhavhidhi acito atema civaringo cinosisira?

¹⁰ Vonanyi zvimweni zvakaitika mu upenyu hwa Dhavhidhi. Paainga ecitiza Sauri mu nyika yo Vafiristi, Dhavhidhi no vandhu vake, vakasiya mbhuri javo ku muzi, voenda ku hondo. Povainga kondhoyo, vavengi vakaviya,  votora mbhuri javo. Dhavidhi waizorangarira kuti no zvese zvaaikwanisari kuita inga muhwi wo hondo, azvicaizomunesera kuita urongwa wo kwenda kosujunura vandhu vaingaya vatohwa. Asi iyena aazivi kuita zvondhozvo. Wakapsaka Jehovha kuti amupe ndhungamiriro. Ecibesehwa ngo mupiri Abhiyatari, Dhavhidhi wakavhunjisa Jehovha kudari: “Ndinozoteverera majongoni aya here?” Jehovha wakavhunja Dhavhidhi zvaaidikana kuita no kumugondesa kuti iyena waizobudirira. (1 Samueli 30:7-10) Mungajijienyi ngo ciitiko ici?

11. Zvicinyi zvamungaita mucito matema civaringo ciri cese?

¹¹ Kumbiranyi vamweni kuti vamubesere mucito matema civaringo. Vhunjisanyi vabari venyu. Mungawanazve mazano aushoni ngo kubhuya no vakuru vaano makore akawanda vari mu cokwadi. Jehovha anothemba vanarume ava i imwimwi mugatovathembavo. Jehovha anovavona inga “bzipo” ku ungano. (VaEfeso 4:8) Munozotema zvivaringo zvaushoni, kudari mukatevejera rutendo hwavo no kupurukira ngwajo jo vanomupa. Wari ngatende tivone zvatingajija ngo muezaniso wa Mambo Aza.

12. Ngojapi mugariro jainga na Mambo Aza paakatanga kutonga?

¹² Mambo Aza paainga mujaha waijidodokesa i wainga no cicunge. Inga muezaniso, Baba wake Abhiya paavakafa, Aza wakava mambo i wakatanga kuvhisa zvithombi zvainga mu nyikemo. Cimwenizve, “wakapangira vaJuda kuti vapsake Tenji Mwari wo majibaba avo, veciteveja mupango no matongero ake.” (2 Kronike 13:23; 14:1-6) Zera Muetiyopiya wakaenda koambana no Vajudha no masoca anokwana kuita 1.000.000. Apa Aza wakapsaka besero ra Jehovha, eciti: “Tenji Mwari, apana wakaezana na imwimwi kuti mubesere vavangi no varembi. Tibeserenyi, Tenji Mwari wedu! Ndimwi wo tinogonda.” Magama aya anokhombija kamare kuti Aza waithemba kuti Jehovha waizovaponesa. Aza wakathemba Baba wake vo mugore i “Tenji Mwari wakanyisa vaEtiópia.”—2 Kronike 14:7-11.

13. Zvicinyi zvakazoitika na Aza, ngenyi?

¹³ Zvaithyisa maningi kuvona masoca anokwana kuita 1.000.000 eciienda korhwa naye. Asi ngokuti Aza waithemba Jehovha iyena wakakwanisa kubudirira. Zvinosuruvarisa ngo zvokuti, paakava no cineso cimweni  cakasiyana na ici, Aza aazivi kupsaka besero ra Jehovha. Paainga ecida kuhwiswa ndi mambo wakashata Bhaasa wo Iziraeri, Aza wakaenda kopsaka kubeswa ndi mambo wo Asiriya. Civaringo ici, cakava no muviyo wakashata maningi! Ecishandisa muporofita wake Hanani, Jehovha wakati kuna Aza: “Ngokuti makada kubeswa ndi mambo wo Síria, asi ndi Tenji Mwari wako, masoca a mambo wo Síria, anozopokonyoka mu nyara jako.” Kuvhira pondhopo Aza wakandosongana no hondo basi. (2 Kronike 16:7, 9; 1 Majimambo 15:32) Tinojijenyi?

14. Mungakhombijisa kudini kuthemba Jehovha? Mukuzwirana na 1 Timoti 4:12, ngowapi unozova muviyo ngo kuita zvondhozvo?

¹⁴ Endereranyi mberi mecijidodokesa no kuthemba Jehovha. Pomakabhabhatijwa makakhombija rutendo hwakakura maningi no kuthemba Jehovha. Jehovha wakadakara ngo kumuashira inga umwe wo mbhuri yake. Wari munodikana kwenderera mberi mecithemba Jehovha. Zvakareruka maningi kuthemba Jehovha pamunoda kutema civaringo cinosisira maningi mu upenyu. Asi tingati kudini pamunoda kutema zvivaringo zvimweni? Zvinosisira maningi kuthemba Jehovha pamunoda kutema zvivaringo, izvo zvinobatanija mabungaijo enyu, basa kana zvamunoda kuita mu upenyu. Mucathemba uzivi hwenyu. Kusiyapo zvondhozvo, psakanyi ndhungamiriro jinowanika mu Bhaibheri pa mugariro uri wese mu upenyu, perapo mozvishandisa. (Mazwi Akangwara 3:5, 6) Mukaita kudaro, munozodakajisa Jehovha i munozoreremejwa ngo vamweni mu ungano.—Verenganyi 1 Timoti 4:12.

15. Inga zvatinovona pana 2 Kronike 18:1-3; 19:2, ngocapi civaringo cakashata cakatema Mambo Jehozafati?

¹⁵ Zvokadi kamare, imwimwi amuzivi kukwana inga itusu tese i nguva jimweni munoposa. Asi zvondhozvo, azvizomuiti kuti mutame kuita zvese zvamunokwanisa pa kushandira Jehovha. Vonanyi muezaniso wa Mambo Jehozafati. Iyena wainga no mugariro muzinji jakanaka. Paainga mujaha “wakapsaka basi Mwari wa baba wake, wofamba ngo gwanja ro matongero ake.” (2 Kronike 17:4, 7) Asi nguva jimweni iyena wakatema zvivaringo zvakashata. Inga muviyo, pa vhaza imweni wakadikana kupangihwa ngo muimiriri wa Jehovha. (Verenganyi 2 Kronike  18:1-3; 19:2.) Mungajijenyi ngo ciitiko ici?

16. Mungajijenyi ngo zvakaitika no mujaha anodanwa Rajevhi?

¹⁶ Tenderanyi no kushandisa mbhangiro yamapuwa. Inga majaha mazinji, zvingaita kuti muri kunesehwa kudira Jehovha pakutanga mu upenyu hwenyu. Mucaremba. Vonanyi zvakaitika no mujaha anodanwa Rajevhi. Ecinangira mukuvo waainga muaruki, wakati: “Nguva jimweni andicaizviziva zvandaida kuita no upenyu hwangu. Inga majaha mazinji, ndaidakarira maningi kutamba bhora i ndainyowejeka maningi pondaienda kumusongano kana kocumaera.” Zvicinyi zvakabesera Rajevhi? Mukuru umweni wakanaka mwoyo, wakamupa mazano manganani. Rajevhi wakati: “Ivona vakandibesera kurangarijisisa ngo ndhungamiro inowanika pana 1 Timoti 4:8.” Rajevhi wakajidodokesa, woshandisa mbhangiro yaakapuwaro. Woeja kuvona zvaisisira maningi mu upenyu hwake. Iyena wakati: “Ndakatema civaringo co kudira Jehovha pakutanga mu upenyu hwangu.” Ngowapi wakava muviyo? Rajevhi wakati: “No papera makore mashoma no ndaashira mbhangiro iya, ndakakwanirisa kuti ndishande inga mubeseri wo ungano.”

17. Vasharuka vanovona kudini majaha ovari kushandira navo Jehovha?

¹⁷ Imwimwi majaha, vasharuka vari mu ungano yenyu vanodakara maningi ngo ‘kushandira’ kwamunoita Jehovha makabatana navo! (Sofonia 3:9) Ivona vanodakarira maningi kuvangisira kwamunoita mu basa romakapuwa. Ivona vanomuda maningi.—1 Johani 2:14.

18. Inga zvatinovona pana Mazwi Akangwara 27:11, Jehovha anovona kudini majaha anomushandira?

¹⁸ Majaha, mucadokanganwa kuti Jehovha anomuda i anomuthemba. Iyena wakananga kuti mu njiku jo kupejisira, kwaizova no cikwata co majaha aizozvipira ngo mwoyo wese. (Nduyo 110:1-3, Shanduro yeNyika Itsva) Iyena anozviziva kuti imwimwi munomuda i munoda kuita zvese kuti mumushandire. Ngo kudaro, ivanyi mundhu anosengerera. Pamunoposa, tenderanyi kujijiswa no kuashira mbhangiro, muciivona kuti iri kuvha kuna Jehovha. (Vaheberi 12:6) Shandanyi ngo simba mu basa romakapuwa. Pa zvese zvamunoita, itanyi kuti Baba wenyu vo mugore, vadade ndimwi.—Verenganyi Mazwi Akangwara 27:11.