1-2. Zvicinyi zvinoita kuti kunamata kwedu kutendehwe ndi Jehovha?

 NGOZVAPI zvamunorangarira pamunozwa gama ro kuti “kunamata.” Kangaije mungarangarira hama yakangwadama yeciita mukumbiro kuna Jehovha icito yavata. Kana mungatorangarira mbhuri yakadakara inonga yecijija Bhaibheri pamwepo.

² Muezaniso jese janangwari jiri kuvonesa vandhu vari kunamata. Waro kunanga kuti Jehovha anotendera kunamata kwavo? Iyena anozotendera kudari zvecizwirana no cidisiso cake no kuitwazve munjira yo rudo no nderemejo. Itusu tinoda maningi Jehovha tinoziva kuti iyena anofanera kunamatwa, ngo iyo ndava tinoda kuzviita munjira yakanakisisa kamare.

3. Ngozvapi zvatinozovona pamusoro uno?

³ Pamusoro uwu tinozovona kunamatwa kwaitendehwa ndi Jehovha munguva jo kare no kuvonavo zviro zvisere zvinotendehwavo ndi Jehovha pakunamata kwedu. Patinonga teciita kudaro tingatorangarira manera atingaitisa nane kunamata kwedu. Tinozovonazve mathangwe anokhombija kuti ngenyi kunamata ko cokwadi kunotiita kuti tidakare.

4. Vandhu vainamata Jehovha mu nguva yo kare, vakakhombijisa kudini ivona vaimurereja no kumuda?

⁴ Munguva jo kare vanarume vakagondeka vakadari inga Abheri, Nowa, Abhirahama na Jobe, vakakhombija kuti ivona vanoreremeja no kuda Jehovha. Vakazviitisa kudini? Ivona vaizwira Jehovha, vainga no rutendo kwaari cimwenizve vaiita mupiro kwaari. Bhaibheri arinangi kuti ngozvapi zvavaiita kamare pakunamata kwavo Jehovha. Asi zvakajeka kamare  kuti ivona vaiita zvese zvavaikwanisa kuti vakuje Jehovha. Ngo kudaro, kunamata kwavo kwaitendehwa na iyena. Pakufamba ko nguva Jehovha wakapa Mutemo Vaiziraeri ecishandisa Mosi. Mutemo iji jaipa ndhungamiriro no manera o kuti Vaiziraeri vaidikana kunamata Jehovha ngo njira yaaitendera.

5. Jesu paakapera kufa no kumuswa, Jehovha waida kuti vanamati vake vamunamate ngo njira yapi?

⁵ Jesu paakapera kufa no kumuswa, Jehovha aacaiveterazve kuti vanamati vake vaenderere mberi vecizwira Mutemo wa Mosi. (Varoma 10:4) Makristu aidikana kuzwira mutemo mupsa, “mutemo wa Kristu.” (Vagaratiya 6:2) Ivona vaidikana kuzwira “mutemo” uwu kuciripi ngo kuudira mu musoro kana kuva no munda-nda-nda ngo pamusoro po zvavanodikana kuita nozvavacikadikani kuita. Asi vaidikana kutevejera muezaniso no zviro zvaijijiswa ndi Jesu. Nyamasi uno, Makristu anoitavo zvese zvaanokwanisa kuti atevejere muezaniso wa Jesu kuti vakwanise kudakajisa Jehovha no kuwana ‘kutondhojwa.’—Mateu 11:29.

6. Muvhunjo japi jatinodikana kujiita patinonga tecijija musoro uwu?

⁶ Patinonga tecipopora divi rimwe nga rimwe ro kunamata kwedu jivhunjisenyi kudari, ‘ndiri kuenderera mberi pa divi iri here?’ Kana mungatojivhunjisazve kudari, ‘ndinodikana kuitisa nane kunamata kwandinoita Jehovha?’ Kangaije mungatodakara ngo zviya zvamuri kuita wari. Asi mungatokumbira Jehovha kuti amubesere kuvona divi ramunodikana kuitisa nane.

7. Jehovha anovona kudini mukumbiro jatinoita jecivha ngo mumwoyo?

⁷ Tinonamata Jehovha patinonga teiita mukumbiro. Bhaibheri rinoezanisa mukumbiro jedu no rubani hwainasirihwa kuti upihwe Jehovha mutebherinakeri pakufamba ko nguva muthemberi. (Nduyo 141:2) Rubani uwu wainuhwira waidakajisa maningi Jehovha. Mukuezanavo, mukumbiro jedu jinovha pasi po mwoyo ‘jinodakajisa’ Jehovha pikija tikashandisa magama akareruka. (Mazwi Akangwara 15:8; Deuteronòmio 33:10) Tinothangwe rakanaka rokutenda kuti Jehovha anodakara maningi paanozwa magama edu o rudo no okubongesera. Iyena anoda kuti timuvhunje zvineso zvedu no zviya zvatinoda. Mucito mabhuya na Jehovha ngo kuita mukumbiro zvaizova zvaushoni kamare kurangarira zvamunoda kunanga. Mukaita kudaro, munozokwanisa kupa Baba wenyu vo kudenga “rubani” unodakajisa.

8. Ngowapi mukana wakanaka watinawo kuti tisimbe Jehovha?

⁸ Tinonamata Jehovha patinonga tecimusimba. (Nduyo 34:2) Tinosimba Jehovha patinobhuya no vamweni ngo pamusoro po manera atinomuda no kushamaisika ngo mugariro jake no mabasa ake. Tinozokwanisa kuva no zvakawanda zvokunanga ngo pamusoro pa Jehovha kudari itusu tikava vandhu vanobongesera. Patinorangarira ngo pamusoro po zvese zvakanaka zvatakaitihwa ndi Jehovha tinozova no mathangwe akanaka kamare kuti timusimbe. Basa ro kucumaera rinotipa mukana wakanaka maningi wokuitira “Mwari mupiro jo kumusimba mukuvo wese. Mupiro iji, ndijona mucero jo muromo wedu.” (Vahebheru 13:15) Kudari inga tinonasa kungwarira pazviya zvatinoda kuvereketa ticito taiita mukumbiro kuna Jehovha, tinodikanavo kungwarira maningi zviro zvatinonanga kuno vaya vatinosonganavo mubasa ro kucumaera. Itusu tinoda kuti ‘mupiro jedu jo kusimba’ jive jakanaka kamare. Izvo ndizvona zvinotiita kuti tidakare maningi patinonga tecicumaera.

9. Kudari inga Vaiziraeri vokare, tinobesereka kudini ngo kuva pamusongano? Ipanyi muezaniso unovonesa manera amakabesereka ngo kuva pamusongano.

 ⁹ Tinonamata Jehovha patinonga tiri pamusongano. Vaiziraeri vokare vakavhunjwa kudari: “Rutatu pa gore, vanarume vese vanodika kuenda pambeji pa Tenji, Mwari wako, pa ndau yaanozosana.” (Deuteronòmio 16:16) Ivona vaidikana kusiya muzi javo no munda javo jicina mundhu anojingwarira. Asi Jehovha wakavagondesa kudari: “Kudari ukakhwira . . . pambeji pa Tenji Mwari wako, apana anozoemura kutora nyika yako.” (Exodo 34:24) Zvecivoneka kuti ivona vaithemba kamare Jehovha vaienda kumabuso aya makore ese. Ngokuita kwavo kudaro ivona vakabesereka munjira jakasiyana-siyana. Inga muezaniso, vakajija zvakawanda ngo pamusoro po Mutemo ja Jehovha, vakakwanisa kuvona kuti Jehovha waivaiitira zviro zvakanaka maningi no kubeserekazve ngo kuva pamwepo no vaya vanoda Jehovha. (Deuteronòmio 16:15) Itusu tinobeserekavo munjira yakafanana nyamasi uno patinosiya zviro zvimweni kuti tiviye pamusongano jo ungano. Vonanyi kuti Jehovha anodakara maningi patinoviya pamusongano takanasa kunasirira kuti tipe mupinguro jinobesera.

10. Ngenyi kuimba idivi rinosisira pakunamata kwedu?

¹⁰ Tinonamata Jehovha patinoimba ndumbo. (Nduyo 28:7 Sandujo yo Nyika Imbza, mu Cishona) Vaiziraeri vaivona kuimba inga divi rinosisira ro kunamata kwavo. Mambo Dhavhidhi wakagaja Varevhi vanokwana kuita 288 kuti vaimbe muthemberi. (1 Kronike 25:1, 6-8) Nyamasi uno, itusu tingakhombija rudo hwedu kuna Jehovha patinoimba ndumbo jinomusimba. Manera akagara izwi redu asipi ciro cinosisira maningi. Vonanyi muezaniso uwu basi. Patinobhuya “tinoshaisha kazinji,” asi atiregeri kuvereketa patinonga tiri pamusongano kana mubasa ro kucumaera. (Jakobo 3:2) Mukuezanavo, atidikani kutendera kuti kutama kukwana ko izwi redu pakuimba kutiite kuti titame kukuja Jehovha.

11. Inga zvinosananguhwa pana Nduyo 48:14, ngenyi tinodikana kupsaka nguva kuti tijije Bhaibheri inga mbhuri?

¹¹ Tinonamata Jehovha patinonga tecijija Soko rake no patinonga tecijijisa vana vedu ngo pamusoro pake. Sabudu raipa Vaiziraeri mukana wokusiya mabasa avaiita njiku no njiku kuti vabatikane pakuvangisa ushamwari hwavo na Jehovha. (Exodo 31:16, 17) Vabari vakagondeka vaishandisa mukuvo uwu kuti vajijise vana ngo pamusoro pa Jehovha no unyasha hwake. Nyamasi uno, itusu tinodikanavo kupsaka nguva kuti tiverenge no kujija Soko ra Mwari. Izvi zvinoita divi rokunamata kwedu Jehovha no kutibesera kuti tive no ushamwari wo phedo na iyena. (Nduyo 73:28) Patinojija Bhaibheri pondhopo inga mbhuri, tinobesera vana vedu kuti vavangise ushamwari hwavo na Baba vedu vano rudo vokudenga.—Verenganyi Nduyo 48:14.

12. Ngozvapi zvatinojija ngo manera aivona Jehovha vaya vakaita zviro zvainga mutebherinakeri?

¹² Tinonamata Jehovha patinonga tecivaka no kunasirira-nasirira ndau yatinonamatira. Bhaibheri rinonanga kuti basa rokuvaka tebherinakeri no kuita zviro zvainga mukati mwayo rainga ‘basa rakacena.’ (Exodo 36:1, 4, Sandujo yo Nyika Imbza, mu Cishona) Nyamasi uno, Jehovha anovonavo kuti basa rokuvaka Nyumba jo kunamatira no nyumba jimweni jinoshandiswa ngo sangano kuva basa rakacena. Hama no hambzaji jimweni jinopeja nguva jakawanda veciita mabasa aya. Itusu tinobongesera maningi ngo basa ravanoitari pakubesera Umambo hwa Mwari. Kusiyapo kubesera pa basa iri, ivona vanobatikana pabasa ro kucumaera. Vamweni  vavo vanotoshanda inga mapiyona. Vakuru vo ungano vangatokhombija kubesera kwavo basa iri rokuvaka, ngokugaja hama no hambzaji jinoshanda ngo simba kuti vave mapiyona kudari vecikwanirisa. Azvinenyi kuti tinokwanisa kana atikwanisi kuita basa iri rokuvaka, tese tingakwanisa kubesera kuti ndau iji jienderere mberi jakacena no kujinasirira-nasirira.

13. Tinodikana kuvona kudini mupiro jatinoita kuti tibesere basa ro Umambo hwa Mwari?

¹³ Tinonamata Jehovha patinonga teciita mupiro kuitira kubesera basa ro Umambo hwa Mwari. Vaiziraeri avacaidikana kuenda pamberi pa Jehovha vacina ciro munyara. (Deuteronòmio 16:16) Ivona vaidikana kuviisa zviri zvese mukuzwirana no mugariro wavo. Ngo kuita kudaro, ivona vaizobongesera Jehovha ngo nasiriro yese yaaingari eciita kuti vabesereke kudivi ro umwari. Waro itusu tingakhombijisa kudini rudo hwedu kuna Jehovha no kubongesera ngo nasiriro yese yatinoashira kudivi ro umwari? Njira imwe ngo yokubesera ungano yedu ngo kuita mupiro no kubesera basa ro pasi pese kudari mugariro wedu wecitenderaya. Mupostori Pauro wakananga kudari: “Mwari anoashira cipo cinoithwa ngo mwoyo wese, ngokuti iyena anovetera kuti mundhu apekeje zvaanazvo, kuciripi zvaacina.” (2 Vakorinte 8:4, 12) Jehovha anoreremeja mupiro jatinoita jecivha ngo mumwoyo, azvinenyi kuti yakawanda kana kuti haiwa.—Marko 12:42-44; 2 Vakorinte 9:7.

14. Mukuzwirana na Mazwi Akangwara 19:17, Jehovha anovona kudini besero ratinopa hama no hambzaji jedu?

¹⁴ Tinonamata Jehovha patinobesera Makristu doni anoda besero. Jehovha wakagondesa kukomborera Vaiziraeri vaipa zvavanazvo kuno varombo. (Deuteronòmio 15:7, 10) Hina, pavhaza jese jatinobesera Mukristu doni anoda besero, Jehovha anozvivona inga tiri kupa iyena. (Verenganyi Mazwi Akangwara 19:17.) Inga muezaniso, Makristu o Kufiripi paakatumira zviro kuna Pauro paainga akasungwa iyena wakadanija zvipo izvi kuva “mupiro wakanaka . . . no unodakajisa Mwari.” (Vafiripi 4:18) Amborangariranyi ngo vaya vari mu ungano mwenyu perapo mojivhunjisa kudari, ‘aripo mundhu wandingabesera?’ Jehovha anodakara maningi paanotivona tecishandisa nguva yedu, simba, zvatinokwanisa no zvatinazvo kudivi ro kunyama kuti tibesere vaya vanoda besero. Iyena anozvivona inga divi rokunamata kwedu.—Jakobo 1:27.

15. Kunamata ko cokwadi kunoda kuti tipeje nguva yakawanda no kuvangisira. Asi ngenyi asipi mutoro?

¹⁵ Kunamata ko cokwadi kunoda nguva no kuvangisira. Asi asipi muthwaro. (1 Johani 5:3) Ngenyi? Ngo kuti itusu tinonamata Jehovha ngo kuti tinomuda. Amborangariranyi ngo mwana anoda kupa cipo baba wake. Iyena waizopeja nguva yakawanda eciita dhezenyo kuti apekeje baba wake. Asi mwana uwu aacaizorangarira kuti ndiri kupeja nguva yakawanda maningi. Iyena anoda maningi baba wake, anodakara ngo kuda kuvapa cipo ici. Mukuezanavo, zvecivoneka kuti itusu tinoda maningi Jehovha tinodakara maningi ngo kushandisa nguva yakawanda no kuvangisira kuti tibatikane pakunamata ko cokwadi.

16. Mukuzwirana na Vahebheru 6:10, Jehovha anovona kudini kuvangisira kwatiri kuita kuti timudakajise?

¹⁶ Vabari vanorudo avaveteri kuashira cipo cakafanana kuvha kuvana vese. Ivona vanozwisisa kuti mwana umwe nga umwe vakasiyana pomwe no mugariro jakasiyana. Mukuezanavo, Baba wedu vokudenga vanozwisisa mugariro wo mundhu umwe nga umwe.  Kangaije imwimwi mungakwanisa kuita zviro zvizinji kupinda vaya vamunoziva no vamunoda. Kana imwimwi mungatokonehwa kuita zvizinji zvinokoniwa ngo vamweni. Kangaije ngo ndava yo makore enyu, uhomi hwenyu kana mabasa amunawo pa mbhuri. Pikija zvakadaro mucadoremba. (Vagaratiya 6:4) Jehovha aazokanganwi basa renyu. Kudari muri kuita zvese zvamunokwanisa no thangwe rakanaka iyena anozodakara. (Verenganyi Vahebheru 6:10.) Jehovha anokwanisa kuvona zviri mumwoyo wenyu. Iyena anoda kuti mudakare no kudakajihwa ngo manera amunomunamata.

17. (a) Ngozvapi zvatingaita kudari tikavona kuti tiri kunesehwa kushandisa zviro zvataperari kubhuya? (b) Mabesereka kudini ngo zviro zvanangwa mu bhokiso rinoti “ Engejeranyi Mudakaro Wenyu”?

¹⁷ Waro ngozvapi zvatingaita kudari tikavona zvecinesa kuita zvimwe zvo zviro zvataperari kubhuya zvakadari inga kujija Bhaibheri kana kucumaera? Patinovangisira kuti tiite zviro izvi ko vhaza jakawanda, kangaije tinozovona kuti tinodakajihwa maningi no kubesereka ndizvona. Tingatoezanisa kunamata kwedu no mabasa amweni akadari inga kudamura-damura muviri no kueja kurija zviri zvese. Kudari tikazviita ko vhaza nganani basi, tinozovona kuti atibudiriri ushoni mudivi iri. Asi tikazviita njiku jese tinozovona kuti tinobudirira kamare. Tingatotanga kuzviita kashomani pa njiku, asi pakufamba ko nguva toengejera padoko ngo padoko. Patinovona muviyo jinovepo ngo vangisira kwedu, tinotogara tecirangarira nguva yokuita zvondhozvo no kudakajihwa ndizvona. Makwanisa kuvona kuti tingashandisa kudini muezaniso uwu pakunamata kwedu?

18. Ngocapi ciro cinosisira maningi catinodikana kuita, ngo wapi unozova muviyo?

¹⁸ Kuita zvese zvatinokwanisa kuti tinamate Jehovha iciro cinosisira maningi catingaita mu upenyu. Kudari tikaita kudaro tinova no upenyu unodakajisa no unorevo. Perapo tinovazve no vetero yokuzonamata Jehovha kwenda no kwenda. (Mazwi Akangwara 10:22) Tinovazve no runyararo ngo kuziva kuti Jehovha anobesera vanamati vake vanosongana no zvineso. (Isaia 41:9, 10) Tinothangwe rakanaka rokudakara patinonga tecinamata Baba wedu vano rudo, avo vanofanera ‘kureremejwa, kukujwa no kuva no simba, ngokuti vakasika zviro zvese.’—Apokaripsi 4:11.