1. Ngoapi masoko o ciporofita a Isaya kuno Vaiziraeri?

 MUPOROFETA Isaya wakasanangura Jehovha ngo njira iyi, “Mwari wo cokwadi.” Gama rokuti “cokwadi,” rikasandujwa rinoreva kuti “ameni.” (Isaia 65:16) Ameni zvinoreva kuti “ngazviitike kudaro” kana kuti ngo “zvokadi.” Parinoshandiswa gama rokuti “ameni” mu Bhaibheri recinangira kuti Jehovha kana kuti Jesu Kristu, rinonga recikhohwesa kuti zvirozvo ngozvokadi. Ciporofeta ca Isaya kuno Vaiziraeri cokuti zvinonanga Jehovha mukuvo wese zvinothembeka, cainga cakajeka. Jehovha ari kuita izvi no kukwanirisa cigondiso cimwe nga cimwe.

2. Ngenyi tingathemba zvigondiso zva Jehovha kuitira kumbeji, muvhunjo japi jatinozodavira pa cijijo cino?

² Tingathembadi kamare kuti zvigondiso zva Jehovha zvaanogondesari nyamasi uno ngo pamusoro po kumbeji, zvinozoitikadi? Pa makore anokhwedera kuita 800 pakupera ko mukuvo wa Isaya, mupostori Pauro wakasanangura kuti ngenyi zvigondiso zva Jehovha zvinothembeka mukuvo wese. Iyena wakati: ‘Mwari [narini] aazonyepi.’ (Vahebheru 6:18) Kudari inga cinyuke, icona acibudisi kumwa inotapira no kumwa ino munyu. Ndizvonavo zvondhozvo na Jehovha Cinyuke co cokwadi, iyena aavereketi manyepo. Ngo kudaro, tingathemba zvigondiso zvese zvinobhuiwa na Jehovha mukuperera kubatanijavo no zvaanogondesa ngo pamusoro po kumbeji. Mu cijijo cino, tinozovona muvhunjo iji: Jehovha anogondesenyi kuitira kumbeji? Ngozvapi zvinotithembesa kuti zvigondiso zva Jehovha zvinozokwanirisikadi?

3. (a) Ngocapi cigondiso ca Mwari cinosisira maningi kwatiri? (Apokaripsi 21:3, 4) (b) Ngoapi mazwiro o vamweni patinobhuya ngo pamusoro po cigondiso ici?

³ Cigondiso catinoda kuvona apa cinodiwa maningi ngo vashandiri va Mwari vo mu nyika yese. (Verenganyi Apokaripsi 21:3, 4.) Jehovha anogondesa mukuvo wokuti “akucazovizve no kufa, kusuruvara, kucema no kuhwajihwa.” Vazinji vedu tinoshandisa vhesi iyi inodakajisa ngo pamusoro po upenyu mu nyika imbza patinocumaera vamweni. Vandhu vamweni vanojizwa kudini patinobhuya navo ngo pamusoro po cigondiso ici? Ivona vangananga kudari: “Zviro izvi zvinoshamaisa maningi, inini andizvithembi kuti zvinozoitikadi.”

4. (a) Jehovha paakagondesa ngo pamusoro po Paradhiso, ngozvapi zvaaiziva kuti zvaizoitika? (b) Kusiyapo basi kugondesa, ngozvapi zvimweni zvaakazoitazve?

⁴ Zvakajeka kuti Jehovha paakafemera mupostori Johani kuti atare cigondiso ici ngo pamusoro po upenyu mu Paradhiso, Jehovha waizviziva kuti taizobhuya no vamweni ngo pamusoro po vetero iyi patinonga tecicumaera masoko akanaka o Umambo. Jehovha waizvizivazve kuti zvaizonesera vazinji kuti vathembe cigondiso ici co “zviro zvipsa.” (Isaia 42:9; 60:2; 2 Vakorinte 4:3, 4) Wari tingaitisa kudini kuti tibesere vamweni kuti vathembe zvigondiso zvinonangwa mu bhuku ra Apokaripsi 21:3, 4 kuti zvinozoitikadi? Itusuvo tingaitisa kudini kuti tienderere mberi tecizvithemba? Jehovha wakatipa mathangwe angatiita kuti itusu tithembe zvigondiso izvi. Waro ngoapi mathangwe akona?

5. Ngojapi vhesi jingatibesera kuthemba zvigondiso zva Jehovha ngo pamusoro po Paradhiso, vhesijo jinonangenyi?

⁵ Pa vhesi jinotevera tinowana mathangwe anotiita kuti tithembe cigondiso ca Jehovha co nyika imbza. Bhaibheri rinonanga kudari: “Wiya waigara pacigaro co umambo, wakati: Vonai! Ndiri kuita kuti zviro zvese zviite zvipsa. Wakatizve: Tarai. Ngokuti masoko aya anogondeka no ocokwadi. Iyena wakandivhunjazve kuti: Zvaitika! Inini ndiri Arfa na Omega, okutanga no wokupejisira.”—Apokaripsi 21:5, 6a.

6. Ngenyi zvigondiso zvinowanika pana Apokaripsi 21:5, 6, zvinovangisa kuthemba kwedu cigondiso ca Jehovha?

⁶ Ngenyi vhesi iji jinovangisa kuthemba kwedu zvigondiso zva Mwari? Bhuku rinozwi Zvakazarurwa—Mugumo Wazvo Une Mbiri Wava Pedyo! rinonanga kudari ngo pamusoro po mavhesi aya: “Zvakaita inga kuti ndi Jehovha kamare wasainira vashandiri vake vakagondeka cigondiso ici, zvecirevera makomborero o kumbeji.” b Bhuku ra Apokaripsi 21:3, 4, rinotivhunja zvakagondeswa ndi Jehovha. Asi mavhesi 5 na 6 tingati mondhomo, tinowana cidhindo ca Jehovha cokuti zvigondiso zva Jehovha zvinozokwanirisika. Wari ngatende tivone kuti Jehovha anotivangisa kudini kuti timuthembe.

7. Ngoani magama atinowana pa vhesi ya 5, ngenyi iwona anosisira?

⁷ Pakutanga ko vhesi Mwari anotithembesa kudari: “Wiya waigara pacigaro co umambo, wakati.” (Apokaripsi 21:5a) Magama aya anosisira maningi ngokuti Jehovha wakamananga mu bhuku ra Apokaripsi ko vhaza jinokwana kuita ndhatu. Wakathembesa masoko aya asipi ngirozi nee asipi Jesu asi ndiyena Jehovha kamare. Izvi zvinotikhohwesa kamare kuti itusu tingathemba kamare masoko amweni anonangwa pa vhesi 5. Kuitisa kudini? Ngokuti ‘Jehovha aanyepi.’ (Tito 1:2) Ngo kudaro, tinonasa kuthemba kamare magama atinowana mu bhuku ra Apokaripsi 21:5, 6.

8. Ngorapi gama rinoshandiswa ndi Jehovha rinovonesa kuti zvigondiso zvake zvinozokwanirisika? (Isaia 46:10)

⁸ Gama rinotevera rinonangwa ndi Jehovha ngorokuti: “Vonai!” (Apokaripsi 21:5) Gama ro Cigiriki rakasandujwa rokuti “vonai!” rinonangwa ko vhaza jakawanda mu bhuku ra Apokaripsi. Bhuku rimweni rinosanangura kuti gama iri rokuti vonai rinoshandiswa kuitira “kungwaja muverengi kuti anase kuteya njeve pazviro zvinotevera.” Ngozvapizve zvimweni zvakazonanga Mwari? Iyena wakazoti: “Ndiri kuita kuti zviro zvese zviite zvipsa.” Jehovha anozoita cinjo kumbejiyo, iyena ano cokwadi cese kuti anozokwanirisa zvaakagondesa. Cimwenizve, ari kunanga inga kuti cinjo iji watopera kujiita.—Verenganyi Isaia 46:10.

9. (a) Magama okuti “ndiri kuita kuti zviro zvese zviite zvipsa,” anorevenyi? (b) Zvicinyi zvinozoitika no “Denga” no “pasi” zva nyamasi uno?

⁹ Ngatende tivone magama anowanika pana Apokaripsi 21:5: “Ndiri kuita kuti zviro zvese zviite zvipsa.” Mu cipauko ici, Jehovha wainangira zviro zvinokwana kuita zviviri. Cokutanga, iyena anozoparaja nyika ino. Cocipiri, iyena anozoviisa nyika imbza. Jehovha anozoitisa kudini kuti aviise nyika imbza? Mu bhuku ra Apokaripsi 21:1, tinoverenga kudari: “Denga rokare no pasi pokare zvainga zvapera.” “Denga ro kare,” rinoimirira utongi wa nyamasi uno unotungamirihwa ndi Sathana no madhimoni ake. (Mateu 4:8, 9; 1 Johani 5:19) Gama rokuti “pasi” mu Bhaibheri, rinorevera vandhu vanorarama pasi pano. (Genesi 11:1; Nduyo 96:1) “Pasi pokare” panoimirira vandhu vakashata. Jehovha aazoeji kuitisa nane asi anozoparaja mukuperera kamare. Pa ndau pazvo, iyena anozoviisa “denga ibza no pasi papsa,” kana kuti utongi upsa unozotonga vandhu vakanaka.

10. Jehovha anozoitisa kudini kuti aite zviro zvese zvipsa?

¹⁰ Pana Apokaripsi 21:5, itusu tinoverenga zviro zvipsa zvinozoithwa ndi Jehovha. Vonanyi kuti Jehovha aazivi kunanga kuti: “ari kuita kuti zviro zvese zviite zvipsa.” Asi iyena wakakhohwesa kamare kuti: “Ari kuita kuti zviro zvese zviite zvipsa.” Jehovha anozoita nyika imbza no kuita kuti vandhu vave vakakwana. Inga zvinonangwa pa ciporofita ca Isaya, Jehovha anozoita kuti nyika ino ive yakaseja inga munda wo Edheni. Iyena anozoita kuti itusu tive vapsa nokurapa umwe nga umwe wedu mukuperera kamare. Vakaremara vanozophuka, njeve jo vanomandondo jinozofununguka, majiso o mapofu anozofununguka, cimwenizve vakafa vanozomuswa.—Isaia 25:8; 35:1-7.

11. Jehovha wakakumbira Johani kuti aitenyi, ngorapi thangwe raakamupa kuti azviite?

¹¹ Ngozvapi zvimweni zvakanangwa ndi Mwari kuti atigondese kuti itusu tingamuthemba? Jehovha wakavhunja Johani kudari: “Tarai. Ngokuti masoko aya anogondeka no ocokwadi.” (Apokaripsi 21:5) Jehovha kusiyapo basi kumuvhunja kuti “atare” iyena wakamuvangisa kuti azviite. Iyenazve wakamupa thangwe. Iyena wakati: “Ngokuti masoko aya anogondeka no ocokwadi,” izvi zvinovonesa kuti magama a Jehovha anothembeka. Tinobongesera maningi Johani ngo kuzwira zvakanangwa ndi Mwari “otara.” Inga muviyo, tinokwanisa kuverenga ngo pamusoro po cigondiso ca Mwari co Paradhiso no kurangarijisisa ngo pamusoro po makomborero anoshamaisa atiri kuvetera.

12. Ngenyi Jehovha wakananga kuti: “Zvaitika!?”

¹² Ngozvapizve zvakananga Mwari? “Zvaitika.” (Apokaripsi 21:6) Wari Jehovha ari kunanga  inga kuti zvese zvanangwa ngo pamusoro po Paradhiso yatakagondeswa inga zvapera kukwanirisika. Jehovha anobhuya no cokwadi cese ngokuti apana cingaphinga cidisiso cake. Iyena wakatipekeja ciro cimweni cinotikhohwesa kuti zvigondiso zvake zvinozokwanirisikadi. Kuitisa kudini?

13. Ngenyi Jehovha wakananga kuti: “Inini ndiri Arfa na Omega”?

¹³ Inga zvabhuiwa mu ndima japerari, Jehovha pacake wakazvinanga ko vhaza jinokwana kuita ndhatu mu zvivoniso zva Johani. (Apokaripsi 1:8; 21:5, 6; 22:13) Ku vhaza jese Jehovha wainanga magama akafanana. “Inini Ndini Arfa na Omega.” Mu abhesedhari yo Vagiriki, Arfa ndi retera yokutanga omega ndi retera yokupejisira. Tecishandisa matahwa okuti “Arfa na Omega,” Jehovha anonga ecikhombija kuti zvaanotangisa anozozviita mukuperera.

14. (a) Ndirini Jehovha wakananga kuti “Arfa” nokutizve ndirini Jehovha anozonanga kuti “Omega.” (b) Ngocapi cigondiso catinowana mu bhuku ra Genesi 2:1-3?

¹⁴ Jehovha pakupera kusika Adhamu na Evha, iyena wakakhombija kamare kuti ngocapi cainga cidisiso cake kuno vandhu no nyika. Bhaibheri rinonanga kudari: “Mwari wakavakomborera wovavhunja kudari: Barananyi muwande, muzaje nyika no kuitonga.” (Genesi 1:28) Pamukuvo wondhowo, ngo ciito, Jehovha wakati: “Arfa.” Iyena wakanasa kujekesa cidisiso cake paakati: Waizoguma mukuvo wokuti mubarihwana wakakwana wa Adhamu na Evha vaizozaja nyika no kuicinja yova Paradhiso. Pamukuvo wo zvinozoitika izvi, Jehovha anonga ananga kuti “Omega.” Jehovha paakapera kusika “pasi pano no zvese zvirimo” iyena wakatipa cigondiso cinowanika pana Genesi 2:1-3. (Verenganyi.) Jehovha wakananga kuti njiku yocinomwe yainga yakaceneswa. Izvi zvinorevenyi? Izvi zvinotivonesa  kuti Jehovha anozokwanirisa cidisiso cake kuno vandhu no nyika pa njiku yocinomwe.

15. Ngenyi Sathana wakarangarira kuti waizokwanisa kuphingaija cidisiso ca Jehovha?

¹⁵ Adhamu na Evha, pavakapera kupandukira Jehovha ivona vakava vashaishi. Cimwenizve, vakaita kuti mubarihwana wavo ugare utaka wo cishaishi no rufu. (Varoma 5:12) Kangaije zvaizodari inga kuti Sathana waphingaija cidisiso ca Jehovha cokuzaja nyika no pasi ngo vandhu vakakwana no vanozwira. Izvi zvaizodari inga kuti Jehovha aacaizokwanirisa cidisiso cake no kunanga kuti “Omega.” Kangaije Sathana waizorangarira kuti Jehovha aacaizokwanirisepi cidisiso cake. Kangaije iyena wairangarirazve kuti Jehovha waizoparaja Adhamu na Evha ciripo-ripoco, nokuumba varovorani vamweni vakakwana kuti akwanirise cidisiso cake kuno vandhu. Kudari Jehovha naakaita izvi Sathana waizopumbha Jehovha kuti ndi munyepi. Ngenyi? Mukuzwirana na Genesi 1:28, Jehovha wakavhunja Adhamu na Evha kuti vana vavo vaizozaja nyika ino.

16. Ngenyi Sathana kangaije waizopumbha Jehovha kuti wakarembejeka?

¹⁶ Ngoapi mavonero amweni aizova na Sathana aaivona kuti Mwari waizokheta kuita? Kangaije Sathana wairangarira kuti Jehovha waizotendera kuti Adhamu na Evha vave no vana vokuti narini avacaizovepi vakakwana. (Mucumaeri 7:20; Varoma 3:23) Pamugariro wakadari, apana kukana-kana kuti Sathana waizopumbha Jehovha kuti wakarembejeka. Ngenyi? Ngokuti cidisiso ca Jehovha cokuti Paradhiso ive yakazara no vandhu vanozwira no vakakwana acicaizokwanirisika.

17. Jehovha wakatongesa kudini kupandukira kwakaita Sathana, Adhamu na Evha nokutizve ngozvapi zvinozoitika pakupejisira? (Vonanyi foto.)

¹⁷ Narini Sathana acaizokwanisepi kurangarira zviro zvaizoithwa ndi Jehovha. Jehovha wakatonga shwiro iyi mu njira yakakwana kuti akwanirise cidisiso cake. (Nduyo 92:5) Jehovha wakatendera kuti Adhamu na Evha vave no vana. Mu njira iyi, wakavonesa kuti iyena asipi munyepi, iyena waizoita kuti kubahwe mwana waizosujunura “mubarihwana” unozwira wa Adhamu na Evha kuti akwanirise cidisiso cake. (Genesi 3:15; 22:18) Mu njira iyi Jehovha aacaizopumbhwa kuti wakarembejeka. Mwana wakabahwari waizopira upenyu hwake kuti aponese vandhu. Sathana aazivi kumborangarira zvairangarihwari ndi Jehovha. Ngenyi? Ngokuti izvi zvakacijikira  pa rudo ucikapimiki wa Jehovha. (Mateu 20:28; Johani 3:16) Mugariro uwu wo rudo auiti divi pa mugariro wo umbau wa Sathana. Waro ngozvapi zvinozoitika ngo ndava yo muripo? Ngo kudaro, kumbhiri ko ciuru co makore mubarihwana unozwira no wakakwana wa Adhamu na Evha, unozozaja nyika inga zvainga zvakanangwa ndi Jehovha kuti zvaizoitika. Pamukuvo uwu, zvinozodari inga kuti Jehovha wananga kuti “Omega.”

18. Ngozvapi zviro zvitatu zvinotithembesa Jehovha? (Vonanyi bhokiso rinoti: “ Mathangwe Matatu Kuti Tithembe Cigondiso ca Jehovha.”)

¹⁸ Mu cijijo ici, itusu takwanisa kuvona zviro zakawanda zvinotikhohwesa kuti nyika inozova Paradhiso. Waro tinganangenyi kuna vaya vanokana-kana kuti zvinozoitikadi? Cokutanga, ndi Jehovha wakatigondesa. Bhuku ra Apokaripsi rinoti: “Wiya waigara pacigaro co umambo, wakati: Vonai! Ndiri kuita kuti zviro zvese zviite zvipsa.” Jehovha ano uzivi, cido no simba rokukwanirisa zviya zvaakagondesa. Cocipiri, mu mavonero a Jehovha ku zviro zvaakagondesa, zvakadari inga kuti zvakwanirisika. Ndiyo ndava iyena wakati: “Masoko aya anogondeka no ocokwadi . . . Zvaitika!” Cocitatu, akuna cingaphinga zvakatangiswa ndi Jehovha, ngo iro thangwe iyena wakati: “Inini ndiri Arfa na Omega.” Pakupejisira, zvinozovoneka kamare kuti asipi Jehovha asi ndi Sathana munyepi no wakarembejeka.

19. Kudari vandhu vakatama kutendera cigondiso co Paradhiso, imwimwi maizoitenyi?

¹⁹ Ceukijanyi kuti pamunonga muri mu basa rokucumaera mecibhuya no mundhu ngo pamusoro po zvigondiso zva Mwari, imwimwivo munonga mecivangisa kuthemba kwenyu ku zvigondiso zva Jehovha. Ngatiti imwimwi maverenga bhuku ra Apokaripsi 21:4, rinobhuya ngo pamusoro po vetero inoshamaisa yo Paradhiso, mundhu omuvhunja kudari: “Izvi azvizoitiki.” Imwimwi maizoitenyi? Maizokwanisa kuverenga naye vhesi ya 5 na 6? Khombijanyi kuti Mwari anozozviitisa kudini pamunonga mecibhuya no mundhuwo no kumukhombija kuti Jehovha anozokwanirisa kudini zvigondiso zvake.—Isaia 65:16.