1-2. Ngenyi tinorangarira kuti Jehovha aaripi kudavira mukumbiro jedu?

 “DAKARAI ndi Tenji Mwari, yena anozoita bzo unoda mwoyo wako.” (Nduyo 37:4) Ici ndi cigondiso cinoshamaisa. Kureva kuti tingavetera kuti Jehovha atipe zvatinokumbira pamukuvo wondhowo? Ngenyi tingajivhunjisa kudaro? Rangariranyi mugariro jinoteverari basi. Hambzaji icizivi kurovohwa inoita mukumbiro kuna Jehovha kuti iende Kucikora co Vavhangeri vo Umambo. Makore mazinji anodarika iyona icizivi kukokwa. Hama imweni iri mujaha inoita mukumbiro yecikumbira besero kuti iite nane pa ndhendha inonesa maningi pikija no zvakadaro, iyona airipi kuita nane. Vabari vo hama imweni iri mujaha vanoita mukumbiro kuti mwana wavo aenderere mberi ari mucokwadi. Asi pakupejisira mwana wiya anozosana kusiya kushandira Jehovha.

² Kangaije imwimwi makamboita mukumbiro mecikumbira ciri cese asi mbhera wari amuto maciashira. Ngo ndava yazvo, kangaije mazwisisa kuti Jehovha anopingura mukumbiro jo vamweni haiwa jenyu. Kana matanga kurangarira kuti maita zviri zvese zvakashata. Hambzaji imweni inodanijwa Janise b yakajizwavo kudaro. Ivona no mwamuna wavo vaaita mukumbiro ngo pamusoro po cido cavo cokuda kushandira pa Bheteri. Ivona vakati: “Inini ndainga no cokwadi cokuti taizodanijwa kuti tiende koshanda ku Bheteri.” Kwakadarika mukuvo, mweji mbhera makore, ivona avazivi kudanijwa kuti vaende koshanda ku Bheteri. Hambzaji Janise vakati: “Ndakacamwa no kubararika hwiru. Ndaigara ndecirangarira kuti kangaije ndakashaishira Jehovha. Ndakaita mukumbiro ndecinanga kamare kuti ngocapi cainga cineso cangu. Waro ngenyi iyena aazivi kundidavira?”

3. Ngozvapi zvatinozovona pa jijo iyi?

³ Njiku jimweni tingatojivhunjisa kuti Jehovha ari kuzwadi  mukumbiro jedu kana kuti haiwa. Vanarume vakagondeka vokare vaitonesekavo ngo pamusoro pazvo. (Jobe 30:20; Nduyo 22:2; Abhakuki 1:2) Ngozvapi zvinomuvangisa kuti Jehovha anozodavira mukumbiro jenyu? (Nduyo 65:2) Kuti tinase kuvona mupinguro wo muvhunjo uwu ngatitange ngo kudavira muvhunjo jinoteverari: Wokutanga, ngozvapi zvatingavetera zvecivha kuna Jehovha? Wocipiri, Jehovha anoveterenyi kwatiri? Wocitatu, ngozvapi zvatingaita kuti tiitise nane mukumbiro jedu?

4. Mukuzwirana na Jeremia 29:12, ngozvapi Jehovha zvaanogondesa kuita?

⁴ Jehovha anogondesa kuti anozodavira mukumbiro jedu. (Verenganyi Jeremia 29:12.) Jehovha anoda maningi vashandiri vake vakagondeka. Ngo iyo ndava, narini iyena aazotami kudavira mukumbiro javo. (Nduyo 10:17; 37:28) Asi atidikani kuvetera kuti Jehovha anozotipekeja zvese zvatinozomukumbira. Zviro zvimweni zvatinomukumbira tinozozviashira mu Paradhiso basi.

5. Jehovha anorangarirenyi paanozwa mukumbiro jedu? Sananguranyi.

⁵ Jehovha anovona kuti zvatinomukumbira zvinozwirana papi no cidisiso cake. (Isaia 55:8, 9) Cimwe co cidisiso cake ngo cokuti nyika izare ngo vandhu vakadakara no vakabatana vecitongwa ngo Umambo hwake. Asi Sathana wakananga kuti vandhu vaizodakara kudari vakatongana ngocavo. (Genesi 3:1-5) Kuti akhombije kuti Sathana wainga ecinanga zvokunyepa, Jehovha wakatendera kuti utongi hwo vandhu hwuwanike nyamasi uno. Zvineso zvimweni zvatinosongana nazvo nyamasi uno zvinoitiswa ngo utongi hwo vandhu. (Mucumaeri 8:9) Itusu tinozviziva kuti Jehovha aazopeji zvineso izvi nyamasi uno. Kudari Jehovha naakaita izvi, vandhu vaizorangarira kuti utongi hwo vandhu hwuri kukwanisa kupeja zvinesozvo.

6. Ngenyi mukuvo wese tinodikana kuva no cokwadi cokuti Jehovha anoita zviro ngo njira yo rudo no yakarungama?

⁶ Jehovha anodavira mukumbiro jakaezana mu njira jakasiyana. Inga muezaniso, Mambo Ezekiya paakahwaja wakakumbira Jehovha kuti amurape. Jehovha wakazviita. (2 Majimambo 20:1-6) Ngo divi rimweni, mupostori Pauro paakakumbira kuti Jehovha ‘avhise muzwa mu muviri make’ kangaije ngo ndava yo zvineso zvo uhomi, Jehovha aazivi kuita zvondhozvo. (2 Vakorinte 12:7-9) Vonanyi muezaniso wo mupostori Jakobo na Pedhru. Mambo Herodhi waida kuvauraya vese. Asi ungano yakaita mukumbiro ngo pamusoro pa Pedhru kangaije na Jakobo. Ngo kudaro, Jakobo wakauraiwa asi Pedhru wakajivirihwa ngo ngirozi mu njira inoshamaisa. (Mabasa o Vapostori 12:1-11) Kangaije tingajivhunjisa kudari: ‘Waro ngenyi Jehovha wakaponesa Pedhru osiya Jakabo?’ Bhaibheri arinangi. c Cokwadi catingava naco ngo cokuti Jehovha narini aaiti “bzicikazivi kururama.” (Deuteronòmio 32:4) Itusu tinozviziva kuti Jehovha waida maningi Pedhru pamwepo na Jakobo. (Apokaripsi 21:14) Nguva jimweni Jehovha angadavira mukumbiro jedu mu njira jimweni jaticaivetera. Asi atikani-kani kuti Jehovha nguva jese anoita zviro ngo njira yo rudo no yakarurama. Ngo kudaro, itusu atishamaisiki ngo njira jaanoshandisa kuti adavire mukumbiro jedu.—Jobe 33:13.

7. Ngozvapi zvaticikadikani kuita, ngenyi?

⁷ Itusu atidi kuezanisa mugariro wedu no jo vamweni. Inga muezaniso, itusu tingakumbira Jehovha kuti atibesere pa mugariro uri wese. Asi mukumbiro wedu audavihwi.  Pakufamba ko nguva, tinozozwisisa kuti ari wese waita mukumbiro wakaezana no wedu, Jehovha oudavira. Hambzaji imweni inodanijwa Ana yakasonganavo no mugariro wondhowo. Ivona vakaita mukumbiro kuna Jehovha kuti Jehovha arape mwamuna wavo Mateu uwo wainga no ndhendha yo Kanseri. Pamukuvo umwewo, hambzaji mbiri jainga vasharuka jaihwisanavo no ndhendha yondhoyo yo Kanseri. Hambzaji Ana vakaita maningi mukumbiro ngo pamusoro po mwamuna wavo pomwe no hambzaji mbiri jiya. Hambzaji mbiri jiya jakaita nane asi mwamuna wavo Mateu wakatamika. Pakutanga hambzaji Ana vakarangarira kudari, hambzaji jiya jakaita nane ngokuti Jehovha wakajibesera. Kudari Jehovha wakaita izvi kuno hambzaji iji, ngenyi aazivi kuzviitavo kuno mwamuna wangu? Zvakajeka kuti itusu atidikani kunanga kuti ngenyi hambzaji iji jakaita nane. Catinoziva ngo cokuti Jehovha ano mbhejiso yaushoni ngo pamusoro po matambujiko edu nokutizve iyena anocidaka-daka cokumusa vashandiri vake vakafa.—Jobe 14:15.

8. (a) Mukuzwirana na Isaia 43:2, Jehovha anotibeseresa kudini? (b) Mukumbiro jinotibesera kudini patinohwisana no zvineso? (Vonanyi vhidhiyo ino musoro unoti: Mukumbiro Unotibesera Kunyisa.)

⁸ Mukuvo wese Jehovha anozova ku divi redu. Inga Baba wedu vano rudo, Jehovha aadakariri kutivona tecitambujika. (Isaia 63:9) Pikija zvakadaro, iyena aaiti kuti titame kusongana no zvineso zvinonesa mu upenyu hwedu, zvingaezaniswa no murambo kana no murazvu. (Verenganyi Isaia 43:2.) Ngo kudaro, iyena anotigondesa kutibesera ‘patinozopinda ngo mukumwa.’ Jehovha aazotenderi kuti zvineso zvedu zvigare kwenda no kwenda. Kusiyapo zvondhozvo, Jehovha anozotipekeja mujimu wake mucena kuti uzotibesere kuti tienderere mberi tecicungirira. (Ruka 11:13; Vafiripi 4:13) Ngo iyo ndava, tingava no cokwadi cokuti tinozova no zvese zvatinoda kuti ticungirire no kuramba takagondeka kuna Jehovha. d

9. Mukuzwirana na Jakobo 1:6, 7, ngenyi tingathemba kuti Jehovha anozotibesera?

⁹ Jehovha anovetera kuti timuthembe. (Vahebheru 11:6) Nguva jimweni itusu tingavona kuti zvineso zvedu zvinganesa maningi kucungirira. Mukuvo umweni tingatanga kukana-kana kuti Jehovha anozotibeseradi kana kuti haiwa. Asi Bhaibheri rinonanga kuti simba ra Mwari ringatiita kuti ‘tikhwire matundhu.’ (Nduyo 18:29, Sandujo yo Nyika Imbza.) Ngo kudaro, kusiyapo kugara tecikana-kana kuti Jehovha anotibesera, tinodikana kuita mukumbiro no rutendo wakavanga wo kuti iyena anozodavira mukumbiro jedu.—Verenganyi Jakobo 1:6, 7.

10. Ipanyi muezaniso unovonesa kuti tinodikana kuita mukuzwirana no mukumbiro jedu.

¹⁰ Jehovha anovetera kuti tiite mukuzwirana no mukumbiro jedu. Inga muezaniso, hama ingakumbira besero Jehovha kuti aibesere kuti iende kobhuya na patarau wayo kuti ipuwe feriya kuti iende kovona gungano. Jehovha waizodavirisa kudini mukumbiro uwu? Iyena waizopekeja cicunge hama iya kuti iende kobhuya na patarau wayo. Asi hama iyi yaidikana kuita divi rayo kwenda kuna patarau kuti iite cikumbiro ici. Zvingaita kuti iyona yaidikana kuita izvi ko vhaza jakawanda. Kangaije iyona inokumbira mudoni wayo wo kubasa kuti vacinjane nguva. Kudari zvecidiwa, iyona ingatendera kuti patarau apungure mare yaanopocera pamweji mukuzwirana no nguva yaatora.

11. Ngenyi tinodikana kuita mukumbiro kuphinda no kuphinda ngo pamusoro po zvineso zvedu?

¹¹ Jehovha anovetera kuti tienderere  mberi tecikumbira ku zviro zvinosisira kwatiri. (1 Vatesaronika 5:17) Jesu wakananga kuti mukumbiro jedu jimweni ajicaizodavihwepi pamukuvo wondhowo. (Ruka 11:9) Ngo kudaro, ticaremba. Ngatiite mukumbiro ngo mwoyo wese ko vhaza jakawanda. (Ruka 18:1-7) Patinoenderera mberi teciita mukumbiro ngo pamusoro po ciri cese catinoda, Jehovha anozwisisa kuti ici ndi ciro cinosisira kamare kwatiri. Kusiyapo zvondhozvo tinozokhombija kuti tino rutendo wokuti iyena anozotibesera.

12. (a) Ngojapi muvhunjo jatinodikana kujiita mukuzwirana no zvatinonga takumbira, ngenyi? (b) Tingakhombijisa kudini kuti tinoreremeja Jehovha pa mukumbiro jedu? (Vonanyi bhokiso rino musoro unoti: “ Kureva Kuti Zvandinokumbira Zvinokhombija Kuti Inini Ndinoreremeja Jehovha?”)

¹² Kudari zvatakumbira Jehovha azvizivi kuitika, tingajivhujisa muvhujo mutatu. Wokutanga: ‘Kureva kuti ndiri kukumbira ciro caushoni?’ Itusu nguva jimweni tinorangarira kuti tinoziva ngozvapi zvaushoni kwatiri. Kangaije zvatiri kukumbiraro pakufamba ko nguva azvizovi zvaushoni kwatiri. Kudari tiri kuita mukumbiro kuti titonge shwiro iri yese, kangaije kungava no njira jimweni jakanaka kuti titonge shwiroyo. Cimwenizve, zviro zvimweni zvatinomukumbira azvizwirani no kuda kwake. (1 Johani 5:14) Rangariranyi ngo muezaniso wo vabari vayani vanangwaya pakutanga. Ivona vakakumbira kuna Jehovha kuti mwana wavo aenderere mberi ari mucokwadi. Zvakadari inga kuti apana cakashata pacikumbiro ici. Asi Jehovha narini aazovangiriji mundhu kuti amushandire. Iyena anoda kuti tese kubatijavo no vana vedu tikhete kumushandira. (Deuteronòmio 10:12, 13; 30:19, 20) Ngo kudaro, kusiyapo kukumbira Jehovha kuti mwana aenderere mberi ari mucokwadi, vabari vangakumbira kuti Jehovha abesere mwana wavo  abaiwe mwoyo ngo cokwadi nokuda kuti Jehovha ave shamwari yake.—Mazwi Akangwara 22:6; Vaefeso 6:4.

13. Mukuzwirana na Vahebheru 4:16, ndirini Jehovha anotibesera? Sananguranyi.

¹³ Muvhunjo wo cipiri watingajiita nga uwu: ‘Kureva kuti ndi mukuvo waushoni wokuti Jehovha andipekeje zvandiri kukumbira?’ Kangaije imwimwi muri kuda mupinguro wo mukumbiro wenyu ngokukasika. Kunasa kunanga, Jehovha anoziva mukuvo waushoni wokuzotibesera. (Verenganyi Vahebheru 4:16.) Mukumbiro jedu pajinononoka kudavihwa kangaije itusu tingarangarira kuti mupinguro wa Jehovha ngo wo kuti ‘haiwa.’ Zvingaita kuti mupinguro ngo wo kuti amboveteranyi ‘padoko.’ Inga muezaniso, amborangariranyi basi ngo pamusoro po mujaha wiya waikumbiraya kuti araphwe ndhendha yake. Kudari Jehovha naakaita mushamaiso o murapa Sathana waizonanga kuti mujaha wiya ari kuenderera mberi ecishandira Jehovha ngokuti wakaraphwa. (Jobe 1:9-11; 2:4) Kusiyapo zvondhozvo, Jehovha wakatigondesa kuti kumbejiyo vese vanozoraphwa ndhendha javo. (Isaia 33:24; Apokaripsi 21:3, 4) Mbhera ugume mukuvo uu, ativhiri kuvetera kuti tirapiwe ngo mushamaiso. Ngo kudaro, hama iya yaidikana kukumbira simba kuna Jehovha kuti ienderere mberi yecishandira Jehovha yakagondeka.—Nduyo 29:11.

14. Majijenyi ngo muezaniso wa Janise?

¹⁴ Imwimwi munoceukija hambzaji Janise vaiita mukumbiro kuti vaende koshanda ku Bheteri? Nopapera makore anokwana kuita mashanu, ivona vakazozwisisa kuti Jehovha waidavira mukumbiro javo. Asi waidavira mu njira yavacaivetera. Ivona vakati: “Ko makore ese aya Jehovha wakandijijisa nokundibesera kuti ndive Mukristu waushoni. Inini ndaidikana maningi kuthemba Jehovha no kuitisa  nane jijo yangu yo mundhu ega. Kusiyapo izvi, inini ndaidikana kujija kuti mudakaro wangu aufiri pa mugariro jangu.” Pakufamba ko nguva, hambzaji Janise no mwamuna wavo vakakokwa kuti vashande inga vavonereri vo ndharaundha. Pavanosota sure vovona zvese zvapera kuitika, ivona vanoti: “Jehovha wakadavira mukumbiro jangu asi aazivi kudavira mu njira yandaivetera. Zvakatora mukuvo wakatikuti kuti ndizwisise kuti mupinguro wa Jehovha wakava cipo cakanaka kwandiri. Ndinobongesera maningi Jehovha ngokundikhombijira kwake rudo no unyasha.”

15. Ngenyi tinodikana kuva vakaezanana pa mukumbiro jedu? (Vonanyi foto.)

¹⁵ Muvhunjo wo citatu nga uu: ‘Kureva kuti ndinodikana kuita mukumbiro ndecikumbira ciro cimweni?’ Ngozvaushoni kunanga zvese zvatinoda pamukumbiro jedu. Asi mukuvo umweni, zviri nane kunanga zviro zvishoma kuitira kuti tikwanise kuwana izvo zvinoda Jehovha kwatiri. Vonanyi muezaniso wa hambzaji imweni yaaita mukumbiro kuti iende Kucikora co Vavhangeri vo Umambo. Ivona vaida kuenda kucikora kuti vazokwanise kushanda kwaidiwa maningi vacumaeri. Ivona vanoenderera mberi vecikumbira Jehovha kuti avabesere kuti vaende kucikora. Kusiyapo kukumbira kuti Jehovha avabesere kuti jiwanike mukana jimweni kuti vakwanise kuita zvizinji mu basa rake. (Mabasa o Vapostori 16:9, 10) Ngo kudaro, ivona vaidikana kuita ciri cese mukuzwirana no mukumbiro javo kana kuvhunjisa muvonereri wo ndharaundha dangani painga no ungano phedopo yaidiwa maningi mapiyona. Ivona vaizotarira Bheteri vecivhunjisa dangani kwainga no ndau iri yese kwaidiwa maningi vacumaeri. e

16. Cokwadi capi catingava naco?

¹⁶ Inga zvatakwanisa kuvona Jehovha anozodavira mukumbiro jedu ngo njira yo rudo no yakarungama. (Nduyo 4:3; Isaia 30:18) Nguva jimweni itusu tinova no mupinguro waticaiveterepi. Asi Jehovha narini aazotami kudavira mukumbiro jedu. Iyena anotida maningi. Narini aazotisiyi. (Nduyo 9:10) Ngo kudaro, endereranyi mberi ‘mecimugonda mukuvo wese’ nokumuvhunja zvese.—Nduyo 62:8.