1-2. (a) Ngenyi mupostori Pauro wakananga kuti “cikuru” pa zvese ndi rudo? (b) Ngojapi muvhunjo jatinozodavira?

 MUPOSTORI Pauro paaibhuya ngo pamusoro po rutendo, vetero no rudo, iyena wakapejisa ngo kubhuya kuti “asi cikuru pa zvese, i rudo.” (1 Vakorinte 13:13) Ngenyi Pauro waidikana kubhuya izvi? Ngokuti kumbejiyo, zvese zvakagondeswa ndi Mwari ngo pamusoro po nyika imbza zvinonga zvakwanirisika. Asi itusu mukuvo wese tinozodikana kukhombijira rudo kuna Jehovha pomwe no vandhu. Kunasa kunanga, rudo hwedu kwavari unozoenderera mberi wecikura.

² Zvecivoneka kuti rudo unozova mugariro unosisira maningi mu upenyu hwedu, ngatende tidavire muvhunjo jinokwana kuita mutatu. Wokutanga, ngenyi tinodikana kudisana umwe no umweni? Wocipiri, tingakhombijisa kudini kuti tinodisana ngocedu? Wocitatu, tingavangisa kudini rudo hwedu kuno umwe no umweni?

3. Ngoapi mathangwe atinawo anotiita kuti tikhombijire rudo kuno umwe no umweni?

³ Ngenyi zvinosisira kwatiri kudisana umwe no umweni? Ngokuti patinokhombija rudo kuno umwe no umweni itusu tinokhombija kuti tiri Makristu o cokwadi. Jesu wakati kuno vajiji vake: “Mukaita kudaro, vese vanozoziva kuti imwimwi muri vajiji vangu: Kudari mukadisana ngo cenyu.” (Johani 13:35) Kusiyapo zvondhozvo, rudo unobesera kuti tive takabatana. Pauro wakati rudo “ndihwona cisungo cakakwana co rubatano.”  (Vakorose 3:14) Kucino thangwe rimweni rinotiitisa kuti tidisane umwe no umweni. Mupostori Johani wakatara kudari: “Wiya anoda Mwari anodikanavo kuda hama yake.” (1 Johani 4:21) Patinokhombijirana rudo kuno umwe no umweni tinovonesa kuti itusu tinoda Mwari.

4-5. Ipanyi muezaniso unovonesa kuti rudo hwedu na Jehovha hwakabatana no rudo watinokhombijirana.

⁴ Kuitisa kudini rudo watinokhombijira hama no hambzaji jedu wakabatana no rudo watinawo na Jehovha? Rangariranyi manera akabatana mwoyo no mativi amweni o muviri. Kuti medhiko akwanise kuvona kuti mwoyo wedu uri ushoni kana kuti haiwa, iyena angashandisa mukono wo mundhu ari kuhwajaro kuti akwanise kuzemena mugariro wo mwoyo. Ngo kuita kudaro, ivona vangakwanisa kuvona dangani mwoyo wo mundhu ari kuhwajaro uri ushoni kana haiwa. Muezaniso uwu unotijijisenyi ngo pamusoro po rudo?

⁵ Kudari inga medhiko anokwanisa kutizemena ecishandisa mukono wedu, mu njira yakafanana, itusu tinokwanisa kuvona kuti rudo hwedu na Jehovha wakavanga kudari tikada vamweni. Patinotanga kuvona kuti rudo hwedu no hama no hambzaji uri kutanga kutondhora, izvi kangaije zvinotatijavo kuti rudo hwedu na Jehovha uri kutanga kutondhora. Patinoenderera mberi tecikhombija rudo hwedu kuno hama no hambzaji, i citatijo cokuti rudo hwedu kuna Jehovha ucakavanga.

6. Ngenyi tinodikana kuneseka patinovona kuti rudo hwedu kuno hama no hambzaji uri kutanga kutondhora? (1 Johani 4:7-9, 11)

⁶ Kudari rudo hwedu kuno hama no hambzaji uri kutanga kutondhora, ici cineso cikuru. Ngenyi? Ngokuti ici i citatijo cokuti ushamwari hwedu na Jehovha, uri kutanga kuremba. Mupostori Johani wakanasa kujekesa izvi paakananga kudari: “Wiya acingadi hama yake, yaanovona, aakwanisi kuda Mwari waacikavoni.” (1 Johani 4:20) Tinojijenyi? Itusu tinokwanisa kudakajisa Jehovha kudari ‘tikadisana ngocedu.’—Verenganyi 1 Johani 4:7-9, 11.

7-8. Mu njira yapi yatingakhombija kuti tinodisana ngocedu?

⁷ Ko vhaza jakawanda mu Soko ra Mwari, tinowana mupango wokuti: “Disananyi ngocenyu.” (Johani 15:12, 17; Varoma 13:8; 1 Vatesaronika 4:9; 1 Pedhru 1:22; 1 Johani 4:11) Rudo ndi mugariro wo mwoyo no mazwiro ari mukati medu. Vamweni vangazivisa kudini kuti tinovada? Ngo magama edu no zvatinovaitira.

⁸ Kuna njira jakawanda maningi jatingakhombijira ndijona kuti itusu tinoda hama no hambzaji jedu. Vonanyi muezaniso iji basi: “Bhuyanyi cokwadi ku umwe no umweni.” (Zakaria 8:16) ‘Garanyi no runyararo ngocenyu.’ (Marko 9:50) “Tanganyi kureremejana ngocenyu.” (Varoma 12:10) “Ashirananyi ngocenyu.” (Varoma 15:7) “Endereranyi mberi . . . meciregererana ngocenyu.” (Vakorose 3:13) “Thwarirananyi muthwaro ngo cenyu.” (Vagaratiya 6:2) “Garanyi mecitondhojana.” (1 Vatesaronika 4:18) “Garanyi mecivangisana . . . Ngocenyu.” (1 Vatesaronika 5:11) ‘Itirananyi mukumbiro.’—Jakobo 5:16.

9. Ngenyi zvinosisira kutondhoja hama jedu? (Vonanyi foto.)

⁹ Ngatende tivone njira imwe yo kukhombijirana rudo kuno umwe no umweni. Mu ndima yapera, takwanisa kuvona kuti mupostori Pauro wakatipekeja mbhangiro yokuti: “Garanyi mecitondhojana.” Ngenyi zvinosisira  kutondhoja hama no hambzaji jedu? Bhuku rimweni rinosanangura gama rakashandiswa ndi Pauro kuti “kutondhoja” recirevera “kugara pamutivi po mundhu paanonga ecihwisana no zvineso zvinonesa.” Ngo kudaro, patinovangisa hama jedu no kujibesera, tinonga tecijimusa kuti jienderere mberi jecifamba mugwanja ro upenyu. Patinokumbatira hama jedu kana kuti hambzaji tecicema najo, tinokhombija kuti tinojida maningi.—2 Vakorinte 7:6, 7, 13.

10. Ngowapi rubatano uripo pa unyasha no tondhojo?

¹⁰ Ari wese paanozwira unyasha mundhu ari kutambujika, anozoda kumuvangisa no kumunyaraja. Angazviitisa kudini? Cokutanga, anovazwira unyasha perapo ovatondhoja. Ngatende tivone kuti Pauro wakaezanisira kudini unyasha unopa Jehovha no kutitondhoja kwaanoita. Pauro wakananga kuti Jehovha ndi “Baba vakazara ngo usizi na Mwari anotondhoja vandhu vari pa mugariro jiri jese.” (2 Vakorinte 1:3) Masanangurire anoita bhuku rimweni ngo pamusoro po vhesi iyi, rinonanga kuti Pauro anoshandisa gama rokuti “vakazara ngo usizi” kuitira kuvonesa mazwiro no unyasha kuno vamweni. Ngo kudaro, Mwari anodanijwa Baba kana kuti Cinyuke ‘wakazara ngo usizi’ ngo ndava yo unyasha hwakavanga hwaanahwo no vandhu. Unyasha wondhowo unomuita kuti atitondhoje “pamatambujiko edu ese.” (2 Vakorinte 1:4) Kudari inga kumwa yakacena inobuda pa cinyuke inotondhoja vese vari kuzwa nyota, Jehovha anotondhoja no kuvangisa vaya vanomwoyo yakakhuvazika. Tingatevejeresa kudini muezaniso wa Jehovha wo kuzwirana unyasha no kutondhoja vamweni? Imwe njira yokuita izvi ngo yokusakurira mugariro wo unyasha mu mwoyo medu no kutondhoja vamweni. Ngojapi jimweni jo mugariro iji?

11. Mukuzwirana na Vakorose 3:12; na 1 Pedhru 3:8, ngojapi mugariro jimweni jatinodikana kusakurira kuti tienderere mberi tino rudo unotiita kuti tide kutondhoja hama jedu?

¹¹ Ngozvapi zvinozotibesera kuti tienderere mberi tecikhombijirana rudo no ‘kugara tecitondhojana?’ Tinodikana kukhombija mugariro jimweni inga muezaniso, kuva takabatana mu murangariro, kuhwajihwa ngo kutambujika ko vamweni no kuva mundhu anojidodokesa. (Verenganyi Vakorose 3:12; 1 Pedhru 3:8.) Mugariro iji jingatibeseresa kudini? Patinozwira unyasha hama jedu no kuneseka ndijona tinozova no cido cakavanga cokuda kuvatondhoja pavanonga vecisongana no zvineso, kudari inga zvakanangwa ndi Jesu kuti “ngokuti muromo unovereketa zvakazara mu mwoyo. Mundhu wakanaka anovhisa zvakanaka mu upfumi hwake.” (Mateu 12:34, 35) Kutondhoja hama jedu no hambzaji, pacina kukana-kana ndi njira yaushoni kamare yo kukhombijira rudo.

12. (a) Ngozvapi zvatinodikana kungwarira? (b) Ngowapi muvhunjo watinozodavira?

¹² Tese tinodikana ‘kuramba tecidisana ngocedu.’ (1 Johani 4:7) Asi zvinosisira kuceukija kuti Jesu wakazvinanga kuti, “rudo hwo vazinji hunozopera ngo ndava yo kuwanda ko ushaishi.” (Mateu 24:12) Jesu aazivi kunanga kuti vajiji vake vaizosiya kukhombijirana rudo ngocavo. Asi tinodikana kungwarira kuti titame kusiya kuti kutama rudo ko nyika ino kupsase matajire atinoita hama no hambzaji jedu. Tecirangarira izvi ngatende tivone muvhunjo umwe unosisira maningi wokuti: Mu njira yapi yatingaziva kuti rudo hwedu kuno hama no hambzaji wakavanga?

13. Ngozvapi zvingadira pamuejo rudo hwedu?

¹³ Njira imwe yatingavona ndiyona kuvanga  ko rudo hwedu, ngo yo kusotesesa manera atinoita patinohwisana no zvineso zvinonesa mu upenyu hwedu. (2 Vakorinte 8:8) Imwe njira yatingazviita ndiyona, ngo yakanangwa ndi mupostori Pedhru paakati: “Kupinda zvese, disananyi maningi ngocenyu, ngokuti rudo hunofukija zvishaishi zvakawanda.” (1 Pedhru 4:8) Kurembejeka no kutama kukwana ko vamweni kungadira pa muejo rudo hwedu.

14. Mukuzwirana na 1 Pedhru 4:8, ngowapi mushovo wo rudo watinodikana kuva nawo? Ezanisanyi.

¹⁴ Ngatende tivone zvakanangwa ndi Pedhru. Divi rokutanga ro vhesi ya 8 rinonanga mushovo wo rudo watinodikana kuva nawo, “disananyi maningi.” Gama rakashandiswa ndi Pedhru rokuti “maningi,” rikasandujwa rinoreva kuti “kunda-ndamuka.” Pa divi rocipiri ro vhesi rinosanangura revo yo gama rokuti disananyi maningi. Rudo hunofukija zvishaishi zvo hama jedu. Ngatiti tabata rudo hwedu kudari inga tesidhu inonda-ndamuka, tounda-ndamura haiwa kamwe nee kaviri asi tinounda-ndamura kamare mbhera ukwanise kufukija “zvishaishi zvakawanda.” Pamugariro uwu, kuregerera kwakadari inga “kufukija.” Inga tesidhu inofukija nguvo yakamweka, mu njira yakaezana, rudo hwedu unokwanisa  kufukija kurembejeka no kutama kukwana ko hama jedu.

15. Kudari rudo hwedu kuno hama no hambzaji ukava wakavanga, ngozvapi zvatinozokwanisa kuita? (Vakorose 3:13)

¹⁵ Rudo hwedu unodikana kuva wakavanga wogumira pakufukija kutama kukwana ko hama jedu pikija paya pazvinonesa. (Verenganyi Vakorose 3:13.) Patinoregerera vamweni tinokhombija kuti rudo hwedu hwakavanga no kuda kudakajisa Jehovha. Ngozvapizve zvingatibesera kuti itusu tisiye pamutivi kutama kukwana ko hama jedu?

16-17. Ngozvapi zvinozotibesera kuti tisiye pamutivi zvinoposwa ngo hama jedu? Ezanisiranyi. (Vonanyi foto.)

¹⁶ Tinodikana kubatikana pa zviro zvaushoni zvinoithwa ngo hama no hambzaji jedu haiwa pakutama kukwana kwavo. Rangariranyi pa muezaniso uwu basi. Rangariranyi kuti muri pamabuso no cikwata co hama no hambzaji. Imwimwi muri kutobungaija, pakupera ko mabusowo mobudisa foto no muri mwese. Kunasa kunanga imwimwi mapera kuvhisa foto mbiri. Zvinoitika ngo zvokuti foto yokutanga aizivi kubuda ushoni. Ngo kudaro, imwimwi muno foto jinokwana kuita ndhatu. Asi pa imwe yakona imwimwi mazwisisa kuti pano imwe hama yabuda ino hope yakashata. Ngozvapi zvamaizoita no foto iyi? Imwimwi munopfujura foto iyi ngokuti muno jimweni jinokwana kuita mbiri. Asi pa foto iji hama jese jiri pondhopo kubatanijavo no hama iya jiri kuseka.

 ¹⁷ Tingaezanisira foto no zvese zvakaitikepo pa njiku yondhoyo. Ngozvokadi kuti imwimwi muno zviro zvaushoni zvokuceukija pamukuvo wamakapeja no hama no hambzaji. Zvinoitika kuti pa njiku yondhoyo hama kana kuti hambzaji yakabhuya zviro zvokuti azvicaingepi zvaushoni. Ngozvapi zvamaizoita no zviro zvakaitikaro? Ngenyi amuzvipfujuri inga manera amunopfujura foto icikaripi ushoni? (Mazwi Akangwara 19:11; Vaefeso 4:32) Itusu tingakanganwa zvakaposwa ngo hama kana hambzaji yedu ngo kuceukija mukuvo jaushoni jotakapeja nayo. Izvi ndizvona zviro zvaushoni zvatingagara teciceukija ngo pamusoro po hama jedu.

18. Ngozvapi zvamajijira ngo pamusoro po rudo pa cijijo cino?

¹⁸ Ngenyi itusu tinoda kuvangisa rudo hwedu kuno umwe no umweni? Inga zvatavona, kudari itusu tikakhombija rudo kuno hama no hambzaji jedu, tinovonesavo kuti tinoda Jehovha. Waro tingakhombijisa kudini rudo kuno hama no hambzaji? Imwe njira yokuita izvi ngo yo kuvatondhoja. Unyasha ndiwona unozotibesera kuti tienderere mberi ‘tecitondhojana.’ Asi tingaitisa kudini kuti tivangise rudo hwedu kuno umwe no umweni? Ngokuita zvese zvatinokwanisa kuti tivaregerere pavanotiposera, pikija paya pazvinonesa.

19. Ngenyi nyamasi uno zvinosisira kuti tikhombijirane rudo kuno umwe no umweni?

¹⁹ Ngenyi nyamasi uno zvinosisira kukhombija rudo kuno umwe no umweni? Pedhru wakananga thangwe rakona paakati: “Kupera ko zvese kwaaphedo. Ngo kudaro . . . disananyi maningi ngocenyu.” (1 Pedhru 4:7, 8) Kupera ko nyika ino pakunonga kwecikhwedera, ngozvapi zvatingavetera? Jesu wakapa ngwajo iyi kuno vajiji vake: “Munozonyenywa ngo majinja ese ngo ndava yo zina rangu.” (Mateu 24:9) Kuti tikwanise kucungirira kuzondana uku, tinodikana kuenderera mberi takabatana. Tikaita izvi Sathana aazokwanisi kutipausa ngokuti tinonga takabatana mu rudo uwo uri “cisungo cakakwana co rubatano.”—Vakorose 3:14; Vafiripi 2:1, 2.