1-2. Ngoyapi njira yakanakisisa yo kuverenga no kujija Bhaibheri? Ezanisanyi.

 AMBORANGARIRANYI kuti munoda kutenga nyumba. Maidakarira kuvona nyumbeyo mucito maitenga? Maizotendera kuitenga basi ngokukhombijwa foto yokumbeji ko nyumbeyo? Pacina kukana-kana, imwimwi maizoenda kovona nyumbeyo yese kamare kuti muvone ngopapi panoda kuitiswa nane. Kangaije munoda kuzovona nyumba yese kuti mukwanise kuvona manera oyakavakwa. Zvokadi kamare, imwimwi munozodakarira kuvona cimwe nga cimwe mucito maitenga.

² Itusu tingaitavo zvakafanana patinonga teciverenga no kujija Bhaibheri. Mutari umweni wo Bhaibheri wakaezanisa masoko ari mu Bhaibheri “no predhiyo yakareba maningi yakavakwa pamaambo akavanga maningi.” Waro ngozvapi zvatingaita kuti tinase kuziva ushoni Bhaibheri? Kudari mukaverenga Bhaibheri no cinangwa cokuda kuripeja munozozwisisa zviro zvishoma basi kana “zviro zvokutanga zvo masoko akacena a Mwari.” (Vahebheru 5:12) Ticito tatenga nyumba, tinoenda kosota “mukatimo” kuti ngo papi payakanakira ngo papi payakashatira. Mu njira yakaezana, tinodikana kunasa kujija Bhaibheri kuti tirizwisise. Mukufananavo, njira yakanakisisa yo kujija Bhaibheri ngo yo kuvona kuti kuitisa kudini mativi akasiyana-siyana o masokowo anozwirana no amweni. Vangisiranyi kuti muzwisise haiwa basi pa zvokadi zvamunotenda asi muzwisise kuti ngenyi munozvitenda.

3. Mupostori Pauro wakanangenyi ku Makristu, ngenyi? (Vaefeso 3:​14-19)

³ Kuti tinase kuzwisisa Bhaibheri no zvimweni zviri mukatimo, tinodikana kunasa kujija zvokadi zvakajikisisa. Mupostori Pauro wakavhunja hama kuti jinase kujija Bhaibheri no kungwarira kwese kuti “jikwanise kunasa kuzwisisa kuti ngohwapi upambhi, urebu, thuru no ujiki,” wo zvokadi. Ngokuita izvi ivona vaizokwanisa kuva ‘vakaima’ no kuvanga mu rutendo hwavo.  (Verenganyi Vaefeso 3:​14-19.) Itusu tinodikana kuitavo zvakafanana. Ngatende tivone kuti tingaitisa kudini kuti tinase kujija Bhaibheri Soko ra Mwari no kubesereka ngo upfumi uri mukatimo.

4. Ngozvapi zvatingaita kuti tikhwedere phedo na Jehovha? Ipanyi muezaniso.

⁴ Inga Makristu, itusu atidi kuzwisisa zviro zvicikanesi basi zvo mu Bhaibheri. Ngo besero ro mujimu mucena wa Mwari itusu tinoda kujija “zviro zvakajika zva Mwari.” (1 Vakorinte 2:​9, 10) Munovona kudini ngokuita urongwa wo kuita jijo yo mundhu ega kuti mukwanise kukhwedera phedo na Jehovha? Inga muezaniso, tinodikana kupsakisisa kuti tivone kuti Jehovha wakakhombijisa kudini rudo kuno vashandiri vake vokare no kuvona kuti zvinomukhohwesa kudini kuti Mwari anomudavo. Mungapsakisisazve kuti muvone kuti kunamata Jehovha mu nguva yo kare kwainga kwakarongeswa kudini no kuvona kuti imwimwi munganamatisavo kudini Jehovha nyamasi uno. Mungapsakisisazve kuti Jesu wakakwanirisa kudini zviporofita paainga pasi pano.

5. Iripo shwiro yomaidakarira kujija pa jijo yenyu yo mundhu ega?

⁵ Hama jimweni jinodakarira kujija Bhaibheri jakananga zviro zvimweni zvajinodakarira kupsakisisa. Mungavona zvavakananga pa bhokiso rino musoro unoti: “ Mazano Kuitira Kuita Jijo yo Mundhu Ega.” Imwimwi mungashandisa bhuku Índice das Publicaçao da Torre de Vigia no Bhuku Rokupsakisisa ro Zvapupu zva Jehovha, kuti munase kupsakisisa. Munozovona kuti kushandisa mabhuku aya kuti muite jijo yenyu yo mundhu ega zvinozomubesera kuti mudakajihwe. Kujija Bhaibheri kunozomubesera kuti muve no rutendo hwakavanga mogumira ‘pakuziva Mwari.’ (Mazwi Akangwara 2:​4, 5) Wari ngatende tivone zvokadi zvo Bhaibheri zvatingajija.

6. (a) Ngowapi musiyano wo urongwa no cidisiso? (b) Ngenyi tingananga kuti cidisiso cina Jehovha kuno vandhu no nyika ino ngo cokwenda no “kwenda?” (Vaefeso 3:11)

⁶ Inga muezaniso, vonanyi kuti Bhaibheri rinonangenyi ngo pamusoro po cidisiso ca  Mwari. Pano musiyano wakakura maningi tecibhuya ngo pamusoro po cidisiso no urongwa. Ngatiti muri kuda kuita hwendo, tingaezanisa gwanja ramunodaro kufamba no urongwa kuti muende koguma kwamunodaro kwenda. Asi urongwa hwenyu ungatama kukwanirisika ngo ndava yokuti citakeco cinonga cakafungwa ngo ndava iri yese. Ngo divi rimweni cidisiso cingaezanisihwa no ndau yamuri kudaro kuguma. Munodikana kuguma kwamuri kwenda, ndiyo ndava mungatopsaka gwanja rimweni kuti mugume kwamuri kwendaro. Imwimwi mungakwanisa kuita cinjo mukuzwirana no zvinodiwaro. Itusu tinobongesera maningi Jehovha ngokutivhunja kwake “cidisiso cake co kwenda no kwenda,” mu Bhaibheri. (Vaefeso 3:11) Mu njira yakasiyana-siyana, Jehovha anokwanisa kuita zvese zvaanoda, “zvese,” zvaanoita zvinomubesera kuti akwanirise cidisiso cake. (Mazwi Akangwara 16:4) Zvese zvaanoita zvinogara kwenda no kwenda. Ngocapi cidiso ca Mwari nokutizve ngojapi cinjo jaakaita kuti cidisiso ici cikwanirisike?

7. Adhamu na Evha pavakapera kupandukira, Jehovha wakadikana kuita cinjo japi pa cidisiso cake? (Mateu 25:34)

⁷ Jehovha wakavhunja varovorani vokutanga kuti ngocapi cainga cidisiso cake kwavari. Iyena wakavavhunja kudari: “Barananyi muwande muzaje nyika no kuitonga . . . Mutonge zvese zvinogwezva,” pa nyika. (Genesi 1:28) Ngokutama kuzwira kwa Adhamu na Evha, vandhu vese vakava vashaishi, asi izvi azvizivi kucinja cidisiso ca Jehovha. Iyena wakashandisa njira imweni kuti akwanirise cidisiso cake. Ngokukasika, Jehovha wakatema civaringo co kuviisa Umambo hwake kuti azokwanirisa cidisiso cake kuno vandhu no nyika inga manera aaidaya pakutanga. (Verenganyi Mateu 25:34.) Ngo rudo hwake, Jehovha wakatumira mwana wake pasi pano pamukuvo waakagaja. Jesu waizojijisa vandhu ngo pamusoro po Umambo no kupira upenyu hwake kuti aponese vazinji. Iyena wakazomumusa ohwirira kudenga kotonga inga Mambo wo umambo hwake asi kuno zviro zvizinji zvamungarangarijisisa ngo pamusoro po cidisiso ca Mwari.

8. (a) Ngocapi ciro cikuru ciri mu Bhaibheri? (b) Mukuzwirana no bhuku ra Vaefeso 1:​8-11, ngocapi cidisiso cikuru ca Jehovha? (Vonanyi foto yo pakapa.)

⁸ Ciro cikuru ciri mu Bhaibheri ngo cokuti zina ra Mwari rizoceneswe, izvi zvinozoitika paanozokwanirisa cidisiso cake pa nyika ecishandisa Umambo hwake unozonga wecitongwa ndi Jesu Kristu. Apana anokwanisa kucinja cidisiso ca Jehovha. Jehovha wakananga kuti zvese zvinozoitika ngo njira yaakagondesa. (Isaia 46:​10, 11; Vahebheru 6:​17, 18) Pakufamba ko nguva nyika inozova Paradhiso, nokutizve mubarihwana wakakwana no wakarurama wa Adhamu na Evha, “unozopona mbhera narini.” (Nduyo 22:26) Jehovha anorangarira kutiitira zviro zvakawanda maningi. Cidisiso cake cikuru ngo cokuti vandhu vese kudenga pamwepo no pasi pano vamunamate vakabatana. Ngo njira iyi vese vanozova vakagondeka no kuzwira Jehovha inga Mukuru. (Verenganyi Vaefeso 1:​8-11.) Imwimwi amushamaisiki pamunovona Jehovha ecikwanirisa cidisiso cake?

9. Jijo yedu yo Bhaibheri inotibesera kudini ngo pamusoro po kumbeji?

⁹ Ngativone ciporofita cakanangwa ndi Jehovha mu munda wo Edheni cinonangwa pana Genesi 3:15. b Ciporofita ici caibhuya ngo zviro zvaizoitika zvaizokwanirisa cidisiso ca Jehovha izvo zvaizoitika ko mazana o makore aizoviya. Inga muezaniso, Jehovha wakavhunja Abhirahama kuti umwe wo mubarihwana wake waizova Kristu. (Genesi 22:​15-18) Ngo kudaro,  mu gore ra 33 Kristu Aviya, Jesu wakazorumwa cisisinindo inga zvainga zvakanangwa paciporofita. (Mabasa o Vapostori 3:​13-15) Divi rokupejisira ro ciporofita ici kana kuti kucangajwa ko musoro wa Sathana, zvinozoitika pa ciuru co makore cokutonga kwa Kristu. (Apokaripsi 20:​7-10) Cimwenizve, Bhaibheri rinobhuya zvizinji zvinozoitika apo Sathana paanozohwisana no sangano ra Jehovha.

10. (a) Ngozvapi zvinozoitika sambiri pano? (b) Tingaitisa kudini kuti tinasirire murangariro wedu no mwoyo? (Vonanyi masoko o pasi.)

¹⁰ Rangarijisisanyi ngo zviitiko zvinoshamaisa zvinonangwa ngo Bhaibheri. Cokutanga, vandhu vo majinja vanozozivisa ciziviso cokuti “wari tiri kugara mu runyararo ticina ngozi iri yese.” (1 Vatesaronika 5:​2, 3) “Pondhopo kamare” dambujiko guru rinozotanga majinja paanonga apera kuhwisa zviara zvese zvokunyepa. (Apokaripsi 17:16) Tevere, “mwana wo mundhu eciviya mu makore o kudenga no simba pamwepo no nduma huru,” kangaije tingatovona zviro zvinoshamaisa. (Mateu 24:30) Zvingaita kuti Jesu anozotonga vandhu eciparajanisa mavhuta no mbuji. (Mateu 25:​31-33, 46) Pikija zvakadaro, Sathana aazorembi. Ngo ushungu hwake anozoita kuti mubatanijwa wo majinja unonangwaya ngo Bhaibheri kuti Gogi, mu nyika yo Magogi, ahwise vandhu va Mwari. (Ezekieli 38:​2, 10, 11) Pamukuvo wokuti vokuzojwa vanonga vaciri pasi pano, ivona vanozotohwa kuti vaende kudenga pamwepo na Jesu no masoca ake kuti vazohwe pa dambujiko guru. c (Mateu 24:31; Apokaripsi 16:​14, 16) Perapo, Kutonga ko Ciuru co Makore ka Kristu kunozotanga pasi pano.—Apokaripsi 20:6.

11. Munojizwa kudini pamunorangarira ngo pamusoro po kupona kwenda no kwenda? (Vonanyi foto.)

¹¹ Waro amboimanyi mumborangarire padoko kuti, ngozvapi zvinozoitika pa kupera ko ciuru co makore. Bhaibheri rinonanga kuti Jehovha “wakadira mo mwoyo mwedu cido cukuda kupona kwenda no kwenda pasi pano.” (Mucumaeri 3:​11, Sandujo yo Nyika Imbza) Amborangariranyi kuti izvi zvinorevenyi kwamuri no ku ushamwari hwenyu na Jehovha. Bhuku Swedera Pedyo naJehovha pheji  319, rinomusa cidaka-daka cedu parinoti: “Pasure po kurarama mazana, zviuru, mamiriyoni; pikija mabhiriyoni o makore, tinozoziva zvakawanda maningi ngo pamusoro pa Jehovha kupinda wari. Asi tinozojija zvakawanda zvinoshamaisa zvicikaverengeki . . . Upenyu ucikaperi unozova unodakajisa maningi mu njira yatainga ticikarangariri no zviro zvinoshamaisa zvakasiyana-siyana. Cinodakajisazve maningi ngo cokuti ushamwari hwedu na Jehovha unozoenderera mberi wakavanga. Kuti izvi zviitike, ngozvapi zvatingawana ngo kweenderera mberi tecijija Bhaibheri?

12. Tingaitisa kudini kuti tisote kumatenga? Ipanyi muezaniso.

¹² Bhaibheri rinotivonesa kuti tinozojizwa kudini ngo kuva pamberi pa Jehovha kana pa “ndau jakakhwirira.” (Isaia 33:5) Bhaibheri rinobhuya zvinoshamaisa ngo pamusoro pa Jehovha no divi ro kudenga ro sangano rake. (Isaia 6:​1-4; Dhanyeri 7:​9, 10; Apokaripsi 4:​1-6) Inga muezaniso, tingaverenga ngo zviitiko zvinoshamaisa zvakavona Ezekieri paakavona ‘denga rakabeuka wovoneswa bziro bza Mwari.’—Ezekieli 1:1.

13. Mukuzwirana no Vahebheru 4:​14-16, munozwa kudini pamunoziva zviri kuithwa ndi Jesu kumatenga?

¹³ Rangariranyi kuti ngozvapi zviri kuithwa ndi Jesu kumatenga inga Mambo no Mupiri Mukuru anozozwisisa mazwiro edu. Ngo ndava yake tinokwanisa kukhwedera “pamberi po cigaro co umambo hwo unyasha hucikaezaniswi” ngo kuita mukumbiro no kukumbira unyasha hwake no besero “pa nguva kwayo.” (Verenganyi Vahebheru 4:​14-16.) Ativhiri kudarika nee njiku imwe hayo ticikarangarijisisi ngo zvese zvatakaitihwa no zvatiri kuitihwa ndi Jehovha na Jesu kuvhira kumatenga. Rudo hwavo kwatiri unodikana kubaya mwoyo wedu no kutivangisa kuti tiite zvese zvatinokwanisa mu basa ratinoitira Jehovha.—2 Vakorinte 5:​14, 15.

14. Ngoyapi njira yaushoni yatingakhombijira ndiyona kubongesera ngo zvatiri kuitihwa ndi Jehovha na Jesu? (Vonanyi foto.)

 ¹⁴ Njira yakanakisisa maningi yatingakhombija ndiyona kubongesera kuna Jehovha na Jesu ngo zvese zvavari kutiitira, ngo yo kubesera vamweni kuti vave Zvapupu zva Jehovha no kuva vateveri va Jesu. (Mateu 28:​19, 20) Ndizvona zvakaithwa ndi mupostori Pauro kuti akhombije kubongesera kwake kuna Jehovha na Jesu. Iyena waizviziva kuti Jehovha “anoda kuti vandhu vese vaponeswe no kuwana zivo yakarungama yo cokwadi.” (1 Timoti 2:​3, 4) Iyena wakavangisira maningi mu basa ro kucumaera kuti abesere vandhu vakawanda kuitira ‘kuti ngo maitiro ariese aponese vamweni.’—1 Vakorinte 9:​22, 23.

15. Mukuzwirana na Nduyo 1:​2, ngozvapi zvinozotisiya takadakara?

¹⁵ Mutari wo nduyo wakasanangura mundhu anobudirira pa zviro zvaanoita inga wiya “anodakara ngo mupango wa Mwari” na wiya ‘anorangarira matongero ake usiku no masikati.’ (Nduyo 1:​1-3) Musanduji umweni wo Bhaibheri anozwi Joseph Rotherham wakananga kudari ngo pamusoro po vhesi iyi mu bhuku rake: “Mundhu mu upenyu hwake anodikana kudakajihwa ngo kuverenga Bhaibheri, kuripsaka, kurijija no kurangarijisisa zvaaverengaro.” Iyena wakaenderera mberi ecinanga kudari: “Pa njiku, mundhu angakanganwa kuverenga Bhaibheri wokonehwa kuwana uzivi unowanika mu Bhaibheri.” Imwimwi munozodakajihwa ngo kuverenga Bhaibheri no kuvona zviro zvimweni zviri mukatimo manera zvinozwirana no zvimweni. Kupsakisisa ciro cimwe nga cimwe catinowana mu Soko ra Mwari ndi zviro zvinodakajisa.

16. Tinozovonenyi mu cijijo cinotevera?

¹⁶ Zvokadi zvinosisira zvatinowana mu Soko ra Mwari azvinesi maningi kuti tizvizwisise. Mu cijijo cinotevera, tinozojija cokwadi cimwe cinosisira maningi pa zvokadi zvimweni zvo tajijari nyamasi, themberi yo kumujimu ya Jehovha, yakatahwa ngo mupostori Pauro mu karata yake ku Makristu o Cihebheru. Munozodakarira maningi kujija ngo pamusoro po shwiro iyi.