Vanoimirira masimba o kumatenga akava pa kuparajwa ko Jerusarema zve anozovazve pa kuparajwa ko nyika ino yakashata ya Sathana pa Harmagedhoni. Kuzwisisa uku, kwacinjwa. Ngenyi zvaidiwa?

Ricito raguma gore ro 607 N.V.I.Y., Jehovha wakapa civoniso Ezekieri co zvaizoitika Jerusarema ricito raparajwa. Mu civoniso ici, Ezekieri wakavona zvakashata zvakawanda zviciitika mu Jerusarema. Perepo, wakavona vandhu vatandhatu vaenga no “cijito cinopeja” mu nyara javo. Kwaengazve no mundhu waenga navo ‘waisimira nguvo yakacena’ zve “wainga no cinyede co mutari.” (Ezekieli 8:6-12; 9:2, 3) Mundhu uu wakabvunjwa kuti afambe ngo mu dhorobha no “[kutatara citatijo] pa huma jo vandhu vari kugomera no kucema ngo ndava yo bzipserujo bzese bzinoitwa pakati paro.” Perepo, vandhu vatandhatu vaya, vakabvunjwa kuti vauraye vese mu dhorobhemo vacaengepi no citatijo. (Ezekieli 9:4-7) Tingajijenyi ngo civoniso ici, zve ndiani mundhu ana cinyede co mutari?

Ezekieri wakavona civoniso ici mu gore ro 612 N.V.I.Y. Ici cakava ciphorofeti cakatanga kukwanirisika pa makore mashanu akazotevera, Jehovha paakatendera kuti cikwata co masoca o Bhabhironi ciparaje Jerusarema. Ngo njira ii, Jehovha wakashandisa vaBhabhironi kuti vapanice  vandhu vake vo kutama kuzwira. (Jeremia 25:9, 15-18) Asi, zvicinyi zvakaitikiravo varurami vo ciJudha vacaitenderepi weya zviro zvese zvakashata zvaiitiwaya mu dhorobhemo? Jehovha wakaita kuti vaponeswe.

Mu civoniso ici, Ezekieri aazivi ku kutara citatijo mundhu ariwese kana kutora rutivi pa kuparajwa ko dhorobha. Kunja kwa izvi, i ngirozi jakatungamirira kuparajwa ko Jerusarema. Ngokudaro, civoniso ici cinotipa mukana wo kuti tivone zvaiitika kumatenga. Jehovha wakabvunja ngirozi kuti jironge kuparajwa ko vakashata no kuita kuti varurami vazopokonyoke. *

Ciphorofeti ici cinozokwanirisikazve kumbejiyo. Taicishandisa pa kunanga kuti mundhu ana cinyede co mutari anoimirira vakazojwa vaciri penye pasi pano. Tainangazve kuti vandhu vaitahwa citatijo kuti vapokonyoke povaizwa no kutendera masoko akanaka otiri kucumaira. Asi, nguva shoma yakhirirari, zvabuda pambhene kuti tinodikana kucinja masananguriro otinoita ciphorofeti ici. Pa Mateu 25:31-33 takajija kuti Jesu ndiena anotonga vandhu. Anozozviita izvi pa dambujiko guru. Pa mukuvo wondhowo vaya vanozotongwa inga mabvuta vanozopokonyoka zve vaya vanozotongwa inga mbuji vanozoparajwa.

Waro, tinojijenyi ngo civoniso ca Ezekieri? Tinojija zvijijo zvishanu:

1.  Jerusarema ricito raparajwa, Ezekieri, Jeremia na Isaia vaingwaja vandhu ngo pamusoro po zvaizoitikira dhorobha ro Jerusarema. Ivona vaishanda inga vavonereri. Nyamasi uno, Jehovha ari kushandisa cikwata cidoko co vakazojwa kuti ajijise vandhu vake no kungwaja vamweni dambujiko guru ricito ratanga. Zvokadi, vandhu va Mwari vese, vanotoravo rutivi pa basa ro kungwaja, inga vopamuzi va Kristu.—Mateu 24:45-47.

2.  Ezekieri aazivi kutara citatijo vaya vaizopokonyoka. Nee vandhu va Mwari nyamasi uno. Ivona vanocumaira basi vamweni no kuvangwaja ngo pamusoro po zvinozoitika kumbejiyo. Basa ro kucumaira ro nyika yese riri kuitwa no besero ro ngirozi.—Apokalipsi 14:6.

3.  Vaya vakaponaya pa mukuvo wa Ezekieri, avacaengepidi no citatijo pa huma javo. Nyamasi uno, vaya vanozopokonyoka avanavo citatijo kamare. Waro, vandhu vanodikana kuitenyi kuti vazopokonyoke pa dambujiko guru? Povanozwa ngwajo, vanodikana kutevejera Kristu, kuzvipira kuna Mwari no kubesera hama ja Kristu ngo basa ro kucumaira masoko akanaka. (Mateu 25:35-40) Pa dambujiko guru, vondhova vanozopuwa citatijo, cokuti vaaphedo kuti vazopokonyoke.

4.  Mundhu ana cinyede anoimirira Jesu. Pa dambujiko guru, Jesu anozotara citatijo vo mbungano huru paanozovatonga inga mabhuta. Ivona vacazova no mukana wo kurarama kwenda no kwenda pasi pano.—Mateu 25:34, 46, Shanduro yeNyika Ipsa. *

5.  Nyamasi uno, vandhu vatandhatu vano zvijito zvinopeja vanoimirira masoca o kumatenga ao anotungamirihwa ndi Jesu. Iona sasambi uno anozoparaja majinja no kupeja ushati hwese.—Ezekieli 10:2, 6, 7; Apokalipsi 19:11-21.

Zvijijo zvotinojija mu civoniso ici zvinotibesera kuti tithembe kuti Jehovha aazoparaji varurami pamwepo no vashaishi. (2 Pedru 2:9; 3:9) Zvijijo zvotajijari zvinoticeujazve kuti basa ro kucumaira rinosisira maningi pa mukuvo wedu uno. Vandhu vese vanodikana kuzwa ngwajo magumo acito aguma!—Mateu 24:14.