Zvicinyi zvamaizodavira kudari makabvujiswa kuti: “Munoda kurarama kwenda no kwenda here?” Vazinji vaizonanga kuti vanoda kurarama kwenda no kwenda, asi vanovona kuti i zviro zvikakwanisiki. Ivona vangati, kufa kunoita divi ro upenyu, ngo zvotakasikihwa.

Asi, ngatiti mubvunjo wondhowo wocinjwa wogara kudari: “Makanasiririka kuti mufe here?” Pa mugariro wo cibarihwe, vandhu vazinji vaizodavira kuti haiwa. Zvinoda kutatijenyi? Pikija zvineso pomwe no muejo jatinosongana najo, cibarihwe cedu ngo kuda kuramba tecirarama,. Bhaibheri rinotatija kuti Mwari wakasika vandhu no cido co kurarama. Zvokadi rinonanga kuti: ‘Wakadira mukuvo ucikaperi mu mwoyo mavo.’​—Mucumaeri 3:11, Shanduro yeNyika Itsva.

Zvokadi kamare, vandhu avaripi kurarama kwenda no kwenda. Waro i cinyi cakaposeka? Kunja kwa izvi, Mwari aazivi kuita ciri cese kuti acinje mugariro uu here? Bhaibheri rinopa mupinguro jinovangisa, zve ijona jinozwirana no zvakaitisa kuti Jesu atambujike no kufa.

Zvipauko zvitatu zvo kutanga zvo Bhaibheri mu bhuku ra Genesi zvinonanga kuti Mwari wakadira vetero yo kurarama kucina magumo ku varovorani vo kutanga, Adhamu na Evha, no kuvabvunja kuti zvicinyi zvovaidikana kuita kuti vawane upenyu ucina magumo. Perepo, ndhorondho inosanangura kuti vakatamisa kudini kuzwira Mwari zve kuti vetero yakaruzika. Ndhorondho iri kunanga zvakajeka—asi vamweni vanokasika kuiramba inga nganovo hajo jinosumuhwa. Asi, mukufanana no Mavhangeri, bhuku ra Genesi rinopa zvese zvinokhombija kuti ndhorondho iyi yakaitikadi kamare. *

Ngowapi wakava muviyo wo kutama kuzwira ka Adhamu? Bhaibheri rinodavira mu njira ii: “Kudari inga hwakangwina uxaixi mu nyika yo pasi ngo ndava yo mundhu umwe, ngo uxaixi hwongwinavo rufu; ndibzonavo bzondhobzo rufu hwakagumira vandhu vese, ngokuti vese vakaxaixa.” (VaRoma 5:12) Ngo kutama kuzwira Mwari, Adhamu wakashaisha. Iyena wakaruza vetero yo kurarama kwenda no kwenda zve wopejisira ngo kufa. Inga mubarihwana wake, itusu tina utaka hwake hwo mugariro woushaishi. Muviyo wakava wo kuhwaja, kuita harahwa zve tofa. Kusanangura uku ko  kuti ngenyi itusu tinofa kunozwirana no zvatinoziva nyamasi uno ngo pamusoro po utaka hwo majibaba edu. Asi, Mwari aazivi kuita ciri cese kuti acinje mugariro uu here?

Hina, Mwari wakaita nasisiro kuti acinje, kana kuwanazve, zviya zvakaruzwa ndi Adhamu kuitira mubarihwana wake, zvecizivika, kuti vetero yo kurarama kwenda no kwenda. Mwari acazvikwanirisa kudini izvo?

Pana VaRoma 6:23 Bhaibheri rinoti: “Mupocero wo uxaixi, rufu.” Izvi zvinoreva kuti rufu i muviyo wo ushaishi. Adhamu wakashaisha, ngokudaro wakafa. Mukuezanavo, itusu tinoshaisha zve tinotongehwa mupocero wo ushaishi, rufu. Asi, , Takabahwa no mugariro uu wo ushaishi, pikija atina ndava. Asi, no rudo hwese, Mwari wakatumira Mwana wake, Jesu kuti aviye, kuzodavira ngo pamusoro po “mupocero wo uxaixi.” Zvinoshandisa kudini izvi?

Zvecivoneka kuti mundhu umwe wakakwana, Adhamu, hwakanghwinisa ushaishi no rufu kwatiri ngo kutama kuzwira, mundhu wakakwana no anozwira waidikana kuti atisujunure ku mutoro wondhowo pikija zvecidiwa kuti afe. Bhaibheri rinosanangura izvi mu njira ii: “Ngo kutama kuzwira ko mundhu umwe, vese vakaitwa vaxaixi. Ngo maitiro ondhoo, ngo kupurukira kwa umwe, vese vanozoita varurami.” (VaRoma 5:19) “Mundhu umwe” uwo, wainga Jesu. Paakabva mugore, wainga mundhu wakakwana *, zve wakafa ngo ndava yedu. Inga muviyo, zvinokwanisika kuti tive vakarurama pa mberi pa Mwari no kuwanazve upenyu wo kwenda no kwenda.

Ngenyi Jesu waidikana kufa kuti zvikwanirisike izvi? Mwari wo Masimba-ese aacaizodirepi hake mutemo wo kuti mubarihwana wa Adhamu utendehwe kurarama kwenda no kwenda here? Iyena wainga no simba ro kuita zvondhozvo. Asi izvo zvaizova kanija zvainanga mutemo wake zvokuti ushaishi unodikana kuripwa ngo upenyu. Mutemo uwo aucaengepi mudoko wo kuti ungasiiwa kana kucinja kuitira kurerusa. Izvi zvinodiwa kuitira urungami hwo kadi-kadi.​—Nduyo 37:28.

Pa shwiro iyi Mwari naakatama kushandisa urungami, vandhu vaizorangarira kuti mu shwiro jimweni  iyena waizozviitazve. Inga muezaniso, kureva kuti waizova urungami kudari iyena wakatanga wananga kuti ndiani pa mubarihwana wa Adhamu waizokwanirisa kuti awane upenyu ucikaperi? Iyena waizothembeka pa cigondiso cake here? Kubatisisa kwake urungami pa kushanda kuti tiwane ruponeso, i zviro zvinotithembesa kuti Mwari nguva jese anoita zvakarungama.

Ngo kufa ko kuzvipira kwa Jesu, Mwari wakafunungura guanja kuitira kurarama kwenda no kwenda mu Paradhiso pasi pano. Vonanyi zvakananga Jesu pana Johani 3:16 paakati: “Mwari wakadisa nyika yo pasi, kokuti wakapa Mwana wake umwe ega, kuti vese vanomutenda vatame kufa, kaveta vave no uhomi hucingaperi.” Ngo kudaro kufa kwa Jesu, akukhombiji basi urungami hwucikaposeki hwa Mwari asi maningi-ningi, hunokhombijavo rudo hwake hukuru ku vandhu.

Asi, ngenyi Jesu wakava anotambujika no kufa mu njira inohwaja inga zvinosananguhwa mu Mavhangeri? Ngo kuzvidira pasi po kuejwa kukuru no kuramba wakagondeka, Jesu wakakanija kamwe zve mbhera narini kupumbha ka Dhiabhu kuti vandhu avarambi vakagondeka kuna Mwari no vari pa muejo. (Jobe 2:4, 5) Kupumbha uku kangaije kwakavoneka inga kunoshanda, Sathana paakapera kunghwinisa Adhamu mu cishaishi. Asi Jesu​—uwo waiezana na Adhamu wakakwana​—wakaramba acizwira pikija no kutambujika. (1 VaKorinto 15:45) Iyena wakakhombija kuti Adhamu waizokwanisa kuzwira Mwari kudari iyena wakasana kuita kudaro. Ngo kuvangirira pasi po muejo, Jesu wakatipa muezaniso kuti tiuteveje . (1 Pedru 2:21) Mwari wakapfupa kuzwira kwakakwana ko Mwana wake, ngo kumupa upenyu ucingafi mugore.

Kufa kwa Jesu kwakaitikadi kamare. Gwanja ro kuti tirarame kwenda no kwenda rakafununguhwa. Imwimwi mungararama kwenda no kwenda here? Jesu wakatatija kuti zvicinyi zvinodikana kuitwa paakati: “Uhomi hucingaperi nga uhu: Kuti vamuzive imwimwi, Mwari umwe ega wokadi-kadi, na wiya wakatumwa ndimwi: Jesu Kristu.”​—Johani 17:3.

Vabudisi vo revhista ii vari kumukoka kuti mujije zvizinji ngo pamusoro pa Jehovha, Mwari wo kadi-kadi, zve ngo pamusoro po Mwana wake, Jesu Kristu. Zvapupu zva Jehovha zvo mu ndharaundha yenyu zvaizodakara ngo kumubesera. Mungakwanisazve kuwana masoko mazinji anobesera ngo kunghwina mu website yedu, www.dan124.com.