MUSORO WO REVHISTA | MUNGAZWISISA ZVINONANGA BHAIBHERI HERE?
Ngenyi Tinodikana Kuzwisisa Bhaibheri?
“Bhaibheri i bhuku ro vanamati rinonasa kuzivikanwa. Asi ku vaShina, i bhuku ricikazivikanwi zve arisisiri.”—LIN, SHINA.
“Anditokwanisi kuzwisisa zvinonanga mabhuku o ciara cangu co ciHindu. Ndingazozwisisa kudini Bhaibheri Rakacena?”—AMIT, INDIA.
“Ndinoreremeja Bhaibheri inga bhuku ro kare, zve ndinondozwa kuti Bhaibheri i bhuku rinonyanya kutengeswa. Andito ndikamborivona kamare.”—YUMIKO, JHAPAU.
Vandhu vazinji pasi pese vanoreremeja Bhaibheri. Ngo kudaro, kudari veciziva ciri cese ngo pamusoro po zviri mu Bhaibheri, kangaije vangaziva zvishoma. Izvi ngo zvokadi kamare ku ma miriyau o vandhu vanorarama ku Azia, asi ngo zvokadiwo ku vazinji vari mu nyika jo kuti Bhaibheri rinozivikanwa ngo vandhu vakawanda.
Asi, kangaije mungabvunjisa kuti, ‘Ngenyi ndecidikana kuda kuzwisisa Bhaibheri?’ Kuzwisisa zvinorehwa ngo bhuku iri rakacena, kungamubesera kuita zvinotevera:
-
Kukwanihwa ngo zvamunazvo zve mova anodakara
-
Kuziva mahwisire amungaita zvineso zvo mbhuri
-
Kuhwisana no kuthimwa-thimwa
-
Kuva no shamwari jakanaka
-
Kuziva mashandisire amungaita mare no ungwaru
Vonanyi muezaniso wa Yoshiko, anogara ku Jhapau. Iyena waida kuziva zvinonanga Bhabheri zve wakasunga kuriverenga pacake. Ngo wapi wakava muviyo? Iyena wakati, “Bhaibheri rakandibesera kuti ndiwane cidisiso mu upenyu no kuwana vetero yo kumbeji,” wakaengejera eciti: “Andicinazve mazwiro o kutama kuziva ciro.” Amit, wambonangwaya pakutanga, wakazosunga kupopora Bhaibheri pacake. Iyena wakati: “Ndakakahamara. Bhaibheri rino masoko anoshanda ku mundhu ari wese.”
Bhaibheri riri kupsasa maningi upenyu wo mamiriyau o vandhu. Ngenyi amuripopori pacenyu kuitira kuvona kuti ringamubeseresa kudini?
