Mujiji umweni anodanijwa kuti Alan S. Duthie, wakatara kudari mu bhuku rake rinozwi, Bible Translations and How to Choose Between Them: “Kudari mecitenda kuti Bhaibheri i Soko ra Mwari ku vandhu vese, izvi zvinoreva kuti Mwari ari kubhuya na itusu. . . . Kudari manamatiro enyu ecipsasa upenyu hwenyu hwese, Bhaibheri ro ndumi yamunovereketa inodikana kuva yo njiku no njiku.”

Vese vanoda Soko ra Mwari ngo mwoyo wese vanozvitenda izvi. Ivona vanotenda kuti “Matahwa ese akafemehwa ndi Mwari. Iwona anobesera pa kujijisa, kupangira, kurungamisa no kutiroveja kuti tiite zvakanaka.” (2 Timoti 3:16) Bhaibheri i bhuku ro kare. Asi irona “arifi, rino simba maningi,” irona rinopa mazano anobesera kutonga zvineso zvo njiku no njiku. (Vahebheru 4:12) Kuti bhuku iri rakaceneswari rinase kuzika no kushandiswa ngo vaverengi varo, rinodikana kuva ro mavereketero o njuku no njiku, kuti rinase kuverengwa no kuzwisika ngo vandhu vese, kubatanijavo no vacizivi kujija.

Vandhu vanoda Soko ra Mwari vakadakara maningi ngo kubudiswa ko Sandujo yo Nyika Imbza yo Matahwa o Cikristu o Cigiriki mu mavereketero o Cindau. Zvapupu zva Jehovha zvakazivisa kubudiswa ko Bhaibheri iri ngo Mudimingu njiku 28 yo mweji wa Fevereiro wo 2021. Rakabudiswa pa musongano unosisira pecishandiswa TV, radhiyo no vhidhiyo streaming. Hama Amaro Teixeira vo Komisau yo Cine ro Musambiki, vakaita ciziviso co kubudiswa ko Bhaibheri iri. Vacumaeri vanopindirija kuita 1.400 vanovereketa Cindau vakadakara ngo kuashira Matahwa o Cikristu o Cigiriki mu mavereketere o njiku ngo njiku. Vandhu vanopindirija 1.400 vakavona musongano uwu. Bhaibheri iri, rakajeka no kurungama zvoita kuti soko ra Mwari rinase kuzika mu Cindau. Kangaije mungajivhunjisa kudari: Ndiyani wakaitari basa iri ro kusanduja?

Pikija Bhaibheri iri ro Sandujo yo Nyika Imbza yo Matahwa o Cikristu o Cigiriki iri ibza ku Cindau, irona raingeyo kuvhira mu gore ro 1950. Mu gore iri, irona rakabudiswa mu Cingezi ngo Sociedade Torre de Vigia de Bíblias e Tratados. Cikwata ici co pasi pese, cakatanga kare kuita basa iri ro kusanduja Bhaibheri. Murindiri wo 15 ya Setembro wo 1950, wakananga kudari: “Vandhu vakaumba komisau yo kusanduja, vakakhombija cido cavo . . . kuti mazina avo atame kunangwa, pikija vari penye kana kuti vakafa. Ivona cido cavo ngo cokukuja Mwari wokadi-kadi, anopona.”

Bhaibheri rese ro Sandujo yo Nyika Imbza yo Matahwa Akacena, rakabudiswa mu gore ro 1961. Pikija kuti mazina avo acizivi kutahwa mbhera nyamasi, apana mathangwe angatitora kuti tipsange kuziva zvizinji ngo pamusoro po kuzvipira kwavo. Masoko o kutanga o Bhaibheri rakabudiswa mu gore ro 2013, anonanga kuti: “Ngo kuziva kuti masoko o Bhaibheri anosisira maningi, takarinasirira tecireremeja maningi masoko aro. Itusu takavona kuti tino mutoro mukuru wo kusanduja Bhaibheri mu njira yakarungama. . . . Cinangwa cedu cainga co kusanduja mu njira yakarungama, yakajeka no icikanesi kuverenga.”

Mbhera nyamasi, Mabhaibheri anopindirija 240.000.000 o Sandujo yo Nyika Imbza o Bhaibheri rese, kana divi raro, akabudiswa kutenderera pasi pese mu mavereketero anokwana kuita 200. Ngozvapi zvakavoniwa ngo vaverengi?

Jesu wakajijisa vajiji vake kuti vakumbire kudari: “Baba wedu muri kumatenga, zina renyu ngariceneswe.” (Mateu 6:9) Bhaibheri rinonanga kuti zina ra Mwari ndi Jehovha. Zina iri rinowanika munokwana kuita zviuru zvinomwe. (Exodo 3:15; Nduyo 83:18, BMAA) Pasure po kufa ko vapostori va Jesu, mu ungano yo Cikristu makazara ngo murangariro yakashata yaiitisa kuti Vajudha vatame kushandisa zina ra Mwari. (Mabasa o Vapostori 20:29, 30; 1 Timoti 4:1) Vakakhopa Matahwa o Cigiriki vakavhisa zina ra Mwari ro kuti Jehovha, vodira mu ndau yo zina ra Mwari mazina o kureremeja o kuti “Mwari” kana kuti “Mambo.”

Komisau yo Bhaibheri ro Sandujo yo Nyika imbza, yakahwirija zina ra Jehovha mu Matahwa o Cikristu o Cigiriki, * zina iri rinowanika munokwana kuita 241. Vasanduji avazivi kudira zina iri ngo kuda kwavo, asi vakapsakisisa maningi kuti vawane mu ndau maraiwanika. Inga muezaniso Ruka 4:18, yakatora masoko anowanika pana Isaia 61:1. Mu Matahwa o kutanga o Cihebheru, zina ra Jehovha raiwanika mu vhesi yondhoyo ya Isaya. Izvi ndizvona zvakaitisa kuti mu Sandujo yo Nyika Imbza, pana Ruka 4:18 inange kudari: “Mujimu wa Jehovha una inini, ngokuti wakandizoja kuti ndizivise masoko akanaka ku varombo.”

Izvi zivnobesera kuti vaverengi, vakwanise kusiyanisa Jehovha Mwari no Mwana wake umwe ega, Jesu Kristu. Inga muezaniso, vasanduji vazinji, vakasanduja kudari pana Mateu 22:44: “Tenji wakabvunja Tenji wangu.” (Biblia Mazwi a Mwari) Ndiyani waivereketa. Ecivhunja ani? Zvokadi vhesi iyi yakatora masoko ari pana Nduyo 110:1, inowanika zina ra Mwari mu matahwa o kutanga o Cihebheru. Asi mu Sandujo yo Nyika Imbza pana Mateu 22:44, inoti: “Jehovha wakavhunja Mambo wangu kuti.” Kusiyana kwa Jehovha Mwari no Mwana wake asipi zviro zvakavigika. (Marko 13:32; Johani 8:17, 18; 14:28) Itusu tinodikana kunasa kuzwisisa musiyano uripo pakati pa Jehovha Mwari no mwana wake kuti tiwane ruponeso. Mabasa o Vapostori 2:21, inoti: “Mundhu wese anodanija zina ra Jehovha anozoponeswa.”

Vasanduji vakavangisira maningi kuti vasanduje matahwa o kutanga o Cigiriki ngo njira yakarungama no kugondeka mu mavereketero o njiku ngo njiku. Inga muezaniso, Sandujo yo Nyika Imbza, yakanasa kujekesa magama o Cigiriki. Mu ndumi zinji jinoverekethwa nyamasi uno, jino magama anonasa kujekesa mukuvo wakaitika zviro; zvakadari inga zvakaitika sure, zviri kuitika wari no zvinozoitika kumbejiyo. Mu Cigiriki muno magama anokhombija mukhaindi wo zviro zviri kuitikaro; inga zviri kuitika wari, zvapera kuitika kana zviri kuenderera mberi zveciitika. Vonanyi masoko a Jesu anowanika pana Mateu 6:33. Gama ro Cigiriki rokuti “kupsaka,” rinoviisa murangariro wo kuenderera mberi kuri kupsaka. Zvakananga Jesu zvakanasa kujekeswa ngo masandujihwe aya: “Endereranyi mberi mecitanga kupsaka Umambo no ururami hwa Mwari. Zviro zvese izvi munozozviengejehwa.” Mu kuezanavo, Mateu 7:7 yakasandujwa kudari: “Endereranyi mberi mecikumbira, munozopuwa; endereranyi mberi mecipsaka, munozowana; endereranyi mberi mecigogoja, munozofunungurihwa.”—Varoma 1:32; 6:2; Vagaratiya 5:15.

Kubudiswa ko Bhaibheri ro Matahwa o Cikristu o Cigiriki mu Cindau, tiri kutanga basi. Kuri kuithwa urongwa hwo kusanduja Bhaibheri rese kuti ribude pa nguva kwayo. Vaverengi vangatovavo no cokwadi co kuti Bhaibheri ro Cindau rakarungama rojeka inga zvakaita ro Cingezi here?

Hina, ndizvona. Tinodavira kudaro ngo pamusoro po kuti basa ro kusanduja Bhaibheri iri, rainga recitungamirihwa ngo Mukhumbi Unotonga wo Zvapupu zva Jehovha. Ngo ungwaru hwese, kwakasungwa kuti kusandujwa ko Bhaibheri kuithwe ngo cikwata co hama jinovangisira. (Mazwi Akangwara 11:14) Nyamasi uno, kuno zvikwata zvakawanda maningi zvo vasanduji pasi pese. Bauhwa rinodanijwa kuti Mabasa o Kusanduja, rakagajwa ku Cine ro Pasi Pese ro Zvapupu zva Jehovha kuti ribesere zvikwata zvese zvinosanduja Bhaibheri. Ivona vanoita izvi ngo kudavira muvhunjo jese jinoithwa ngo vasanduji ava. Izvi zvinoitisa kuti ma Bhaibheri ese o Sandujo yo Nyika Imbza azwirane. Mu kuengejera, kwakanasirihwa porogarama yo mukomputadhori inodanijwa kuti Sistema de Tradução da Torre de Vigia kuti ibesere vasanduji vo Bhaibheri. Pakati po zviro zvizinji, porogarama iyi inobesera vasanduji kuti vakwanise kuvona kuti gama ro Cihebheru no ro Cigiriki rakasandujiswa kudini ku Cingezi. Izvi zvinovabesera kuti vanase kuvona kuti ngorapi gama ra ushoni ravangashandisa. Pikija zvakadaro basa ro kusanduja rinodikana kuvangisira maninigi kamare. Asi computadhori iri kubesera maningi kuitira kuti vasanduji vo Bhaibheri vanase kusanduja mu njira inozika. Izvi zivnoitisa kuti Sandujo yo Nyika Imbza inase kusandujwa mu njira yakajeka inga mazikire ainoita ku Cingezi.

Tiri kumuvangisa kuti mupopore Sandujo yo Nyika Imbza yo Matahwa o Cikristu o Cigiriki. Mungariverenga mu interneti kana mu JW Library. Kumbejiyo mungazowana Bhaibheri rakaipirimihwi kuvha ku ungano jo Zvapupu zva Jehovha. Munozodakajihwa ngo mativi akasiyana-siyana arinawo. Irona rakajeka, arinesi kuverenga, rino divi rinodanijwa kuti Zviri mu Bhuku. Divi iri rinozomupekeja mafundo makuru amunojija pa bhukuro rese. Rinozomubeserazve kuti mukasike kuwana vhesi inowanika gama ramunonasa kuziva maningi. Bhaibheri iri rino divi rimweni rinodakajisa maningi ro masoko o kuengejera. Cinosisira maningi ngo cokuti imwimwi munozoverenga Bhaibheri iri mecithemba kamare kuti irona rakanasa kusandujwa, recibudisa zvainangwaro ngo Soko ra Mwari kamare mu mavereketere amunoita njiku no njiku.