Häw ine gedanke mër måke wile un soo God ëre

AIR klauk mësch wat buiker srijwe däir, hät soo sreewe: “Wen air ni waite däit woo dai hengåe wilst, nischt däit dem helpe dår henkåme.” Dat is ërlig wår. Un däit oos wijse wij muite ine gedanke häwe dat wat wij måke wile dat oos leewend sich loone däit.

Dai Bijbel sägt oiwer feel lüür wat wule wat måke un häwe dat måkt kreege. Nóe “hät aine groote kaste buugt taum sijn familg rere”. Dat hät bijnå 50 jåre lang duurt. Dai profët Moisés “däir bijblijwe kijke nå dai beloonen wat hai krijge däir”. (Heb 11:7 un 26) Un Jehovaa hät tau Josué sägt hai schul dat Canaã land inneeme. (Deut 3:21, 22 un 28 un Jos 12:7 bet 24)

Jësus hät sägt dat ‘dai gaure nijges fon God sij Regirung up dai gans bewånend ër preegt ware däir’. (Mat 24:14) Weegen dat wat Jësus sägt hät dai apostel Paulo däir gans genau waite wat hai måke wul. Paulo hät saichen hat, hät beschaids fon dai Her Jësus kreege un har oiwer sich Jësus sijne nåme tau ale folk bekandmåke. Dit ales hät em lust geewt taum feel gemainde up feel stele insete. (Atos 9:15 un Col 1:23)

Jehovaas sijn dijners fone früüsche tijd häwe em ümer ërt as sai wat måke wule un dat måkt kreege häwe. Un hüütsendåg? Wosoo koine wij ine gedanke häwe mër måke wile? Wat kan oos helpe dat måkt krijge?

Wait woweegen wilst duu wat måke

Dai lüür koine im wile häwe irgends air dail måke. Åwer dat wat dai wat Jehovaa dijne im wile häwe, is aners as dat wat dai lüür fone wild im wile häwe. Feel lüür wile bloos gild krijge un rijk sin, åwer wij wile dat ni. Wat wij wile is daile måke wat oos helpe Jehovaa dijne un em ëre. (Mat 6:33 un 1 Tim 4:7) Wij wile dat måke weegen wij lijbe God un dai andrer lüür. (Mat 22:37 bet 39)

Kan sin wij häwe im wile mër up Jehovaa sijne arbëd måke urer mër gaure moors häwe. Hät nischt sägen wat wij wile, dat hauptsach is ales måke weegen wij lijbe Jehovaa un dai andrer lüür. Åwer, lijkerst soo, öftens wij krijge ni måkt wat wij wile. Den, wat kan oos helpe måkt krijge dat wat wij wile?

Häw aine starke wünsch

Dau ais denke an wosoo hät Jehovaa ales måkt. Hai har wat im wile, åwer hai hät dat ine stükewijs måkt. Un hai hät dat nent soo’s dåg. Wij daue dat waite weegen hai hät sägt: “Dat wäir åwend un dat wäir morgens.” (Gên 1:5, 8, 13, 19, 23 un 31) God däir waite wat hai måke schul in jërer dag. Un hai däir dat soo måke. Soo, hai hät ales måkt kreege. (Apo 4:11) Jó hät sägt: “Wen hai [Jehovaa] air dail måke wil, hai mökt dat.” (Jó 23:13) As God saie hät ales wat hai måkt har, hai hät sich sër fröögt un hät sägt: ‘Ales is sër gaud.’ (Gên 1:31)

Dat passijrt wat wij wile wij muite dat wirklig wile. Wat kan oos helpe dës stark wünsch häwe? Lijkerst as nog nischt upe Ër wäir, Jehovaa küün al saie woo fain as dai ware däir un wosoo as dat em ëren gaiw. Wen wij Jehovaa nåmåke daue un daue andenke wat dat ruutergeewe kan wat wij wile, den daue wij wirklig wünsche dat måke. Dit is passijrt mit Tony wat 19 jåre har. Dat airst mål as hai ain Betel besöcht hät, hai hät ais nij forgeete wat hai dår saie hät. Nå dit besuiken Tony däir sich fråge: ‘Wosoo wäir leewe up soo’ne stel?’ Tony hät ais nij anhule dår andenke. Dårweegen hät hai sich anstrengt taum dat måkt krijge. Feel jåre nåheer is hai annåme woore taum in Betel arbëre un dat hät em sër fröögt.

Anerd årt taum oos wünsch grööter måke taum måkt krijge wat wij wile, is oos t’hoophule mit dai wat dat al måkt kreege häwe. Jayson wat 30 jåre uld is, sägt wat mit em passijrt is. As hai jong wäir, hai wul ni gërn upe preegarbëd gåe. Nådem dat hai uutlërt har ine schaul hät hai anfånge arbëre soo as pionijr. Wat hät Jayson hulpe dai wünsch häwe taum pionijr sin? Hai hät sägt: “Mit andrer fortele un mit eer t’hooparbëre wat al pionijr wäire hät mij sër hulpe.”

Srijw wat’s duu måke wilst

Wen’s duu im wile häst wat måke, wat kan dij helpe? Dau ain list måke mit dai daile wat’s duu måke wilst. Soo, wart lichte sin måkt krijge wat’s duu måke wilst. Salomão hät sägt dat klauke wöör koine oos helpe gaure uutsuike måke. (Ecl 12:11) Jehovaa hät sägt dat dai köönigs fon Israel müste dai lei leese un denåste dai srijwe. Soo, ümer wen sai leese däire dat wat sai sreewe hare, sai däire waite wat sai måke müste. (Deut 17:18) Den, dau srijwe dai daile wat’s duu måke wilst un wat’s duu måke must taum dat måkt krijge. Srijw uk wat dij forstööre küün un wosoo kast duu dat oiwerståe. Wen’s duu upsuike däist oiwer dat wat’s duu måke wilst un hülp tau andrer lüür forlangst dat kan uk dij helpe måke wat’s duu måke wilst.

Geoffrey wäir pionijr in Ásia un däir al tijd preege. Åwer mit ais is em sijn fruug doodbleewe un dårweegen hai is sër traurig un forsåcht woore. Åwer hai wul gërn bijblijwe preege. Dun, hai hät anfånge ane srijwen dai daile wat hai måke wul un däir dåroiwer beere. Air dail wat hai wul wäir in air månat drai bijbelstuune häwe. Geoffrey däir sich anstrenge taum preegen un däir ümer leese dai daile wat hai sreewe har. Krëg hai måkt wat hai måke wul? Jå. Un hai hät fair bijbelstuune im månat kreege.

Fängt an mit daile wat’s duu måkt krijgst

Dat kan soo låte dat wek daile wat wij wile sin sër swår taum krijgen. Tony, air kërl woo wij al oiwer fortelt häwe, wul gërn in Betel arbëre. Åwer hai däir denke dat dat ni mööglig wäir, weegen hai däir feel forkërde daile måke un wäir nog ni Tüüge fon Jehovaa. Tony hät andacht an daile wat hai måke küün. Hai hät anfånge dai daile wat richtig wäire måke un hät sich tauwe låte. Hai hät sich anstrengt taum hülpspionijr sin un nåheer pionijr. As hai dës daile måkt hät, hai hät saie dat arbëre in Betel wäir ni wat tau swår taum krijgen.

Dat neemlig kan mit dij passijre. Kan sin duu wilst wat måke wat löt tau swår taum krijgen. Wat kan dij den mithelpe? Denk an wat’s duu måke kast un dau dat måke. Nå dat’s duu dat måkt krijgst denk an anerd daile wat’s duu måke kast. Dit däit dij helpe ni nålåte un krijge dat wat’s duu wilst. Dau uk tau Jehovaa beere dat hai dij mithelpe däit taum dit måkt krijge. Dai apostel Paulo hät oos formånt: “Daut ümer beere.” (1 Tes 5:17)

Låt ais ni nå

Lijkerst dat wij oos anstrenge daue, kan sin dat wij air dail ni måkt krijge wat wij måke wule. Dit is passijrt mit Marcos. Marcos wul gërn dat dai apostel Paulo em uutsuike däir taum mit em rëse gåe taum preegen. Åwer Paulo hät ni wut em mitneeme. (Atos 15:37 bet 40) Marcos hät ni nålåte. Hai hät anerd dail måkt taum bijblijwe preege. Dat is sër gaud wääst. Marcos is hengåe nå Babilônia taum t’hoop mit Pedro preege. Ain tijd nåheer, Paulo hät waiten kreege wat Marcos måkt har, un hät em dårweegen låwt. (2 Tim 4:11 un 1 Ped 5:13) Un air sër groot geschenk wat Marcos kreege hät taum måken is air stük ine Bijbel srijwe oiwer Jësus sij leewend.

Kan sin soo’s wij daue oos anstrenge taum air dail måke åwer dår kümt wat mank. Wij döre ni glijk nålåte. Wij muite andenke an andrer daile wat wij nog måkt krijge. Wij koine oos sicher sin up dat wat dai köönig Salomão sägt hät: “Forlåt dij up Jehovaa in ales wat’s duu mökst un dat wat’s duu wilst giwt richtig.” (Pro 16:3)

Kan sin wij krijge ni air dail måkt wat wij wule. Wij koine krank ware urer oos papa un mama uppasse un nog andrer daile. Wij muite andenke soo as air dail wat wij gërn häwe wile is dat ëwig leewend, im himel urer upe ër. (Luc 23:43 un Fil 3:13 un 14) Wosoo krijge wij dit? Dai apostel João hät sreewe: “Wee God sijne wile mökt, blijwt up ümer.” (1 João 2:17) Lijkerst wen wij ni måkt krijge air dail wat wij wile, wij ale koine oos anstrenge taum God gefale un em sij geboote horge. (Ecl 12:13) Ine gedanke häwe daile wat wij måke koine däit oos ümer helpe Jehovaa horge un em ëre.

[Tåfel]

Wek daile wat’s duu im wile häwe kast

○ Dai Bijbel jërer dag leese

○ Ale dai Wat Bekandmökt un Wåkt Up! leese

○ Beeter måke dai moor soo’s duu beere däist

○ Wijse dai gaure moors wat dai hailig gaist drögt

○ Beeter preege un inlëre

○ Mër måke in Jehovaa sijne arbëd

○ Beeter preege upe ruu, doir dai telefon un upe arbëdstel