Wen’s duu aine kenelëre wilst, dat airst dail wat’s duu em fråge däist is: woo hitst duu? Åwer, wen’s duu dës fråg tau God måke däirst, wat däir hai antwoore?

“Ik bün Jehovaa. Dit is mij nåme.” (Isaías 42:8)

Dës nåme hät groote wërd tau em selwst. Kair hät aine nåme uutsöcht tau Jehovaa. Hai selwst hät sich dëse nåme uutsöcht. Hai hät soo sägt: “Dit is mij nåme up ümer, un soo wart an mij andacht tijd nå tijd.” (Êxodo 3:15) Ine Bijbel, fijne wij wöör soo as Her, Fåter un soo wijrer taum oiwer God fortele. Åwer sij nåme, Jehovaa, wart feel mër benutst as irgends air fon dës andrer wöör un uk mër as andrer nåmen wat ine Bijbel ståe, soo as Abraão, Moisés, Davi un Jësus. Nog as dit, Jehovaa wil dat dai lüür em sijne nåme waite schåle. Ine Bijbel stäit: “Dat dai lüür waite dat’s duu, wem sij nåme Jehovaa is, bloos duu dai Alehöögst büst oiwer dai gans ër.” (Salmo 83:18)

Dës nåme hät groote wërd tau Jësus. In dai Vater Unser, Jësus hät inlërt wij müste soo tau God beere: “Dij nåme schal hailig måkt ware.” (Mateus 6:9) Jësus hät uk soo beert: “Fåter, måk dijne nåme hailig.” (João 12:28) God sij nåme hailig måke har groote wërd tau Jësus. Dårweegen hät hai beert: “Ik häw eer dijne nåme bekandmåkt un dau bijblijwe der bekandmåke.” (João 17:26)

God sij nåme hät groote wërd tau dai wat em sijne wile måke. Dai wat God ine früüsche tijd horge däire, däire waite dat God eer rere un behüüte däir, sai müste God sijne nåme benutse. Ine Bijbel stäit: “Jehovaa sij nåme is air stark turm. Dai gerecht löpt dår riner un krigt behüüten.” (Provérbios  18:10) Ine Bijbel stäit uk: “Jërer dai wat Jehovaa sijne nåme anraupe däit, wart rert.” (Joel 2:32) Dai Bijbel däit uk inlëre dat dai wat wirklig God sijne wile måke, daue em sijne nåme benutse. Ine Bijbel stäit soo: “Weegen al folk ware gåe nåm een god sij nåme, åwer wij ware gåe nå Jehovaa sijm nåme, oos God, up ümer.” (Miqueias 4:5 un Atos 15:14)

God sij nåme däit oos inlëre wosoo as hai is un wat hai måke kan. Feel uutgelërte wat dai Bijbel studijre maine dat dai nåme Jehovaa bedüürt “Hai mökt wat ware schal”. Dai aigen Jehovaa hät oos hulpe dat forståe. Hai hät tau Moisés sägt: “Ik War Wat Ik Ware Wil.” (Êxodo 3:14) Soo, God sij nåme däit oos inlëre dat God is ni bloos dai wat ales måkt hät. Hai kan ales ware wat hai wil, taum sijne wile måke un kan uk måke dat dai lüür un ales wat hai måkt hät ware däit wat hai wil taum sijne wile måke. Dai Bijbel däit wöör soo as Her, Fåter un soo wijrer benutse taum oiwer God fortele. Dës wöör wijse dat hai dai gans macht hät oiwer ales. Åwer bloos God sij nåme, Jehovaa, wijst wosoo as hai is un dat hai ales ware kan taum sijne wile måke.

God sij nåme däit oos inlëre dat hai gaure ümgang mit oos häwe wil. Wat God sij nåme bedüüre däit wijst dat hai sich bekümre däit mit oos un mit ales wat hai måkt hät. God hät sijne nåme tau oos weese. Den, hai wil dat wij em kene schåle. Hai selwst hät oos sijne nåme inlërt. Hai hät ni sägt andrer schule dat måke. Dit ales wijst, God wil ni dat wij maine hai is wijdaf fon oos un dårweegen koine wij em ni gaud kenelëre. Hai wil dat wij oos sicher sin koine dat hai wirklig giwt un wil bij oos sin. (Salmo 73:28)

Wen wij God sijne nåme benutse, wij wijse dat wij gaure ümgang mit em häwe wile. Denk an aine mësche woo’s duu gaure ümgang mit häwe wilst. Duu däist dijne nåme tau em säge, åwer hai wil ni der benutse. Wil dës mësch wirklig gaure ümgang mit dij häwe? Soo wat däit mit Jehovaa passijre. Hai hät sijne nåme tau oos weese un wil dat wij dëse nåme benutse schåle. Wen wij God sijne nåme benutse, wij wijse dat wij gaure ümgang mit em häwe wile. Sogår wen air ‘angrüüwle däit an sijne nåme’, hai däit dat saie. (Malaquias 3:16)

Dat airst dail wat wij måke muite taum God kenelëre is em sijne nåme waite. Åwer sin nog andrer daile wat wij waite muite, soo’s wosoo Jehovaa is un em sijn gaure moors.