As ik geboore bün, mijn papa un mama däire upm land wåne, upe air koloni in Galicia, Espanha. Wij wäire acht kiner un ik wäir dai firt. In oose familg har feel lijb. In dai tijd in Espanha, wäir dai moor dat air fon dai kiner uutlëre däir taum katolisch praister urer freira sin. In oos familg drai häwe dat måkt.

As ik 13 jåre har, ik un mijn swester sin na Madri hengåe taum lëre taum freira sin. Åwer dår up dai stel wäir ni sër gaud weegen küüne wij mit kair fortele un kair amigos häwe. Dår wij müste bloos horge wat dai andrer freiras säge däire, beere un dai moors någåe. Morgens gans tijg, wij günge na klain kirch taum grüüwlen, åwer mëstümer ik krëg an nischt denke. Nåheer, wij däire lijrer singe un kirch hule, ales up latim språk. Ik däir bijnå nischt forståe un däir denke dat God ni dicht an mij wäir. Ik däir dai ganse dag stil blijwe. Sogår as ik un mijn swester oos trefe däire, wij küüne bloos air der andrer sage: “Låw dai hailig Marij.” Dai freiras däire oos låte bloos halw stuun fortele nåm eeten. Dår wäir gans aners as mij leewend mit mijn familg! Ik däir mij alaine forneeme un feelmål däir ik hüüle.

Ik häw nij ais fornåme dat ik ain ümgang har mit God. Lijkerst soo, ik bün freira woore as ik 17 jåre har. Ik häw bloos måkt wat dai andrer wule åwer ik wäir ni sicher of God wirklig mij uutsöcht har taum dat måke. Dai freiras däire säge wen air mësch ni dår sicher wäir, däir in’t höl gåe. Nog soo, ik wäir ni sicher. Ik wüst dat Jësus wäir ümer mank dai lüür. Hai däir eer inlëre un helpe. (Mateus 4:23 bet 25) Mit 20 jåre, ik wul ni mër freira sin. Hät mij sër bewunert as dai oiwerst freira hät mij sägt dat wen ik ni sicher wäir, dun wäir beeter wen ik soo rasch as gäit weggåe däir. Ik main sai angst har dat ik dai andrer freiras inreere däir taum uk ni mër freiras sin. Dun ik bün weggåe.

Mijn papa un mama häwe mij forståe as ik na huus tröögkåme bün. Åwer ine klain stad woo wij wåne däire wäir kain arbëd. Dun ik bün na Düütschland henrëst taum mit mijn braurer wåne. Hai däir tauhööre tau ain grup lüür wat wegschikt woore sin uut Espanha un wat comunistas wäire. Sai wäire dår hijner an dat ale, arbëdslüür, kërls un fruuges, dai neemlige recht häwe schule. Dårweegen, ik däir mij gaud befijne mank eer un bün comunista woore. Spårer hen, ik häw frigt mit air fon dai grup. Ik däir maine dat ik wat gaures måke däir as ik bläärer oiwer oose grup uutdaile däir un ine ruu rümer gåe däir taum dai lüür eer rechte forlange.

Åwer mite tijd, ik bün werer traurig woore, weegen dai comunistas däire ni någåe wat sai säge däire. Ik häw sicherhët hat dårfon as in 1971, in Frankfurt, Düütschland, wek jonges fon oose grup häwe dai stokthuus afbrent woo dai regirung fon Espanha wäir. Sai wule wijse dat sai gëgen wäire dai ungerecht un grof regirung fon Espanha. Åwer tau mij, soo as sai dat måkt häwe, wäir ni richtig.

As mij airst jong geboore is, ik häw mij kërl sägt dat ik güng ni mër up dai forsamlunge fon dai comunistas. Ik häw mij sër alaine fornåme weegen kair fon dai comunistas, wat ik ümgang har, hät mij besuikt as ik mij klair jong hat häw. Ik häw mij frågt woweegen as wij leewe daue un of dat loont sich urer ni dai wild beetermåke.

In 1976, air kërl un fruug fon Espanha, wat Jehovaas Tüügen wäire, häwe an mijn doir ranerklopt un häwe mij wek buiker oiwer dai Bijbel geewt. As sai mij werer besuikt häwe, ik häw eer feel frågen måkt oiwer woweegen sofeel nood un ungerechtigkët is. Doir dai Bijbel sai häwe al mijn frågen antwoort! Dat hät mij sër bewunert ik häw glijk annåme dai Bijbel lëre.

Am anfang ik wul bloos nijge daile lëre. Åwer ales is aners woore as ik un mijn kërl häwe anfånge up dai forsamlunge oiwer dai Bijbel gåe fon Jehovaas Tüügen. In dai tijd wij hare twai kiner. Jehovaas Tüügen däire oos mitneeme tau dai forsamlunge un sai däire oos helpe dai kiner uppasse doir dai forsamlunge oiwer. Dat hät mijn härts sër anstöt.

Lijkerst soo, wek daile ik wäir nog ni sicher. Ik häw uutsöcht mijn familg besuike in Espanha. Mijn unkel, wat katolisch praister wäir, hai wul mijn inreere dai bijbelstuun anhule. Åwer Jehovaas Tüügen häwe mij sër hulpe weegen sai däire mijn frågen antwoore doir dai Bijbel, soo as in Düütschland Jehovaas Tüügen uk måke däire. Ik häw uutsöcht as ik nå huus tröögkåme däir, ik däir bijblijwe dai Bijbel lëre. Mijn kërl wul ni mër dai Bijbel lëre, åwer ik häw ni anhule. In 1978, ik häw mij tauwe låte soo as air Tüügen fon Jehovaa.

Dai wårhët wat ik ine Bijbel lërt häw, hät mij hulpe waite woweegen wij leewe daue. In 1 Pedro 3:1 bet 4 sägt dat dai fruug mut uuner sijn kërl sijn ordnung sin, em ëre un ruig un fråm sin, weegen dat hät groote wërd tau God. Dat wat ik lërt häw ine Bijbel hät mij hulpe ain gaur mama un fruug sin.

Ik bün al Tüügen fon Jehovaa for 35 jårelang. Ik bün sër fröölig dat ik God dijne dau un dat ik höört tau tau ain wår familg in gloobe t’hoop mit fair fon mijn fijw kiner.