Jësus is doodbleewe dat dai lüür sijn süün forgeewt ware küün un dat sai up ümer leewe küüne. (Romanos 6:23 un Efésios 1:7) Jësus is reäl doodbleewe. Dit wijst dat dai lüür koine uk reäl bijblijwe, lijkerst wen sai swårhëte doirsete daue. (Hebreus 4:15)

 Wosoo küün dat passijre weegen bloos dai dood fon air mësch?

1.   Jësus is doodbleewe dat oos süün forgeewt ware küün. (Colossenses 1:14)

    Dai airst kërl, Adam, is måkt woore åne fëgel. Åwer, hai hät uutsöcht ni God horge un dit hät schårt ale dai wat fon em afstame däire. Ine Bijbel stäit: “Soo dat bloos air ni horgt hät, feel sin süündig woore.” (Romanos 5:19)

    Jësus wäir uk åne fëgels, åwer hai hät nij ais süün måkt. Dårweegen küün ‘hai sich anbaire taum oos süün forgeewe’. (1 João 2:2) Weegen dat Adam ni horgt hät, ale lüür häwe süün. Åwer, Jësus sijne dood hät måkt dat dai süün forgeewt ware küün wen sai gloobe an em hare.

    Dat kan soo t’hooppasst ware: Adam hät dai lüür forköft taum dai süün. Åwer Jësus sijne dood hät werer dai lüür tröögköft taum em. Dårweegen wen air ain süün måke däit, “häwe wij aine wat helpe däit t’hoop mit’m Fåter: Jësus Kristus, air gerecht”. (1 João 2:1)

2.   Jësus is doodbleewe “dat jërer ainsig wat an em gloobe hät ni uutrot wart, åwer up ümer leewe kan”. (João 3:16)

    Adam is måkt woore taum up ümer leewe. Åwer weegen sijn süün hai is doodbleewe. Doir Adam “dai süün int wild rinerkåme is, un dai dood doir dai süün, un soo dai dood hät ale angreepe, weegen ale hare süün måkt”. (Romanos 5:12)

    Tau dai wat gloobe häwe an Jësus, sijn dood hät ni bloos eer fraimåkt fon dai süün, åwer uk fon dai dood. Dai Bijbel däit dåroiwer säge: “Soo as dai süün regijrt hät t’hoop mit dai dood, dai gaurigkët wat wij ni wërd sin regijre däir doir dai gerechtigkët un henbringe däir nå dat ëwig leewend, doir Jësus Kristus, oos Her.” (Romanos 5:21)

    Is wår, dai lüür leewe ni feel tijd hüütsendåg. Åwer God hät forspråke dat hai ëwig leewend geewe däir tau dai lüür wat gerecht sin. Hai hät uk forspråke upwåke dai doore dat sai uk ëwig leewend krijge koine doir Jësus sijne dood. (Salmo 37:29 un 1 Coríntios 15:22)

3.   Jësus “hät horgt betm dood”. Soo, hai hät weese dat air mësch kan reäl sin tau God, lijkerst wen hai swårhëte doirsete däit. (Filipenses 2:8)

    Adam har aine körper un gedanke åne fëgels, åwer hai is afgünig wääst un hät God ni horgt, weegen hai wul tau sich häwe wat ni em hööre däir. (Gênesis 2:16 un 17 un 3:6) Ain tijd nåheer, Satan, wat God sij faind is, hät sägt “dai mësch giwt ales wat dai hät for sij leewend”. (Jó 2:4) Hai wul säge dat kair däir God horge wen hai dår nischt mit tröög krijge däir, uphaupt wen em sij leewend im gefärlig is. Åwer Jësus, wat uk åne fëgels wäir, hät God horgt in ales un is ümer reäl tau em bijbleewe, lijkerst dat hai aine schåm un slime dood hat hät. (Hebreus 7:26) Soo, Jësus hät weese dat gans sicher air mësch kan reäl sin tau God, lijkerst wen hai swårhëte doirsete däit.

Frågen oiwer Jësus sijne dood

•   Woweegen hät müst Jësus slimhëte doirsete un doodblijwe taum dai lüür rere? Woweegen hät God dår nischt tau måkt dat dai lüür ni doodblijwe däire?

   God sijn lei sägt: “Dai loon wat dai süün oos betålt is dai dood.” (Romanos 6:23) God hät dit ni forståke fon Adam, åwer hai hät sägt hai däir doodblijwe weegen dai süün. (Gênesis 3:3) As Adam süün måkt hät God hät sij woord hule, weegen hai ‘kan ni laige’. (Tito 1:2) Adam hät ni bloosig dai lüür dai süün anhakt, åwer uk dai dood.

   Lijkerst dat dai lüür wërd sin doodblijwe weegen dai süün, God hät tau eer weese sijn gaurigkët wat wij ni wërd sin. (Efésios 1:7) God hät uutsöcht dai lüür rere. Wosoo? Hai hät Jësus Kristus sij leewend geewt for oos. Soo, God hät feel gerechtigkët un barmhärtsigkët weese.

•   Wonair is Jësus doodbleewe?

   Jësus is rümer draire nåmirdags doodbleewe, in der Ooster fon dai judeus. (Marcos 15:33 bet 37) Dit is passijrt frijdag, 1 april fon dat jår 33.

•   Woo is Jësus doodbleewe?

   Jësus is doodmåkt woore “up dai Knåke Stel, wat in hebraico språk hit Gólgota”. (João 19:17 un 18) In Jësus sijn tijd, dës stel däir blijwe uut Jerusalém. (Hebreus 13:12) Kan sin dat wäir upm barg. Woweegen? Weegen dai lüür küüne Jësus saie fon wijdaf. (Marcos 15:40) Åwer wij koine oos ni sicher sin woo Gólgota blëw.

•   Wosoo is Jësus doodbleewe?

   Feel daue glööwe dat Jësus doodbleewe is an aine krüüts. Åwer ine Bijbel stäit: “Hai selwst hät oos süün up sijn körper drågt, upm poste.” (1 Pedro 2:24) Dai wat dai Bijbel sreewe häwe, häwe twai wöör benutst taum sägen oiwer dat dail wat sai benutst häwe taum Jësus doodmåke: staurós un xýlon. Feel uutgelërte lüür häwe sägt dat dat wäir soo aine grårer post.

•   Wosoo schåle wij an Jësus sijne dood denke?

   In der nacht fon der Ooster wat passijre däir ais upt jår, Jësus hät wat inset un hät tau sijn jüngers sägt: “Daut dat ümer werer taum andenken an mij.” (1 Coríntios 11:24) Stuune nåheer, Jësus is doodmåkt woore.

   Dai wat dai Bijbel sreewe häwe, häwe Jësus t’hoopmaint mit der schåp wat anbåre wäir in der Ooster. (1 Coríntios 5:7) Soo as dai Ooster däir der dai israeliten andenke helpe dat sai frai wäire un ni mër eskravs wäire, dat Åwendmål fon dem Her däit oos andenke helpe dat wij fraimåkt woore sin fone süün un dood. Dai Ooster wat måkt wäir in 14 nisã wäir måkt ais upt jår. Dårweegen daue dai kristen dat Åwendmål fon dem Her ais upt jår måke.

   Jërer jår wen dai dag is woo Jësus doodbleewe is, feel lüür daue fijre dat Åwendmål fon dem Her.