के मरियम परमेश्वरकी आमा हुन्?
बाइबलको जवाफ
होइन; बाइबलले मरियम परमेश्वरकी आमा हुन् भनेर सिकाउँदैन, न त यसले मरियमको उपासना गर्नुपर्छ वा तिनलाई महिमा दिनुपर्छ भनेर नै सिकाउँछ। a यो कुरा विचार गर्नुहोस्:
मरियमले आफू परमेश्वरकी आमा हुँ भनेर कहिल्यै पनि दाबी गरिनन्। अनि बाइबलले बताएअनुसार तिनले “परमेश्वरको छोरा”-लाई जन्म दिइन्, परमेश्वरलाई होइन।—मर्कूस १:१; लूका १:३२.
येशू ख्रीष्टले पनि मरियम परमेश्वरकी आमा हुन्; त्यसैले तिनलाई विशेष भक्ति चढाउनुपर्छ भनेर कहिल्यै भन्नुभएन। बरु उहाँले त एक पटक एउटी स्त्रीले उहाँकी आमा बन्ने सुअवसर पाएकोमा मरियम धन्यकी हुन् भन्दा उनलाई यसो भनेर सच्याउनुभयो: “त्यसो होइन। धन्य त तिनीहरू हुन्, जसले परमेश्वरको वचन सुन्छन् र पालन गर्छन्!”—लूका ११:२७, २८.
“परमेश्वरकी आमा” र “थियोटोकोस्” (परमेश्वरकी जननी) भन्ने अभिव्यक्तिहरू बाइबलमा कतै पनि पाइँदैन।
बाइबलमा “स्वर्गकी रानी” भन्ने अभिव्यक्तिले मरियमलाई नभई धर्मत्यागी इस्राएलीहरूले पुज्ने एउटी देवीलाई बुझाउँछ। (यर्मिया ४४:१५-१९) “स्वर्गकी रानी” भन्ने नाम बेबिलोनी देवी इश्तारलाई (अस्तारते) दिइएको हुन सक्छ।
सुरु-सुरुका ख्रीष्टियनहरूले मरियमको उपासना गर्दैनथे, न त तिनीहरूले तिनलाई विशेष सम्मान नै दिए। एक इतिहासकारले बताएअनुसार सुरु-सुरुका ख्रीष्टियनहरूले “गुटबन्दीलाई तिरस्कार गरेका हुन सक्छन् र सम्भवतः तिनीहरू मरियमलाई अचाक्ली आदर दिँदा कुनै देवीको उपासना गरेको भान पर्न सक्छ भनेर डराएका हुन सक्छन्।”—इन क्वेस्ट अफ द जिविस् मेरी।
बाइबलले परमेश्वर सधैँ अस्तित्वमा हुनुहुन्छ भनेर बताउँछ। (भजन ९०:१, २; यशैया ४०:२८) उहाँको सुरुवात नै नभएकोले उहाँको आमा हुने त कुरै भएन। अनि अर्को कुरा, मरियमले परमेश्वरलाई आफ्नो कोखमा राख्न सम्भव छैन किनकि बाइबलले बताएअनुसार परमेश्वर उच्च स्वर्गमा समेत अटाउनुहुन्न।—१ राजा ८:२७.
मरियम—“परमेश्वरकी आमा” नभई येशूकी आमा
मरियम जन्मजातै एक यहूदी थिइन् र तिनी राजा दाऊदको घरानाकी थिइन् (लूका ३:२३-३१) तिनको विश्वास र भक्तिको कारण तिनी परमेश्वरको निगाह-पात्र हुन सकिन्। (लूका १:२८) आफ्नो छोरा येशूलाई पृथ्वीमा जन्म दिन परमेश्वरले मरियमलाई रोज्नुभयो। (लूका १:३१, ३५) पछि मरियमले आफ्नो पति यूसुफबाट अरू छोराछोरी पनि जन्माइन्।—मर्कूस ६:३.
बाइबलले पछि मरियम येशूकी चेली भइन् भनेर बताएको छ तर बाइबलले तिनको यसबाहेक अरू केही पनि बताएको छैन।—प्रेषित १:१४.
a केही धार्मिक सम्प्रदायले मरियम परमेश्वरकी आमा हुन् भनेर सिकाउँछ। तिनीहरूले मरियमलाई “स्वर्गकी रानी” वा थियोटोकोस् भन्छन्, जुन ग्रीक शब्दको अर्थ हो, “परमेश्वरकी जननी।”
अन्य रोचक विषयहरू
तिनीहरूको विश्वास अनुकरण गर्नुहोस्
मरियम—“हेर्नुहोस्, म यहोवाकी दासी हुँ!”
मरियमले गब्रिएल स्वर्गदूतलाई दिएको जवाफबाट हामी तिनको विश्वासबारे के थाह पाउन सक्छौं? तिनले अन्य कस्ता अनमोल गुणहरू प्रकट गरिन्?
बाइबलको महत्त्वपूर्ण शिक्षा
के येसु ख्रिष्ट परमेश्वर हुनुहुन्छ?
येसु ख्रिष्ट र सर्वशक्तिमान् परमेश्वर एकै जना हुनुहुन्छ कि फरक-फरक व्यक्ति हुनुहुन्छ?
बाइबलसम्बन्धी प्रश्नहरूको जवाफ
के परमेश्वर त्रिएकको भाग हुनुहुन्छ?
थुप्रै धर्मले परमेश्वर त्रिएकको भाग हुनुहुन्छ भनेर सिकाउँछ। के बाइबलले पनि त्यही कुरा सिकाउँछ?
हाम्रो बारेमा
यहोवाको साक्षीलाई भेट्न अनुरोध
बाइबलको कुनै विषयबारे यहोवाका साक्षीहरूसित भेटेर छलफल गर्नुहोस् वा निश्शुल्क बाइबल अध्ययन कसरी गरिन्छ भनी जान्नुहोस्।