ब्रह्‍माण्ड र यसमा भएको जीवन आफसेआफ आएको हो कि ईश्‍वरले सृष्टि गर्नुभएको हो? माथि उल्लेख गरिएका भौतिकशास्त्रीहरूको धारणा र बाइबलको सुरुको किताब उत्पत्तिमा लेखिएको कुरा बिलकुलै फरक छ। सबै कुरा ईश्‍वरले सृष्टि गर्नुभएको हो भन्‍ने विचारधारालाई समर्थन गर्ने मानिसहरू पनि छन्‌ भने सबै कुरा आफसेआफ आयो भन्‍ने धारणालाई समर्थन गर्ने मानिसहरू पनि छन्‌। तर यस विषयमा कतिपय मानिसहरू दोधारमा छन्‌। यसको पक्ष र विपक्षमा थुप्रै लोकप्रिय किताब लेखिएका छन्‌ अनि विभिन्‍न कार्यक्रम सञ्चालन गरिएका छन्‌।

शिक्षकहरूले ब्रह्‍माण्ड र यसमा भएको जीवन आफसेआफ आएको हो भनेर निर्धक्क भई सिकाउलान्‌। तर के तिनीहरूले यी सबै कुरा सृष्टि भएका होइनन्‌ भनेर प्रमाण दिएका छन्‌? अर्कोतर्फ धर्मगुरुहरूले सृष्टिकर्ता हुनुहुन्छ भनेर सिकाउँछन्‌। तर के तिनीहरूले त्यस धारणालाई समर्थन गर्न प्रमाणहरू दिएका छन्‌? अथवा तिनीहरूले ईश्‍वर हुनुहुन्छ भनेर सिकाएकाले हामीले तिनीहरूको कुरा विश्‍वास गर्नुपर्छ भन्छन्‌ कि?

तपाईँले सृष्टिकर्ता हुनुहुन्छ कि हुनुहुन्‍न भन्‍नेबारे सोच्नुभएको होला। तर त्यसको जवाफ कसैले दिन सक्दैन भन्‍ने लागेको हुन सक्छ। तपाईँलाई यस्तो पनि लाग्यो होला: यसको जवाफ थाह पाएर के नै फरक पर्छ र?

ब्यूँझनुहोस्‌!-को यस अङ्‌कमा सृष्टिकर्ता हुनुहुन्छ भन्‍ने कुरामा धेरै मानिसलाई विश्‍वस्त हुन मदत गरेका केही तथ्य विचार गरिनेछ। साथै ब्रह्‍माण्ड र पृथ्वीमा जीवनको सुरुवातबारे थाह पाउनु किन महत्त्वपूर्ण छ भन्‍ने प्रश्‍न छलफल गरिनेछ।