इजकिएल २०:१-४९
२० सातौँ वर्षको पाँचौँ महिनाको १० औँ दिनमा इस्राएलका केही नाइके यहोवाको विचार बुझ्न मकहाँ आए र मेरो सामुन्ने बसे।
२ तब यहोवाको यो वचन मकहाँ आयो:
३ “हे मानिसको छोरा, अब इस्राएलका नाइकेहरूसित बोल र तिनीहरूलाई भन, ‘ब्रह्माण्डका मालिक यहोवा यसो भन्नुहुन्छ: “तिमीहरू मकहाँ के सोध्न आयौ? ‘म आफ्नै कसम खाएर भन्छु, म तिमीहरूलाई जवाफ दिन्नँ’+ ब्रह्माण्डका मालिक यहोवा घोषणा गर्नुहुन्छ।”’
४ “हे मानिसको छोरा, के तिमी तिनीहरूको न्याय गर्न* तयार छौ? तिमी साँच्चै तयार छौ? तिनीहरूका पुर्खाले गरेका घिनलाग्दा कामहरू तिनीहरूलाई बताइदेऊ।+
५ तिनीहरूलाई भन्नू, ‘ब्रह्माण्डका मालिक यहोवा यसो भन्नुहुन्छ: “इस्राएललाई छानेको दिनमा+ मैले याकुबका सन्तानसित शपथ पनि खाएँ र मिश्र देशमा मैले तिनीहरूसामु आफूलाई चिनाएँ।+ हो, मैले तिनीहरूसित शपथ खाएँ र भनेँ, ‘म यहोवा तिमीहरूका परमेश्वर हुँ।’
६ त्यस दिन मैले तिनीहरूलाई मिश्र देशबाट निकालेर तिनीहरूको लागि छानेको देशमा—दूध र मह बग्ने देशमा लैजानेछु भनेर शपथ खाएँ।+ त्यो संसारकै सबैभन्दा सुन्दर देश थियो।
७ त्यसपछि मैले तिनीहरूलाई भनेँ, ‘तिमीहरूले आफूसित भएका सबै घिनलाग्दा कुरा फ्याँकिदेओ; मिश्रका घिनलाग्दा मूर्तिहरूले* आफूलाई बिटुलो नपार।+ म यहोवा तिमीहरूका परमेश्वर हुँ।’+
८ “‘“तर तिनीहरूले मेरो विद्रोह गरे र मेरो कुरा पटक्कै सुन्न चाहेनन्। तिनीहरूले आफूसित भएका घिनलाग्दा कुराहरू फ्याँकेनन् र मिश्रका घिनलाग्दा मूर्तिहरू पुज्न पनि छोडेनन्।+ त्यसैले मैले मिश्रमा तिनीहरूमाथि आफ्नो क्रोध दन्काउने र भएभरको रिस पोखाउने प्रतिज्ञा गरेँ।
९ तर तिनीहरू बसिरहेका जातिहरूमाझ मेरो नाममा कलङ्क नलागोस् भनेर मैले आफ्नो नामको खातिर कदम चालेँ।+ किनकि तिनीहरूलाई* मिश्रबाट छुटाएर ल्याउँदा मैले ती जातिहरूमाझ आफूलाई तिनीहरूसामु* चिनाएँ।+
१० त्यसैले मैले तिनीहरूलाई मिश्रबाट निकालेर निर्जनभूमिमा ल्याएँ।+
११ “‘“मैले तिनीहरूलाई मेरा विधिविधान तथा फैसलाहरू बताएँ+ ताकि ती पालन गर्ने मानिसहरू जीवित रहन सकून्।+
१२ तिनीहरूलाई पवित्र गर्ने म यहोवा नै हुँ भनेर तिनीहरूले जानून् भनी मैले तिनीहरू र मबीच चिन्हको रूपमा+ विश्रामदिन* पनि दिएँ।+
१३ “‘“तर इस्राएलको घरानाले निर्जनभूमिमा मेरो विद्रोह गऱ्यो।+ तिनीहरूले मेरा विधिविधान मानेनन् अनि मेरा फैसलाहरू तिरस्कार गरे, जुन पालन गरेमा मानिस जीवित रहन सक्छ। तिनीहरूले मेरो विश्रामदिनलाई पूर्णतया बिटुलो पारे। त्यसैले मैले तिनीहरूमाथि निर्जनभूमिमा आफ्नो रिस पोखेर तिनीहरूको नामोनिसान मेटिदिने प्रतिज्ञा गरेँ।+
१४ तर मैले जुन जातिहरूको सामुन्नेबाट तिनीहरूलाई* निकालेर ल्याएको थिएँ, तिनै जातिहरूमाझ मेरो नाममा कलङ्क नलागोस् भनेर मैले आफ्नो नामको खातिर कदम चालेँ।+
१५ तिनीहरूको लागि भनेर मैले दिएको दूध र मह बग्ने देश,+ जुन संसारकै सबैभन्दा सुन्दर देश थियो, त्यहाँ तिनीहरूलाई लैजानेछैनँ भनेर पनि मैले निर्जनभूमिमा तिनीहरूसँग शपथ खाएँ।+
१६ किनकि तिनीहरूले मेरा फैसलाहरू मानेनन्, मेरा विधिविधान पालन नगरेर मेरो विश्रामदिनलाई बिटुलो पारे। तिनीहरूको मन घिनलाग्दा मूर्तिहरूमै भएकोले मैले यस्तो शपथ खाएँ।+
१७ “‘“तर तिनीहरूलाई देखेर मलाई दया लाग्यो। त्यसैले मैले तिनीहरूलाई नाश गरिनँ। मैले निर्जनभूमिमा तिनीहरूको नामोनिसान मेटिनँ।
१८ निर्जनभूमिमा मैले तिनीहरूका छोराहरूलाई यसो भनेँ,+ ‘तिमीहरूका पुर्खाहरू जुन नीतिनियममा चले, तिमीहरू त्यसमा नचल।+ तिनीहरूको सिद्धान्त पालन नगर र तिनीहरूका घिनलाग्दा मूर्तिहरूले आफूलाई बिटुलो नपार।
१९ म यहोवा तिमीहरूका परमेश्वर हुँ। मेरा विधिविधान र फैसलाहरूबमोजिम चल।+
२० मेरो विश्रामदिनलाई पवित्र मान+ अनि त्यो तिमीहरू र मबीच चिन्ह हुनेछ। अनि म यहोवा तिमीहरूका परमेश्वर हुँ भनेर तिमीहरूले जान्नेछौ।’+
२१ “‘“तर तिनीहरूका छोराहरूले पनि मेरो विद्रोह गर्न थाले।+ तिनीहरूले मेरा विधिविधान उल्लङ्घन गरे र मेरा फैसलाहरू पालन गरेनन्, जुन पालन गरेमा मानिसले आफ्नो जीवन बचाउन सक्छ। तिनीहरूले मेरो विश्रामदिनलाई बिटुलो पारे। त्यसैले मैले निर्जनभूमिमा तिनीहरूमाथि आफ्नो क्रोध दन्काउने र भएभरको रिस पोखाउने प्रतिज्ञा गरेँ।+
२२ तर मैले जुन जातिहरूको सामुन्नेबाट तिनीहरूलाई* निकालेर ल्याएको थिएँ, तिनै जातिहरूमाझ मेरो नाममा कलङ्क नलागोस् भनेर मैले आफूलाई रोकेँ+ र आफ्नो नामको खातिर कदम चालेँ।+
२३ साथै मैले निर्जनभूमिमा तिनीहरूलाई जातिजातिमाझ र ठाउँठाउँमा तितरबितर पारिदिने शपथ खाएँ।+
२४ किनभने तिनीहरूले मेरा फैसलाहरू पालन गरेनन्, मेरा विधिविधान उल्लङ्घन गरे+ र मेरो विश्रामदिनलाई बिटुलो पारे अनि आफ्ना पुर्खाका घिनलाग्दा मूर्तिहरूको पछि लागी नै रहे।+
२५ साथै मैले तिनीहरूलाई यस्ता नीतिनियम मान्न दिएँ, जसले तिनीहरूको भलो गर्दैन थियो र यस्ता फैसलाहरू पालन गर्न दिएँ, जसले तिनीहरूको जीवन बचाउँदैन थियो।+
२६ तिनीहरूले आफ्नो पहिलो सन्तानलाई आगोमा बलि चढाएर+ आफैलाई बिटुलो पार्दा मैले रोकिनँ। तिनीहरूलाई नाश गर्न र म नै यहोवा हुँ भनेर चिनाउन मैले त्यसो गरेँ।”’
२७ “त्यसैले हे मानिसको छोरा, इस्राएलको घरानालाई भन, ‘ब्रह्माण्डका मालिक यहोवा यसो भन्नुहुन्छ: “तिमीहरूका पुर्खाले यसरी नै मलाई धोका दिएर मेरो निन्दा गरेका थिए।
२८ तिनीहरूलाई दिन्छु भनेर शपथ खाएको देशमा मैले तिनीहरूलाई ल्याएँ।+ तर जब तिनीहरूले अग्ला-अग्ला डाँडा र झ्याम्म परेका रूखहरू देखे,+ तब त्यहाँ बलि चढाउन थाले र घिनलाग्दा भेटीहरू चढाए। मीठो बास्ना आउने बलि र मद्यभेटी* पनि चढाए।
२९ त्यसैले मैले तिनीहरूलाई सोधेँ, ‘तिमीहरू त्यो अग्लो थानमा* किन जान्छौ? (त्यस ठाउँलाई आजसम्म पनि अग्लो थान भनिन्छ।)’”’+
३० “अब इस्राएलको घरानालाई भन्नू, ‘ब्रह्माण्डका मालिक यहोवा यसो भन्नुहुन्छ: “घिनलाग्दा मूर्तिहरू पुजेर के तिमीहरू पनि आफ्ना पुर्खाले जस्तै वेश्यावृत्ति* गर्छौ र आफूलाई बिटुलो पार्छौ?+
३१ घिनलाग्दा मूर्तिहरूलाई पुजेर र आफ्ना सन्तानलाई आगोमा बलि चढाएर के तिमीहरू आफूलाई अझै बिटुलो पार्छौ?+ हे इस्राएलको घराना, म तिमीहरूलाई किन जवाफ दिऊँ?”’+
“‘म आफ्नै कसम खाएर भन्छु, म तिमीहरूलाई जवाफ दिन्नँ,’+ ब्रह्माण्डका मालिक यहोवा घोषणा गर्नुहुन्छ।
३२ ‘अनि तिमीहरू मनमनै भन्छौ, “आओ, हामी अरू जातिजस्तै बनौँ, ती देशका मानिसहरूजस्तै, जो ढुङ्गा र काठका देवताहरूलाई पुज्छन्।”*+ तर तिमीहरूको यो इच्छा कहिल्यै पूरा हुनेछैन।’”
३३ “‘म आफ्नै कसम खाएर भन्छु,’ ब्रह्माण्डका मालिक यहोवा घोषणा गर्नुहुन्छ, ‘म राजाको रूपमा तिमीहरूमाथि शक्तिशाली र पराक्रमी हातले* शासन गर्नेछु र तिमीहरूमाथि आफ्नो क्रोध खन्याउनेछु।+
३४ शक्तिशाली र पराक्रमी हातले अनि क्रोध खन्याउँदै म तिमीहरूलाई जातिजातिहरूको बीचबाट निकालेर ल्याउनेछु र ती ठाउँहरूबाट जम्मा गर्नेछु, जहाँ तिमीहरूलाई तितरबितर पारिएको थियो।+
३५ म तिमीहरूलाई जातिजातिहरूको निर्जनभूमिमा ल्याउनेछु र त्यहाँ आमनेसामने तिमीहरूको इन्साफ गर्नेछु।+
३६ “‘मैले मिश्र देशको निर्जनभूमिमा तिमीहरूका पुर्खाको इन्साफ गरेझैँ म तिमीहरूको पनि इन्साफ गर्नेछु,’ ब्रह्माण्डका मालिक यहोवा घोषणा गर्नुहुन्छ।
३७ ‘म तिमीहरूलाई गोठालोको लौरोमुनिबाट छिर्न लगाउनेछु+ र तिमीहरूलाई करारको बन्धनमा बाँध्नेछु।
३८ तर म तिमीहरूमाझ भएका विद्रोहीहरू र मेरो विरुद्धमा पाप गर्नेहरूलाई हटाउनेछु।+ तिनीहरू प्रवासी भएर बसेको ठाउँबाट म तिनीहरूलाई निकालेर ल्याउनेछु तर तिनीहरू इस्राएलमा पस्न पाउनेछैनन्।+ तब म नै यहोवा हुँ भनेर तिमीहरूले जान्नेछौ।’
३९ “हे इस्राएलको घराना, तिमीहरूलाई ब्रह्माण्डका मालिक यहोवा यसो भन्नुहुन्छ: ‘जाओ, आफूसित भएका घिनलाग्दा मूर्तिहरू पुज।+ तर त्यसपछि पनि तिमीहरूले मेरो कुरा सुनेनौ भने तिमीहरूले यसको परिणाम भोग्नुपर्नेछ। तिमीहरूले आफ्ना बलिदानहरू र घिनलाग्दा मूर्तिहरूद्वारा मेरो पवित्र नाममा फेरि कलङ्क लगाउन सक्नेछैनौ।’+
४० “ब्रह्माण्डका मालिक यहोवा घोषणा गर्नुहुन्छ, ‘मेरो पवित्र डाँडामा, इस्राएलको डाँडामा+ इस्राएलको सम्पूर्ण घरानाले मेरो सेवा गर्नेछ।+ म तिमीहरूलाई ग्रहण गर्नेछु र तिमीहरूले चढाएका सबै पवित्र कुरा—भेटीहरू र उब्जनीको पहिलो फल स्विकार्नेछु।+
४१ मैले तिमीहरूलाई तितरबितर पारेको ठाउँबाट र जातिजातिहरूको माझबाट निकालेर ल्याएपछि तिमीहरूले चढाएको भेटीको मीठो बास्नाले गर्दा म तिमीहरूदेखि खुसी हुनेछु।+ अनि जातिजातिसामु म तिमीहरूमाझ आफ्नो पवित्रता प्रकट गर्नेछु।’+
४२ “‘तिमीहरूका पुर्खालाई दिन्छु भनेर शपथ खाएको इस्राएल देशमा तिमीहरूलाई पुऱ्याएपछि+ म नै यहोवा हुँ भनेर तिमीहरूले जान्नेछौ।+
४३ अनि त्यहाँ तिमीहरूले आफ्नो व्यवहार र कामहरूद्वारा कसरी आफूलाई बिटुलो पाऱ्यौ भनेर सम्झनेछौ+ अनि आफ्ना खराब कामहरू सम्झेर आफैलाई घृणा गर्नेछौ।+
४४ हे इस्राएलको घराना, म तिमीहरूको दुष्ट र भ्रष्ट कामअनुसार होइन बरु आफ्नो नामको खातिर कदम चाल्छु भनेर जब तिमीहरूले बुझ्नेछौ, तब म नै यहोवा हुँ भनेर तिमीहरूले जान्नेछौ,’+ ब्रह्माण्डका मालिक यहोवा घोषणा गर्नुहुन्छ।”
४५ यहोवाको वचन फेरि मकहाँ आयो। उहाँले मलाई भन्नुभयो:
४६ “हे मानिसको छोरा, दक्षिणतिर हेर, त्यसविरुद्ध भविष्यवाणी गर; दक्षिणको वनविरुद्ध भविष्यवाणी गर।
४७ दक्षिणको वनलाई भन्नू, ‘यहोवाको वचन सुन्। ब्रह्माण्डका मालिक यहोवा यसो भन्नुहुन्छ: “म तँविरुद्ध आगो सल्काउनेछु+ र त्यसले तँकहाँ भएका सबै रूख भस्म पार्नेछ, चाहे ती हरिया होऊन् वा सुकेका। यो दन्केको आगो निभ्नेछैन+ र दक्षिणदेखि उत्तरसम्म सबैको अनुहार डढ्नेछ।
४८ आगो निभ्नेछैन र म यहोवाले नै त्यो आगो लगाएको हुँ भनेर सबैले देख्नेछन्।”’”+
४९ अनि मैले भनेँ: “हे ब्रह्माण्डका मालिक यहोवा, तिनीहरू मलाई यसो भन्दै छन्, ‘यसले अड्को मात्र थापेको होइन र?’”
फुटनोटहरू
^ वा “तिनीहरूलाई न्यायदण्ड सुनाउन।”
^ यहाँ प्रयोग भएको हिब्रू शब्द “जनावरको दिसा” जनाउने शब्दसित सम्बन्धित हुन सक्छ र यसलाई घृणा व्यक्त गर्न प्रयोग गरिएको छ।
^ अर्थात्, इस्राएलीहरूलाई।
^ अर्थात्, इस्राएलीहरूसामु।
^ हिब्रू भाषामा सबाथ। शब्दावलीमा “विश्रामदिन” हेर्नुहोस्।
^ अर्थात्, इस्राएलीहरूलाई।
^ अर्थात्, इस्राएलीहरूलाई।
^ साँचो परमेश्वरको उपासनालाई त्यागेर झूटा देवताहरूलाई पुज्नुलाई वेश्यावृत्तिसित तुलना गरिएको छ।
^ वा “देवताहरूको सेवा गर्छन्।”
^ शा., “पसारिएको हातले।”
