इजकिएल ३०:१-२६
३० यहोवाको वचन फेरि मकहाँ आयो। उहाँले मलाई भन्नुभयो:
२ “हे मानिसको छोरा, भविष्यवाणी गर र भन, ‘ब्रह्माण्डका मालिक यहोवा यसो भन्नुहुन्छ:
“‘हाय! त्यो दिन आउँदै छ,’ भन्दै बिलौना गर।”
३ किनकि त्यो दिन नजिकै छ। हो, यहोवाको दिन नजिकै छ।+
त्यो दिन आकाशलाई कालो बादलले ढाक्नेछ,+ त्यो जातिजातिको इन्साफको समय हुनेछ।+
४ मिश्रमाथि तरबार प्रहार गरिनेछ र त्यहाँ भएको काटमार देखेर इथियोपियामा आतङ्क मच्चिनेछ;
मिश्रका धनसम्पत्ति लगिनेछन् र त्यसका जगहरू भत्काइनेछन्।+
५ इथियोपिया,+ पत,+ लुद र अरू राष्ट्रका सबै मानिस
अनि कुबका मानिसहरूका साथै करार गरेको राष्ट्रका* छोराहरू पनि
त्यही तरबारले काटिनेछन्।
६ यहोवा यसो भन्नुहुन्छ:
‘मिश्रका समर्थकहरू पनि काटिनेछन्
अनि त्यसको सेखी झारिनेछ।’+
“‘मिग्दोलदेखि+ सिनेसम्मै+ तिनीहरू तरबारले काटिनेछन्,’ ब्रह्माण्डका मालिक यहोवा घोषणा गर्नुहुन्छ।
७ ‘उजाड भएका देशहरूमध्ये त्यो सबैभन्दा उजाड पारिनेछ अनि त्यसका सहरहरूजत्तिको तहसनहस भएको सहर अरू कुनै पनि हुनेछैन।+
८ मिश्रमा र त्यससित साठगाँठ गरेका सबै राष्ट्रमा म आगो लगाइदिनेछु, तब तिनीहरूले म नै यहोवा हुँ भनेर जान्नेछन्।
९ आफूमाथि ज्यादै भरोसा गर्ने इथियोपियालाई तर्साउन म त्यो दिन सन्देशवाहकहरूलाई जहाजमा पठाउनेछु; मिश्रको इन्साफको दिनमा तिनीहरू डरले थरथर काँप्नेछन् किनभने त्यो दिन निश्चय आउनेछ।’
१० “ब्रह्माण्डका मालिक यहोवा यसो भन्नुहुन्छ: ‘म मिश्रका मानिसहरूलाई बेबिलोनका राजा नबुकद्नेजरको* हातबाट नाश गर्नेछु।+
११ तिनी र तिनका फौज, जो अत्यन्तै निष्ठुर र क्रूर छन्,+ तिनीहरूलाई मिश्र नाश गर्न पठाइनेछ। तिनीहरूले मिश्रलाई आफ्नो तरबारले प्रहार गर्नेछन् र देशभरि लासको थुप्रो लगाउनेछन्।+
१२ म नाइल नदीका नहरहरूलाई+ सुकाइदिनेछु र मिश्रलाई दुष्टहरूको हातमा बेचिदिनेछु। त्यो देश र त्यसमा भएका सबै कुरा विदेशीको हातबाट उजाड हुनेछन्।+ म यहोवाले नै यसो भनेको हुँ।’
१३ “ब्रह्माण्डका मालिक यहोवा यसो भन्नुहुन्छ: ‘म घिनलाग्दा मूर्तिहरू* पनि नष्ट गर्नेछु र नोफका* निकम्मा देवताहरूलाई हटाइदिनेछु।+ त्यसपछि मिश्रबाट फेरि कहिल्यै कुनै शासक खडा हुनेछैन र म त्यहाँ आतङ्क फैलाइदिनेछु।+
१४ म पाथ्रोसलाई उजाड पारिदिनेछु,+ जोअनमा आगो लगाइदिनेछु अनि नोलाई* पनि सजाय दिनेछु।+
१५ मिश्रको बलियो गढ सिनमाथि म रिस पोख्नेछु र नोका बासिन्दाहरूलाई नाश गर्नेछु।
१६ मिश्रमा म आगो लगाइदिनेछु, सिन डरले थरथर काँप्नेछ, नो तहसनहस हुनेछ र नोफमाथि* दिउँसै आक्रमण हुनेछ।
१७ ओन* र पिबेसेथका युवकहरू तरबारले काटिनेछन् र सहरवासीहरू कैदमा लगिनेछन्।
१८ मैले तपनेसमा मिश्रको जुवा भाँच्दा त्यहाँ अन्धकार छाउनेछ।+ त्यसको सेखी झर्नेछ+ अनि कालो बादलले त्यसलाई ढाक्नेछ र त्यसका सहरवासीहरू कैदमा लगिनेछन्।+
१९ म मिश्रलाई सजाय दिनेछु। तब म नै यहोवा हुँ भनेर तिनीहरूले जान्नेछन्।’”
२० अनि ११ औँ वर्षको पहिलो महिनाको सातौँ दिनमा यहोवाको वचन मकहाँ आयो। उहाँले मलाई भन्नुभयो:
२१ “हे मानिसको छोरा, मैले मिश्रका फारोको पाखुरा भाँचिदिएको छु। त्यसलाई निको पार्न मलहमपट्टी गरिनेछैन र पाखुरा कमजोर भएकोले त्यसले तरबार उठाउन सक्नेछैन।”
२२ “त्यसैले ब्रह्माण्डका मालिक यहोवा यसो भन्नुहुन्छ: ‘म मिश्रका फारोविरुद्ध खडा भएको छु।+ म त्यसको भाँचिएको र बलियो दुवै पाखुरा भाँचिदिनेछु।+ त्यसको हातबाट तरबार खसालिदिनेछु।+
२३ त्यसपछि म मिश्रीहरूलाई जातिजातिबीच र देशदेशमा तितरबितर पारिदिनेछु।+
२४ म बेबिलोनका राजाको पाखुरा बलियो पारिदिनेछु*+ र मेरो तरबार तिनको हातमा थमाइदिनेछु।+ अनि म फारोका पाखुरा भाँचिदिनेछु र त्यो मर्न लागेको मानिसजस्तै बेबिलोनका राजासामु छटपटाएर कराउनेछ।
२५ म बेबिलोनको राजाका पाखुरा बलियो पारिदिनेछु तर फारोका पाखुरा भने लुलो बनाउनेछु। अनि जब म बेबिलोनका राजाको हातमा मेरो तरबार थमाइदिनेछु र तिनले मिश्रविरुद्ध तरबार चलाउनेछन्,+ तब म नै यहोवा हुँ भनेर तिनीहरूले जान्नेछन्।
२६ म मिश्रीहरूलाई जातिजातिबीच र देश-देशमा तितरबितर पारिदिनेछु।+ तब म नै यहोवा हुँ भनेर तिनीहरूले जान्नेछन्।’”
फुटनोटहरू
^ यसले मिश्रीहरूसित गठबन्धन गरेका इस्राएलीहरूलाई जनाएको हुन सक्छ।
^ शा., “नबुकद्रेजरको।” नबुकद्नेजर नामको अर्को हिज्जे।
^ वा “मेम्फिसका।”
^ यहाँ प्रयोग भएको हिब्रू शब्द “जनावरको दिसा” जनाउने शब्दसित सम्बन्धित हुन सक्छ र यसलाई घृणा व्यक्त गर्न प्रयोग गरिएको छ।
^ अर्थात्, थेबेसलाई।
^ वा “मेम्फिसमाथि।”
^ वा “हेलिओपोलिस।”
^ वा “राजाको शक्ति बढाउनेछु।”
