इजकिएल ३१:१-१८
-
अग्लो देवदार मिश्रको पतन (१-१८)
३१ एघारौँ वर्षको तेस्रो महिनाको पहिलो दिन यहोवाको यो वचन फेरि मकहाँ आयो। उहाँले मलाई भन्नुभयो:
२ “हे मानिसको छोरा, मिश्रका फारो र त्यसका मानिसहरूलाई भन्नू,+
‘तेरो महानताको तुलना म कोसित गरूँ?
३ एक जना अस्सेरियाली थियो, लेबनानको एउटा देवदार।
त्यसका हाँगाहरू असाध्यै सुन्दर, झ्याम्म परेका र लामा-लामा थिए।
त्यसको टुप्पो आकाशसम्मै पुगेको थियो।
४ प्रशस्त पानी पाएकोले त्यो निकै ठूलो भयो, गहिरो मूलबाट पानी पाएकोले हलक्क बढ्यो।
त्यो जहाँ रोपिएको थियो, त्यसका चारैतिर खोलाहरू थिए;
ती खोलानालाले मैदानका सबै रूखलाई पानीले भिजाउँथ्यो।
५ त्यसैले त्यो मैदानका अरू रूखभन्दा अग्लो भयो।
खोलाहरूमा प्रशस्त पानी भएकोले
त्यसका हाँगाबिँगा झाँगिँदै गए र लामा-लामा भए।
६ आकाशका सबै चराले त्यसमा गुँड बनाए;
सबै जङ्गली जनावर त्यसका हाँगामुनि आएर ब्याए;
ठूलठूला जातिहरूले त्यसको छहारीमुनि शरण लिए।
७ त्यसको जरामा प्रशस्त पानी पुगेकोले
त्यसका हाँगाबिँगा लामा-लामा भए र त्यो एकदमै सुन्दर देखिन्थ्यो।
८ परमेश्वरको बगैँचामा भएका कुनै पनि देवदार+ त्यसको बराबरीमा आउन सक्दैनथ्यो।
त्यसको जस्तो हाँगा कुनै पनि धुपीको थिएन।
त्यसको जस्तो हाँगाबिँगा कुनै पनि कटुसको थिएन।
परमेश्वरको बगैँचामा भएको अरू कुनै पनि रूख त्योजस्तो सुन्दर थिएन।
९ मैले त्यसलाई झ्याम्म परेको र सुन्दर बनाएँ।
अदनको बगैँचाका अर्थात् साँचो परमेश्वरको बगैँचाका सबै रूखले त्यसको डाह गर्थे।’
१० “त्यसैकारण ब्रह्माण्डका मालिक यहोवा यसो भन्नुहुन्छ: ‘त्यो ज्यादै अग्लो भएर त्यसको टुप्पो बादलसम्मै पुग्यो र त्यो घमन्डले फुल्यो।
११ त्यसैले म त्यसलाई जातिजातिमध्येको शक्तिशाली शासकको हातमा सुम्पनेछु।+ तिनी त्यसविरुद्ध उठ्नेछन् र त्यसको दुष्टताको कारण म त्यसलाई तिरस्कार गर्नेछु।
१२ अनि अत्यन्तै निष्ठुर र क्रूर विदेशीहरूले त्यसलाई ढाल्नेछन् र त्यसलाई पहाडमा अलपत्र छोड्नेछन्। त्यसका पातहरू तल बेँसीमा झर्नेछन् र त्यसका हाँगाहरू खोलाहरूमा छरपस्ट हुनेछन्।+ त्यसको छहारीमुनि शरण लिएका सबै मानिस त्यसलाई छोडेर भाग्नेछन्।
१३ त्यसको मुढामा आकाशका सबै चराचुरुङ्गी र त्यसका हाँगाहरूमा सबै जङ्गली जनावर बस्नेछन्।+
१४ त्यस उप्रान्त खोलाछेउको कुनै पनि रूख असाध्यै अग्लो हुनेछैन वा त्यसको टुप्पोले बादल छुनेछैन र प्रशस्त पानी पाएको अरू कुनै पनि रूख बादलसम्मै पुग्नेछैन। किनकि तिनीहरू नाश हुनेछन् र मरिसकेका अरू मानिससँगै गहिरो खाडलमा* जानेछन्।’
१५ “ब्रह्माण्डका मालिक यहोवा यसो भन्नुहुन्छ: ‘त्यो रूख चिहानमा* जाने दिन म मानिसहरूलाई शोक मनाउन लगाउनेछु। त्यसले पानी नपाओस् भनेर म पानीका गहिरा मुहानहरू बन्द गरिदिनेछु र खोलाहरू थुनिदिनेछु। यसरी म लेबनानलाई शोकाकुल पार्नेछु र मैदानका सबै रूख ओइलाउनेछन्।
१६ त्यो ढलेको आवाज सुनेर जातिजातिका मानिस त्रसित हुनेछन्। म त्यसलाई मरेका सबै मानिस पुग्ने गहिरो खाडलमा* जाक्नेछु। तब अदनका सबै रूखले,+ लेबनानका सबैभन्दा असल र राम्रा रूखले, प्रशस्त पानी भएको ठाउँका रूखले गहिरो खाडलमा सान्त्वना पाउनेछन्।
१७ देवदारको त्यो रूखसँगसँगै ती रूखहरू पनि चिहानमा* जानेछन्,+ जहाँ तरबारले काटिएका रूखहरू छन्। त्यस रूखको छत्रछायामा बसेका जातिजातिका त्यसका समर्थकहरू* पनि त्यससँगसँगै जानेछन्।’+
१८ “‘अदनको अरू कुनचाहिँ रूखले तैँले जति ख्याति अनि महिमा पाएको थियो र?+ तँ अदनका रूखहरूसँगै काटिनेछस् र चिहानमा जानेछस्। बेखतनेहरूसँगै* र तरबारले काटिएकाहरूसँगै तँ पनि गाडिनेछस्। फारो र त्यसका मानिसहरूमाथि यो सब आइपर्नेछ,’ ब्रह्माण्डका मालिक यहोवा घोषणा गर्नुहुन्छ।”
