इजकिएल ३५:१-१५
-
सेइरका पहाडहरूविरुद्ध भविष्यवाणी (१-१५)
३५ यहोवाको वचन फेरि मकहाँ आयो। उहाँले मलाई भन्नुभयो:
२ “हे मानिसको छोरा, सेइरको पहाडी इलाकातिर+ फर्केर त्यसविरुद्ध भविष्यवाणी गर।+
३ त्यसलाई भन, ‘ब्रह्माण्डका मालिक यहोवा यसो भन्नुहुन्छ: “हे सेइरको पहाडी इलाका, म तँविरुद्ध खडा भएको छु। म तँमाथि आफ्नो हात उठाउनेछु अनि तँलाई निर्जन र उजाड पारिदिनेछु।+
४ म तेरा सहरहरू ध्वस्त पार्नेछु अनि तँ निर्जन र उजाड हुनेछस्+ अनि तैँले म नै यहोवा हुँ भनेर जान्नेछस्।
५ किनकि तैँले इस्राएलीहरूसित सधैँ दुस्मनी गरिस्+ अनि तिनीहरूमाथि विपत्ति आउँदा, तिनीहरूलाई दण्ड दिएर अन्तिम न्याय गर्ने समय आउँदा तैँले तिनीहरूलाई तरबारको सिकार हुन दिइस्।”’+
६ “ब्रह्माण्डका मालिक यहोवा घोषणा गर्नुहुन्छ, ‘म आफ्नै कसम खाएर भन्छु, म तँलाई मृत्युको योग्य ठहराउनेछु अनि मृत्युले* तँलाई पछ्याउन छोड्नेछैन।+ तँ जसलाई घृणा गर्थिस्, तिनीहरूलाई तैँले मृत्युमा पुऱ्याइस्, त्यसैले तँलाई पनि मृत्युमा पुऱ्याइनेछ।+
७ म सेइरको पहाडी इलाकालाई निर्जन र उजाड बनाउनेछु।+ अनि त्यसको बाटो भएर आवतजावत गर्ने जोकोहीलाई नाश गर्नेछु।
८ म तेरो पहाडी इलाका लासैलासले भरिदिनेछु अनि तरबारले काटिएकाहरूको लासले तेरा पहाड, बेँसी र सबै खोलानाला भरिनेछन्।
९ तँ सदाको लागि उजाड हुनेछस् र तेरा सहरहरू कहिल्यै आबाद हुनेछैनन्+ अनि तैँले म नै यहोवा हुँ भनेर जान्नेछस्।’
१० “तैँले यसो भनिस्, ‘यी दुई जाति र यी दुई देश मेरा हुनेछन् र म यिनीहरूमाथि कब्जा जमाउनेछु।’+ तर तैँले म यहोवा त्यहीँ छु भनेर बिर्सिस्।
११ त्यसैले ब्रह्माण्डका मालिक यहोवा घोषणा गर्नुहुन्छ, ‘म आफ्नै कसम खाएर भन्छु, तैँले तिनीहरूसित रिस, ईर्ष्या र दुस्मनी राखेर जस्तो व्यवहार गरिस्, म पनि तँसित त्यस्तै व्यवहार गर्नेछु+ अनि मैले तँलाई दण्ड दिँदा तिनीहरूले म को हुँ भनेर जान्नेछन्।
१२ जब म तँलाई दण्ड दिन्छु, तब म यहोवाले तैँले भनेका सबै अपमानजनक कुरा सुनेको रहेछु भनेर तैँले बुझ्नेछस्। किनकि तैँले इस्राएलका पहाडहरूविरुद्ध यसो भनेको थिइस्, “ती उजाड भएका छन् र हाम्रै आहार बनेका छन्।”
१३ अहङ्कारी भई तैँले मेरो विरुद्धमा थुप्रै कुरा बोलिस्।+ मैले तेरो सबै कुरा सुनेँ।’
१४ “ब्रह्माण्डका मालिक यहोवा यसो भन्नुहुन्छ: ‘मैले तँलाई निर्जन र उजाड पार्दा सारा पृथ्वी रमाउनेछ।
१५ इस्राएलको घरानाको उत्तराधिकार खोसिँदा तँ खुब रमाएको थिइस् तर अब म तँलाई त्यसरी नै उजाड पार्नेछु।+ ए सेइरको पहाडी इलाका, हो, सारा एदोम, तँ निर्जन र उजाड हुनेछस्;+ तब मानिसहरूले म नै यहोवा हुँ भनेर जान्नेछन्।’”
फुटनोटहरू
^ वा “रक्तपातले।”
