प्रस्थान २०:१-२६
२० त्यसपछि परमेश्वरले इस्राएलीहरूलाई यी कुराहरू भन्नुभयो:+
२ “तिमीहरूलाई दासत्वको घर—मिश्रबाट छुटाएर ल्याउने म यहोवा तिमीहरूका परमेश्वर हुँ।+
३ तिमीहरूले मबाहेक अरू कुनै देवीदेवतालाई नमान्नू।+
४ “तिमीहरूले आफ्नो लागि कुनै मूर्ति नबनाउनू; माथि आकाशमा, तल पृथ्वीमा अथवा पानीमुनि भएको कुनै पनि कुराको प्रतिमा नबनाउनू।+
५ तिमीहरूले तिनीहरूलाई नढोग्नू वा अरूको लहलहैमा लागेर तिनीहरूलाई नपुज्नू+ किनकि म यहोवा तिमीहरूका परमेश्वर मबाहेक अरू कसैको भक्ति गरिएको सहँदिनँ।+ जसले मलाई घृणा गर्छ, त्यसले गरेको गल्तीको सजाय म त्यसका छोराहरू, नातिहरू र पनातिहरूलाई समेत दिनेछु।
६ तर मलाई प्रेम गर्ने र मेरो आज्ञा पालन गर्नेहरूलाई म तिनीहरूको हजारौँ पुस्तासम्म अटल प्रेम देखाउनेछु।+
७ “तिमीहरूले यहोवा आफ्ना परमेश्वरको नाम व्यर्थमा नलिनू+ किनकि उहाँको नाम व्यर्थमा लिनेलाई यहोवा परमेश्वरले सजाय नदिई छोड्नुहुन्न।+
८ “विश्रामदिन* मनाउन नबिर्सनू र त्यसलाई पवित्र मान्नू।+
९ तिमीहरूले छ दिनसम्म मेहनत गरेर आफ्नो सबै काम सिद्ध्याउनू।+
१० तर सातौँ दिन भने यहोवा परमेश्वरको लागि अलग्गै छुट्ट्याइएको विश्रामदिन हो। त्यो दिन तिमीहरूले, तिमीहरूका छोरा वा छोरीले, तिमीहरूका दास वा दासीले, तिमीहरूका घरपालुवा जनावरले वा तिमीहरूको बस्तीमा बस्ने कोही पनि विदेशीले कुनै काम नगर्नू।+
११ किनकि यहोवा परमेश्वरले छ दिनमा आकाश, पृथ्वी, समुद्र र त्यसमा भएका सबै थोक बनाउनुभयो अनि सातौँ दिनदेखि विश्राम गर्न थाल्नुभयो।+ त्यसैले यहोवा परमेश्वरले विश्रामदिनलाई आशिष् दिनुभयो र त्यसलाई पवित्र ठहराउनुभयो।
१२ “तिमीहरूले आफ्नो बुबा र आमाको आदर गर्नू;+ यसो गऱ्यौ भने यहोवा परमेश्वरले तिमीहरूलाई दिनुहुने भूमिमा तिमीहरू दीर्घायु हुनेछौ।+
१३ “तिमीहरूले हत्या नगर्नू।+
१४ “तिमीहरूले व्यभिचार* नगर्नू।+
१५ “तिमीहरूले चोरी नगर्नू।+
१६ “तिमीहरूले आफ्नो छिमेकीको विरुद्धमा झूटो साक्षी नदिनू।+
१७ “तिमीहरूले आफ्नो छिमेकीको घरको लोभ नगर्नू। छिमेकीकी पत्नी,+ तिनको दास वा दासी, तिनको गोरु, गधा वा तिनको कुनै पनि कुराको लोभ नगर्नू।”+
१८ त्यतिबेला इस्राएलीहरूले मेघ गर्जेको, बिजुली चम्केको, सिङ फुकेको र डाँडाबाट धुवाँको मुस्लो निस्केको देखिरहेका थिए। तिनीहरू डरले थरथर कामे र टाढै उभिरहे।+
१९ तिनीहरूले मोसालाई भने: “हामीसित तपाईँ नै बोल्नुहोस् र हामी तपाईँको कुरा सुन्नेछौँ। परमेश्वर आफैचाहिँ हामीसित नबोलून् भनेर बिन्ती गरिदिनुहोस् नत्र हामी मर्नेछौँ।”+
२० अनि मोसाले मानिसहरूलाई भने: “नडराओ! तिमीहरूले सधैँभरि परमेश्वरको डर मान र पाप नगर भनेर+ उहाँ तिमीहरूलाई जाँच्न आउनुभएको हो।”+
२१ त्यसैले इस्राएलीहरू टाढै उभिरहे तर मोसा भने साँचो परमेश्वर उपस्थित हुनुभएको बाक्लो बादलको नजिकै गए।+
२२ तब यहोवा परमेश्वरले मोसालाई भन्नुभयो: “तिमीले इस्राएलीहरूलाई यसो भन, ‘मैले तिमीहरूसित स्वर्गबाट बोलेको प्रमाण तिमीहरू आफैले देख्यौ।+
२३ तिमीहरूले सुन वा चाँदीको मूर्ति नबनाउनू; मबाहेक अरू कसैको उपासना नगर्नू।+
२४ तिमीहरूले मेरो लागि माटोको वेदी बनाउनू र आफ्नो भेडाबाख्रा र गाईवस्तुबाट अग्निभेटी र मेलबलि* चढाउनू। मेरो नामको सम्झना गर्न म जुन-जुन ठाउँ रोज्छु,+ त्यहाँ-त्यहाँ म आउनेछु र तिमीहरूलाई आशिष् दिनेछु।
२५ यदि तिमीहरूले मेरो निम्ति ढुङ्गाको वेदी बनायौ भने कुँदेको ढुङ्गा प्रयोग नगर्नू+ किनकि ढुङ्गा कुँद्न औजार प्रयोग गऱ्यौ भने वेदी अपवित्र हुनेछ।
२६ मेरो वेदीमा उक्लन खुड्किलाहरू नबनाउनू नत्र तिमीहरूको लाज* देखिनेछ।’
