Oto dhimbulukwa wi ihatele po esiku limwe sho wa li okanona? Otashi vulika wa li wa tetwa konyala nenge wa pugunyuka mongolo. Mbela oto dhimbulukwa nkene meme gwoye a li e ku hekeleke? Otashi vulika a li o opaleke oshilalo shoye e te shi manga. Otashi vulika wa li to lili, ihe oohapu dhe oombwanawa nodhopahole odhe ku ningitha wu kale wu uvite hwepo. Pethimbo omuntu e li okanona oha hekelekwa nuupu.

Ihe omuntu sho to koko onkalamwenyo ohayi ende tayi dhigupala. Omaupyakadhi ohaga ningi ogendji, nohashi kala oshidhigu okumona ngoka te ku hekeleke. Uupyakadhi womuntu omukuluntu ihawu kanduka po naanaa uuna a papatelwa kuyina nenge a mangwa noshilapi. Natu tale kiiholelwa yontumba.

• Mbela opu na esiku wi iyadhele wa kanitha iilonga yoye? Julian okwa ti kutya sho a lalekwa miilonga osha li she mu halutha nokwa kala a yemata noonkondo. Okwa kala ti ipula ta ti: ‘Otandi ka sila ngiini oshimpwiyu uukwanegumbo wandje? Nda kala ngaa tandi longo nuudhiginini uule woomvula adhihe ndhoka, omolwashike ongeshefa opo tayi mono kutya kandi na oshilonga?’

• Otashi vulika wa gwililwa po keyeme, molwaashoka ondjokana yeni ya teka. Raquel okwa ti: “Sho omusamane gwandje a thigi ndje po ombadhilila oomwedhi 18 dha ka pita, onda li nda gwililwa po keyeme. Onda li ndu uvite omutima gwandje gwa dhengwa pevi. Osha li sha guma ndje palutu nopamadhiladhilo nosha li sha tilitha ndje.”

• Otashi vulika wu na uuvu wa kwata miiti mboka wu wete wa fa itaawu hwepopala. Omathimbo gamwe otashi vulika ho kala wu uvite ngaashi tatekulululwa Job a li u uvite, ngoka a li a nika oluhodhi sho a ti: “Onda vulwa okukala nomwenyo; itandi kala nagwo sigo aluhe.” (Job 7:16) Otashi vulika nangoye wu uvite ngaashi Luis, omulumentu gwomimvo 80 nasha ngoka a ti: “Omathimbo gamwe onda li handi kala ndu uvite nda hala okusa.”

• Nenge tashi vulika wa pumbwa ehekeleko omolweso lyagumwe ngoka wu hole. Robert okwa ti: “Sho okamwandjemati ka sile moshiponga oshinyanyalithi shondhila, petameko kanda li tandi vulu oku shi itaala. Onda adhika kuuwehame mboka Ombiimbeli ye wu yelekanitha nengongamwele lya tsa tali ulula omuntu.” — Lukas 2:35.

Robert, Luis, Raquel naJulian oya li ya mono ehekeleko, nonando oya li moonkalo oondhigu. Oya li ya mono ehekeleko kOmunankondoadhihe, Kalunga. Okwa li e li ya pe ngiini? Mbela ota vulu oku ku pa ehekeleko ndyoka wa pumbwa?