DHILADHILA ando to ende mondjila kongulohi. Nonando etango olya ningina nale, ino tila, oshoka owu na otoshe hayi tema nawa. Ngele owa minikile nayo pevi, oto vulu okumona nawa shoka shi li komeho goye. Nuuna wa minikile nayo komeho, uuyelele wayo otawu minikile mondjila wa ya oshinano.

Ombiimbeli oya fa otoshe. Ngaashi twe shi mona miitopolwa ya tetekela, Oohapu dhaKalunga otadhi vulu oku tu kwathela tu ungaunge naashoka tashi holoka komeho getu, ano omaupyakadhi gakehe siku ngoka hage tu adha muuyuni mbuka. Ihe Ombiimbeli ohayi tu kwathele momukalo gwa dhenga mbanda. Ohayi gandja wo uuyelele kombinga yonakuyiwa, mboka hawu tu kwathele tu mone notu ende mondjila ndjoka tayi ke tu etela enyanyu tali kalelele negwaneno. (Episalomi 119:105) Ngiini mbela?

Natu taleni omikalo mbali moka Ombiimbeli tayi vulu oku tu pa etegameno lyonakuyiwa: 1 Otayi tu kwathele tu kale tu na elalakano monkalamwenyo notayi 2 tu longo nkene tu na okupanga uukuume tawu kalelele nOmushiti gwetu.

Ombiimbeli otayi gandja omayele ge shi okwiinekelwa gankene tu na okuungaunga nomaupyakadhi getu, ihe kayi shi owala embo lyokwiikwathela. Pehala lyoku tu ladhipika tu gandje owala eitulomo kiinima yopaumwene, otayi tu longo tu kale tu na ko nasha nayalwe. Shika otashi ke tu kwathela tu kale nonkalamwenyo tayi ti sha lela.

Pashiholelwa, tala kekotampango ndika lyOmbiimbeli tali ti: “Okugandja oku na elago ku vule okutaamba.” (Iilonga 20:35) Mbela oto dhimbulukwa oshikando shimwe sho wa li wa kwathele omuntu e na ompumbwe? Nenge tashi vulika wa li wi iyamba wu pulakene kukuume koye sho te ku hokololele shoka shi li momutima gwe? Mbela kawa li wa nyanyukwa sho we shi ningi?

Ohatu kala twa nyanyukwa noonkondo ngele tatu gandja inaatu tegelela tu galulilwe sha. Omunyolimambo gumwe okwa ti: “Osha pumba wu gandje sha e to kala inoo mona sha shi vulithe  pwaashoka wa gandja, ihe ino gandja nedhiladhilo lyokugalulilwa sha.” Ihe nando ongaaka, uuna tatu gandja, unene tuu kwaamboka itaaya vulu oku tu galulila sha, otatu lalekwa nuuyamba. Dhoshili, otatu longo pamwe nOmushiti gwetu, ngoka ha tala ko okulongela yalwe iilonga iiwanawa, oye e ku ningilwa. (Omayeletumbulo 19:17) Okwa lenga noonkondo shoka hatu ningile oohepele nenge mboka ye na ompumbwe, noku uvaneka kutya ote ke tu pa omwenyo gwaaluhe moparadisa kombanda yevi, etegameno ekumithi lyonakuyiwa. — Episalomi 37:29; Lukas 14:12-14. *

Komeho gaayihe, Ombiimbeli otayi tu longo kutya otatu vulu okumona elalakano lyashili monkalamwenyo ngele otatu longele Kalunga kashili, Jehova. Oohapu dhe otadhi tu ladhipike tu mu tange, tu mu simaneke notu vulike kuye. (Omuuvithi 12:13; Ehololo 4:11) Uuna tatu shi ningi, otatu ningi sha shoka oshiwanawaelela: Otatu nyanyudha Omushiti gwetu. Ote tu ladhipike ta ti: “Ninga oondunge, u nyanyudhe omwenyo gwandje.” (Omayeletumbulo 27:11) Dhiladhila owala kutya uuna tatu ningi omatokolo ge li pandunge ga kankamena komakotampango gOmbiimbeli, otatu nyanyudha omutima gwaTate yetu omunahole gwomegulu. Omolwashike mbela? Omolwaashoka oku na ko nasha natse nokwa hala tu mone uuwanawa mboka hawu zi mokulandula ewiliko lye. (Jesaja 48:17, 18) Katu na tuu elalakano lya dhenga mbanda lyokulongela Omunamapangelo agehe nolyokulonga shoka tashi nyanyudha omutima gwe!

Ombiimbeli otayi tu kumagidha wo tu pange uukuume nOmushiti gwetu. Otayi ti: “Hedheni kuKalunga, ye nota hedha kune.” (Jakob 4:8) Omathimbo gamwe otashi vulika tu kale tatu ipula ngele otashi wapa ngaa shili okuninga ookuume kOmushiti omunankondo adhihe. Ihe Ombiimbeli otayi tu shilipaleke kutya ngele otwe mu “kongo,” otatu “mu mono oshoka ke li kokule nomuntu nando ogumwe.” (Iilonga 17:27) Omayele gOmbiimbeli kombinga yokuninga ookuume kaKalunga oge na lela oshilonga ngele tashi ya ponakuyiwa yetu. Ngiini mbela?

Natu tale kwaashika: Nando otu kambadhale ngaashi tatu vulu, kapu na nando ogumwe gwomutse ta vulu okuyanda omutondi omunene, eso. (1 Aakorinto 15:26) Ihe Kalunga oko ta kala sigo aluhe. Iha si nokwa hala ookuume ke ya kale wo sigo aluhe. Ombiimbeli oya popya oohapu ndhika oombwanawa tadhi ulike shoka Jehova a halela mboka taye mu kongo tadhi ti: “Naa kale nelago sigo aluhe!” — Episalomi 22:26.

Ongiini to vulu okupanga uukuume tawu kalelele naKalunga? Tsikila okwiilonga kombinga ye mOohapu dhe, Ombiimbeli. (Johannes 17:3; 2 Timoteus 3:16) Konga ekwatho kuye, opo wu yi uve ko. Ombiimbeli otayi tu shilipaleke kutya ngele otwi ‘indile Kalunga’ oondunge, ote dhi tu pe. * (Jakob 1:5) Hugunina, kambadhala okutula miilonga shoka to ilongo, etha Oohapu dhaKalunga dhi kale ‘onyeka mokweenda kwoye, nuuyelele mondjila yoye’ ngashingeyi nosigo aluhe. — Episalomi 119:105.