Ngele otwa tseya omaukwatya gagumwe, otatu ke mu tseya nawa, nokungawo uukuume wetu naye otawu ka kala wa kola. Sha faathana, ngele otwa tseya omaukwatya gaJehova, otatu ka tseya nawa kutya okwa tya ngiini, nokungawo uukuume wetu naye otawu ka kala wa kola. Oku na omaukwatya ogendji, ihe gane gomugo ga dhenga mbanda ogo: oonkondo, uunongo, uuyuuki nohole.

‘Omuwa Omupangeliawike, ongoye wa shiti egulu nevi koonkondo dhoye.’ — JEREMIA 32:17.

Oonkondo dhaKalunga otadhi monika meshito lye. Pashiholelwa, ngele owa thikama momutenya, oshike to ka kala wu uvite koshipa shoye? Uupyu wetango. Osha yela kutya uupyu wetango mboka ho kala wu uvite owu li oonkondo dhaJehova dhokushita. Etango oli na oonkondo dhi thike peni? Ehuku lyalyo oli na uupyu wu thike lwopoodigili (°C) oomiliyona 15. Osekonde kehe etango ohali gandja oonkondo dhi thike pokutopa kwoomboma dhopalute omamiliyona ogendji.

Etango lyetu eshona moku li yelekanitha noonyothi itaadhi vulu okuyalulwa ndhoka dhi li meyalelo. Aanongononi oya tengeneka kutya onyothi yimwe onenenene kwaadhihe, yedhina UY Scuti, onene noonkondo netango muyo otali yi mo lwiikando 1 700 lwaampono. Ngele onyothi ndjoka oya tulwa mpoka pu na etango, otayi ka siikila evi nosho wo edhingolokondjila lyopulanete Jupiter. Shika otashi tu kwathele  tu uve ko nawa oohapu dhaJeremia kutya Jehova Kalunga okwa shiti egulu nevi, ano eyalelo, koonkondo dhe oonenenene.

Uuwanawa wuni hatu mono moonkondo dhaKalunga? Opo tu kale tu na omwenyo, otwa pumbwa iinima mbyoka Kalunga a shita, ngaashi etango niinima ayihe yilwe iiwanawa mbyoka yi li kevi. Kakele kaashono, oha longitha oonkondo dhe, opo e tu kwathele pauhandimwe. Ngiini? Omimvo 2 000 nasha dha ka pita, Kalunga okwa pele Jesus oonkondo a longe iikumithalonga. Ombiimbeli otayi ti: ‘Aaposi otaa mono ko, iilema otayi ende, aanashilundu otaa yele, oombolo otaa uvu ko naasi otaa yumudhwa.’ (Mateus 11:5) Ohe tu kwathele ngiini kunena? Natango Ombiimbeli otayi ti: “Oye ta tsu omukumo oonakuvulwa. . . . Mboka taa inekele Omuwa, ohaa mono oonkondo oompe.” (Jesaja 40:29, 31) Kalunga ohe tu pe “oonkondo” dhi vule ndhoka dhopaunshitwe, opo tu vule okukandula po nenge okwiidhidhimikila omaupyakadhi nomashongo monkalamwenyo. (2 Aakorinto 4:7) Osha yela kutya oto ka kala wa hala okukala nekwatathano ewanawa naKalunga. Oku tu hole noonkondo noha longitha oonkondo dhe oonene, opo e tu kwathele momaupyakadhi getu.

“Omuwa, owa shiti iinima oyindji! Tala nkene wa shiti ayihe noondunge!” — EPISALOMI 104:24.

Ngele otwi ilongo oshindji kombinga yeshito lyaJehova, otatu ka kuminwa uunongo we. Nokuli aanongononi yamwe ohaya konakona eshito Lye nohaye li holele, opo ya hwepopaleke iinima mbyoka ya nduluka po. Iinima mbyoka ya nduluka po taya holele eshito, iinima iishona, ngaashi eka lyokunateka nosho wo iinima iinene, ngaashi oondhila.

Oshinima oshikumithi shoka tashi tu ulukile uunongo waKalunga osho olutu lwomuntu. Pashiholelwa, dhiladhila omukalo moka okanona hake ya po. Ohake ya po ngele osele ndjoka hayi kala meyi ya simbapala. Mosele moka omo hamu kala uuthigululwakwatya wako awuhe. Osele ndjoka ohayi itopola moosele odhindji dha faathana. Ihe pethimbo lyontumba, oosele ndhoka ohadhi itopola moosele oonkwawo omathele dhi ikalekelwa, ngaashi oosele dhombinzi, dhonelive nodhomasipa. Konima yaashono, iilyo yolutu ohayi tameke okuholoka po nokukala tayi inyenge. Muule owala woomwedhi omugoyi, osele oyo tuu ndjoka ya simbapala, oyo hayi ende tayi koko sigo ya ningi okanona. Molutu lwako ohamu kala oosele odhindjidhindji. Uunongo waKalunga mboka hawu monika momukalo moka okanona hake ya po, ohawu inyengitha oyendji ya tse kumwe nomunyoli gwOmbiimbeli ngoka a ti: “Otandi ku hambelele e tandi ku simaneke, oshoka onda shitwa nuunkulungu.” — Episalomi 139:14.

Uuwanawa wuni hatu mono muunongo waKalunga? Omushiti gwetu oku shi shoka twa pumbwa, opo tu kale twa nyanyukwa. Oku na ontseyo oyindji noku uvite ko iinima nawanawa, nomolwaashono ta vulu oku tu pa omayele gopandunge mOmbiimbeli. Pashiholelwa, Ombiimbeli otayi tu kumagidha tayi ti kutya natu kale hatu ‘dhiminathana po oondjo ethimbo kehe.’ (Aakolossa 3:13) Omayele ngaka oge li pandunge lela. Oondohotola odha mona kutya okukala hatu dhimine po ohaku kwathele omuntu a kale ha kotha nawa nohaku shunitha pevi elondo lyombinzi. Ohaku kwathele wo omuntu kaa kale a polimana nokaa kwatwe komikithi dhilwe. Kalunga okwa fa kuume ngoka e na owino noku na ko nasha natse, ngoka kaapu na  esiku e ethe po oku tu pa omayele ngoka taga vulu oku tu kwathela. (2 Timoteus 3:16, 17) Mbela ino hala okukala wu na kuume a tya ngawo?

“Omuwa oku hole shoka shu uka.” — EPISALOMI 37:28.

Kalunga oha longo aluhe shoka shu uka. Ombiimbeli otayi ti nokuli kutya “itashi vulika Kalunga a longe uugoyoki. Omunankondoawike ita vulu okulonga uuwinayi.” (Job 34:10) Oha pangula aluhe pauyuuki ngaashi omupisalomi a nyola kombinga Ye a ti: “Oto pangula aantu shi thike pamwe.” (Episalomi 67:4) Molwaashoka Jehova oku “wete momutima,” iha vulu okweendwa mevi. Oha vulu aluhe okumona kutya oshili oyinipo e ta pangula pauyuuki. (1 Samuel 16:7) Shimwe ishewe, oha kala e wete okwaanuuyuuki nuulingilingi kehe tawu longwa kombanda yevi. Oku uvaneka kutya masiku “aakaanakalunga otaa ka kombwa mo moshilongo.” — Omayeletumbulo 2:22.

Kalunga ke shi omupanguli omukwanyanya ngoka ha kala aluhe a hala okugeela aantu. Ohe ya sile ohenda, uuna sha pumbiwa. Ombiimbeli otayi ti: “Omuwa oye omunamutimahenda nomunalukeno” nokwaamboka nokuli aakolokoshi, ngele oyi itedhulula. Kalunga omuyuuki shili! — Episalomi 103:8; 2 Petrus 3:9.

Uuwanawa wuni hatu mono muuyuuki waKalunga? Omuyapostoli Petrus okwa tile: “Kalunga aantu ayehe ohe ya tala ye thike pamwe. Ngoka he mu tila noha longo shoka shu uka, Kalunga ote mu taamba, na kale ogwomoshigwana sha tya ngiini.” (Iilonga 10:34, 35) Ohatu mono uuwanawa muuyuuki we, oshoka ke na okatongo. Ota vulu oku tu taamba ko notatu vulu oku mu longela, kutya nduno otwa za momuhoko guni, moshigwana shini, otwa mona elongo lya tya ngiini nenge otu li pondondo yini.

Kalunga okwe tu pa eiyuvo, molwaashoka okwa hala tu kale tu shi kutya oku hole uuyuuki notu mone mo uuwanawa muwo. Ombiimbeli otayi yelitha kutya eiyuvo olyo ompango ya ‘nyolelwa momitima dhetu,’ ndjoka hayi “koleke” nenge hayi ulike ngele eihumbato lyetu ewanawa nenge ewinayi. (Aaroma 2:15) Ohali  tu kwathele ngiini? Ngele otwe li dheula nawa, otali vulu oku tu kwathela tu yande okulonga shoka inaashi uka. Ngele otwa ningi epuko, eiyuvo otali vulu oku tu inyengitha tu itedhulule e tatu etha po shoka oshiwinayi. Osha yela kutya okukala tu shi kutya Kalunga oku hole uuyuuki otaku vulu oku tu kwathela notaku vulu oku tu hedhitha popepi naye.

“Kalunga oye ohole.” — 1 JOHANNES 4:8.

Kalunga oha ulike kutya oku na oonkondo, uunongo nuuyuuki. Ihe Ombiimbeli inayi popya kutya Kalunga oye oonkondo, uunongo nenge uuyuuki. Oya ti owala kutya oye hole. Omolwashike mbela? Omolwaashoka oonkondo dhaKalunga ohadhi vulu shili oku mu kwathela a ninge sha. Wo uuyuuki we nuunongo we ohayi wilike omukalo moka ha ningi iinima. Ihe ohole ye oyo hayi mu inyengitha mukehe shimwe ta ningi.

Nonando Jehova ke na shoka a pumbwa, ohole oyo ye mu inyengitha a shite iishitwa iinandunge megulu nokombanda yevi. Iishitwa mbyoka otayi vulu okumona mo uuwanawa mohole ye nomesiloshimpwiyu lye. Omolwohole ye, Kalunga okwa shiti evi li kale ehala ewanawa lyokukalwa kaantu. Oha ulukile natango aantu ohole sho ‘etango lye he li pitithile aawinayi naawanawa, nomvula ye he yi lokithile aayuuki naalunde.’ — Mateus 5:45.

Ombiimbeli otayi ti ishewe kutya “Omuwa oye omunesilohenda nomunalukeno.” (Jakob 5:11) Oha ulukile ohole mboka haya katuka oonkatu ya mana mo, opo ye mu tseye noya hedhe popepi naye. Aantu ya tya ngawo Kalunga oku ya wete pauhandimwe nohe ya ‘sile oshimpwiyu’ nokuli. — 1 Petrus 5:7.

Ongiini tatu vulu okumona uuwanawa mohole yaKalunga? Ohatu nyanyukilwa okutala etango tali ningine. Ohatu nyanyukilwa okuuva okahanona taka yolo. Ohatu kala twa nyanyukwa uuna tatu ulukilwa ohole komuntu gwaandjetu. Iinima mbika otashi vulika inaayi simanenena, ihe ohayi tu nyanyudha noonkondo.

Jehova okwe tu ulukila wo ohole, sho e tu pa uuthembahenda woku mu galikana. Ombiimbeli otayi tu ladhipike tayi ti: “Inamu kala mu na nando oshimpwiyu shasha, ihe oompumbwe dheni dhi tseyithileni Kalunga momagalikano geni agehe.” Ngaashi he omunahole, Jehova okwa hala tu konge ekwatho kuye uuna twa gwililwa po noonkondo komaupyakadhi. Molwaashoka oku tu hole, oku uvaneka oku tu pa ‘ombili ye, ndjoka yi vule uunongo auhe wopantu.’ — Aafilippi 4:6, 7.

Moshitopolwa shika otwa kundathana paufupi kombinga yomaukwatya gaKalunga ga simanenena, ngaashi oonkondo, uunongo, uuyuuki nohole. Mbela inashi ku kwathela wu mone kutya Kalunga oku na omaukwatya ga tya ngiini? Ngashingeyi otatu ku ladhipike wu mone shoka a gwanitha po naashoka ta ka gwanitha po monakuyiwa tashi vulu oku tu etela uuwanawa.