Iitopolwa ayihe mbyoka ya tetekela, oye tu kwathela nale tu mone omayamukulo kepulo, Kalunga oye lye? Tango otwi ilonga mOmbiimbeli kutya edhina lye oJehova nonokutya uukwatya we wa dhenga mbanda owo ohole. Otwa mona kutya oshike a gwanitha po nale noshike ta ka gwanitha po monakuyiwa, shoka tashi ka etela aantu ayehe uuwanawa. Opu na natango iinima oyindji mbyoka twa pumbwa okwiilonga kombinga yaKalunga. Ihe otashi vulika to ipula kutya uuwanawa wuni to ka mona mokwiilonga oshindji kombinga ye.

Jehova oku uvaneka kutya ngele to mu kongo nenge “to yi kuye, ote ku taamba.” (1 Ondjalulo 28:9) Sho to ende to tseya Kalunga, oto ka kala wu na oshinima shondilo, ano ‘uukuume’ wopothingo naye. (Episalomi 25:14) Mbela uukuume wa tya ngawo otawu ku etele uuwanawa washike?

Enyanyu lyashili. Jehova ota popiwa e li “omunelago” nenge omunyanyukwi. (1 Timoteus 1:11, OB-1954) Ngele otwa panga uukuume wopothingo naye e tatu landula oondjila dhe, otatu ka mona enyanyu lyashili. Enyanyu ndyoka otali ke tu etela uuwanawa pamadhiladhilo, pamaiyuvo nopalutu. (Episalomi 33:12) Oto ka kala wo wu na onkalamwenyo ombwanawa ngele owa yanda okuninga iinima mbyoka tayi vulu oku ku ehameka. Kala ho ningi iinima mbyoka tayi ku etele uuwanawa nokukala wu na ekwatathano ewanawa nayalwe. Ngele owa ningi ngawo, oto ka popya ngaashi Omupisalomi a ti: “Osho opalela ndje oku kala popepi naKalunga.” — Episalomi 73:28.

Kalunga ote ke ku sila oshimpwiyu. Jehova oku uvanekela aapiya ye a ti: “Otandi ku wilike e tandi ku tonatele.” (Episalomi 32:8) Shoka otashi ti kutya Jehova oha sile oshimpwiyu aapiya ye pauhandimwe noha pe kehe gumwe shoka a pumbwa. (Episalomi 139:1, 2) Ngele owa kala wu na ekwatathano ewanawa naJehova, oto ka mona kutya okwi ilongekidha aluhe oku ku kwathela.

Onakuyiwa ombwanawa. Kakele koku ku kwathela wu kale wa nyanyukwa nowa mbilipalelwa monkalamwenyo, Jehova ote ku pe wo ompito yoku ka kala nonakuyiwa ombwanawa. (Jesaja 48:17, 18) Ombiimbeli otayi ti: “Mboka ye ku tseya, Kalunga awike kashili, noya tseya wo Jesus Kristus, ngoka we mu tumu, oyo mboka ye na omwenyo gwaaluhe.” (Johannes 17:3) Nonando otu li momathimbo omadhigu, etegameno ndyoka Jehova e tu pa otali vulu oku tu kwathela, lya fa ekwatitho lya “kwata lya dhiginina oomwenyo dhetu.” — Aahebeli 6:19.

Omauwanawa ngaka gatatu ogo gamwe gomomatompelo ga simanenena tu na, ngoka tage tu inyengitha tu tseye nawa Kalunga notu pange uukuume naye. Opo wu mone uuyelele owundji popya nOonzapo dhaJehova, noke li jw.org/ng.