Oparadisa oyi li popepi!
Sho Kalunga a shiti evi, elalakano lye olya li, opo ku kale aantu aayuuki sigo aluhe. (Episalomi 37:29) Okwa tula aaihokani yotango, Adam naEva, moshikunino oshiwanawa shaEden. Okwe ya lombwele ya longe evi noye li sile oshimpwiyu, pamwe noluvalo lwawo. — Genesis 1:28; 2:15.
Sho tatu popi ngeyi evi kali shi we Oparadisa, ngaashi sha li elalakano lyaKalunga lyopetameko. Ihe okwa hala natango evi li kale Oparadisa. Mbela ote ke shi enda ngiini, opo evi li ninge ishewe oparadisa? Ngaashi twi ilongo miitopolwa ya tetekele, Kalunga ita ka hanagula po evi. Pehala lyaashono, ota ka pitika aantu mboka aadhiginini kuye ya ka kale ko sigo aluhe. Onkalo kombanda yevi otayi ka kala ya tya ngiini, ngele Kalunga a gwanitha po omauvaneko ge?
Otaku ka kala epangelo limwe kombanda yevi
Masiku, uuna epangelo lyomegulu lya tameke oku tu lela, aantu ayehe kombanda yevi otaya ka kala ya nyanyukwa. Otaya ka kala taya longo nombili nokugwanitha po nawa iilonga yawo muukumwe. Kalunga okwa hogolola Jesus Kristus oye a ka pangele ombanda yevi ayihe. Jesus ina fa aapangeli oyendji mboka tu wete kunena, oshoka ye oku na ko nasha naalelwa ye. Ohole, olukeno, ombili nosho wo uuyuuki, ogo omaukwatya ngoka ta ka kala e na sho te tu lele. — Jesaja 11:4.
Aantu muuyuni awuhe otaya ka hangana
Aantu mboka taya ka kala kombanda yevi, itaya ka kala ya topoka paigwana nenge pamihoko. Aantu yomaludhi agehe otaya ka kala ya hangana. (Ehololo 7:9, 10) Otaya ka kala ye hole Kalunga nosho wo aantu ooyakwawo. Otaya ka longa pamwe ye na ombili ya gwanithe po elalakano lyaKalunga lyopetameko, ya sile evi oshimpwiyu. — Episalomi 115:16.
Iiponga yopaunshitwe otayi ka hula po
Uuna Uukwaniilwa waKalunga wa tameke okupangela kombanda yevi, onkalo yombepo itayi ka kala we hayi etele aantu iiponga, oshoka iinima ayihe otayi ka kala yi li pomahala. (Episalomi 24:1, 2) Sho Jesus a li kombanda yevi, okwa li ha ganda iikungulu e tayi mwena, naashoka osha li euliko kutya ota vulu oku ke shi ninga monakuyiwa. (Markus 4:39, 41) Onkee ano, kapu na omuntu ta ka kala a tila iiponga yopaunshitwe. Kohi yepangelo lyaKalunga aantu nosho wo iinamwenyo otaya ka kala pamwe nombili. — Hosea 2:18.
Otaku ka kala uukolele niikulya ya gwana
Kehe gumwe ota ka kala e na uukolele wi ihwa po. Kapu na omuntu te ke ehama, ta ka kulupa nokusa. (Jesaja 35:5, 6) Ayehe otaya ka kala muuyuni uuwanawa, mwa yela nawa, wa fa oshikunino shaEden, moka mwa li Adam naEva tango. Muuyuni uupe, kombanda yevi otaku ka kala ku na eloolo lyiikulya. Kehe gumwe ota ka lya shoka a hala. (Genesis 2:9) Ngaashi owala sha li sha ningilwa oshigwana shaKalunga, Israeli shonale, uuna Oparadisa ye ya, kehe gumwe ota ka kala e na “iikulya ya gwana.” — Levitikus 26:4, 5.
Ombili yashili negameno
Muuyuni uupe, aantu ayehe otaya ka kala pamwe nombili. Otaya ka kala wo haya ungaunga nayakwawo nolukeno nopauyuuki. Itapu ka kala we iita, po kapu na ngoka ta ka longitha oonkondo a hepeke yakwawo, na kehe gumwe ota ka kala e na shoka a pumbwa. Ombiimbeli oyu uvaneka tayi ti: “Kehe gumwe ota ka kala nombili mokati komiviinu nomikwiyu dhe, nokape na ngoka te mu halutha we.” — Mika 4:3, 4.
Omagumbo niilonga iiwanawa
Kapu na aantu taya ka tembudhwa pomahala nosho wo momagumbo gawo. Kehe shimwe shoka taya ka longa otashi ke ya etela uuwanawa. Ombiimbeli oye shi popya kutya mboka taya ka kala mOparadisa “itaa ki ihepeka owala.” — Jesaja 65:21-23.
Elongo lya dhenga mbanda
Ombiimbeli oyu uvaneka tayi ti: “Evi otali ka udha okutseya Omuwa kwa fa omeya ga siikila efuta.” (Jesaja 11:9) Aantu mboka taya ka kala mOparadisa itaya ka mana okwiilonga kombinga yuunongo waJehova nosho wo wiinima iiwanawa mbyoka a shita. Ontseyo ndjoka taya ka mona, itaye ke yi longitha ye ete po iikondjitho nenge ye ehameke yalwe. (Jesaja 2:4) Pehala lyaashono, otaye ki ilonga nkene ye na okukala pamwe nombili nosho wo nkene ye na okusila evi oshimpwiyu. — Episalomi 37:11.
Aantu otaya ka kala nomwenyo sigo aluhe
Kalunga okwa shita evi momukalo moka tatu vulu okukala ko tu uvite uugumbo esiku kehe. Elalakano lye olya li aantu ya kale nomwenyo sigo aluhe kombanda yevi. (Episalomi 37:29; Jesaja 45:18) Opo elalakano lye ndyono li gwanithwe kombanda yevi, Kalunga “ota ka hanagula po eso sigo aluhe.” (Jesaja 25:8) Ombiimbeli oyu uvaneka tayi ti: “Oko noitaku ka kala we eso, oluhodhi, elilo nenge uuwehame.” (Ehololo 21:4) Kalunga ota ka pa aantu ayehe mboka haya vulika kuye, ompito ya ka kale nomwenyo sigo aluhe. Mokati kawo omwa kwatelwa mboka ta ka hupitha, sho ta ka hanagula po uuyuni mbuka wa yonuka. Opu na wo aantu oyendjiyendji mboka taya ka yumudhwa ya ka kale nomwenyo sigo aluhe muuyuni uupe. — Johannes 5:28, 29; Iilonga 24:15.
Aantu mboka tayi ilongekidha ngashingeyi, ya ka kale nomwenyo muuyuni uupe, evi to yele. Nonando yo aantu yonyama nombinzi otaya kambadhala, opo ya kale nomaukwatya ngoka Kalunga a hala ya ka kale ye na muuyuni uupe. Ohaye shi ningi ngiini? Omokwiilonga kombinga yaJehova Kalunga nosho wo kombinga yOmwana, Jesus Kristus, ngoka a li a tumu kombanda yevi. — Johannes 17:3.
Mona uuyelele wa gwedhwa po nkene to vulu oku shi enda, opo wu ka hupe sho uuyuni mbuka tawu ka hanagulwa po, ngoye wu ka kale muuyuni uupe mboka wu li pokuya masiku. Ngele Oonzapo dhaJehova odhe ya pungoye, zimina mu kundathane Ombiimbeli nadho, tamu longitha embo, Kala nonkalamwenyo ombwanawa sigo aluhe.
Opu na ishewe uuyelele mbuka
OSHUNGOLANGELO
Uukwaniilwa waKalunga otawu ka gwanitha po shike?
Jesus oku shi kutya Uukwaniilwa waKalunga owo owala epangelo ndyoka tali vulu okukandula po omaupyakadhi kombanda yevi. Uukwaniilwa mboka owa gwanitha po nale shike shoka tashi tu ningitha tu kale tu na omukumo?
OSHUNGOLANGELO
Uukwaniilwa waKalunga, epangelo kaali na uulingilingi
Iinima ihamano mbyoka Uukwaniilwa mbuka tawu ka ninga otayi ulike kutya otawu ka kala aluhe kaawu na uulingilingi.
