Oshitya olukeno otashi ti “okukala wu uvite ngaashi gulwe u uvite nenge okukala wa fa wu li monkalo ye.” Omutseyinawa gwuukolele wopamadhiladhilo Dr. Rick Hanson, okwa ti kutya ‘otwa valwa nuukwatya wolukeno.’

DHILADHILA KWAASHIKA: Mbela omolwashike twa shitwa nuukwatya wolukeno mboka kaawu li miishitwa yilwe? Ombiimbeli otayi yelitha kutya Kalunga okwa shita aantu oshifetha she. (Genesis 1:26) Otwa shitwa oshifetha shaKalunga sha hala okutya otatu vulu okuulika uukwatya wa fa we. Onkee ano, uuna olukeno talu inyengitha aantu ya kwathele yalwe, ohaya holele olukeno lwOmushiti gwawo omunahenda, Jehova Kalunga. — Omayeletumbulo 14:31.   

Kalunga oha kala e tu uvitile olukeno noha kala u uvite nayi ngele tatu mono iihuna. Ombiimbeli oya popi kombinga yAaisraeli yonale, mboka ya li taya mono iihuna ye li aapika muEgipiti naasho ya li mombuga taya mono iihuna uule womimvo 40, ya ti: “Momahepeko gawo agehe [okwe ya nikile uuthigwa, OB-1954].” (Jesaja 63:9) Ndhindhilika kutya Kalunga ka li owala e shi iihuna mbyoka ya li taya mono. Okwa li wo e ehamekwa kuyo. Okwa ti: “Onda mono, nkene aantu yandje taa hepekwa.” (Eksodus 3:7) Kalunga okwa ti: “Kehe ngoka te mu gumu, ota gumu ondanda yeho lyandje.” (Sakaria 2:8, NW) Uuna yalwe ye tu uvitha nayi, naye oha kala u uvite nayi.

Ombiimbeli otayi tu shilipaleke kutya nonando omitima dhetu odhi kale tadhi tu nyenyetele nenge tu kale tu uvite inaatu gwana okuulukilwa olukeno kuKalunga, “Kalunga oye omunene e vule eiyuvo lyetu nokwa tseya iinima ayihe.” (1 Johannes 3:19, 20) Kalunga oku tu shi e tu vule. Oku shi nawa oonkalo dhetu, omadhiladhilo getu nosho wo omaiyuvo getu. Oku tu nine olukeno.

Omanyolo otage tu shilipaleke

• “Nge to galikana, otandi ku zimine. Ngele to ithana ndje, otandi ku yamukula.” — JESAJA 58:9.

• “Ongame awike ndi shi shoka nde mu dhiladhilila, omadhiladhilo gandje ogelago, hagomupya; otandi mu pe onakuyiwa netegameno. Otamu ka ithana ndje. Otamu ke ya tamu galikana ndje, notandi ke mu yamukula.” — JEREMIA 29:11, 12.

• “Omahodhi gandje owe ga pungula. Inaga nyolelwa nani membo lyoye?” — EPISALOMI 56:8.

Mbela okukala tu shi kutya Kalunga oha kala e tu uvitile olukeno otaku vulu oku tu kwathela tu ungaunge nomaupyakadhi getu? Tala koshimoniwa shaMaria:

“Onda li ndi wete kutya onkalamwenyo ondhigu sho nda li ndu uvithwa nayi keso lyomumwandjemati gwomimvo 18 konima yaasho a kala ta kondjo nuuvu wokaankela uule womimvo mbali. Onda li nda geyela Jehova sho inaaya mo olunyala naasho inee mu aludha!

“Konima yoomvula hamano, kuume kandje gumwe omunahole nomunahenda gwomegongalo lyetu okwa li a pulakene kungame sho tandi mu lombwele nkene ndu uvite kutya Jehova ke hole ndje. Sho a pulakene kungame uule woowili dhontumba inaa kwata ndje melaka, okwa totha ovelise yimwe ndjoka ya li ya gumu ndje. Ovelise ndjoka oyi li muJohannes gwotango 3:19, 20, tayi ti: ‘Kalunga oye omunene e vule eiyuvo lyetu nokwa tseya iinima ayihe.’ Okwa yelitha kutya Jehova oku uvite ko uupyakadhi wetu.

“Kakele kaashono, osha li natango oshidhigu kungame ndi kale inaandi geyela Jehova! Onda lesha Episalomi 94:19 ndyoka tali ti: ‘Uuna nda tila nonda sa iimpwiyu, oto hekeleke ndje e to nyanyudha ndje.’ Onda li ndi wete oovelise dha fa owala ongame dha nyolelwa! Osho ngaa nee nda ka mona oshipu okupopya naJehova kombinga yuudhigu wandje, ndi na einekelo kutya oha pulakene noku uvite ko onkalo yandje.”

Itashi hekeleke tuu okutseya kutya Kalunga oku uvite ko oonkalo dhetu noku tu uvitile olukeno! Ihe mbela omolwashike nduno pu na okumona iihuna okundji? Mbela omolwaashoka Kalunga te tu geele omolwiilonga yetu iiwinayi? Mbela Kalunga ota ka ninga po sha ngaa a hulithe po okumona iihuna? Omapulo ngoka otaga ka kundathanwa miitopolwa tayi landula.