Okuza sho Kalunga a shiti aantu, okwa li a popi nayo okupitila maayengeli nomaahunganeki. Shimwe ishewe, okwa hogolola etumwalaka lye nomauvaneko ngoka e ya ningila ga nyolwe. Omauvaneko ngoka ga za kuKalunga oga guma onakuyiwa yoye. Mbela openi to vulu okwaadha omauvaneko ngoka gaKalunga kunena?

Etumwalaka ndyoka Kalunga e tu pa oli li mOohapu dhe, Ombiimbeli. (2 Timoteus 3:16) Kalunga okwa longitha ngiini aahunganeki ya nyole etumwalaka lye? (2 Petrus 1:21) Kalunga okwa tula oohapu dhe momadhiladhilo gaanyoli mboka, e taye dhi nyola. Osha faathana nokunena. Ngele omunangeshefa oha longitha amushanga e mu nyolele ko ketumwalaka lye, etumwalaka ndyoka ohatu li tala ko kutya olya za komunangeshefa ye mwene. Sha faathana, nonando Kalunga okwa longitha aalumentu yontumba ya nyole etumwalaka lye, oye lela Omunyoli gwOmbiimbeli.

Etumwalaka lyaKalunga olya simana, onkee okwa hala aantu ye li leshe noye li uve ko. Kunena ‘elaka etoye’ otali vulu okumonika kaantu ‘yomihoko adhihe, yomaludhi agehe noyomomalaka agehe. (Ehololo 14:6) Ombiimbeli oya tolokwa ya gwana po nenge iitopolwa yawo yimwe momalaka ge vulithe 3 000, yi vule omambo agehe muuyuni, shoka shi li eyambeko lya za kuKalunga.