ONKALAMWENYO kunena kayi li ngaashi Kalunga a li a hala yi kale. Evi olya li li na okukala lyu udha aantu mboka ya hala okukala mepangelo lye, haya mono uuwanawa mewiliko ndyoka ta gandja nohaya ulike omaukwatya omawanawa ga fa ge. Oya li ye na okukala haya longele kumwe ya nyanyukwa sho taya putudha oyana, taya ilongo iinima iipe nokuninga evi alihe oparadisa.

• “Ota hulitha po omalugodhi kombanda yevi alihe.” — Episalomi 46:9.

• “Ethimbo . . . olye ya . . . lyokuhanagula po mboka taa yonagula po evi!” — Ehololo 11:18.

• “Kape na nando ogumwe . . . ta ka tya: ‘Otandi ehama.’” — Jesaja 33:24.

• ‘Otaa ka nyanyukilwa iilonga yiikaha yawo yene.’ — Jesaja 65:22.

Omahunganeko ngaka otaga ka gwanithwa ngiini? Kalunga okwa langeka po Omwana, Jesus, e li Omukwaniilwa gwepangelo lya gwanenena, ndyoka tali ka pangela kombanda yevi okuza megulu. Ombiimbeli otayi li ithana Oshilongo nenge Uukwaniilwa waKalunga. (Daniel 2:44) Ombiimbeli otayi popi kombinga yaJesus tayi ti: “Omuwa Kalunga ote mu ningi omukwaniilwa.” — Lukas 1:32, 33.

Sho Jesus a li kombanda yevi, okwa li a longo iikumithalonga oyindji tu ulike kutya e li Omukwaniilwa, ota ka vula okulundulula onkalamwenyo yaantu yi ninge ombwanawa, yi vule ndjika tu li.

• Okwa li a panga uuvu kehe, u ulike nkene ta ka kutha po uuwehame awuhe waantu. — Mateus 9:35.

• Okwa loteke efuta, u ulike nkene ta ka gamena aantu mokupangela oonkondo dhopaunshitwe. — Markus 4:36-39.

• Okwa kutitha aantu omayuvi, u ulike kutya ota ka gwanitha po oompumbwe dhawo. — Markus 6:41-44.

• Okwa shitukitha omeya ga ninge omaviinu pohango, u ulike nkene ta ka kwathela aantu ya nyanyukilwe onkalamwenyo. — Johannes 2:7-11.

Ongiini to vulu oku ka kala nonkalamwenyo ndjoka Kalunga ta longekidhile aantu mboka ye mu hole? Opu na ‘ondjila’ ndjoka wu na okulandula. Ombiimbeli otayi yi popi kutya, ‘ondjila ndjoka tayi fala komwenyo, naashona yowala mboka taye yi mono.’ — Mateus 7:14.

Ondjila ndjoka tayi fala komwenyo gwaaluhe oyini? Ondjila ndjoka tayi fala komwenyo gwaaluhe oyo iinima ayihe mbyoka Kalunga he tu lombwele tu ninge. Ota ti: “Ongame Omuwa Kalunga koye, ngoka tii ku [“longo,” NW] shoka she ku opalela noku ku ulukila ondjila u na okweenda nayo.” (Jesaja 48:17) Okweenda mondjila ndjika otaku ku kwathele wu kale nonkalamwenyo ya dhenga mbanda.

 Jesus okwa ti: “Ongame ondjila noshili nomwenyo.” (Johannes 14:6) Ngele otwi itaale oshili ndjoka Jesus a longa nokulandula oshiholelwa she, otatu ka hedha popepi naKalunga nonkalamwenyo yetu otayi ka kala ombwanawa.

Ongiini to vulu okumona ondjila ndjoka tayi fala komwenyo gwaaluhe? Oku na omalongelokalunga ogendji, ihe Jesus okwa londodha a ti: “Hakehe ngoka ti ithana ndje ‘Omuwa, Omuwa,’ ta yi mOshilongo shegulu, aawe, oye tuu ngoka ta gwanitha ehalo lyaTate yomegulu.” (Mateus 7:21) Okwa ti wo: “Otamu ya dhimbulula kiiyimati yawo.” (Mateus 7:16) Ombiimbeli otayi vulu oku ku kwathela wu mone kutya elongelokalunga lyashili olini, nowu li yoolole mo momalongelokalunga giifundja. — Johannes 17:17.

Ongiini to vulu okweenda mondjila ndjoka tayi fala komwenyo gwaaluhe? Owu na okwiilonga kombinga yaaNgoka e tu pa omwenyo. Oye lye mbela? Edhina lye olye? Okuhole shike? Ota ningi shike ngashingeyi? Okwa hala tu ninge shike? *

Kalunga ina hala owala aantu ya kale taya longo, taya li, taya dhana nokuputudha oyana. Otatu vulu okutseya omushiti gwetu nokuninga ookuume ke. Otatu vulu okuulika kutya otu mu hole mokulonga ehalo lye. Jesus okwa ti: “Mboka ye ku tseya, Kalunga awike kashili, noya tseya wo Jesus Kristus, ngoka we mu tumu, oyo mboka ye na omwenyo gwaaluhe.” — Johannes 17:3.

Okwiilonga okunyanyudha Kalunga awike kashili, ohashi tu pula tu ninge omalunduluko gontumba. Shoka otashi vulika shi kale oshidhigu. Ihe uushili owo kutya, ngele otwa tameke okweenda mondjila ndjoka, onkalamwenyo yetu otayi ka kala ombwanawa. Oonzapo dhaJehova otadhi ke ku kwathela wu mone omayamukulo kombinga yaKalunga. Ohadhi konakona naantu Ombiimbeli pethimbo nopehala tali ya opalele. Oto vulu okukwatathana natse kondjukithi ndjika yokointaneta, www.dan124.com/ng.