1-2. Omolwashike Aakriste kunena ya pumbwa okukala ye na ohokwe membo lyaLevitikus?

OMUYAPOSTOLI PAULUS okwa li a dhimbulukitha kuume ke omugundjuka, Timoteus, kutya “enyolo kehe olya nyolithwa kOmbepo yaKalunga noli na oshilonga.” (2 Tim. 3:16) Embo lyaLevitikus nalyo olya kwatelwa mo. EmboMbiimbeli ndyoka owe li tala ko ngiini? Yamwe otashi vulika ye li tala ko li na owala omusholondondo gwoompango ndhoka kaadhi na oshilonga kunena, ihe Aakriste yashili hasho ye li tala ko ngawo.

² Embo lyaLevitikus olya nyolwa pwa pita ngashingeyi omimvo 3 500, ihe nonando ongawo, Jehova okwe li nyolitha, li “tu longe.” (Rom. 15:4) Molwaashoka embo lyaLevitikus olye tu hololela nkene Jehova ha dhiladhila nankene ha kala e uvitile iinima yontumba, otwa pumbwa okukala tu na ehalo lyoku li lesha. Uushili owo kutya membo ndyoka otatu vulu okwiilonga mo iiyilongomwa oyindji. Natu ka konakoneni ine yomuyo.

3. Omolwashike kwa li haku gandjwa omayambo omumvo kehe mEsiku lyEkwatakanitho?

³ Oshiilongomwa shotango: Opo Jehova a taambe ko omayambo getu, tango otu na okukala twa hokiwa kuye. Omumvo kehe, mEsiku lyEkwatakanitho, oshigwana shaIsraeli osha li hashi gongala pamwe shi gandje omayambo giinamwenyo. Omayambo ngoka oga li haga kwathele Aaisraeli ya dhimbulukwe kutya oya pumbwa okuyogolwa, omolwomayono gawo. Ihe manga omuyambimukuluntu inaa eta ombinzi yeyambo lyoshinamwenyo mUuyapukielela  mesiku ndyono, tango okwa li e na okuninga oshinima shilwe sha simanenena shi vule edhiminopo lyoondjo dhoshigwana.

4. Ngaashi sha popiwa muLevitikus 16:12, 13, oshike sha li hashi ningwa komuyambi omukuluntu, ngele ta yi mUuyapukielela mEsiku lyEkwatakanitho oshikando shotango? (Tala ethano lyokombanda.)

⁴ Lesha Levitikus 16:12, 13. Thaneka momadhiladhilo shoka sha li hashi ningwa mEsiku lyEkwatakanitho: Omuyambi omukuluntu okwa li ha yi metsalihangano. Shika osho oshikando shotango shomiikando itatu a li e na okuya mUuyapukielela mesiku ndyoka. Moshikaha shimwe okwa li ha kala a humbata ohanga yiitsinino ya nika nawa, nomoshikwawo okwa humbata oshikwatelwa shoshingoli shu udha omakala gomulilo. Uuna a thiki pelapi lyetopolitho, oha thikama, manga inaa ya mUuyapukielela. Nesimaneko enene, oha yi mUuyapukielela e ta thikama komeho yoshikethahangano. Pathaneko, okwa thikama komeho gaJehova Kalunga! Opo nduno omuyambi okwa li ha tile nuukeka iitsinino iiyapuki pomakala gomulilo, nehala ndyoka e tali kala li na ezimba lyiitsinino ya nika nawa. * Lwanima, oha ka galukila mUuyapukielela e na ombinzi yomayonondjambo. Ndhindhilika kutya manga inaa yamba ombinzi yomayonondjambo, oha lungunitha iitsinino.

5. Oshike tatu ilongo kelongitho lyiitsinino mEsiku lyEkwatakanitho?

⁵ Oshike tatu ilongo kelongitho lyiitsinino mEsiku lyEkwatakanitho? Ombiimbeli oya popya kutya omagalikano gaapiya yaJehova aadhiginini ngoka ga taambiwa ko, oga fa iitsinino. (Eps. 141:2; Eh. 5:8) Dhimbulukwa kutya omuyambi omukuluntu okwa li ha eta iitsinino komeho gaJehova nesimaneko enene. Sha faathana, uuna tatu galikana Jehova, ohatu shi ningi nesimaneko enene. Otwe mu simaneka noonkondo. Otwa pandula noonkondo sho Omushiti gweshito alihe he tu pitike tu popye naye megalikano notu hedhe popepi naye, onga okanona ke li nahe. (Jak. 4:8) Ohe tu taamba ko tu li ookuume ke. (Eps. 25:14) Otwa lenga uuthembahenda mbuka noonkondo, noinatu hala nando tu mu yemateke.

6. Oshike tatu ilongo kokufika iitsinino hoka kwa li haku ningwa komuyambi omukuluntu, manga inaa gandja omayambo?

⁶ Dhimbulukwa kutya manga omuyambi omukuluntu inaa gandja omayambo, okwa li e na okufika iitsinino. Kungawo, okwa li ha shilipaleke ngele Kalunga okwe mu hokwa, manga inaa gandja omayambo. Oshike tatu ilongo kwaashoka? Sho Jesus a li kombanda yevi, manga inaa gandja omwenyo gwe gu ninge iikulila, okwa li e na okuninga oshinima sha simanenena shi vule kokule ehupitho lyaantu. Oshike shono? Okwa li e na okuvulika kuJehova nuudhiginini, opo eyambo lye li taambiwe ko. Kungawo, Jesus okwe shi ulike sha yela kutya okuninga iinima momukalo gwaJehova, okwo oshinima sha dhenga mbanda. Jesus okwa yukipalitha uunamapangelo waHe, nenge tu tye omukalo gwe gwokupangela.

7. Omolwashike Jesus monkalamwenyo ye ayihe kombanda yevi, a kala a hokiwa kuHe?

⁷ Monkalamwenyo ye ayihe kombanda yevi, Jesus okwa kala ta vulika lelalela komithikampango dhaJehova dhi li pauyuuki. Nokuli nonando okwa li a piti momamakelo nenge momayeleko nokwa li e shi kutya ota ka sa eso tali uvitha omwenyo omutoye, okwa li a tokola toko okupopila omukalo gwaHe gwokupangela. (Fil. 2:8) Sho Jesus a li momamakelo, okwa galikana ‘ta lili nokukuga pombanda.’ (Heb. 5:7) Omagalikano ge taga zi komutima, oga koleke ehalo lye lyokutsikila okukala omuvuliki. KuJehova, omagalikano gaJesus oga li ga fa ezimba lyiitsinino ya nika nawa. Jesus monkalamwenyo ye  ayihe, okwa kala ta nyanyudha He noonkondo nokuyukipalitha uunamapangelo We.

8. Ongiini tatu vulu okuholela Jesus?

⁸ Otatu vulu okuholela Jesus, mokuninga ngaashi tatu vulu tu kale hatu vulika kuJehova notu kale aadhiginini komithikampango dhe. Uuna tu li momamakelo, natu galikane Jehova twa mana mo e tu kwathele, molwaashoka otwa hala oku mu nyanyudha. Kungawo, otatu ulike kutya otatu ambidhidha omukalo gwe gwokupangela. Otu shi kutya Jehova ita ka taamba ko omagalikano getu, ngele ohatu ningi iinima mbyoka e tonde. Ihe ngele otwa kala metsokumwe nomithikampango dhe, otatu vulu okukala neinekelo kutya omagalikano getu taga zi komutima, otaga ka kala ga fa ezimba lyiitsinino ya nika nawa kuye. Otatu vulu wo okukala nuushili kutya okuvulika kwetu nokukala aadhiginini, ohaku nyanyudha Tate yetu gwomegulu. — Omayel. 27:11.

9. Omolwashike pwa li hapu gandjwa omakwatathanondjambo?

⁹ Oshiilongomwa oshitiyali: Ohatu longele Jehova, molwaashoka otwe mu pandula. Opo tu shi tse omuthindo, natu taleni kombinga yomakwatathanondjambo, oshinima shilwe shoka sha li sha simana mokulongela Kalunga kwashili muIsraeli shonale. * Membo lyaLevitikus otatu ilongo mo kutya Aaisraeli oya li haya vulu okugandja ekwatathanondjambo, “omolwepandulo.” (Lev. 7:11-13, 16-18) Omuntu okwa li ha gandja eyambo ndyoka, molwaashoka a hala oku li gandja, ihe hamolwaashoka e na oku li gandja. Onkee ano, shoka osha li hashi ulike kutya okwe li gandja pahalo lye mwene, molwaashoka oku hole Kalunga ke, Jehova. Onyama yoshimuna  shoka sha yambwa, oya li hayi liwa po komuntu ngoka e shi yamba, pamwe nuukwanegumbo we nosho wo aayambi. Ihe iitopolwa yimwe yoshimuna shoka sha yambwa, oya li hayi pewa Jehova oye awike. Iitopolwa mbyoka oyini?

10. Omakwatathanondjambo ngoka ga popiwa muLevitikus 3:6, 12, 14-16, otage tu longo shike kombinga yaashoka sha li sha inyengitha Jesus a longe ehalo lyaHe?

¹⁰ Oshiilongomwa oshititatu: Ohatu gandja shoka oshiwanawa kuJehova, molwaashoka otu mu hole. Jehova okwa li ha tala ko iinkene yi li oshitopolwa dhingi shoshinamwenyo. Okwa li wo a popi kutya iilyo yilwe yomeni ya simanenena, mwa kwatelwa iitiyanathigo, oyi na ongushu. (Lesha Levitikus 3:6, 12, 14-16.) Onkee ano, Jehova okwa li ha kala unene a nyanyukwa, uuna Omuisraeli te mu pe nehalo ewanawa iitopolwa mbyoka ya simanenena nosho wo iinkene. Omuisraeli ngoka te shi ningi, okwa li ha ulike kutya okwa halelela okupa Kalunga shoka oshiwanawa lela. Momukalo gwa faathana, Jesus okwa li a gandja nehalo ewanawa kuJehova shoka oshiwanawa lela, moku mu longela nomutima aguhe, molwaashoka oku mu hole. (Joh. 14:31) Jesus okwa li e hole okulonga ehalo lyaKalunga, molwaashoka okwa li e hole noonkondo ompango ye. (Eps. 40:8) Jehova okwa li ha kala a nyanyukwa noonkondo, sho e wete Omwana te mu longele shili nehalo ewanawa.

11. Ongiini iilonga yetu ya faathana nomakwatathanondjambo, nongiini shika tashi tu hekeleke?

¹¹ Okulongela kwetu Jehova nehalo ewanawa, okwa faathana nomakwatathanondjambo ngoka, molwaashoka ohaku ulike nkene tu mu uvitile. Ohatu mu pe shoka oshiwanawa lela, molwaashoka otu mu hole nomutima gwetu aguhe. Jehova oha kala a nyanyukwa okumona aalongeli ye omamiliyona taye mu longele nehalo ewanawa, molwaashoka oye mu hole noonkondo nosho wo omithikampango dhe. Ohashi tu hekeleke, uuna tu shi kutya Jehova oku wete nokwa lenga iilonga yetu noku shi kutya omolwashike tatu yi longele. Pashiholelwa, ngele ngoye omukokele noiho vulu we okulonga oshindji ngaashi wa hala, kala wu na uushili kutya Jehova omangambeko goye oku ga wete. Otashi vulika wu kale wu uvite ho gandja oshishona, ihe Jehova oku wete ohole yoye yomuule, ndjoka tayi ku inyengitha wu ninge ngaashi to vulu. Okwa nyanyukwa okutaamba ko oshiwanawa shoka to mu pe!

12. Jehova okwa li ha kala e uvitile ngiini omakwatathanondjambo, naashika otashi tu tsu ngiini omukumo?

¹² Oshike tatu ilongo kombinga yomakwatathanondjambo? Uuna iitopolwa yoshinamwenyo mbyoka iiwanawa lela tayi lungunithwa, olwithi olwa li halu gundumuka lwu uka mombanda, na Jehova okwa li ha kala e shi hokwa. Kala wu na uushili kutya Jehova okwa hokwa iilonga mbyoka to mu longele nehalo ewanawa nonomutima aguhe. (Kol. 3:23) Dhiladhila kunkene e ku hokwa. Okwa tala ko oonkambadhala dhoye dhopahole ndhoka to ningi miilonga ye, kutya nduno oonene nenge oonshona, dhi li omaliko ngoka ta ka dhimbulukwa nota kala a lenga sigo aluhe. — Mat. 6:20; Heb. 6:10.

13. Shi ikolelela kuLevitikus 9:23, 24, Jehova okwa li a ulike ngiini kutya okwa hokwa aayambi mboka opo ya langekwa po?

¹³ Oshiilongomwa oshitine: Jehova oha yambeke oshitopolwa shehangano lye shokombanda yevi. Natu tale shoka sha li sha ningwa po mo 1512 K.E.N., sho etsalihangano lya li lya thikamekwa pondundu Sinai. (Eks. 40:17) Moses okwa li a kwatele komeho oshituthi, moka Aaron noyanamati ya li ya langekwa po ye li aayambi. Oshigwana shaIsraeli osha li sha gongala, opo shi tale sho aayambi taya gandja omayambo gawo gotango giinamwenyo. (Lev. 9:1-5) Jehova okwa li a ulike ngiini kutya okwa hokwa aayambi mboka opo ya langekwa po? Manga Aaron naMoses ya li taya yambeke aantu, Jehova okwa  tumu omulilo gu lungunithe po eyambo ndyoka li li koshiyambelo. — Lesha Levitikus 9:23, 24.

14. Omolwashike okuhokiwa kuJehova kwaAaron noyanamati mboka ya li ya langekwa po ye li aayambi, ku li oshinima sha simana kutse kunena?

¹⁴ Omulilo ngoka gwa li gwa holoka pelangeko lyomuyambi omukuluntu, ogwa li tagu ulike shike? Jehova okwa li a tumu omulilo a ulike kutya okwa hokwa nota ambidhidha Aaron noyanamati mboka a hogolola ya ninge aayambi. Sho Aaisraeli ye shi mono sha yela kutya Jehova ota ambidhidha aayambi mboka, oya kala ye na etompelo ewanawa lyoku ya ambidhidha ngaashi taya vulu. Mbela shoka osha simana nokutse kunena? Eeno! Uuyambi womuIsraeli owa li owala tawu thaneke uuyambi wa simanenena. Omuyambi Omukuluntu, Kristus, oku na aayambi 144 000, mboka taya ka pangela pamwe naye megulu. — Heb. 4:14; 8:3-5; 10:1.

15-16. Jehova okwa ulike ngiini kutya okwa hokwa ‘omupiya omudhiginini nomunandunge’?

¹⁵ Mo 1919, Jesus okwa langeke po okangundu kaamwatate aagwayekwa, ye li ‘omupiya omudhiginini nomunandunge.’ Omupiya ngoka oha kwatele komeho iilonga yokuuvitha noha pe aalanduli yaKristus “iikulya pethimbo [lyo opala, NW].” (Mat. 24:45) Mbela otu shi iwetele ngaa kutya omupiya omudhiginini nomunandunge okwa hokiwa kuKalunga?

¹⁶ Satana nuuyuni we ohaya ningi ngaashi taya vulu, ya keelele iilonga yomupiya omudhiginini nomunandunge kaayi ye komeho. Ando omupiya ka li ha longo iilonga mbyoka kekwatho lyaJehova, ando ita vulu oku yi longa. Nonando opwa kala pu na iita yopaali yuuyuni, omahepeko ga kwata miiti, uuhupilo tawu nyangwanyangwa nokuningilwa okwaanuuyuuki, omupiya omudhiginini nomunandunge okwa tsikile nokupa aalanduli yaKristus kombanda yevi iikulya  yopambepo. Dhiladhila kiikulya yopambepo oyindji mbyoka hatu pewa kunena oshali shamuhongi, momalaka ge vulithe po 900. Shoka otashi ulike lela kutya omupiya ota ambidhidhwa kuKalunga. Iilonga yokuuvitha nayo oyi li elalekonuuyamba lya za kuJehova. Onkundana ombwanawa oya kala shili nokuuvithilwa ‘uuyuni awuhe.’ (Mat. 24:14, yelekanitha OB-1954.) Osha yela kutya Jehova ota wilike nota yambeke ehangano lye kunena.

17. Ongiini tatu vulu okuulika kutya otatu ambidhidha ehangano ndyoka Jehova ta longitha?

¹⁷ Oshi li nawa tu ipule tatu ti: ‘Mbela onda pandula ngaa sho ndi li oshitopolwa shehangano lyaJehova shokombanda yevi?’ Pethimbo lyaMoses naAaron, Jehova okwa li a tumu omulilo okuza megulu a ulike kutya okwa hokwa mboka a langeka po. Sha faathana, Jehova okwe tu ulukila sha yela kutya ota longitha ehangano lye kunena. Odhoshili kutya otu na oshindji okupandula. (1 Tes. 5:18, 19) Ongiini tatu vulu okuulika kutya otatu ambidhidha ehangano ndyoka Jehova ta longitha? Omokulandula omalombwelo ga kankamena kOmbiimbeli ngoka hatu pewa okupitila miileshomwa yetu, pomakugongala nopiigongi yetu iishona niinene. Shimwe ishewe, otatu vulu okuulika kutya ohatu li ambidhidha, mokukutha ombinga pakuudha miilonga yokuuvitha noyokulonga aantu. — 1 Kor. 15:58.

18. Owa tokola toko okuninga shike?

¹⁸ Natu kale twa tokola toko tu tule miilonga iiyilongomwa mbyoka twi ilongo membo lyaLevitikus. Otwa hala Jehova a taambe ko omayambo ngoka tatu mu pe. Natu longele Jehova, molwaashoka otwe mu pandula. Natu tsikile okupa Jehova ngaashi tatu vulu, molwaashoka otu mu hole nomutima gwetu aguhe. Natu ambidhidhe ehangano lye nomutima gwetu aguhe, ndyoka ta longitha kunena. Mokuninga ngawo, otatu vulu okuulukila Jehova kutya otwa lenga uuthembahenda mboka tu na woku mu longela tu li Oonzapo dhe.