Ehokololo lyOmbiimbeli ndyoka tali a adhika muGenesis 22:6 otali ti kutya Kalunga okwa li a lombwele Abraham a ye a ka ninge efikilondjambo kehala lyi li kokule negumbo lye. Enyolo ndyoka otali ti kutya Abraham “okwa tsike Isak iikuni yefikilondjambo, noye mwene okwa humbata omwele nomulilo. Manga ya li taa ende.”

MOmanyolo inamu popiwa kutya omulilo ogwa li hagu temwa momukalo guni pethimbo lyonale. Shi na ko nasha nepulo ndyoka lyi ikolelela kehokololo ndika, omugandji gwomauyelele kombinga yOmbiimbeli gumwe okwa ti kutya omulilo itagu vulu “okuhumbatwa gwa tema molweendo olule” ngaashi ndoka lwa li lwe endwa kuAbraham naIsak. Onkee ano, otashi vulika Abraham nomwanamati ya li ya humbata iinima mbyoka ya li ye na oku ka temitha omulilo.

Ihe yalwe otaya ti kutya okutema omulilo methimbo lyonale kasha li oshinima oshipu. Mpoka tashi vulika, aantu oya li haya mono oshipu oku ka tala ekala lyomulilo kaashiinda, pehala lyoku gu tema owala kuyo yene. Aakonakoni oyendji otaya ti kutya sho Abraham a yi molweendo olule, okwa li a humbata ombiga yi na onkogo yelyenge mu na omakala gomulilo ngoka e ga kutha peziko ndyoka lya kala lya tema. (Jes. 30:14) Onkee ano, omakala ga tema ngoka Abraham a li a humbata molweendo lwe, okwa li ta vulu oku ga longitha natango okutema omulilo a tula po uuhwamekitho.