1-2. Jesus okwa li ta ti shike, sho a popi oohapu ndhoka dhi li muJohannes 4:35, 36?

JESUS okwa kala ta ende nomapya, tashi vulika ngoka ge na iilya opo tayi koko. (Joh. 4:3-6) Iilya mbika oya li tayi ka kala ya gwana okuteywa meni lyoomwedhi ne lwaampono. Jesus okwa popi oshinima shoka tashi monika itaashi wapa, a ti: “Yelutheni omeho geni, mu tale kutya omapya oga thika okuteywa.” (Lesha Johannes 4:35, 36.) Okwa li ta ti shike?

² Jesus otashi vulika a li ta popi keteyo lyaantu lyopathaneko. Natu tale kwaashoka sha li sha ningwa po. Nonando Aajuda kaya li haya endathana nAasamaria, Jesus okwa li a uvithile omukiintu Omusamaria nokwa li a pulakene. Manga Jesus a li ta popi kombinga yomapya ngoka ga li ga “thika okuteywa,” ongundu yAasamaria mboka ya uva kombinga yaJesus komukiintu ngoka, oya li ya uka kuye, e ke ya longe oshindji. (Joh. 4:9, 39-42) Omutseyi gwOmbiimbeli gumwe, okwa popi shi na ko nasha naashika a ti: “Okuhalelela kwaantu . . . okwa ulike kutya oya li ya fa iilya ya thika okuteywa.”

3. Ngele owa kala wa tala ko aantu ngaashi Jesus, oshike to ka ninga?

³ Ongiini kombinga yaantu mboka ho uvithile onkundana ombwanawa? Mbela oho ya tala ko ya fa iilya mbyoka ya adha okuteywa? Ngele osho, oto ka ninga iinima itatu tayi landula. Shotango, oto ka uvitha neendelelo. Ethimbo lyokuteya olya ngambekwa, onkene inatu pumbwa okumana po ethimbo. Oshitiyali, oto ka kala wa nyanyukwa, sho wu wete aantu taya pulakene konkundana ombwanawa. Ombiimbeli otayi ti: “Aantu [ohaya] nyanyukwa, uuna taa teya.” (Jes. 9:3) Oshititatu, omuntu kehe oto ke  mu tala ko kutya ota vulu okuninga omulongwa, onkee oto ka tameka oonkundathana naye dha kankamena kiinima mbyoka e na ohokwe muyo.

4. Moshitopolwa shika, otatu ki ilonga shike komuyapostoli Paulus?

⁴ Jesus ka li a tala ko Aasamaria momukalo omwiinayi, ngaashi aalanduli ye tashi vulika ya li ye ya tala ko. Pehala lyaashono, okwa li e ya tala ko kutya otaya vulu okuninga aalongwa. Natse otwa pumbwa okutala ko aantu yomoshitopolwa shetu kutya otaya vulu okuninga aalongwa yaKristus. Omuyapostoli Paulus okwe tu tulila po oshiholelwa oshiwanawa shoka tu na okulandula. Oshike tatu vulu okwiilonga kuye? Moshitopolwa shika, otatu ka kundathana (1) nkene a li i ilongo sha kombinga yaashoka sha li shi itaalwa kwaamboka a li a uvithile, (2) nkene a li a mono shoka ye na ohokwe musho nosho wo (3) nkene a li e ya tala ko kutya otaya vulu okuninga aalongwa yaJesus.

5. Omolwashike Paulus a li e uvite ko aapulakeni ye mosinagoga?

⁵ Olundji Paulus okwa li ha uvithile moosinagoga dhAajuda. Pashiholelwa, mosinagoga yomuTessalonika, okwa “kala nokutompa aantu [Aajuda] nOmanyolo mOmasabati gatatu.” (Iil. 17:1, 2) Paulus otashi vulika a li ha kala a manguluka, uuna e li mosinagoga. Okwa li Omujuda. (Iil. 26:4, 5) Paulus okwa li e uvite ko Aajuda, onkee okwa li a vulu oku ya uvithila nomukumo. — Fil. 3:4, 5.

6. Eyooloko lini lya li pokati kaantu mboka Paulus a uvithile pomalandithilo muAtena naamboka a uvithile mosinagoga?

⁶ Konima sho Paulus a thiminikwa kaapataneki ye a ze mo muTessalonika nomuBerea, okwa yi kuAtena. Hoka natango “okwa kala ta ludhike nAajuda naapagani mboka oonakusimaneka Kalunga mosinagoga.” (Iil. 17:17) Nonando ongawo, sho a li ta uvithile pomalandithilo, okwa li a pulakenwa kaantu yi ili. Mokati kaapulakeni ye, omwa li aafilosofi naantu yalwe mboka kaaye shi Aajuda, mboka ya li ya tala ko etumwalaka lyaPaulus li li “elongo . . . epe.” Oya ti kuye: “Otu uvu to popi iinima yimwe kaatu yi shi.” — Iil. 17:18-20.

7. Shi ikolelela kIilonga 17:22, 23, Paulus okwa li a lundulula ngiini omukalo gwe gwokuuvitha?

⁷ Lesha Iilonga 17:22, 23. Paulus ka li a uvithile etumwalaka lye aantu yomuAtena mboka kaaye shi Aajuda, momukalo moka a uvithile Aajuda mosinagoga. Otashi vulika Paulus a li i ipula a ti: ‘Mbela aantu mbaka yomuAtena oyi itaala shike?’ Okwa li a konenene omudhingoloko moka e li, e ta ndhindhilike omikalondjigilile dhaantu dhopalongelokalunga. Oshikwawo, Paulus okwa li a kundathana nayo iinima mbyoka yi itaala notayi tsu kumwe  nOmanyolo. Omutseyi gwOmbiimbeli gumwe, okwe mu popi a ti: “E li Omukriste Omujuda, okwa ndhindhilike kutya aapagani Aagreka kaya li haya longele Kalunga ‘kashili’ kAajuda nokAakriste, ihe okwa kambadhala okuulika kutya Kalunga ngoka ta uvitha kombinga ye, oku shiwike nokAayatena.” Onkee ano, Paulus okwa li e na ehalo okulundulula oonkundathana dhe naantu shi ikolelela konkalo. Okwa li a lombwele Aayatena kutya etumwalaka lye olya za ‘kuKalunga kee shiwike,’ ngoka ya kala taya kambadhala okulongela. Nonando mboka kaaye shi Aajuda kaya li ye shi Omanyolo, Paulus ka li e ya si uunye. Pehala lyaashono, okwa li e ya tala ko ya fa iilya mbyoka ya adha okuteywa, nokwa li a lundulula omukalo gwe gwoku ya uvithila onkundana ombwanawa.

8. (a) Ongiini to vulu okumona shoka aantu yomoshitopolwa sheni yi itaala? (b) Uuna gumwe ta ti kutya oku na elongelokalunga lye, oto vulu oku mu yamukula ngiini?

⁸ Kala ho konenene ngaashi Paulus. Ndhindhilika iinima mbyoka yi itaalwa kaantu yomoshitopolwa sheni. Mbela omunegumbo egumbo lye nenge ohauto ye, oyi li monkalo ya tya ngiini? Mbela edhina lye, omizalo dhe, okwiiyopaleka kwe nenge okupopya kwe, otayi ulike kutya ogwelongelokalunga lini? Otashi vulika e ku lombwela shu ukilila kutya oku na elongelokalunga lye. Uuna omukokolindjila i ikalekelwa gwedhina Flutura a lombwelwa ngawo, oha yamukula ta ti: “Inandi ya oku ku thiminikila shoka ndi itaala, ihe okupopya nangoye kombinga yoshikundathanwa shika tashi ti . . . ”

9. Iinima yini to vulu okupopya nomuntu ngoka e li melongelokalunga lyontumba, mbyoka amuhe mwi itaala?

⁹ Iinima yini to vulu okukundathana naangoka e li melongelokalunga lyontumba? Kambadhala okupopya kombinga yiinima mbyoka tamu tsu kumwe. Otashi vulika ha longele owala Kalunga gumwe awike, e shi kutya Jesus Omuhupithi gwaantu nenge tashi vulika i itaala kutya otu li muuyuni wa kolokosha, mboka wu li pokuhulithwa po. Uuna tamu kundathana naye kombinga yiinima mbyoka amuhe mwi itaala, mu uvithila etumwalaka lyOmbiimbeli momukalo ngoka tagu hokitha.

10. Oshike tu na okukambadhala okuninga, nomolwashike?

¹⁰ Dhimbulukwa kutya aantu otashi vulika kaayi itaale kehe shimwe taya longwa momalongelokalunga gawo. Onkene nokuli nokonima ngele wa mono kutya omuntu ogwomelongelokalunga lini, kambadhala okumona kutya oshike ye mwene i itaala. David, omukokolindjila i ikalekelwa gwokoAustralia, ota ti: “Aantu oyendji ngashingeyi ohaya tula mumwe uufilosofi naashoka yi itaala momalongelokalunga gawo.” Omumwameme Donalta gwokoAlbania, ota ti: “Aantu yamwe mboka hatu tsakaneke, ohaya ti kutya oye na elongelokalunga lyawo, ihe lwanima ohaye ke shi zimina kutya inayi itaala lela  muKalunga.” Omumwatate gumwe omutumwa moArgentina, ota ti kutya aantu yamwe ohaya ti oyi itaala mUukwatatu, ihe paushili wo wene otashi vulika inaayi itaala kutya He, Omwana nombepo ondjapuki, oKalunga gumwe. Ota ti: “Oku shi tseya, ohaku shi ningi oshipu okutameka oonkundathana dheni niinima mbyoka amuhe tamu tsu kumwe nayo.” Onkee ano, kambadhala okumona kutya aantu oyi itaala lela shike. Opo nduno, ngaashi Paulus, oto vulu ‘okuninga ashihe shoka to vulu, omolwaayehe.’ — 1 Kor. 9:19-23.

11. Ngaashi sha popiwa mIilonga 14:14-17, ongiini Paulus a li a uvithile aantu mboka ya li muListra etumwalaka lye, momukalo omwaanawa?

¹¹ Lesha Iilonga 14:14-17. Paulus okwa li a mono kutya aapulakeni ye, oye na ohokwe mushike, e ta tungile ko oonkundathana dhe. Pashiholelwa, ongundu yaantu ndjoka a li a popi nayo muListra, oya li yi shi kashona Omanyolo nenge nokuli kaayi ga shi. Onkee ano, Paulus okwa li a tompathana nayo kombinga yiinima mbyoka taya vulu okuuva ko. Okwa li a popi kombinga yeteyo olindji nosho wo okunyanyukilwa onkalamwenyo. Okwa li a longitha iitya nosho wo iiholelwa mbyoka aapulakeni ye taya vulu okuuva ko nawa.

12. Ongiini to vulu okumona kutya omuntu oku na ohokwe mushike, nokutungila ko efalomo lyoye?

¹² Longitha oondunge, wu mone kutya aantu yomoshitopolwa sheni oye na ohokwe mushike, e to tungile ko efalomo lyoye. Ongiini to vulu okumona kutya omuntu oku na ohokwe mushike, uuna wa thiki puye nenge pegumbo lye? Natango, kala to konenene. Otashi vulika wu adhe ta longo moshikunino, ta lesha embo, ta pangele ohauto nenge ta ningi sha shilwe. Ngele otashi wapa, omolwashike itoo tameke oonkundathana dhoye naashoka i ipyakidhila nasho? (Joh. 4:7) Omizalo dhomuntu nokuli nadho otadhi vulu okuulika sha kombinga ye. Otashi vulika tadhi ulike kutya ye ogwuukwashigwana wuni, oha longo shike nenge uudhano mboka e hole. Gustavo ota ti: “Onda li nda tameke oonkundathana nomulumentu gwomimvo 19, ngoka a li a zala okambindja ka thanekwa omwiimbi a tseyika nawa. Onda li nde mu pula kombinga  ye, e ta lombwele ndje kutya omolwashike e mu hole. Oonkundathana ndhoka odha fala sigo omekonakonombiimbeli, nongashingeyi oku li omumwatate.”

13. Ongiini to vulu okuninga ekonakonombiimbeli momukalo tagu hokitha?

¹³ Uuna to konakona Ombiimbeli nomuntu, shi ninga momukalo tagu hokitha noku mu ulukila nkene ekonakono tali ke mu kwathela. (Joh. 4:13-15) Pashiholelwa, omumwameme Poppy, okwa li a taambwa megumbo lyomukiintu ngoka a li a ulike ohokwe. Sho Poppy a mono onzapo yi li kekuma tayi ulike kutya omukiintu ngoka okwi ilongela uuprofesoli, okwa tsu omuthindo kutya natse ohatu longo aantu okupitila mekonakonombiimbeli nopokugongala. Omukiintu ngoka okwa taamba ko ekonakono, okwa yi kokugongala esiku lya landula, na nziya konima yaashono, okwa ka ya koshigongi shoshikandjo. Konima yomumvo, okwa ninginithwa. Ipula to ti: ‘Mboka handi talele po, oye na ohokwe mushike? Mbela otandi vulu okukonakona nayo Ombiimbeli momukalo tagu hokitha?’

14. Ongiini to vulu okwiilongekidhila ekonakonombiimbeli kehe?

¹⁴ Ngele owa tameke okukonakona Ombiimbeli nomuntu, kala ho ilongekidhile ekonakono kehe, nokukaleka momadhiladhilo eputuko nosho wo iinima mbyoka e na ohokwe muyo. Sho to ilongekidha, hogolola omanyolo ngoka tamu ka lesha, uuvidio nomathaneko ngoka to ka longitha wu yelithe ooshili dhOmbiimbeli. Ipula to ti: ‘Oshike unene tashi ka kala oshihokithi komukonakoni gwandje notashi adha omutima gwe?’ (Omayel. 16:23) MoAlbania, omukiintu gumwe ngoka a li ta konakona nomukokolindjila gwedhina Flora, okwa li a ti: “Itandi vulu okwiitaala kutya oku na eyumuko.” Flora ka li e mu thiminike e shi itaale. Okwa ti: “Onda li tandi dhiladhila kutya tango okwa pumbwa okutseya Kalunga ngoka a uvaneka kutya oku na eyumuko.” Okuza mpono, kehe pekonakono, Flora okwa kala ta tsu omuthindo ohole yaJehova, uunongo we noonkondo dhe. Lwanima, omukonakonimbiimbeli gwe okwe ki itaala kutya oku na eyumuko. Ngashingeyi oku li Onzapo yaJehova yi na uulaadhi.

15. Shi ikolelela kIilonga 17:16-18, iikala yini Paulus a li e uvitile nayi muGreka shonale, ihe omolwashike a li inaa sa uunye Aayatena?

¹⁵ Lesha Iilonga 17:16-18. Paulus ka li a sa uunye Aayatena, nonando oshilando shawo osha li shu udha iikalunga, oluhondelo nomalongo guufilosofi goshipagani, noina etha omatukano gawo ge mu teye omukumo. Paulus okwa li a ningi Omukriste, nonando ‘nale okwa li ha popile Aakriste muuwinayi, he ya tidhagana noku ya sheka.’ (1 Tim. 1:13) Ngaashi owala Jesus e shi mono kutya Paulus ota vulu okuninga omulongwa, Paulus naye okwa li e shi kutya Aayatena nayo otaya vulu okuninga aalongwa. Ka li a kanitha einekelo muyo. — Iil. 9:13-15; 17:34.

16-17. Oshike tashi ulike kutya aantu yomaludhi agehe, otaya vulu okuninga aalongwa yaKristus? Gandja oshiholelwa.

¹⁶ Omimvo 2 000 nasha dha ka pita, aantu yomomaputuko gi ili nogi ili, oya li ya ningi aalongwa yaJesus. Sho Paulus a nyolele Aakriste yokoshilando shomuGreka, Korinto, ontumwafo, okwe ya lombwele kutya yamwe megongalo oya li nale aalongi yomiyonena nenge ye na eihumbato lya nyata. Okwa gwedha ko a ti: “Yamwe yomune osho mwa li mwa tya ngaaka. Ihe omwa yogwa oondjo.” (1 Kor. 6:9-11) Ando ongoye, andola owa vula ngaa okukala wu na einekelo kutya aantu mboka otaya vulu okuninga omalunduluko nokuninga aalongwa?

¹⁷ Kunena, aantu oyendji oye na ehalo lyokuninga omalunduluko nokuninga aalongwa yaJesus. Pashiholelwa, moAustralia, omukokolindjila i ikalekelwa gwedhina Yukina, okwa li i ilongo kutya aantu yomaludhi agehe, otaya vulu okwiinyengithwa ketumwalaka lyOmbiimbeli. Esiku  limwe, manga e li pongeshefa yontumba, okwa mono omukiintu omugundjuka a thanekwa kolutu nokwa zala oonguwo dha yula unene. Yukina ota ti: “Petameko onda li tandi kakadhala, ihe lwanima onda tokola okupopya naye. Onde shi mono mo kutya oku na ohokwe mOmbiimbeli, molwaashoka okwa li a nyolwa oovelise dhimwe dhOmapisalomi.” Omukiintu ngoka okwa tameke okukonakona nokuya komakugongala. *

18. Omolwashike tu na okuyanda okupangula aantu?

¹⁸ Mbela Jesus okwa li a tala ko omapya ga thika okuteywa, molwaashoka a li a tegelela aantu oyendji ye mu landule? Hasho nando. Omanyolo oga hunganeka kutya aantu owala aashona ya li taye ke mu itaala. (Joh. 12:37, 38) Jesus okwa li ha vulu okulesha omitima dhaantu. (Mat. 9:4) Nonando ongawo, okwa li a gandja eitulomo kaantu aashona mboka ye mu itaale, nokwa li a uvithile aantu ayehe nuulaadhi. Tse ihatu vulu okulesha omitima, onkee ano, otu na okuyanda okupangula nenge okukala twa sa uunye omuntu gwontumba nenge oshitopolwa moka hatu longele. Pehala lyaashono, kala wa tala ko aantu kutya otaya vulu okuninga aalongwa. Marc ngoka e li omutumwa koBurkina Faso, ota ti: “Aantu mboka handi dhiladhila kutya otaya ka ninga ehumokomeho, olundji ohaya etha po okukonakona. Ihe mboka handi kala nda tala ko kutya itaya ka ninga ehumokomeho, olundji oyo haye shi ningi. Onkee ondi ilongo kutya oshi li pandunge tu kale hatu etha tu wilikwe kombepo yaJehova.”

19. Aantu yomoshitopolwa shetu otu na oku ya tala ngiini?

¹⁹ Tango otashi vulika wu dhiladhile kutya moshitopolwa sheni kamu na aantu oyendji mboka ya fa iilya ya thika okuteywa. Ihe dhimbulukwa shoka Jesus a lombwele aalongwa ye. Okwa ti kutya omapya oga thika okuteywa. Aantu otaya vulu okuninga omalunduluko e taya ningi aalongwa yaKristus. Jehova okwa tala ko aalongwa mboka ye li ‘omaliko.’ (Hag. 2:7) Ngele otwa kala twa tala ko aantu ngaashi Jehova naJesus, otatu ki ilonga kombinga yeputuko lyawo naashoka ye na ohokwe musho. Otatu ke ya tala ko ye li aamwatate naamwameme, ihe hangaashi aantu mboka kaatu shi.