1-2. Ekulilo oshike, nomolwashike twe li pumbwa?

SHO Adam ngoka a li omulumentu a gwanenena a yono, kungawo ye nosho wo oyana mboka a li ta ka mona oya kanitha uuthembahenda wokukala nomwenyo sigo aluhe. Adam ka li ta vulu okwiipopila omolwoshinima shoka a ningi. Okwa li a yonene owina. Ihe ongiini kombinga yoyana? Yo inaya kutha ombinga mokuyona kwaAdam. (Rom. 5:12, 14) Mbela opwa li ngaa tapu vulu okuningwa sha ya hupithwe meso ndyoka hekulululwa i ilongela? Eeno! Nziya konima sho Adam a yono, Jehova okwa tameke okutula po elongekidho lyankene ta ka hupitha oyana yaAdam muulunde neso. (Gen. 3:15) Peuthwathimbo lye, Jehova okwa li ta ka tuma Omwana okuza megulu ‘a gandje omwenyo gwe, a hupithe oyendji.’ — Mark. 10:45; Joh. 6:51.

² Ekulilo oshike? MOmanyolo gopaKriste gOshigreka, ekulilo olyo ofuto ndjoka Jesus a gandja, opo a futile po shoka sha kanithwa kuAdam. (1 Kor. 15:22) Omolwashike twa li twa pumbwa ekulilo? Otwa li twe li pumbwa, molwaashoka omithikampango dhaJehova dhi na ko nasha nuuyuuki mOmpango ye otadhi ti kutya omwenyo ogu na okufutwa nomwenyo. (Eks. 21:23, 24) Adam ka li we a gwanenena. Omolwuuyuuki waKalunga, Jesus okwa yamba po omwenyo gwe gwa gwanenena. (Rom. 5:17) Kungawo Jesus okwa ningi “He yomuukwaaluhe” yaayehe mboka ye na eitaalo mekuliloyambo. — Jes. 9:6; Rom. 3:23, 24.

3. Shi ikolelela kuJohannes 14:31 nosho wo 15:13, omolwashike Jesus a Ii e na ehalo lyokuyamba po omwenyo gwe gwa gwanenena?

³ Jesus okwa li e na ehalo lyokuyamba po omwenyo gwe, omolwohole ye onene yokuhola He gwomegulu natse wo twa kwatelwa mo. (Lesha Johannes 14:31; 15:13.) Ohole ndjoka oyo ya li ye mu inyengitha a kale a tokola toko okukala omudhiginini onkalamwenyo ye ayihe noku gwanithe po ehalo lyaHe. Omolwekuliloyambo ndyoka, elalakano lyaJehova lyopetameko li na ko nasha  naantu nosho wo nevi otali ka gwanithwa. Moshitopolwa shika, otatu ka kundathana kutya omolwashike Kalunga e etha Jesus a monithwe iihuna noonkondo manga inaa sa. Otatu ka kundathana wo paufupi oshiholelwa shomunyoli gwOmbiimbeli gumwe ngoka a li a pandula noonkondo ekuliloyambo. Lwahugunina, otatu ka kundathana nkene tatu vulu okuulika kutya otwa pandula ekuliloyambo nankene tatu vulu okukala tu na olupandu shi vulithe nale omolwekuliloyambo ndyoka Jehova naJesus ye tu pa.

4. Hokolola nkene Jesus a si.

⁴ Dhiladhila kwaashoka sha li sha ningilwa Jesus esiku lya tetekele eso lye. Nonando okwa li ta vulu okupula He e mu tumine omatangakwiita gaayengeli ge mu gamene, okwa li e etha a kwatwe po kaakwiita Aaroma, mboka ya li ye mu dhenge nonyanya. (Mat. 26:52-54; Joh. 18:3; 19:1) Oya li ye mu dhenge nongola ndjoka ya li ye mu ningi iinoto kolutu. Lwanima, oye mu humbateke endangalati enene komapepe ge ge na iilalo tayi zi ombinzi. Okwa tameke okukookolola omuti ngoka, e gu ukitha hoka a li ta ka dhipagelwa, ihe aakwiita Aaroma oya lombwele omulumentu gulwe e gu mu humbatele. (Mat. 27:32) Sho Jesus a thiki kehala hoka a li ta ka dhipagelwa, aakwiita oya kutha oomboha, e taya alele iikaha ye noompadhi dhe komuti gwomahepeko. Okwa li lela e li muuwehame, oshoka olutu lwe oludhigu olwa li lwe endjelela. Ookuume ke oya li ya nika oluhodhi, yina okwa li ta lili, ihe aapangeli Aajuda oya li ta ye mu sheke. (Luk. 23:32-38; Joh. 19:25) Jesus okwa kala e li muuwehame uule woowili dhontumba. Omutima nomapunga ge oga tameke okuvulwa, e ta kala itaa vulu we okufudha nuupu. Sho a mono kutya oku li pokusa, okwa galikana Jehova oshikando sha hugunina. Okwa sizimike omutse gwe e ta fudha mo omufudho gwe gwahugunina. (Mark. 15:37; Luk. 23:46; Joh. 10:17, 18; 19:30) Jesus ina sa tuu eso enyanyalithi nolisitha ohoni!

5. Jesus okwa li unene u uvitile nayi shike?

⁵ Omukalo moka Jesus a dhipagwa hagwo gwa li oshinima shiyemateka kuye unene. Okwa li ti ipula unene netompelo ndyoka aantu mboka ya li ompinge naye ya gandja opo a dhipagwe. Okwa li a lundilwa kutya okwa tuka Kalunga noka li e mu simaneka nenge edhina lye. (Mat. 26:64-66) Shoka osho sha li unene shu uvitha Jesus nayi, nokwa li a pula He ngele otashi vulika emakelo ndyoka lisitha ohoni li mu pitilile po. (Mat. 26:38, 39, 42) Mbela omolwashike Jehova a li e etha Omwana omuholike a monithwe iihuna noku se? Natu ka taleni komatompelo gatatu.

6. Omolwashike Jesus a li e na okwaalelwa komuti gwomahepeko?

⁶ Etompelo lyotango olyo kutya Jesus okwa li e na okwaalelwa komuti gwomahepeko, opo a mangulule Aajuda methingo. (Gal. 3:10, 13) Aajuda oya li ya zimina okukala haya vulika kOmpango yaKalunga, ihe mokweendela ko kwethimbo inaya kala we haya vulika kuyo. Oshilanduliko, ethingo lyawo ndyoka olya gwedha kuulunde mboka ya thigulula kuAdam. (Rom. 5:12) Ompango yaKalunga kAaisraeli oya li tayi ti kutya omuntu ngoka a yona eyono ndyoka lya gwana oku mu dhipagitha, oku na okudhipagwa, nomathimbo gamwe omudhimba gwe ogwa li hagu endjelelekwa komuti. * (Deut. 21:22, 23; 27:26) Onkee ano, sho Jesus a alelwa komuti gwomahepeko, okwe shi ningi tashi wapa, opo oshigwana shoka she mu ekelahi shi mone uuwanawa mekuliloyambo lye.

7. Omolwetompelo etiyali lini Kalunga e etha Omwana a monithwe iihuna?

⁷ Natu taleni ketompelo etiyali kutya omolwashike Kalunga e etha Omwana a monithwe iihuna. Jehova okwa li ta dheulile Jesus oshinakugwanithwa she shomonakuyiwa shokukala e li Omuyambi Omukuluntu. Jesus okwa li e  shi mono nkene hashi kala oshidhigu okuvulika kuKalunga uuna to makelwa nemakelo edhigu. Emakelo ndyoka olya li nokuli lye mu ningitha a pule ekwatho kuHe megalikano ta ‘lili nokukuga pombanda.’ Molwaashoka Jesus okwa pita momamakelo omadhigu noonkondo, oku shi shoka twa pumbwa ‘nota vulu oku tu kwathela’ uuna tatu “makelwa.” Inatu pandula tuu Jehova sho e tu pa Omuyambi Omukuluntu ngoka ha kala u “uvitile uunkundi wetu olukeno”! — Heb. 2:17, 18; 4:14-16; 5:7-10.

8. Omolwetompelo etitatu lini Kalunga e etha Omwana a makelwe sha kwata miiti?

⁸ Etompelo etitatu olyo kutya Jehova okwe etha Jesus a monithwe iihuna, opo a vule okuyamukula epulo lya simana ndyoka tali ti: Mbela omuntu ta vulu ngaa okukala omudhiginini kuJehova uuna ta makelwa sha kwata miiti? Shi na ko nasha nepulo ndyono, Satana okwa tsu ompata kutya itashi vulika. Okwa ti kutya aantu ohaya longele owala Jehova molwaashoka ya hala e ya pe sha. Okwi itaala wo kutya ngaashi hekulululwa gwawo Adam, kaye hole shili Jehova. (Job 1:9-11; 2:4, 5) Molwaashoka Jehova okwa li e na uushili kutya Omwana omudhiginini, okwe etha a makelwe sigo omeso. Jesus okwa kala omudhiginini noku ulike kutya Satana omufundja.

9. Omuyapostoli Johannes okwe tu tulila po oshiholelwa shini?

⁹ Eitaalo lyAakriste oyendji olya kolekwa sho yi ilongo kombinga yekuliloyambo. Ohaya tsikile okuuvitha nonando otaya patanekwa, nohayi idhidhimikile omamakelo onkalamwenyo yawo ayihe. Natu taleni koshiholelwa shomuyapostoli Johannes. Uule womimvo dhi vulithe 60 nasha, okwa li u uvitha nuulaadhi kombinga yaKristus nosho wo yekulilo. Sho a li e na omimvo 90 nasha, Epangelo lyaRoma aniwa olya li lye mu tala ko e li omuntu a nika oshiponga, e tali mu tula mondholongo kokantuntu kaPatmos. Mbela okwa li a ninga sha sha puka? Aawe. Okwa li owala u ‘uvitha oohapu dhaKalunga nokuhokolola kombinga yaJesus.’ (Eh. 1:9) Johannes okwe tu tulila po lela oshiholelwa oshiwanawa shokukala tu na eitaalo neidhidhimiko.

10. Oohapu ndhoka Johannes a nyola otadhi ulike ngiini kutya okwa li a pandula ekuliloyambo?

¹⁰ MomamboMbiimbeli ngoka a nyola, Johannes oku ulike kutya oku hole noonkondo Jesus nosho wo kutya okwa pandula ekuliloyambo. Momambo moka omwa popiwa lwiikando yi vulithe 100 kombinga yekulilo nenge kombinga yiinima iiwanawa mbyoka ekuliloyambo lyaJesus lye shi ningitha tashi wapa. Pashiholelwa, Johannes okwa nyola a ti: “Ngele ku na ngoka a yono, nena otu na Omupopili Kristus, omuyuuki ngoka te tu galikanene puTate.” (1 Joh. 2:1, 2) Oohapu dhaJohannes otadhi tsu wo omuthindo nkene okuuvitha kombinga ‘yoshili ndjoka ya hololwa kuJesus’ kwa simana. (Eh. 19:10) Osha yela kutya Johannes okwa li a pandula noonkondo ekulilo. Ongiini tatu vulu okuulika kutya natse otwe li pandula?

11. Oshike tashi vulu oku tu kwathela tu kondjithe omamakelo?

¹¹ Kondjitha okuyona. Ngele otwa pandula shili ekuliloyambo, itatu ka kala niikala yokutya: ‘Inandi pumbwa okuninga po sha uuna tandi makelwa ndi yone. Otandi vulu owala okuyona, lwanima e tandi pula ndi dhiminwe po.’ Mepingathano naashono, uuna tatu makelwa tu ninge sha sha puka, otwa pumbwa okutya: ‘Aawe! Itandi vulu okuninga oshinima sha tya ngawo, oshoka Jehova naJesus oya longela ndje uuwanawa owindji.’ Metsokumwe naashono, otatu vulu okupula Jehova e tu nkondopaleke, tatu mu indile tatu ti: ‘Ino ethela ndje momamekelo.’ — Mat. 6:13, NW.

12. Ongiini tatu vulu okutula miilonga omayele ngoka taga adhika muJohannes gwotango 3:16-18?

 ¹² Kala wu hole aamwatate naamwameme. Uuna tatu ulukilathana ohole yuumwayinathana, kungawo otatu ulike wo kutya otwa pandula ekuliloyambo. Omolwashike tatu tile ngawo? Omolwaashoka Jesus ina gandja owala omwenyo gwe molwetu, ihe okwa si wo peha lyaamwatate naamwameme. Sho e yi igandjela, otashi ulike kutya okwe ya tala ko ye na ongushu. (Lesha 1 Johannes 3:16-18.) Ohatu ulike kutya otu hole ooitaali ooyakwetu momukalo moka hatu ungaunga nayo. (Ef. 4:29, 31–5:2) Pashiholelwa, ohatu ya kwathele uuna taye ehama, uuna tayi idhidhimikile omashongo ga kwata miiti, nuuna ya dhengwa kiiponga yopaunshitwe. Ihe mbela otu na okwiinyenga ngiini uuna omwiitaali omukwetu a ningi sha nenge a popi sha she tu uvitha nayi?

13. Omolwashike tu na okukala hatu dhimine po yalwe?

¹³ Mbela omathimbo gamwe oho shi mono oshidhigu okudhimina po ooitaali ooyakweni? (Lev. 19:18) Ngele osho, kala ho tula miilonga omayele ngaka taga ti: “Dhiminathanii po oondjo ethimbo kehe, uuna pe na ngoka a ningathana namukwawo. Dhiminathanii po oondjo naanaa, ngashika Omuwa e mu dhimine po.” (Kol. 3:13) Oshikando kehe tatu dhimine po omwiitaali omukwetu, kungawo otatu ulukile Tate yetu gwomegulu kutya otwa pandula shili ekuliloyambo. Ongiini tatu vulu okuulika kutya otwa pandula noonkondo omagano ngoka twa pewa kuKalunga?

14. Omomukalo gumwe guni tatu vulu okukoleka olupandu lwetu omolwekuliloyambo?

¹⁴ Pandula Jehova omolwekuliloyambo. Omumwameme gumwe e na omimvo 83 gwedhina Joanna, ngoka ha kala moIndia, okwa ti: “Ondi wete kutya osha simana okupopya kombinga yekulilo esiku kehe momagalikano gandje nokupandula Jehova sho e li tu pa.” Esiku kehe uuna to galikana paumwene, dhiladhila kombinga yomapuko ngoka wa ninga, e to pula Jehova e ku dhimine po. Odhoshili kutya ngele owa yono eyono lya kwata miiti, oto ka kala wa pumbwa ekwatho lyaakuluntugongalo. Otaya ka pulakena kungoye, e taye ku pe omayele okuza mOohapu dhaKalunga. Otaya ka galikana pamwe nangoye, taya pula Jehova e ku dhimine po, opo wu vule okukala ishewe wu na ekwatathano ewanawa naye nowu ‘aludhwe’ pambepo. — Jak. 5:14-16.

15. Omolwashike twa pumbwa okukonga ethimbo lyokulesha kombinga yekuliloyambo nokutedhatedha kulyo?

¹⁵ Kala ho tedhatedha kombinga yekuliloyambo. Omumwameme gwomimvo 73 gwedhina Rajamani, okwa ti: “Oshikando kehe te lesha  kombinga yankene Jesus a li a monithwa iihuna, ohandi kala owala nda kengeleka omahodhi.” Otashi vulika wo nangoye ho kala wa yemata uuna to dhiladhila kombinga yankene Jesus a li a monithwa iihuna noonkondo. Ihe ngele owa kala ho tedhatedha muule kombinga yeiyambo ndyoka Jesus a ningi, oto ka kala wu mu hole noonkondo nosho wo He. Opo wu vule okutedhatedha kombinga yekuliloyambo, oto vulu okwi itulila po elalakano lyokukonakona paumwene kombinga yalyo.

16. Okulonga aantu kombinga yekuliloyambo ohaku tu etele uuwanawa washike? (Tala ethano lyokombanda.)

¹⁶ Longa yalwe kombinga yekuliloyambo. Okupopya nayalwe kombinga yekuliloyambo ohaku tu kwathele wo tu kale twe li pandula. Otu na iilongitho ya dhenga mbanda mbyoka tatu vulu okulongitha tu longe yalwe kutya omolwashike Jesus e tu sila. Pashiholelwa, otatu vulu okulongitha oshileshwa oshitine shomokambo Onkundana ombwanawa ya za kuKalunga! Oshileshwa shoka oshi na oshipalanyolo “Jesus Kristus oye lye naanaa?” Nenge tu longithe ontopolwa ontitano yembo Ombiimbeli otayi tu longo shike? Ontopolwa ndjoka oyi na oshipalanyolo “Ekulilo omagano ge na ondilo ga za kuKalunga.” Omumvo kehe ohatu ulike kutya otwa pandula ekuliloyambo, mokukala pEdhimbuluko lyeso lyaJesus nomokuhiya nuulaadhi aantu ye ye ya kale po pamwe natse. Jehova ine tu pa tuu uuthembahenda uunene wokulonga aantu kombinga yOmwana!

17. Omolwashike ekuliloyambo li li omagano ga dhenga mbanda ngoka Kalunga a pa aantu?

¹⁷ Odhoshili kutya otu na omatompelo omawanawa gokuulika kutya otwa pandula ekuliloyambo. Omolwekuliloyambo, otatu vulu okukala nekwatathano ewanawa naJehova nonando inatu gwanenena, niilonga yOmuhindadhi otayi ka hanagulwa po thilu. (1 Joh. 3:8) Omolwekuliloyambo, elalakano lyaJehova lyopetameko li na ko nasha nevi otali ka gwanithwa. Evi alihe otali ka ninga oparadisa. Pethimbo ndyoka kehe gumwe to ka tsakaneka ota ka kala e hole Jehova nohe mu longele. Onkee ano, kehe esiku konga omikalo moka to vulu okuulika kutya owa pandula ekuliloyambo, ano omagano ga dhenga mbanda ngoka Kalunga e tu pa!