1, 2. (a) Oshike shoka twa pumbwa okukala tu na, nomolwashike? (b) Oshike tatu ka kundathana moshitopolwa shika?

TU LI Aakriste yashili, otwa pumbwa okwiilonga okukala tu na uuyelele wi ihwa po, opo tu thike pehulithodhiladhilo li li mondjila. (Omayel. 3:21-23; 8:4, 5) Ngele hasho, otashi ka kala oshipu kuSatana nuuyuni we ye tu pukithe. (Ef. 5:6; Kol. 2:8) Odhoshili kutya otatu vulu owala okuthika pehulithodhiladhilo lyomondjila, ngele otu na uushili wi ihwa po. Omayeletumbulo 18:13 otayi ti: “Ngoka ta yamukula, manga inaa uva, otashi mu nikile uugoya notashi mu sitha ohoni.”

² Moshitopolwa shika, otatu ka tala komashongo gontumba ngoka hage shi ningitha oshidhigu komuntu a mone uushili noku thike pehulithodhiladhilo li li mondjila. Otatu ka tala wo komakotampango gOmbiimbeli ngoka taga vulu oku tu kwathela nosho wo kiiholelwa mbyoka tayi vulu oku tu kwathela tu kale hatu tala kuuyelele womondjila.

3. Omolwashike twa pumbwa okutula miilonga ekotampango lyOmbiimbeli ndyoka li li mOmayeletumbulo 14:15? (Tala kethano lyopetameko.)

³ Kunena, aantu oye na omauyelele ogendji unene. Uuyelele wumwe ohatu wu mono okupitila kointaneta, kotiivii nosho wo miikundaneki yilwe. Otashi vulika wo hatu tuminwa oo-e-mail, omatumwalaka nohatu  lombwelwa omahokololo kookuume ketu. Molwaashoka okutaandelitha uuyelele wa puka nokugoyokitha oshili okwa ha, otu na omatompelo omawanawa gokukala twa kotoka nokukonakona nawa shoka tatu uvu. Ekotampango lyOmbiimbeli lini tali vulu oku tu kwathela? Omayeletumbulo 14:15 otayi ti: “Omuntu gwanathangwa oti itaale shaa ohapu, ihe onkotoki ota ndhindhilike oonkatu dhe.”

4. Aafilippi 4:8, 9 otadhi vulu ngiini oku tu kwathela tu hogolole shoka tu na okulesha, nomolwashike sha simanenena okukala tu na uuyelele womondjila? (Tala wo oshimpungu “ Iinima yontumba mbyoka tayi tu kwathele tu mone uushili.”)

⁴ Otwa pumbwa uushili wu shi okwiinekelwa, opo tu ninge omatokolo gopandunge. Onkee ano, otwa pumbwa okukala tu shi okuhogolola nuukeka uuyelele mboka tu na okulesha. (Lesha Aafilippi 4:8, 9.) Inatu mana po ethimbo lyetu mokutala oonkundana kointaneta ndhoka tadhi limbilike nenge tu leshe oo-e-mail ndhoka tadhi taandeleke iifundja. Osha simana nokuli okuyanda omapandja gokointaneta ngoka taga humithwa komeho kaashunimonima. Elalakano lyawo okuteya omukumo aapiya yaKalunga nokupengitha oshili. Uuyelele wa puka ohawu ningitha omuntu a ninge omatokolo gaa li pandunge. Ino dhiladhila nando kutya uuyelele wa penga itawu vulu oku ku pukitha. — 1 Tim. 6:20, 21.

5. Onkundana yiifundja yini Aaisraeli ya li yu uvu, noye ya gumu ngiini?

⁵ Okwiitaala omahokololo giifundja, ohaku eta iilanduliko iiwinayi. Pashiholelwa, tala kwaashoka sha ningwa po pethimbo lyaMoses, sho oondaadhi 10 dhomoondaadhi 12, ndhoka dha li dha tumwa dhi ka ndaadhe Evi lyEuvaneko, dha galuka ko nonkundana yiifundja. (Num. 13:25-33) Okudhenga omutoto kwawo, okwa ningitha aapiya yaKalunga ya teke omukumo. (Num. 14:1-4) Omolwashike aantu yi inyenge momukalo ngoka? Otashi vulika ya li taya dhiladhila kutya manga oondaadhi odhindji dha zi ko nonkundana ombwinayi, shoka dha popi, oshili. Aantu oya tindi okupulakena kuJosua naKaleb, nonando oyo ya li taya popi oshili. (Num. 14:6-10) Pehala lyokutaamba ko oshili nokuulika kutya oyi inekela muJehova, oyi itaale iifundja. Shoka ya ningi kasha li pandunge.

6. Omolwashike inaatu pumbwa okukala twa kumwa, ngele otu uvu omahokololo giifundja kombinga yaapiya yaJehova?

⁶ Otwa pumbwa okukala twa kotoka, unene tuu ngele otu uvu omahokololo kombinga yaapiya yaKalunga. Inatu dhimbwa nando kutya Satana omupataneki gwaapiya yaKalunga aadhiginini. (Eh. 12:10) Onkee ano, Jesus okwe tu londodha kutya aapataneki yetu, ‘otaye ke tu popila muuwinayi auhe nokufundja’ kombinga yetu. (Mat. 5:11) Ngele otwa dhiginine elondodho ndyoka, itashi ke tu kumitha, ngele otu uvu omahokololo giifundja kombinga yoshigwana shaJehova.

7. Manga inoo tuma o-e-mail nenge etumwalaka, oshike wa pumbwa okuninga?

⁷ Mbela owu hole okutumina ookuume koye oo-e-mail nosho wo omatumwalaka? Ngele osho, uuna wa mono sha oshipe miikundaneki nenge wu uvu oshinima shontumba, otashi vulika wu kale wu uvite wa fa omukundaneki gwoonkundana, ngoka oye a hala tango okukundaneka ehokololo lyontumba. Onkee ano, manga inoo tuma etumwalaka nenge o-e-mail, ipula to ti: ‘Mbela uuyelele mbuka nda hala okutaandelitha owo shili ngaa? Mbela ondi na ngaa uushili wi ihwa po?’ Ngele hasho, otashi vulika wu taandelithe uuyelele wiifundja mokati kaamwatate naamwameme. Onkee ano, otashi ka kala pandunge kuu tume o-e-mail nenge etumwalaka ndyoka.

8. Aapataneki yetu miilongo yimwe oya ningi shike, nongiini tatu vulu okuungaunga nayo?

⁸ Opu na natango etompelo limwe kutya omolwashike sha nika oshiponga okutuma meendelelo oo-e-mail nomatumwalaka. Miilongo yimwe, iilonga yetu oya ngambekwa nenge yi indikwa. Aapataneki yetu miilongo moka, otashi vulika ya taandeleke omahokololo nelalakano lyoku tu tilitha  nenge lyoku tu ningitha twaa inekelathane. Tala shoka sha li sha ningwa moSoviet Union. Aapolisi yomonanguwi, ya tseyika nawa KGB, oya li ya taandeleke omitoto kutya aamwatate yamwe mboka ya tseyika nawa, oya kengelela oshigwana shaJehova. * Aamwatate naamwameme oyendji oya li yi itaale omitoto ndhoka noya tokola ya thige po ehangano lyaJehova. Shoka kasha li tuu shiyemateka! Shinyanyudha, oyendji konima oya galuka. Ihe yamwe onkee ngaa ya yile sigo okeluwa ndika, oshoka oye etha eitaalo lyawo li nkundipale. (1 Tim. 1:19) Ongiini tatu vulu okuyanda iilanduliko mbyoka yinikitha oluhodhi? Yanda okutaandelitha omahokololo giifundja nenge ngoka kaatu na uushili mugo. Ino kala omuntu gwanathangwa nenge ho itaale kehe shimwe. Shilipaleka kutya owu na uushili.

9. Oshike ishewe hashi shi ningitha oshidhigu tu mone uuyelele womondjila?

⁹ Omahokololo ngoka kaage na uuyelele inaawu ihwa po, ohage shi ningitha oshidhigu komuntu a thike pehulithodhiladhilo li li mondjila. Ehokololo ndyoka li na uushili inaawu ihwa po, osha yela nale kutya olyiifundja. Ongiini tatu vulu okuyanda okupukithwa komahokololo ngoka? — Ef. 4:14.

10. Oshike sha li sha ningitha Aaisraeli ya kale ya hala okukondjitha aamwahe, noshike she ya kwathele kaaye shi ninge?

¹⁰ Tala shoka sha li sha ningilwa Aaisraeli yokuuninginino womulonga gwaJordan pethimbo lyaJosua. (Jos. 22:9-34) Oya li ye etelwa etumwalaka ndyoka tali popi kutya Aaisraeli yokuuzilo waJordan (ezimo lyaRuben, lyaGad netata lyezimo lyaManasse) oya tunga oshiyambelo oshinene popepi naJordan. Ombinga yimwe yetumwalaka ndyoka oya li yoshili. Shi ikolelela kuushili inaawu ihwa po, mboka ya li kuuninginino oya thiki pehulithodhiladhilo kutya aamwahe oya pilamena Jehova. Onkee ano, Aaisraeli mboka ya li kuuninginino, oya gongala, opo ya ka kondjithe mboka ye li kuuzilo. (Lesha Josua 22:9-12.) Elago enene, manga inaaye ke ya kondjitha, oya tumu ko aalumentu yamwe aainekelwa ya ka konge uuyelele wi ihwa po. Mbela oya mono ko uuyelele wuni? Oya li ya mono kutya Aaisraeli yomezimo lyaRuben, lyaGad netata lyezimo lyaManasse, oya tungu oshiyambelo, shi li  endhindhiliko lyokudhimbulukwa, ihe kashi shi nelalakano lyokuyambela ko. Oshiyambelo shoka osha li sha tungwa, opo ayehe monakuyiwa ya tseye kutya nayo wo oya li aapiya yaJehova aadhiginini. Aaisraeli mboka oye na okukala ya li ya nyanyukwa, sho inaaya ka kondjitha aamwahe. Pehala lyaashono, oya kutha ethimbo ya ka konge tango uuyelele wi ihwa po.

11. (a) Oshe ende ngiini Mefiboshet a ningilwe okwaanuuyuuki? (b) David okwa li ta vulu ngiini okuyanda okwaanuuyuuki hoka?

¹¹ Natse pauhandimwe otashi vulika tu ningilwe okwaanuuyuuki, omolwaantu mboka taya taandelitha omahokololo kombinga yetu, ngoka kaage na uuyelele wi ihwa po. Natu taleni koshiholelwa shomukwaniilwa David naMefiboshet. David okwa li a ulukile Mefiboshet olukeno nokwe mu pe omapya agehe gahekulu, Saul. (2 Sam. 9:6, 7) Konima yaashono, David oku uvu ehokololo lyiifundja kombinga yaMefiboshet. Pehala lyokutala ngele shoka u uvu oshoshili, David okwa tokola a kuthe Mefiboshet iinima ye ayihe. (2 Sam. 16:1-4) Hugunina, sho David a ka popya naMefiboshet, David okwa mono kutya epuko olye nokwa galulile Mefiboshet iinima ye. (2 Sam. 19:24-29) Andola David okwa li tango a kutha ethimbo a konge uuyelele, opo a tale ngele ehokololo ndyoka olyoshili, ando Mefiboshet ina ningilwa okwaanuuyuuki hoka.

12, 13. (a) Jesus okwa li a ungaunga ngiini nomalundilo? (b) Oshike tatu vulu okuninga po, ngele gumwe ota taandelitha iifundja kombinga yetu?

¹² Oto ka ninga po shike, ngele gumwe okwe ku lundile? Jesus naJohannes Omuninginithi, nayo oya li ya lundilwa. (Lesha Mateus 11:18, 19.) Mbela Jesus okwa li a ungaunga ngiini noshinima shoka? Jesus ka li a mana po ethimbo lye noonkondo dhe i ipopile. Pehala lyaashono, okwa tsu omukumo aantu yi imonene ko yo yene uushili, mokutala kiilonga ye nokelongo lye. Jesus okwa ti: “Uunongo waKalunga owa hololwa kiilonga ye.” — Mat. 11:19.

¹³ Opu na oshiilongomwa sha simana shoka tatu vulu okwiilonga kuJesus. Omathimbo gamwe, aantu otashi vulika ye tu lundile nenge ye tu popile muuwinayi. Otashi vulika tu kale twa halelela okuningilwa uuyuuki nokukala twa hala tu ninge po sha tu opaleke edhina lyetu. Ihe opu na shoka tatu vulu okuninga. Ngele gumwe okwe tu lundile, otatu vulu okwiihumbata momukalo ngoka tagu kwathele aantu kaayi itaale iifundja mbyoka. Eeno, ngaashi Jesus, eihumbato lyetu lyu uka otali vulu okudhima po omalundilo nosho wo oohapu dhuushili inaawu ihwa po, ndhoka tatu popilwa.

14, 15. Ongiini okwiigameka koondunge dhetu yene taku vulu okukala omwigo?

¹⁴ Kashi shi oshipu okumona uuyelele wu shi okwiinekelwa, opo wu thike pehulithodhiladhilo lyomondjila. Shimwe ishewe, okwaagwanenena kwetu oku li eshongo enene. Ongiini ngele otwa kala nokulongela Jehova nuudhiginini uule womimvo odhindji? Otashi vulika twa mona owino yokudhiladhila nosho wo oondunge dhokuyoolola. Omolwiinima mbyoka, aantu otashi vulika ya kale ye tu simaneka noonkondo. Mbela iinima mbyono otayi vulu okukala omwigo kutse?

¹⁵ Eeno, okwiigameka unene koondunge dhetu yene, otaku vulu okukala omwigo. Omaiyuvo getu noondunge dhetu, otayi vulu okutameka okunwetha mo okudhiladhila kwetu. Otashi vulika tu kale tu wete kutya otu uvite ko onkalo yontumba, nonando katu na uuyelele awuhe. Oshinima shono osha nika oshiponga. Ombiimbeli otayi tu londodha kaatu igameke koondunge dhetu yene. — Omayel. 3:5, 6; 28:26.

16. Oshike sha li sha ningwa mehala lyokulila, na Tomas okwa thiki pehulithodhiladhilo lini nziya?

¹⁶ Tala koshiholelwa shika. Ongulohi yimwe manga omukuluntugongalo gumwe gwedhina Tomas e li mehala lyokulila, okwa mono omukuluntugongalo omukwawo, John, a kuutumba  nomukiintu gumwe ngoka kee shi omukulukadhi gwe. Tomas okwa li a tala sho taya yolo, yo taya tyapula nokupapatelathana. Oshinima shoka osha piyaganeke Tomas noshe mu thigi nomapulo. Mbela John nomukadhi otaya ka teya ondjokana? Oshike tashi ka ningilwa omukadhi gwaJohn? Ongiini kombinga yoyana yaJohn? Hasho oshikando shotango Tomas ta mono onkalo ya fa ndjoka. Andola ongoye wa li wa mono oshinima shono, ando owa kala wu uvite ngiini?

17. Lwanima, Tomas okwa ka uva shike, notatu ilongo shike moshiholelwa shino?

¹⁷ Tomas okwa li e na okweenda kashona. Nonando okwa thiki pehulithodhiladhilo kutya John ota kengelele omukadhi, mbela okwa li ngaa e na uushili wi ihwa po? Tomas okwa tokola okudhengela John ongulohi ndjoka. Dhiladhila owala nkene Tomas a li a pepelelwa, sho a uvu kutya omukiintu ngoka naJohn oyahe yayina gumwe, nokwa li e ya oku mu talela po ta zi kondoolopa yokokule. Oya kala uule womimvo odhindji inaaya monathana. John okwa li owala ta vulu okutsakanena naye mehala lyokulila, molwaashoka mondoolopa okwa piti mo owala osheendelela. Omukulukadhi gwaJohn ka li a mono ompito e ye a popithe suwala ye. Elago enene, Tomas ka li a taandelitha edhiladhilo lye ndyoka lya puka. Shono otashi tu longo shike? Kutya nduno otwa kala moshili ethimbo li thike peni, otwa pumbwa aluhe okumona uuyelele wi ihwa po, opo tu thike pehulithodhiladhilo lyomondjila.

18. Okwaauvathana otaku vulu ngiini oku tu ningitha tu pangule aamwatate?

¹⁸ Ohashi kala wo eshongo megongalo okukonakona uushili woshinima shoka sha kwatela mo omumwatate ngoka tse naye ihaatu tsu tu thithe. Otashi vulika tu kale twe mu limbililwa, ngele otatu gandja eitulomo kokwaauvathana pokati ketu naye. Uuna tu uvu omumwatate ngoka ta popilwa muuwinayi, otatu vulu oku shi itaala nuupu. Oshike tatu ilongo mehokololo ndika? Ngele otwa kwatele aamwatate onkone, otashi vulika tu ya pangule, nonando katu na uushili washa. (1 Tim. 6:4, 5) Otatu ka yanda owala okupangula aamwatate, ngele itatu pitike efupa nondumbo yi mene omidhi momitima dhetu. Pehala lyaashono, otu na okukala tu hole aamwatate noku ya dhimina po tashi zi komutima. — Lesha Aakolossa 3:12-14.

19, 20. (a) Omakotampango gOmbiimbeli geni tage ke tu kwathela tu konakone ngele uuyelele owu li mondjila? (b) Oshike tatu ka kundathana moshitopolwa tashi landula?

¹⁹ Oshidhigu kunena okumona uushili wi ihwa po noku wu konakona nawa, oshoka omitotolombo nosho wo uushili inaawu ihwa po, oya ha. Opu na ishewe okwaagwanenena kwetu. Oshike tashi ke tu kwathela moshinima shino? Otu na okukala tu shi omakotampango gOmbiimbeli noku ga tula miilonga. Ekotampango limwe lyOmbiimbeli olyo kutya osha nika uugoya notashi sitha ohoni okuyamukula oshinima shoka inoo uva uushili washo. (Omayel. 18:13) Ekotampango lilwe lyOmbiimbeli otali tu dhimbulukitha kaatu itaale ohapu kehe, ihe tu shilipaleke ngele oyoshili. (Omayel. 14:15) Shimwe ishewe, kutya nduno otwa kala moshili ethimbo li thike peni, otu na okukala twa kotoka, opo kaatu igameke koondunge dhetu yene. (Omayel. 3:5, 6) Omakotampango gOmbiimbeli ngoka otage ke tu gamena owala, ngele otatu longitha uushili mboka wa za koonzo dhi shi okwiinekelwa, opo tu thike pehulithodhiladhilo lyomondjila nokuninga omatokolo gopandunge.

²⁰ Opu na ishewe eshongo lilwe. Olini mbela? Egamo lyokupangula aantu shi ikolelela keholokopo lyawo. Moshitopolwa tashi landula, otatu ka konakona iinima yimwe mbyoka hayi tu ningitha olundji tu pangule yalwe notatu ka tala wo kutya oshike tashi vulu oku tu kwathela tu yi yande.