EITAALO oli na oonkondo lela. Pashiholelwa, nonando Satana okwa hala okuyona po ekwatathano lyetu naJehova, eitaalo ohali tu kwathele tu wape “okudhima nalyo iikuti ayihe ya hwama omulilo mbyoka tayi umbwa kuMwiinayi.” (Ef. 6:16) Ngele otu na eitaalo, otatu vulu okwiidhidhimikila omaupyakadhi ngoka taga monika omanene ga fa oondundu. Jesus okwa li a lombwele aalongwa ye a ti: “Andola mu na eitaalo li thike pomuma yosinapi, ando otamu vulu okulombwela ondundu ndjika: ‘Itumba po mpaka, u hedhe nkwiyaka!’ Ando tayi itumbu po.” (Mat. 17:20) Molwaashoka eitaalo ohali koleke ekwatathano lyetu naJehova, otu na okudhiladhila komapulo ngaka: Eitaalo oshike? Iikala yetu yokomutima ohayi gumu ngiini eitaalo lyetu? Ongiini tatu vulu okukoleka eitaalo lyetu? Otu na okukala twi itaala mulye? — Rom. 4:3.

Eitaalo kali shi owala okwiitaala shoka Ombiimbeli tayi ti, oshoka “oompwidhuli wo odhe shi itaala [kutya Kalunga oko e li] notadhi kakama kuumbanda.” (Jak. 2:19) Ano eitaalo oshike nani?

Ombiimbeli oya fatulula eitaalo momikalo mbali. Gwotango, “okukala tu na eitaalo otashi ti okukala tu na einekelo lya kola miinima mbyoka twa tegamena.” (Heb. 11:1a) Ngele owu na eitaalo, oho kala wi itaala thiluthilu kutya kehe shimwe shoka Jehova a popya oshoshili notashi ka gwanithwa. Pashiholelwa, Jehova okwa li a lombwele Aaisraeli a ti: “Onda hangana nomutenya nuusiku, opo omathimbo ngaka ga kale ngaashi gu uthwa. Ehangano ndika itali vulu okuteka po. Osho nda hangana wo nomupiya gwandje David.” (Jer. 33:20, 21) Mbela oho kala wa tila kutya pamwe esiku limwe etango itali ka pita we, shoka tashi ningitha pu kale kaapu na we uusiku nomutenya? Ngele iho kala wa limbililwa oompango dhopaunshitwe ndhoka hadhi kaleke evi tali dhingoloka moakisi yalyo nokudhingoloka etango, mbela owu na okukala wa limbililwa ngele Omushiti gwoompango ndhoka, ota vulu ngaa okugwanitha po omauvaneko ge? Hasho nando. — Jes. 55:10, 11; Mat. 5:18.

Omutiyali, eitaalo olyo “okukala nuumbangi waashoka sha tegelelwa nando kashi wetike.” Eitaalo otali popiwa li li “okukala nuumbangi” wiinima mbyoka itaatu vulu okumona nomeho, nonando oyoshili. (Heb. 11:1b, NW) Ngiini mbela? Natu tye nduno okanona oke ku pula taka ti: ‘Owu shi shi ngiini kutya oku na ombepo (air)?’ Nonando ino mona nale ombepo ndjoka, oto ke ka kwathela moku ka lombwela iinima mbyoka tayi ulike kutya oko yi li, ngaashi okufudha, ombepo ndjoka hayi pepe nosho tuu. Ngele okanona oka tompwa kuumbangi mboka, otashi ke ka kwathela ka itaale miinima mbyoka kaayi wetike kutya oyoshili. Sha faathana, eitaalo olyi ikolelela kuumbangi wa kola. — Rom. 1:20.

Molwaashoka eitaalo olya kankamena kuumbangi, tango omuntu okwa pumbwa okukala e na ‘ontseyo yashili,’ opo a kale e na eitaalo. (1 Tim. 2:4) Ihe shoka inashi gwana. Omuyapostoli Paulus okwa  nyola a ti: “Ngoka i itaala nomwenyo gwe aguhe,” oku na eitaalo. (Rom. 10:10) Omuntu ke na owala okukala i itaala oshili, ihe oku na wo okukala e yi lenga. Shoka osho owala tashi ke mu inyengitha a kale e na eitaalo, ano a katuke metsokumwe noshili. (Jak. 2:20) Omuntu ngoka inaa pandula oshili nomutima aguhe, otashi vulika a tinde nokuli okwiitaala uumbangi wa yela mboka wu li po, ngele okwa dhama komalongo ge omakulu nenge a hala okuninga shoka a hala. (2 Pet. 3:3, 4; Jud. 18) Nomolwaashono pethimbo lyOmbiimbeli, haantu ayehe mboka ya li ya mona iikumithalonga, ya li yi itaala. (Num. 14:11; Joh. 12:37) Ombepo ondjapuki yaKalunga ohayi kokeke owala eitaalo maantu mboka ye hole lela oshili. — Gal. 5:22; 2 Tes. 2:10, 11.

Omukwaniilwa David oye gumwe gwomwaamboka ya li ye na eitaalo lya kola. (Heb. 11:32, 33) Nonando ongawo, haantu ayehe maandjawo ya li ye na eitaalo lya fa lye. Pashiholelwa, oshikando shimwe Eliab, omumwayina gwaDavid gwosheeli, ka li a ulike eitaalo, sho a nyenyetele David, omolwokugeela Goliat. (1 Sam. 17:26-28) Kapu na ngoka a valwa e na eitaalo nenge e li thigulula kaavali ye. Onkee ano, eitaalo lyaDavid olya li tali ulike kutya oku na ekwatathano ewanawa naKalunga.

MEpisalomi 27, David okwa holola nkene sha ende, opo a kale e na eitaalo lya kola. (Ovelise 1) David okwa li ha tedhathedha koonkalo ndhoka a pita mudho nokunkene a li a ungaunga nomaupyakadhi ge. (Ovelise 2, 3) Okwa li a pandula noonkondo elongekidho lyaJehova lyoku mu longela. (Ovelise 4) David okwa li a longele Kalunga pamwe nooitaali ooyakwawo petsalihangano. (Ovelise 6) Okwa li ha galikana Jehova a mana mo. (Ovelise 7, 8) David okwa li wo a hala okulongwa kuKalunga. (Ovelise 11) Eitaalo olya li lya simana kuDavid, nomolwaashono a pula ta ti: “Ando kanda li ndi na eitaalo, ando ondi li peni?” — Ovelise 13, NW.

Oto vulu okukala wu na eitaalo lya fa lyaDavid, ngele owa holele iikala mbyoka ya popiwa mEpisalomi 27. Molwaashoka eitaalo olya kankamena kontseyo yashili, ngele owa konakona Oohapu dhaKalunga nosho wo iileshomwa yopaMbiimbeli, otashi ka kala oshipu okwiimika oshiyimati shombepo shika. (Eps. 1:2, 3) Kala wo ho tedhatedha konima ngele wa konakona. Okutedhatedha oku li evi moka hamu mene olupandu pathaneko. Sho ngaa olupandu lwoye lwokupandula Jehova talu ende talu koko, oto ka kala wo wa halelela okukala neitaalo tali longo, moku mu tanga megongalo nokutseyithila yalwe etegameno lyoye. (Heb. 10:23-25) Shimwe ishewe, ohatu ulike kutya otu na eitaalo, uuna tatu tsikile ‘okugalikana nopwaa na okuvulwa.’ (Luk. 18:1-8) Onkee ano, natu “galikaneni aluhe” kuJehova nokukala neinekelo kutya ‘oye omusilishimpwiyu gwetu.’ (1 Tes. 5:17; 1 Pet. 5:7) Eitaalo ohali tu inyengitha tu katuke oonkatu, noonkatu dhetu ohadhi ulike kutya otu na eitaalo lya kola. — Jak. 2:22.

Ongulohi manga Jesus inaa sa, okwa li a lombwele aalongwa ye a ti: “Itaaleni Kalunga ne mu itaale  ndje wo.” (Joh. 14:1) Onkene inatu pumbwa owala okukala tu na eitaalo muJehova, ihe nomuJesus wo. Ongiini tatu vulu okukala tu na eitaalo muJesus? Natu taleni omikalo ndatu.

Gwotango, tala ko ekulilo li li omagano we ga pewa kuKalunga. Omuyapostoli Paulus okwa ti: “Otandi kala ndi itaala Omuna gwaKalunga, ngoka e hole ndje nokwa gandja omwenyo gwe molwandje.” (Gal. 2:20) Ngele owa kala wu na eitaalo muJesus, oto ka kala wi itaala lela kutya ekulilo otali vulu oku ku kwathela, olyo lye shi ningitha tashi wapa, opo oondjo dhoye dhi kale tadhi dhimwa po, otali ku pe etegameno lyokumona omwenyo gwaaluhe notali ku shilipaleke lela kutya Kalunga oku ku hole. (Rom. 8:32, 38, 39; Ef. 1:7) Shoka otashi ke ku kwathela wu yande omadhiladhilo omawinayi nokwiipa uusama. — 2 Tes. 2:16, 17.

Omutiyali, hedha popepi naJehova okupitila megalikano, omolwekuliloyambo ndyoka lye shi ningitha tashi wapa. Omolwekulilo, otatu vulu okugalikana kuJehova “tu na omukumo, hoka tatu ka silwa ohenda nolukeno. Esilohenda ndyoka otali tu kwatha pethimbo lyo opala.” (Heb. 4:15, 16; 10:19-22) Egalikano ohali tu kwathele tu kale twa tokola toko tu kondjithe shoka tashi tu makele tu yone. — Luk. 22:40.

Omutitatu, kala ho vulika kuJesus. Omuyapostoli Johannes okwa nyola a ti: “Oongoka i itaala Omwana, oku na omwenyo gwaaluhe, ihe ngoka itaa vulika kOmwana, ita ka mona omwenyo, ihe ondjahi yaKalunga otayi kala kombanda ye.” (Joh. 3:36) Ndhindhilika kutya Johannes okwa yelekanitha okukala neitaalo nokwaavulika. Onkee ano, uuna to vulika kuJesus, oto ulike kutya owe mu itaala. Oho vulika kuJesus, sho ho landula “ompango yaKristus,” ano ashihe shoka e tu longa nokwe tu lombwela. (Gal. 6:2) Oho vulika wo kuJesus, sho ho landula ewiliko lye okupitila ‘momupiya omudhiginini nomunandunge.’ (Mat. 24:45, yelekanitha NW.) Ngele owa kala ho vulika kuJesus, oto ka vula okwiidhidhimikila omaupyakadhi ngoka ga fa oshikungulu. — Luk. 6:47, 48.

Oshikando shimwe omulumentu gumwe okwa li i igidha Jesus a ti: “Ondi itaala, kwatha ndje nuuna ndaa na eitaalo.” (Mark. 9:24) Omulumentu ngoka okwa li ngaa e na eitaalo, ihe okwa li e wete a pumbwa eitaalo lya kola. Ngaashi omulumentu ngoka, atuheni otashi vulika tu ki iyadhe moonkalo moka twa pumbwa eitaalo lya kola. Atuheni otatu vulu okukoleka eitaalo lyetu ngashingeyi. Ngaashi twe shi mona, ohatu koleke eitaalo lyetu, uuna tatu konakona Oohapu dhaKalunga nokutedhatedha kudho, shoka tashi ke tu kwathela tu kale twa pandula Jehova noonkondo. Eitaalo lyetu otali ka kola wo, uuna tatu longele Jehova pamwe nooitaali ooyakwetu, tatu lombwele yalwe kombinga yetegameno lyetu nuuna tatu dhiginine okugalikana. Kakele kaashono, ngele otwa kala neitaalo lya kola, otatu ka pewa ondjambi onenenene. Oohapu dhaKalunga otadhi tu ladhipike tadhi ti: “Ookuume kandje, itungileni kekankameno lyeitaalo lyeni eyapuki . . . ne mwi ikaleke mohole yaKalunga.” — Jud. 20, 21.