1. Oshike tashi vulu oku tu kwathela tu nyanyukilwe okukonakona omahunganeko gOmbiimbeli?

 OMUMWATATE omugundjuka Ben okwa ti: “Ondi hole okukonakona omahunganeko gOmbiimbeli.” Mbela oto tsu kumwe naye? Nenge owu uvite omahunganeko gOmbiimbeli omadhigu okuuva ko? Otashi vulika nokuli wu kale wu uvite kutya oku ga konakona oku lulila. Ihe ngele owa ilongo oshindji kutya omolwashike Jehova e ga kwatela mo mOohapu dhe, otashi vulika wu tameke okukala we ga hokwa.

2. Oshike tatu ka kundathana moshitopolwa shika?

² Moshitopolwa shika itatu ka kundathana owala kutya omolwashike tu na okwiilonga kombinga yomahunganeko gOmbiimbeli, ihe otatu ka kundathana wo kutya ongiini tatu vulu oku ga konakona. Otatu ka kundathana wo omahunganeko gaali membo lyaDaniel, tu mone kutya ongiini oku ga uva ko taku vulu oku tu kwathela ngashingeyi.

3. Oshike twa pumbwa okuninga ngele otwa hala okuuva ko omahunganeko gOmbiimbeli?

³ Otwa pumbwa okupula ekwatho ngele otwa hala okuuva ko omahunganeko gOmbiimbeli. Natu taleni kethaneko tali landula. Natu tye andola owa ka talela po kehala hoka kuu shi ko, ihe kuume koye ngoka wu li naye ehala ndyoka oku li shi nawa. Oku shi mpoka mu li, noondjila adhihe oku dhi shi nawa. Kapu na omalimbililo kutya oto ka kala wa nyanyukwa sho kuume koye a zimine mu ye naye. Sha faathana, Jehova oku shi mpoka tu li momukokomoko gwethimbo ndika, noku shi nawa onakuyiwa yetu. Ano opo tu uve ko omahunganeko gOmbiimbeli, otu na okupula kuJehova ekwatho neifupipiko.—Dan. 2:28; 2 Pet. 1:19, 20.

4. Omolwashike Jehova a nyolitha omahunganeko mOohapu dhe? (Jeremia 29:11) (Tala wo ethano.)

⁴ Ngaashi owala aavali haya kala ya halela oyana uuwanawa, Jehova naye okwa hala oyana ya kale nonakuyiwa ombwanawa.  (Lesha Jeremia 29:11.) Nonando aavali ihaya vulu okutseya onakuyiwa yoyana, Jehova oha kala e shi shoka tashi ka ningwa komeho, nohashi ningwa shili. Okwa nyolitha omahunganeko mOohapu dhe, opo tu tseye kombinga yiiningwanima mbyoka ya simana manga inaayi ningwa. (Jes. 46:10) Omahunganeko gOmbiimbeli omagano gopahole twe ga pewa kuTate yetu gwomegulu. Ihe ongiini to vulu okukala nuushili kutya shoka Ombiimbeli ya hunganeka otashi ka gwanithwa shili?

5. Oshike aagundjuka taya ilongo moshiholelwa shaMax?

⁵ Kosikola aagundjuka yetu oye li mokati kaantu mboka inaaya simaneka naanaa Ombiimbeli. Omathimbo gamwe, shoka haya popi nenge iinima mbyoka haya ningi ohayi vulu okukuna omalimbililo momadhiladhilo gaanona mboka ye li Oonzapo. Natu taleni koshiholelwa shomumwatate Max. Okwa ti: “Sho nda li ndi na omimvo omulongo nasha, onda tameke okukala nda limbililwa ngele aavali yandje oye li ngaa melongelokalunga lyashili nongele Ombiimbeli oya nwethwa mo ngaa shili kuKalunga.” Aavali ye oya li ya ningi po shike? Okwa ti: “Oya li ya ngungumana, nonando ondi shi kutya oya limbililwa.” Aavali yaMax oya li ya yamukula omapulo ge, taya longitha Ombiimbeli. Max naye okwa li wo a ningi po sha. Okwa ti: “Onda konakona omahunganeko gOmbiimbeli, nonda kundathana naagundjuka ooyakwetu shoka nda ilonga mo.” Oshizemo oshini? Max okwa ti: “Konima yaashoka onda li nda tompwa kutya Ombiimbeli oya nwethwa mo kuKalunga.”

6. Oshike wu na okuninga ngele owu na omalimbililo, nomolwashike?

⁶ Ngele owa tameke okukala wu na omalimbililo ngele Ombiimbeli oyi li ngaa paushili ngaashi Max, ino pumbwa okukala wa sa ohoni. Ihe owa pumbwa okuninga po sha meendelelo. Omalimbililo oga fa olusu. Ngele olusu owe lu ethele pokuma, otalu vulu okuyonagula po oshinima shoka shi na ongushu. Opo wu vudhe mo omalimbililo ngoka taga vulu okuyona po eitaalo lyoye, ipula kutya: ‘Mbela onda itaala ngaa shoka Ombiimbeli tayi popi kombinga yonakuyiwa?’ Ngele ku na uushili, owa pumbwa okukonakona omahunganeko gOmbiimbeli ngoka ga gwanithwa nale. Natu taleni nkene to vulu oku shi ninga.

7. Oshiholelwa shini Daniel e tu tulila po ngele tashi ya pokukonakona omahunganeko? (Daniel 12:10) (Tala wo ethano.)

⁷ Daniel okwe tu tulila po oshiholelwa oshiwanawa shankene tu na okukonakona omahunganeko. Okwa li e ga konakona neinyengotompelo ewanawa, opo a tseye oshili. Okwa li wo omwiifupipiki. Okwa li e shi kutya Jehova ote ke mu kwathela a uve ko omahunganeko ngele okwa kala ha vulika kuye. (Dan. 2:27, 28; lesha Daniel 12:10.) Daniel okwa li a ulike kutya omwiifupipiki mokukala e na einekelo kutya Jehova ote mu kwatha. (Dan. 2:18) Okwa li wo ha konakona omanyolo nuukeka. Okwa li ha kongo omayamukulo mOmanyolo ga nwethwa mo ngoka ga li ko pethimbo lye. (Jer. 25:11, 12; Dan. 9:2) Ongiini to vulu okuholela Daniel?

8. Omolwashike yamwe haya tindi okwiitaala kutya omahunganeko gOmbiimbeli ohaga gwanithwa, ihe oshike tu na okuninga po?

⁸ Konakona omainyengotompelo goye. Uuna to konakona omahunganeko gOmbiimbeli, mbela  oho shi ningi molwaashoka wa hala okutseya oshili? Ngele osho, Jehova ote ke ku kwathela. (Joh. 4:23, 24; 14:16, 17) Aantu yalwe ohaya konakona Ombiimbeli molwomatompelo galwe. Yamwe otashi vulika haye shi ningi, molwaashoka ya hala okumona uuyelele mboka tawu ti kutya Ombiimbeli inayi nwethwa mo shili kuKalunga. Kungawo, ohaya dhiladhila kutya ngele Ombiimbeli inayi za kuKalunga, otaya vulu okutokola kuyo yene shoka shi li mondjila naashoka sha puka. Onkee ano otwa pumbwa oku yi konakona netompelo ewanawa. Shimwe ishewe, otwa pumbwa uukwatya wulwe wa simana, opo tu vule okuuva ko omahunganeko gOmbiimbeli.

9. Uukwatya wuni twa pumbwa, opo tu uve ko omahunganeko gOmbiimbeli? Shi yelitha.

⁹ Kala omwiifupipiki. Jehova okuuvaneka okukwathela mboka aaifupipiki. (Jak. 4:6) Onkee ano otwa pumbwa oku mu galikana e tu kwathele tu uve ko omahunganeko gOmbiimbeli. Ngele otu li aaifupipiki, otatu ka taamba ko wo ekwatho ndyoka hatu pewa komupiya omudhiginini ngoka ha longithwa kuJehova e tu pe iikulya yopambepo pethimbo. (Luk. 12:42) Jehova oKalunga kelandulathano, onkee ano, oshi shi okuuviwa ko sho ha longitha owala onzo yimwe oku tu kwathela tu uve ko oshili ndjoka yi li mOohapu dhe.—1 Kor. 14:33; Ef. 4:4-6.

10. Oshike to ilongo moshiholelwa shaEsther?

¹⁰ Ninga omapekapeko nuukeka. Tango, konakona ehunganeko ndyoka wu hole e to ningi omapekapeko kombinga yalyo. Omumwameme Esther osho a li a ningi. Okwa li a hala okutseya oshindji kombinga yomahunganeko ngoka taga popi okuya kwaMesiasa. Okwa ti: “Sho nda li ndi na omimvo 15, onda tameke okuninga omapekapeko ndi mone uuyelele mboka tawu ulike kutya omahunganeko ngoka oga nyolwa shili manga Jesus inaa valwa.” Okwa li a tompwa kwaashoka a lesha kombinga yOondhingambo dhomEfuta lyaSa. Okwa gwedha ko a ti: “Oondhingambo dhimwe odha li dha nyolwa manga Kristus inaa valwa, naashoka oshe mu kwathele a mone kutya omahunganeko ngoka oge na okukala ga za kuKalunga. Onda li handi lesha iinima iikando niikando, opo ndi yi uve ko.” Esther okwa nyanyukwa omolwoonkambadhala ndhoka a ninga. Konima sho a konakona nuukeka omahunganeko gOmbiimbeli gi ili nogi ili, okwa ti: “Ondi imonene ko ngaye mwene kutya shoka Ombiimbeli tayi popi oshoshili.”

11. Omolwashike twa pumbwa okukala tu na uushili kutya Ombiimbeli oyi li paushili?

¹¹ Uuna twa mono nkene omahunganeko gamwe gomOohapu dhaKalunga ga gwanithwa, ohatu kala twi inekela Jehova noonkondo nosho wo ewiliko ndyoka he tu pe. Shimwe ishewe, omahunganeko gOmbiimbeli ohage tu kwathele tu kale tu na etegameno lyonakuyiwa, kashi na nduno mbudhi kutya otwa taalela omashongo goludhi luni. Natu ka kundathaneni omahunganeko gaali ngoka ge li muDaniel, taga gwanithwa ngashingeyi. Ngele otwa kala tu ga uvite ko, otashi ke tu kwathela tu ninge omatokolo gopandunge nenge gomondjila.

12. Oompadhi ‘dhosheela sha vundakanithwa neloya’ otadhi thaneke shike? (Daniel 2:41-43)

¹² Lesha Daniel 2:41-43. Mondjodhi ndjoka Daniel a li a fatululile omukwaniilwa Nebukadnezzar,  oompadhi dhoshiyelekela ndhoka omukwaniilwa a li a mono, odha li ‘dhosheela sha vundakanithwa mumwe neloya.’ Ngele otwa yelekanitha ehunganeko ndika nomahunganeko ngoka ge li muDaniel nomEhololo, otatu vulu okuthika pehulithodhiladhilo kutya oompadhi otadhi thaneke epangelo lyomuhanga, lyaAnglo-Amerika, epangelo ndyoka enankondo muuyuni ngashingeyi. Daniel okwa popya kombinga yepangelo ndyoka enankondo a ti: ‘Ombinga yimwe yepangelo ndika otayi ka kala ya kola, nonkwawo inayi kola.’ Omolwashike taku tiwa ombinga yimwe inayi kola? Omolwaashoka aakwashigwana mboka taya thanekwa keloya, oya dhina kutya epangelo ndyoka ka li oonkondo dha fa dhosheela. b

13. Oshili yini ya simanenena tatu ilongo mehunganeko ndika?

¹³ Otwa ilonga oshili ya simanenena koshihongwathano shoka Daniel a mono. Ihe otatu vulu okwiilonga oshindji koompadhi dhasho. Shotango, epangelo enankondo lyuuyuni, lyaAnglo-Amerika, olya li lya holola oonkondo dhalyo momikalo dhilwe. Pashiholelwa, olyo lya li lya dhana onkandangala mokusindana mIita Iitiyali yUuyuni. Nonando ongawo, kali na oonkondo ngaashi omapangelo ngoka ge li tetekele, notali ka tsikila okukala ngawo, molwaashoka aakwashigwana yalyo ohaya kondjithathana nohaye li kondjitha wo. Oshitiyali, epangelo enankondo, lyaAnglo-Amerika, olyo tali ka kala lyahugunina tali pangele uuyuni manga Uukwaniilwa waKalunga inaawu hulitha po omapangelo agehe gopantu. Nokuli nando iigwana yilwe omathimbo gamwe otashi vulika yi pataneke epangelo enankondo lyuuyuni, lyaAnglo-Amerika, itayi ke li pingena po. Shono otu shi shi, molwaashoka “emanya” ndyoka tali thaneke Uukwaniilwa waKalunga otali ka nyanyagula oompadhi dhoshiyelekela, oshitopolwa shoka tashi thaneke epangelo lyomuhanga lyaAnglo-Amerika.—Dan. 2:34, 35, 44, 45.

14. Ongiini okuuva ko ehunganeko tali popi kombinga yoompadhi dhoshiyela nodheloya taku vulu oku tu kwathela tu ninge omatokolo ge li pandunge?

¹⁴ Mbela owa tompwa kutya ehunganeko lyaDaniel li na ko nasha noompadhi dhoshiyela nodheloya olyoshili? Ngele osho, otashi ka guma onkalamwenyo yoye. Ito ka lalakanena okwiikongela iimaliwa oyindji nenge iinima yopamaliko oyindji, molwaashoka owu shi kutya uuyuni mbuka masiku otawu ka hanagulwa po. (Luk. 12:16-21; 1 Joh. 2:15-17) Okuuva ko ehunganeko ndika otaku ke ku kwathelwa wu mone nkene iilonga yokuuvitha noyokulonga aantu, ya simana. (Mat. 6:33; 28:18-20) Ngele wa konakona ehunganeko ndika, omolwashike itoo ipula epulo ndika: ‘Mbela omatokolo ngoka handi ningi otaga ulike kutya onda tompwa kutya Uukwaniilwa waKalunga masiku otawu ka hulitha po omapangelo agehe gopantu?’

15. Olye ‘omukwaniilwa gwokuumbangalantu,’ nolye ‘omukwaniilwa gwokuumbugantu’ kunena? (Daniel 11:40)

¹⁵ Lesha Daniel 11:40. Daniel ontopolwa 11 otayi popi kombinga yaakwaniilwa, nenge omapangelo gopapolotika, ngoka taga kondjithathana omolwoonkondopangelo. Ngele otwa yelekanitha ehunganeko ndika nomahunganeko galwe mOmbiimbeli, otatu vulu okumona kutya ‘omukwaniilwa gwokuumbangalantu’ oRusia niilongo mbyoka tayi longele kumwe naye, omanga ‘omukwaniilwa gwokuumbugantu’ epangelo enankondo muuyuni, lyaAnglo-Amerika. c

16. “Omukwaniilwa gwokuumbangalantu” ohu ungaunga ngiini noshigwana shaKalunga?

¹⁶ Oshigwana shaKalunga shoka shi li kohi yepangelo ‘lyomukwaniilwa gwokuumbangalantu’ otashi hepekwa komukwaniilwa ngoka. Oonzapo dhimwe odha kala nokudhengwa nokutulwa  mondholongo omolweitaalo lyadho. Okuhepekwa kwadho ‘komukwaniilwa gwokuumbangalantu’ okwa koleke eitaalo lyadho muJehova nomOohapu dhe. Omolwashike mbela? Omolwaashoka aamwatate oye shi kutya okuhepekwa kwoshigwana shaKalunga otaku gwanitha po oohapu dhopahunganeko ndhoka dha popiwa muDaniel. d (Dan. 11:41) Okukala tu shi oshinima shoka, otashi tu kwathele tu kaleke etegameno lyetu lya kola notu kale aadhiginini kuJehova.

17. Oshigwana shaKalunga shoka shi li kohi yepangelo ‘lyomukwaniilwa gwokuumbangalantu’ osha taalela omashongo geni?

¹⁷ Nale, “omukwaniilwa gwokuumbugantu” okwa li wo a hepeke oshigwana shaJehova. Pashiholelwa, petameko lyethelemimvo etimilongo mbali, aamwatate oyendji oya li ya tulwa mondholongo, molwuudhiginini wawo, naanona yamwe Oonzapo oya li ya tidhwa mo mosikola omolwokwaanombinga kwawo mopolotika. Ihe omimvo omilongo opo dha zi ko, aapiya yaJehova aadhiginini mboka ye li kohi yepangelo lyomukwaniilwa  gwokuumbugantu oya li ya makelwa momikalo dhilwe omolwuudhiginini wawo kUukwaniilwa waKalunga. Pashiholelwa, pethimbo lyiikonga yomahogololo, Omukriste otashi vulika a kale e uvite ta makelwa a ambidhidhe ongundu yimwe yopapolotika nenge gulwe ngoka ta hogololwa. Nonando iha hogolola, otashi vulika a kale e uvite kutya ongundu yimwe yopapolotika oyi li nawa yi vule onkwawo. Nando ongawo, opo tu kale lela aadhiginini, otu na okukala twa kotoka shi na ko nasha naashoka tatu ningi notatu dhiladhila nosho wo nkene tu uvite.—Joh. 15:18, 19; 18:36.

18. Ohatu inyenge ngiini shi na ko nasha nomaipumomumwe pokati ‘komukwaniilwa gwokuumbangalantu’ nosho wo ‘nomukwaniilwa gwokuumbugantu’? (Tala wo ethano.)

¹⁸ Mboka inaayi itaala momahunganeko gOmbiimbeli otashi vulika ya kale ya tila noonkondo uuna ye wete “omukwaniilwa gwokuumbugantu” ta kondjo ‘nomukwaniilwa gwokuumbangalantu.’ (Dan. 11:40) Aakwaniilwa ayehe mboka oye na iilwitho yolute yokuhanagula po aantu ayehe kombanda yevi. Ihe otu shi kutya Jehova ita ka etha shoka shi ningwe. (Jes. 45:18) Onkee ano pehala lyoku tu ningitha tu kale tatu ipula, uutondwe mboka wu li pokati ‘komukwaniilwa gwokuumbangalantu’ nosho wo ‘nomukwaniilwa gwokuumbugantu’ otawu koleke eitaalo lyetu. Shoka otashi ulike kutya onkalelo yuuyuni mbuka oyi li pokuhula po.

19. Omolwashike twa pumbwa okukala tu shi oshili kombinga yomahunganeko?

¹⁹ Katu shi kutya omahunganeko gamwe otaga ka gwanithwa ngiini. Nokuli nomuhunganeki Daniel ka li e uvite ko ehunganeko kehe ndyoka a nyola kombinga yalyo. (Dan. 12:8, 9) Ihe molwaashono katu shi lela nkene omahunganeko ngono taga ka gwanithwa, shono itashi ti kutya itaga ka gwanithwa shili. Kapu na omalimbililo, otatu vulu okukala tu na einekelo kutya Jehova ote ke tu ulukila shoka twa pumbwa okutseya pethimbo lyo opala, ngaashi owala a li e shi ningi monakuziwa.—Amos 3:7.

20. Omahunganeko geni omahokithi taga ka gwanithwa masiku, noshike tu na okutsikila okuninga?

²⁰ Eigidho ‘lyombili negameno’ otali ka gwanithwa. (1 Tes. 5:3) Opo nduno omapangelo otaga ka ponokela omalongelokalunga giifundja. (Eh. 17:16, 17) Omapangelo otaga ka ponokela oshigwana shaKalunga. (Hes. 38:18, 19) Oshiningwanima shika otashi fala sigo opiita yaArmagedon. (Eh. 16:14, 16) Otatu vulu okukala nuushili kutya iiningwanima mbika masiku otayi ka ningwa. Onkee ano natu tsikileni okuulukila Tate yetu gwomegulu omunahole kutya otwa pandula, mokugandja eitulomo komahunganeko gOmbiimbeli nomokukwathela yalwe ya ninge sha faathana.