1, 2. Omolwashike enyolo lyAaroma 5:12 ehokithi kOonzapo dhaJehova?

DHILADHILA ando wa hala okunyola melandulathano oovelise dhOmbiimbeli ndhoka Oonzapo dhaJehova dhi shi nawa nohadhi longitha olundji. Mbela Aaroma 5:12 oyo to tula petameko lyomusholondondo gwomanyolo ngoka wa nyola? Dhiladhila kutya iikando ingapi ho longitha enyolo ndika tali ti: “Uulunde owe etwa muuyuni komuntu gumwe, nuulunde we owe etelele eso. Onkee ano eso olya taandele maantu ayehe, oshoka ayehe oya yono.”

² Ovelise ndjoka oya longithwa lwiikando membo Ombiimbeli otayi tu longo shike? Uuna to konakona embo ndika naamwoye nenge nayalwe, otashi vulika ho longitha Aaroma 5:12 ngele tamu kundathana elalakano lyaKalunga li na ko nasha nevi, kombinga yekulilo nosho wo yonkalo yoonakusa montopolwa 3, 5 no 6. Ihe mbela olungapi ho dhiladhila kombinga yenyolo ndino shi na ko nasha nekwatathano lyoye naJehova, niilonga yoye nonakuyiwa yoye?

3. Oshike tu na okudhimbulukwa shi na ko nasha nuulunde wetu?

³ Osha yela kutya atuheni aalunde nohatu ningi omapuko esiku kehe. Ihe nonando ongawo, otu na uushili kutya Kalunga ohe tu sile ohenda, molwaashono oku shi kutya tse ontsi yevi. (Eps. 103:13, 14) Jesus moshiholelwa shegalikano lye okwi indile Kalunga a  ti: “Dhima po oondjo dhetu.” (Luk. 11:2-4) Katu na okukala tatu dhiladhila komapuko ngoka Kalunga e tu dhimina po nale, ihe otu na okukala tatu dhiladhila kutya omolwashike e tu dhimina po.

4, 5. (a) Oshike tashi tu kwathele tu uve ko Aaroma 5:12? (b) “Omagano gesilohenda lyaKalunga” ngoka ga tumbulwa mAaroma 3:24 oshike?

⁴ Moontopolwa ndhoka dha tetekela oohapu dhomuyapostoli Paulus ndhoka dhi li mAaroma 5:12, nuunene tuu montopolwa ya ka landula ko, ontopolwa 6, otatu adha mo uuyelele wa simana. Oontopolwa ndhoka otadhi tu kwathele tu uve ko nkene Jehova ta vulu oku tu dhimina po. Montopolwa 3, otamu popiwa ngeyi: ‘Oshoka aantu ayehe oya yona, ihe molwomagano gesilohenda lyaKalunga, Kalunga ote ya ningi aayuuki, oshoka Jesus Kristus okwe ya kulila.’ (Rom. 3:23, 24) Paulus okwa li a hala okutya shike sho a popi ‘omagano gesilohenda lyaKalunga’? Oshitya shOshigreka shoka sha tolokwa ‘omagano gesilohenda lyaKalunga’ otashi gandja edhiladhilo lyokuninga oshinima shontumba momukalo omwaanawa nopwaahe na okugalulilwa sha, ano inoo tegelela wu pewe sha.

⁵ Omulongwantu gumwe, John Parkhurst, okwa ti: “Uuna taku popiwa omagano gesilohenda lyaKulanga nenge lyaKristus olundji uutumbulilo mbuka otawu ulike kwaashoka ya ninga po, opo ya hupithe aantu muulunde neso.” Uutumbulilo ‘omagano gesilohenda lyaKalunga’ mboka wu li moNew World Translation otawu opalele. Ihe mbela Kalunga oku ulike ngiini omagano gesilohenda lye? Mbela shoka oshi na ko nasha nashike netegameno lyoye nosho wo nekwatathano lyoye naKalunga? Natu shi taleni.

6. Oolye taya vulu okumona mo uuwanawa momagano gesilohenda lyaKalunga?

⁶ Adam oye ‘omuntu gumwe’ ngoka e ‘eta muuyuni’ uulunde neso. Onkee ano, “omolwokuyona kwomuntu gumwe eso olya tameke okupangela maantu ayehe.” Paulus okwa gwedha ko a ti: “Eudho lyesilohenda lyaKalunga” olye ya ‘omolwaanguka gumwe, Jesus Kristus’. (Rom. 5:12, 15, 17) Omagano gesilohenda lyaKalunga oge etela aantu ayehe uuwanawa. “Oyendji otaa ningwa aayuuki koshipala shaKalunga omolwokuvulika kwomuntu gumwe,” Jesus. Omagano gesilohenda lyaKalunga otaga vulu oku tu petha ‘omwenyo gwaaluhe omolwaJesus Kristus.’ —  Rom. 5:19, 21.

7. Omolwashike omagano gaKalunga gekuliloyambo ge li pahole nopasilohenda?

⁷ Jehova ka li e na okutuma Omwana kombanda yevi a ninge ekuliloyambo. Shimwe ishewe, aantu mboka inaaya gwanenena kaya li ya gwana okupewa ekuliloyambo ndyoka lya zi kuKulanga naJesus. Onkee ano, okudhiminwa po kwetu nosho wo etegameno lyoku ka mona omwenyo gwaaluhe oyi li shili esilohenda inaali longelwa sha. Otu na lela okukala twa pandula omagano gesilohenda lyaKalunga nokweetha ge tu nwethe mo monkalamwenyo yetu yesiku kehe.

8. Aantu yamwe otashi vulika ya kale ye na etaloko lya puka lini li na ko sha nokuyona kwetu?

⁸ Tu li oluvalo lwaAdam inaalu gwanenena, ohatu ningi omapuko omolwuulunde. Ihe otashi ka kala epuko enene uuna tatu longitha nayi omagano gesilohenda lyaKalunga, ngaashi mokudhiladhila kutya ‘nonando onda yona koshipala shaKalunga, kandi na okukala tandi ipula nasho, oshoka Jehova ota dhimine ndje po.’ Shiyemateka, Aakriste yamwe osho ya li yu uvite ngaaka, omanga nokuli aayapostoli yamwe ya li momwenyo. (Lesha Judas 4.) Otashi vulika inaatu dhiladhila nale ngawo; ihe edhiladhilo ndyoka lya puka otashi vulika li ye mutse e tali tameke okukoka.

9, 10. Ongiini Paulus nayalwe ya li ya mangululwa mo muulunde neso?

 ⁹ Paulus okwa li a tsu omuthindo kutya otu na okuyanda lela etaloko lya puka ndyoka tali ti: ‘Kalunga oku shi uvite ko, ita kala e na ko nasha nomapuko gandje.’ Omolwashike mbela kaatu na okudhiladhila ngawo? Omolwashono Paulus okwa nyola a ti kutya Aakriste oye na ‘okukwatunuka mo muulunde.’ (Lesha Aaroma 6:1, 2.) Ongiini kwa li taku vulu okutiwa kutya Aakriste oya “kwatunuka mo muulunde” omanga ya li natango momwenyo?

¹⁰ Jehova Kalunga okwa li a dhimine po Paulus nosho wo yalwe yopethimbo lye okupitila mekuliloyambo. Okwa li e ya dhimine po, e ya gwayeke nombepo ondjapuki nokwe ya hiya ya ninge oyana yopambepo. Opo nduno okwe ya pe etegameno lyokuya megulu. Ngele oya kala aadhiginini otaya ka kala nomwenyo sigo aluhe notaya ka pangela pamwe naKristus megulu. Ihe Paulus okwa li a popi kutya oya “kwatunuka mo muulunde” manga ya li natango momwenyo taya longele Kalunga kombanda yevi. Okwa li a longitha oshiholelwa shaJesus, ngoka a si e li omuntu gwopanyama e ta yumudhilwa megulu e li oshishitwa shopambepo. Jesus ka li we ta ka sa nando. Onkalo ye oya li ya faathana naandjoka yaagwayekwa, mboka ya li taya vulu okwiitala ko kutya oya ‘kwatunuka mo muulunde, noye na omwenyo, taya longele Kalunga muukumwe naJesus Kristus.’ (Rom. 6:9, 11) Onkalamwenyo yawo kaya li we ngaashi ya li nale. Kaya li we taya pangelwa kuuhalu wawo wuulunde. Oye etha po onkalamwenyo yawo yonale.

11. Omomukalo guni tse mboka tu na etegameno lyokukakala nomwenyo sigo aluhe kombanda yevi twa “kwatunuka mo muulunde”?

¹¹ Ongiini kombinga yetu? Manga inaatu ninga Aakriste, otwa li hatu yono olundji, tashi vulika nokuli twa li ihaatu ndhindhilike kutya shoka twa ninga osha puka koshipala shaKalunga. Otwa li hatu ‘longo iilonga yuupika, yoonyata noyuukolokoshi.’ Otaku vulu okutiwa kutya otwa li “aapika yuulunde.” (Rom. 6:19, 20) Sho twa tseya oshili yOmbiimbeli, otwa ningi omalunduluko monkalamwenyo yetu, otwi iyapulile Kalunga e tatu ninginithwa. Okuza mpoka, otwa kala tu na ehalo ‘lyokuvulika nomwenyo aguhe’ komalongo nokomithikampango dhaKalunga. Otwa ‘mangululwa muulunde’ notwa ‘ningi aapika yiilonga iiwanawa.’ (Rom. 6:17, 18) Onkee ano, otaku vulu okutiwa kutya natse otwa “kwatunuka mo muulunde.”

12. Etokolo lini kehe gumwe gwomutse e na okuninga?

¹² Ngashingeyi dhiladhila koohapu dhaPaulus ndhoka tadhi ti: “Uulunde kau na okupangela we momalutu geni omasi, mu vulike ando kuuhalu womuntu guulunde.” (Rom. 6:12) Otashi vulika tu ‘ethe uulunde wu tu pangele’ mokuninga kehe shimwe shoka omalutu getu ga hala tu ninge. Molwaashoka ohatu vulu ‘okweetha’ nenge okutinda uulunde wu tu pangele, otatu vulu okwiipula kutya mbela oshike naanaa tu na okuninga po? Ipula to ti: ‘Mbela omathimbo gamwe, ohandi etha omahalo nomadhiladhilo gandje omawinayi ga pangele ndje? Nenge ohandi kambadhala ngaa okukwatunuka mo mugo? Mbela ohandi longele ngaa Kalunga muukumwe naJesus Kristus?’ Ngele otwa pandula omagano gesilohenda lyaKalunga, otatu ka ninga ngaashi tatu vulu, opo tu mu nyanyudhe.

13. Oshike tashi ulike kutya otatu vulu okupilamena iilonga iiwinayi mbyoka twa li hatu longo nale?

¹³ Oshigwana shaJehova Kalunga osha pilamene “iiyimati” (OB-1954) mbyoka sha li hashi imike manga sha li inaashi mu tseya, kaashi mu hole naasho sha li ihaashi mu longele. Onkalamwenyo yasho yonale oya li ya kwatela mo ‘iinima mbyoka she yi sa ohoni ngashingeyi’ naambyoka ya li tayi vulu oku shi fala meso. (Rom. 6:21) Ihe osha lundulula  onkalamwenyo yasho. Shoka osho sha li sha ningwa kaantu oyendji yomuKorinto mboka Paulus a popi kombinga yawo. Yamwe oya li aasimaneki yiimenka, aahondeli, omashenge naakali nomashenge, aafuthi, oonkolwi nosho tuu. Ihe oya li ya “yogwa oondjo” dhawo noya “yoololelwa Kalunga.” (1 Kor. 6:9-11) Shoka otashi vulika osho sha li sha ningilwa yamwe megongalo lyaRoma. Paulus okwa li a nwethwa mo e ya nyolele oohapu ndhika: “Inamu gandja iilyo yomalutu geni muulunde, yi longithwe miilonga iiwinayi. Ihe igandjeni ne yene kuKalunga, mu kale mwa yumudhwa kuusi, ne mu pe Kalunga uuntu weni auhe, u longithwe miilonga iiwanawa.” (Rom. 6:13) Paulus okwa li e na uushili kutya otaya ka kala ya yogoka pambepo notaya ka tsikila okumona mo uuwanawa momagano gesilohenda lyaKalunga.

14, 15. Oshike tu na okwiipula kombinga ‘yokuvulika nomwenyo aguhe’?

¹⁴ Osho shi li ngawo nokunena. Omathimbo gamwe aamwatate naamwameme yamwe otashi vulika ya li ya fa mboka yomuKorinto. Ihe nayo oya lundulula onkalamwenyo yawo. Oya thiga po onkalamwenyo ya nyata noya “yogwa oondjo” dhawo. Otashi vulika nangoye wa li ho longo iilonga iiwinawi, ihe mbela ngashingeyi onkalo yoye oyi li ngiini koshipala shaKalunga? Ngashingeyi sho wu shi omagano gesilohenda lyaKalunga nosho wo kutya ota vulu oku ku dhimina po, mbela owa tokola toko waa ‘gandje iilyo yolutu lwoye muulunde’?

¹⁵ Opo tu ulike kutya otwa pandula omagano gesilohenda lyaKalunga otwa pumbwa okuyanda thiluthilu omayono ga kwata miiti ngoka ga li ga ningwa kuyamwe yomuKorinto. Shono osha simanenena kutse ngele otatu ti kutya otwa taamba ko omagano gesilohenda lyaKalunga, ‘nuulunde kau na oku tu pangela.’ Mbela otwa tokola okukala tatu ‘vulika nomwenyo aguhe’ mokuninga ngaashi tatu vulu tu yanda omayono ngoka yamwe tashi vulike ye ga tale ko inaaga puka naanaa? —  Rom. 6:14, 17.

16. Otu shi shi ngiini kutya okukala Omukriste inashi kwatela mo owala okweetha okuninga omayono gakwata miiti?

¹⁶ Dhiladhila komuyapostoli Paulus. Otatu vulu okukala nuushili kutya ka li ha kutha ombinga miilonga ya puka mbyoka ya tumbulwa mAakorinto yotango 6:9-11. Ihe nonando ongawo, okwa li a zimine kutya ye omulunde. Okwa ti: “Ngame omuntu tandi ka sa, nda landithwa po ndi kale omupika guulunde. Kandi shi shi shoka tandi shi longo, oshoka ihandi longo shoka nda hala oku shi longa, ihe ohandi longo shoka ndi tonde.” (Rom. 7:14, 15) Shika otashi ulike kutya opwa li iinima yilwe mbyoka Paulus a li a tala ko yi li uulunde nenge ya puka, nokwa li te yi kondjitha wo. (Lesha Aaroma 7:21-23.) Otu na okuninga wo sha faathana sho tatu kambadhala ‘okuvulika nomwenyo aguhe.’

17. Omolwashike wa hala okukala omunashili?

¹⁷ Pashiholewa, natu taleni koshinima shi na ko nasha nokukala omunashili. Okukala omunashili oko oshinima sha simana kOmukriste. (Lesha Omayeletumbulo 14:5; Aaefeso 4:25.) Satana oye “he yiifundja.” Ananias nomukadhi oya li ya kanitha oomwenyo dhawo, molwaashoka ya fundju. Inatu hala oku ya holela, onkene natu yandeni iifundja. (Joh. 8:44; Iil. 5:1-11) Ihe okwaapopya iifundja mbela oko owala kwa kwatelwa mokukala omunashili? Osha yela kutya okukala aanashili oku na okuulika kutya otwa pandula lela omagano gesilohenda lyaKalunga.

18, 19. Okukala omunashili osha hala okutya shike?

¹⁸ Okufundja, oko okupopya oshinima kaashi shi shoshili. Onkee ano, Jehova ina hala nando aantu ye ya popye iifundja. Okwa li a lombwele Aaisraeli a ti: “Kaleni aayapuki, oshoka ngame Omuwa Kalunga keni omuyapuki.” Onkene okwa gandja oshiholelwa shokukala omuyapuki. Kalunga okwa ti: “Inamu yaka, inamu kotokela, inamu fundja.” (Lev. 19:2, 11) Shiyemateka, omuntu ngoka a tokola  okukala ihaa popi iifundja otashi vulika a kotokele yalwe moku ya lombwela iifundja.

¹⁹ Pashiholelwa, omulumentu gumwe ota lombwele omuhona gwe nenge aaniilonga ooyakwawo kutya ongula ite ya kiilonga nenge kutya oku na okuzimbuka kuyele, molwaashoka ota ka mona ndohotola. Otashi vulika haasho etompelo lye, ihe okwa hala owala a ka pite koaputeka nenge a ka fute owala nziya sha kombelewa yandohotola. Otashi vulika itee ya owala kiilonga, molwaashono a hala okuya molweendo manga kuyele nenge okufala uukwanegumbo we kefuta. Omulumentu nguka otashi vulika a kale a fa a popya oshili, ihe mbela oto ka tya oku li omunashili nenge omukotokeli? Otashi vulika wu shi omuntu gumwe ngoka a li a kotokele yalwe. Omathimbo gamwe aantu ohaya kotokele, opo ya likole sha kuyalwe nenge ya yande egeelo. Ihe tse ohatu vulika kuJehova ngoka a ti: “Inamu kotokela”. Dhiladhila wo kAaroma 6:19 mboka taya ti: “Igandjeni, mu ninge aapika yiilonga iiwanawa, opo mu ninge aayapuki.”

20, 21. Ngele otwa pandula omagano gesilohenda lyaKalunga otu na okuyanda shike?

²⁰ Okupandula omagano gesilohenda lyaKalunga inaku kwatela mo owala okuyanda oluhondelo, uunkolwi nenge omayono ngoka yamwe yomuKorinto ya li ya ningi. Okutaamba ko omagano gesilohenda lyaKalunga inaku kwatela mo owala okuyanda oluhondelo, ihe okuyanda wo iikala yokunyanyukilwa omainyanyudho ga nyata. Okugandja iilyo yomalutu getu yi kale aapika yokulonga uuyuuki itaku ke tu kwathela owala kaatu kolwe, ihe otaku ke tu inyengitha wo tu yande okunwa sigo tatu hala okukolwa. Otashi vulika tashi pula oonkambadhala dha gwedhwa po, opo tu vule okukondjitha omahalo ga puka.

²¹ Elalakano lyetu olyo okuyanda omayono goludhi kehe, kutya nduno omanene nenge omashona. Itatu vulu okukala inaatu ninga epuko lyasha, molwaashono inatu gwanenena, ihe nonando ongawo, otu na okukambadhala tu ninge shoka shi li mondjila ngaashi Paulus a ningi. Okwa li a ladhipike amwaahe a ti: “Uulunde kau na okupangela we momalutu geni omasi, mu vulike ando kuuhalu womuntu guulunde.” (Rom. 6:12; 7:18-20) Sho tatu kondjitha uulunde woludhi kehe otatu ulike kutya otwa pandula shili omagano gesilohenda lyaKalunga ngoka e tu pa okupitila muKristus.

22. Mboka ye na olupandu omolwomagano gesilohenda lyaKalunga otaya ka mona ondjambi yini?

²² Kalunga okwe tu dhimina po oondjo dhetu molwomagano gesilohenda lye, nota tsikile oku dhi dhima po. Omolwolupandu ndoka tu na, natu tsikileni okuninga ngaashi tatu vulu, opo twaa gwile momayono ngoka yamwe tashi vulika ye ga tale ko ganathangwa. Paulus okwa li a tsu omuthindo kombinga yondjambi ndjoka tatu ka mona, a ti: “Ngashingeyi omwa mangululwa muulunde nomwa ningi aapika yokulongela Kalunga, nokutya okukalamwenyo kweni akuhe oku li meutho lye, nopehulilo otamu ka mona omwenyo gwaaluhe.” —  Rom. 6:22.