1, 2. Ongiini oshiholelwa shaTony sha ulika kutya omuntu ota vulu okuninga omalunduluko monkalamwenyo?

OMUNASIKOLA gumwe gwedhina Tony okwa putuka kee na he. Okwa li kosekondele noka li naanaa e na ohokwe mosikola. Onkee okwa li ta dhiladhila okuthiga po osikola. Momahuliloshiwike, okwa li owala ha kala nookuume ke nenge a ka tale oomuvi. Ka li e hole omalugodhi noka li a pikwa kiingangamithi. Nonando ongawo, ka li e na elalakano lyasha monkalamwenyo. Okwa li wo a limbililwa ngele oku na ngaa Kalunga. Opo nduno, okwa tsakanene naaihokani Oonzapo, e te ya lombwele kombinga yomalimbililo ge noku ya pula omapulo. Oye mu pe uumbo uyali, The Origin of Life — Five Questions Worth Asking nosho wo Was Life Created?

² Sho aaihokani ya ka galuka, oya adha Tony a lundulula iikala ye. Okwa li a konakona uumbo mboka, sigo omafo gi igonyo. Okwa ti: “Oku na okukala ku na Kalunga.” Okwa taamba ko ekonakonombiimbeli, netaloko lye li na ko nasha nonkalamwenyo, olye ende tali lunduluka kashona nakashona. Okwa li wo a hwepopala lela mosikola. Omukuluntusikola nokuli naye okwa li e shi kuminwa. Okwe mu lombwele a  ti: “Eihumbato lyoye olya lunduluka lela nowa hwepopala miilongwa yoye. Oshaashi ho endathana nOonzapo dhaJehova?” Tony okwa ti eeno, e te mu uvithile. Okwa mana osikola niitsa iiwanawa. Ngashingeyi oku li omukokolindjila gwondjigilile nomuyakuligongalo. Okwa nyanyukwa wo sho e na He omunahole, Jehova. — Eps. 68:5.

3. Jehova okwa gandja omayele geni kaagundjuka?

³ Oshimoniwa shaTony, otashi tu dhimbulukitha nkene Jehova a lenga aagundjuka. Okwa hala ya pondole lela monkalamwenyo noya kale ya nyanyukwa. Onkene ote ya ladhipike ta ti: “Dhimbulukwa Omushiti gwoye momasiku guugundjuka woye.” (Omuuv. 12:1) Shoka ihashi kala aluhe oshipu, momasiku ngaka tu li. Nonando ongawo, oto vulu oku shi ninga. Kekwatho lyaKalunga, oto vulu okupondola, ihe kashi shi owala pethimbo lyuugundjuka, ndele omonkalamwenyo yoye ayihe. Opo tu shi uve ko, natu tale shoka tatu ilongo moshiholelwa shAaisraeli sho ya li ya kwata ko Evi lyEuvaneko nosho wo shaDavid, sho a li a kondjitha Goliat.

4, 5. Oshike tatu ilongo moshiholelwa shAaisraeli, sho ya kwata ko Evi lyEuvaneko nosho wo shaDavid, sho a kondjitha Goliat? (Tala omathano gopetameko.)

⁴ Sho Aaisraeli ya li pokuthika mEvi lyEuvaneko, Kalunga ka li e ya lombwele ya hwepopaleke uunkulungu wawo wokukondja nenge yi ilongekidhile olugodhi. (Deut. 28:1, 2) Pehala lyaashono, okwe ya lombwele ya vulike kiipango ye noya kale ye mu inekela. (Jos. 1:7-9) Pataloko lyopantu, omayele ngoka oga li taga monika itaaga kwatha sha, ihe oga li ga dhenga mbanda. Jehova okwa li e shi kwathele iikando niikando, opo shi sinde Aakaanana. (Jos. 24:11-13) Odhoshili kutya opo tu vulike kuKalunga, otu na okukala neitaalo, oshoka ohali tu kwathele aluhe tu pondole. Yamwe monakuziwa osho ya li ya ningi, notatu vulu wo oku shi ninga kunena.

⁵ Goliat okwa li ependafule, omulumentu gwomuthika gwoometa ndatu konyala nokwa li a homatekeka. (1 Sam. 17:4-7) David okwa li owala e na iinima iyali, oshuumbitho neitaalo muKalunga ke, Jehova. Aantu mboka kaaye na eitaalo, otashi vulika ya li ye mu wete egoya. Kaya li tuu ya puka! Goliat oye a li egoya. — 1 Sam. 17:48-51.

6. Oshike tatu ka kundathaneni muule?

⁶ Oshitopolwa sha zi ko, osha kundathana iinima ine mbyoka tayi vulu oku tu kwathela tu kale twa nyanyukwa notu pondole monkalamwenyo. Iinima mbika oyo: okutonatela ekwatathano lyetu naKalunga, okukala nolupandu lwookuume mboka Kalunga e tu pa, okwiitulila po omalalakano taga ti sha nokukala twa lenga emanguluko lyetu, tu li aapiya ye. Natu kundathaneni iitopolwa mbyoka muule, mokutala komakotampango gamwe ngoka ge li mEpisalomi 16.

7. (a) Omuntu ngoka e na ekwatathano lya kola naKalunga okwa tya ngiini? (b) David okwa li e na “eliko” lini nolya li lye mu etele oshizemo shini?

⁷ Omuntu ngoka e na ekwatathano lya kola naKalunga, oku na eitaalo muye noha tala ko iinima ngaashi he yi tala ko. Oha etha a wilikwe kuKalunga noha kala a tokola a vulike kuye. (1 Kor. 2:12, 13) David oku li oshiholelwa oshiwanawa. Okwa imbi a ti: “Omuwa, ongoye awike eliko lyandje noho pe ndje ashihe shoka nde shi pumbwa.” (Eps. 16:5) “Eliko” ndyoka olya li lya kwatela mo ekwatathano ndyoka David a li e na naKalunga, ngoka a li e mu gamene. (Eps. 16:1) Oshizemo? Okwa nyola a ti: ‘Onda nyanyukwa.’ Odhoshili kutya kapwa li pu na shilwe hashi nyanyudha David unene, kaashi shi ekwatathano lye naKalunga. — Lesha Episalomi 16:9, 11.

8. Iinima yini tayi vulu oku ku etela enyanyu lyashili monkalamwenyo?

⁸ Aantu mboka ya pititha komeho omainyanyudho neliko, kaye na siku ya kale nenyanyu ndyoka David a li e na. (1 Tim. 6:9, 10) Omumwatate gumwe gwokoKanada, okwa ti: “Enyanyu lyashili ihali zi mwaashoka hatu mono monkalamwenyo, ihe ohali zi mwaashoka hatu pe Omugandji gwoshipewa kehe oshiwanawa, Jehova Kalunga.”  (Jak. 1:17) Okukala shili wu na eitaalo muJehova noku mu longela, otaku ke ku kwathela wu kale nonkalamwenyo yi na eityo nowa nyanyukwa. Ongiini to vulu okukokeka eitaalo lyoye? Omokukala naJehova pathaneko. Ngiini mbela? Omokulesha Oohapu dhe, omokutala keshito nomokudhiladhila kombinga yomaukwatya ge mwa kwatelwa ohole ye yoku ku hola. — Rom. 1:20; 5:8.

9. Ongiini to vulu okweetha Oohapu dhaKalunga dhi ku zule ngaashi David?

⁹ Omathimbo gamwe Kalunga oha ulike kutya oku tu hole, moku tu pukulula ngaashi tate ta pukulula oyana. David okwa li a taamba ko epukululo ndyoka lyopahole. Okwa ti: “Ngame ote hambelele Omuwa, oshoka oye ha wilike ndje, nomuusiku eiyuvo lyandje ohali londodha ndje.” (Eps. 16:7) Odhoshili kutya okwa li a tedhatedha kOohapu dhaKalunga, e te dhi taamba ko noku dhi etha dhi mu zule. Ngele nangoye osho wa ningi, ohole yoye yokuhola Kalunga otayi ka koka noto ka kala wa hala okuvulika kuye. Oto ka ninga wo Omukriste e na ekwatathano lya kola naJehova. Omumwameme Christin okwa ti: “Uuna nda ningi omapekapeko e tandi tedhatedha kwaashoka nda lesha, ohandi kala ndi uvite kutya shoka nda lesha ongame sha longekidhilwa kuJehova.”

10. Ngaashi sha popiwa muJesaja 26:3, okukala nekwatathano naJehova ohaku etele omuntu uuwanawa wuni?

¹⁰ Okukala wu na ekwatathano naJehova, ohaku ku kwathele wu mone ontseyo nosho wo oondunge. Omaukwatya ngoka otaga vulu oku ku kwathela wu kale wa tala ko uuyuni nonakuyiwa yawo ngaashi Kalunga e yi tala ko. Omolwashike Kalunga he ku pe ontseyo ndjoka nosho wo oondunge? Okwa hala wu itulile po omalalakano omawanawa monkalamwenyo, wu ninge omatokolo gopandunge nokukala wu na etegameno lya kola lyonakuyiwa. (Lesha Jesaja 26:3.) Omumwatate Joshua, gwokoAmerika, okwa ti: “Okukala popepi naJehova, ohashi ku kwathele wu mone kutya oshike sha simana naashoka inaashi simana.” Shoka ihashi tu etele tuu enyanyu lyashili!

11. David okwa li a hogolola ngiini ookuume kashili?

¹¹ Lesha Episalomi 16:3. David okwa li e shi okukonga ookuume kashili. Okwa li a “hokwa unene” okukala naamboka ye hole Jehova. Ookuume mboka oya popiwa kutya aantu “mboka haa inekele Omuwa,” sha yela kutya oya li ya yogoka pamikalo nohaya vulika kuJehova. Omupisalomi gumwe naye osho a li e uvite ngaaka kombinga yokuhogolola ookuume. Okwa nyola a ti: “Ngame onda ningi kuume kaamboka haye ku simaneke, nokaayehe mboka haa vulika kiipango yoye.” (Eps. 119:63) Ngaashi twe shi kundathana moshitopolwa sha tetekele, nangoye oto vulu okumona ookuume oyendji ye li nawa, mboka haya tila Jehova nohaya vulika kuye. Ookuume mboka inaya pumbwa okukala yepipi limwe.

12. Uukuume mboka wa li pokati kaDavid naJonatan owa li wa kankamena kushike?

¹² Omupisalomi David ka li owala a panga uukuume naantu mboka yepipi lye. Oto dhimbulukwa gumwe ngoka a li a ningi kuume ke kopothingo? Edhina lye oJonatan. Uukuume wawo owo wumwe wa dhenga mbanda wa popiwa mOmbiimbeli. Owu shi shi ngaa kutya Jonatan okwa li e vule David nomimvo 30 lwaampono? Mbela uukuume wawo owa li wa kankamena kushike? Ayehe oya li ye na eitaalo muKalunga, ya simanekathana nakehe gumwe okwa mono uulaadhi wamukwawo, sho taya kondjitha aatondi yaKalunga. — 1 Sam. 13:3; 14:13; 17:48-50; 18:1.

13. Ongiini to vulu okumona ookuume oyendji? Gandja oshiholelwa.

¹³ Ngaashi David naJonatan, natse otatu vulu okukala twa “hokwa unene” mboka ye hole Jehova noye na eitaalo muye. Omumwameme Kiera ngoka a kala ta longele Kalunga omimvo odhindji, okwa ti: “Onda panga uukuume naantu yi ili noyi ili muuyuni awuhe, ya za momaputuko nomomihoko dha yoolokathana.” Ngele nangoye osho wa ningi, oto ka mona nkene Oohapu dhaKalunga nombepo ondjapuki ye tu hanganitha muuyuni awuhe.

14. (a) Oshike tashi vulu oku ku kwathela wu itulile po omalalakano omawanawa monkalamwenyo? (b) Aagundjuka yamwe oya li ye uvite ngiini, sho yi itulile po omalalakano gokulongela Jehova?

¹⁴ Lesha Episalomi 16:8. David okwa li a pititha komeho okulongela Kalunga monkalamwenyo ye. Nangoye ngele owa kala aluhe nokudhiladhila kwaashoka Jehova e ku halela nokwiitulila po omalalakano ge li metsokumwe nehalo lye, oto ka kala wa nyanyukwa shili monkalamwenyo. Omumwatate Steven okwa ti: “Okulonga sigo nda adha elalakano lyandje nokutala nkene nda ninga ehumokomeho, ohashi nyanyudha ndje.” Omumwatate omugundjuka a za koNdowishi, ngoka ta longele ngashingeyi Jehova koshilongo shilwe, okwa ti: “Ngele nda kulupa, inandi hala ndi ka mone kutya monakuziwa onda kala owala tandi ningi iinima yopaumwene.” Otwi inekela kutya nangoye osho wu uvite ngaaka. Ngele osho, longitha omagano goye wu simaneke Kalunga nokuningila yalwe uuwanawa. (Gal. 6:10) Itulila po omalalakano gokulongela Jehova noku mu pula megalikano e ku kwathele wu ga adhe. Oku hole okuyamukula omagalikano ga tya ngaaka. — 1 Joh. 3:22; 5:14, 15.

15. Omalalakano geni to vulu okwiitulila po? (Tala oshimpungu “ Omalalakano gamwe ngoka to vulu okwiitulila po.”)

¹⁵ Omalalakano geni to vulu okwiitulila po? Otaga vulu okukala ga kwatela mo okugandja omatyokosha pokugongala niitya yoye mwene, okukokola ondjila nenge oku ka longa koBetel. Oto vulu okukambadhala okwiilonga elaka lilwe nelalakano wu ka uvithile moshitopolwa moka mu na aakwiilongo. Omumwatate omugundjuka Barak ngoka e li miilonga yethimbo lyu udha, ota ti: “Okupenduka esiku kehe ndi shi kutya otandi longitha oonkondo dhandje adhihe ndi longele Jehova, oshinima shoka hashi uvitha ndje nawa noonkondo noitandi vulu oku shi yelekanitha niilonga yilwe.”

16. David okwa li e uvitile ngiini omithikampango dhaJehova, nomolwashike?

¹⁶ Lesha Episalomi 16:2, 4. Ngaashi twe shi mono moshitopolwa sha zi ko, oompango nomakotampango gaKalunga otaga vulu oku tu mangulula. Ohage tu kwathele tu kale tu hole shoka oshiwanawa nokutonda shoka oshiwinayi. (Amos 5:15) Omupisalomi David okwa li a popi kombinga  yaJehova a ti: “Iinima ayihe iiwanawa mbyoka ndi na, ohandi yi pewa kungoye.” Okulonga shoka oshiwanawa oku li oshinima sha dhenga mbanda. David okwa li a longo nuudhiginini a holele Kalunga, opo a kale e hole shoka Kalunga e hole. Okwa li wo a longo nuudhiginini, opo a tonde shoka Kalunga e tonde. Shoka Kalunga e tonde osha kwatela mo okulongela iimenka, hoka ku li okulongela sha shilwe kaashi shi Jehova noku shi simaneka pehala lyoku mu simaneka. Okulongela iimenka ohaku shundula wo aantu. — Jes. 2:8, 9; Eh. 4:11.

17, 18. (a) David okwa popi shike shi na ko nasha niilanduliko iiwinayi mbyoka hayi etithwa kelongelokalunga lyiifundja? (b) Oshike hashi ningitha aantu yi “iyetele uudhigu owindji”?

¹⁷ Pethimbo lyOmbiimbeli, olundji elongelokalunga lyiifundja olya li lya kwatela mo oluhondelo. (Hos. 4:13, 14) Aantu oyendji oya li ye li panda, molwaashono oya li ye hole oluhondelo. Shoka kasha li nando hashi ya etele enyanyu lyashili, ihe eyeme owala. David okwa ti kutya ‘ayehe mboka ya li ya landula iikalunga, oyi iyetele uudhigu owindji.’ Aantu oya li wo ya yamba oyana oyendji kiikalunga. (Jes. 57:5) Jehova ka li nando a panda oshinima shoka. (Jer. 7:31) Ando oko wa li ethimbo ndyoka, kapu na omalimbililo kutya ando owa nyanyukwa noonkondo, ngele aavali yoye oya li ye na eitaalo muJehova nohaya vulika kuye.

¹⁸ Omalongelokalunga giifundja kunena nago oga taamba ko oluhondelo nokuli nuushenge. Shika ohashi ningitha aantu ya kale ye uvite ya manguluka ngaashi sha li pethimbo lyOmbiimbeli. (1 Kor. 6:18, 19) Otashi vulika nangoye we shi ndhindhilika kutya shoka osha ningitha owala aantu yi “iyetele uudhigu owindji.” Onkee ano, aagundjuka kaleni hamu pulakene kuHo yeni gwomegulu. Shi ulikeni kutya okuvulika kuJehova oshinima oshiwanawa. Dhiladhileni kiizemo mbyoka hayi etithwa kokwaavulika hoka haku etele owala omuntu enyanyu lyopakathimbo. (Gal. 6:8) Joshua ngoka a popiwa metetekelo, okwa ti: “Otatu vulu okulongitha emanguluko lyetu ngaashi twa hala, ihe ngele inatu li longitha pandunge itashi ke tu etela enyanyu lyashili.”

19, 20. Aagundjuka mboka ye na eitaalo muJehova nohaya vulika kuye, otaya ka mona omayambeko geni?

¹⁹ Jesus okwa li a lombwele aalongwa ye a ti: “Ngele tamu vulika koohapu dhandje, nena kapu na omalimbililo, one aalongwa yandje. Ne otamu ka tseya ihe oshili, noshili otayi ke mu mangulula.” (Joh. 8:31, 32) Emanguluko ndyoka olya kwatela mo okumanguluka ko komalongelokalunga giifundja, kokwaashisha nokiidhila. Olya kwatela mo wo iinima yilwe. Ngaashi twe shi mono, otali ka kwatela mo natango ‘emanguluko neadhimo lyaana yaKalunga.’ (Rom. 8:21) Oto vulu nokuli oku li nyanyukilwa ngashingeyi mokukala ho ‘vulika koohapu dhaKristus’ nenge komalongo ge. Momukalo ngoka, oto ka “tseya ihe oshili,” ihe haku ilonga owala kombinga yayo, ndele nokukala wo metsokumwe nayo.

²⁰ Aagundjuka, kaleni mwa lenga emanguluko ndyoka Kalunga e mu pa. Li longitheni pandunge, oshoka otali ke mu etela uuwanawa monakuyiwa. Omumwatate gumwe omugundjuka, okwa ti: “Okulongitha emanguluko pandunge wu li omugundjuka, ohashi ku kwathele uuna to ka ninga omatokolo omanene, ngaashi okumona iilonga tayi opalele nenge okuhogolola ngele oto hokana nenge oto tegelele ko manga.”

21. Ongiini to vulu okukala mondjila ndjoka tayi ku kwathele wu ka mone “okukalamwenyo kwashili”?

²¹ Muuyuni mbuka, shoka aantu haya ti kutya onkalamwenyo ombwanawa, oshinima shopakathimbo. Katu shi shi ngele ngula omutse otagu ka kala kumwe nothingo. (Jak. 4:13, 14) Onkee ano, oshinima shopandunge shoka to vulu okuninga, okukala mondjila ndjoka tayi ku kwathele wu ki imonene “okukalamwenyo kwashili,” ano omwenyo gwaaluhe. (1 Tim. 6:19) Odhoshili kutya Kalunga iha thiminike omuntu a ende mondjila ndjoka. Ehogololo oli li miikaha yetu yene. Onkene, ninga Jehova “eliko” lyoye. Kala wa lenga ‘uuwanawa’ owundji mboka e ku ningila. (Eps. 103:5) Kala wo wi itaala kutya ota vulu oku ku pa “enyanyu” nosho wo ‘uunelago sigo aluhe.’ — Eps. 16:11.