1. Aantu oyendji oya tala ko ngiini iilonga?

AANTU yomoshitopolwa sheni oya tala ko ngiini iilonga? Miilongo oyindji, aantu otaya longo nuudhiginini nosho wo oowili odhindji, inaashi monika nando onale. Aantu mboka ye na iilonga oyindji, olundji ihaya mono ethimbo lyokufudha po nenge lyokukala noyaandjawo nosho wo lyokwiipalutha pambepo. (Omuuv. 2:23) Shimwe ishewe, aantu yamwe kaye hole okulonga sha nandonando nohaya kala ye na omaipopilo kutya omolwashike itaaya longo. — Omayel. 26:13, 14.

2-3. Jehova naJesus oya tula po oshiholelwa shini shi na ko nasha niilonga?

² Mepingathano niikala yuuyuni kaayi li pandjele, dhiladhila kunkene Jehova naJesus ya tala ko iilonga. Kapu na omalimbililo kutya Jehova oku hole iilonga. Jesus okwe shi yelitha sho a popi a ti: “Tate ota longo aluhe, nangame wo ondi na okulonga.” (Joh. 5:17) Dhiladhila owala kiilonga oyindjiyindji mbyoka a longa, sho a shiti aayengeli oyendji newangandjo. Ohatu mono wo iinima iiwanawa oyindji mbyoka Kalunga a shitila kombanda yevi. Omupisalomi oku li mondjila, sho a popile a ti: “Omuwa, owa shiti iinima oyindji! Tala nkene wa shiti ayihe noondunge! Evi olyu udha iishitwa yoye.” — Eps. 104:24.

³ Jesus okwa li a holele He. Okwa li a longo pamwe naJehova Kalunga, sho ta “yala egulu.” Okwa li pamwe naye a “fa engomba.” (Omayel. 8:27-31) Konima yethimbo ele, sho e ke ya kombanda yevi, okwa li a longo iilonga iikumithi. Iilonga mbyoka oya li ya fa iikulya kuye, niilonga ye oye shi ulike kutya Kalunga oye e mu tuma. — Joh. 4:34; 5:36; 14:10.

4. Oshike tatu ilongo kuJehova naJesus kombinga yokuvululukwa?

⁴ Mbela sho Jehova naJesus ye tu tulila po iiholelwa yokulonga nuudhiginini, otashi ti inatu pumbwa tu vululukwe po? Hasho  nando. Jehova iha vulwa nando, onkene ina pumbwa okuvululukwa. Ihe Ombiimbeli otayi ti kutya konima sho a shiti egulu nevi, okwa ‘zimbuka e ta vululukwa’ po. (Eks. 31:17) Nonando ongawo, shoka otashi ti kutya sho Jehova a mana okushita, okwa kutha ethimbo a nyanyukilwe shoka a shita. Jesus okwa li a longo nuudhiginini, sho a li kombanda yevi. Nonando ongawo, okwa li a kongo ethimbo a vululukwe po noku lye pamwe nookuume ke. — Mat. 14:13; Luk. 7:34.

5. Aapiya yaKalunga oyendji ohaya mono oshidhigu okuninga shike?

⁵ Ombiimbeli otayi ladhipike aapiya yaKalunga ya kale haya longo. Kaye na okukala aananyalo, ihe okukala haya longo nuudhiginini. (Omayel. 15:19) Otashi vulika ho longo iilonga yokwiikongela omboloto, opo wu sile oshimpwiyu yaandjeni. Aalongwa ayehe yaKristus nayo oye na oshinakugwanithwa shokuuvitha onkundana ombwanawa. Nonando ongawo, nangoye owa pumbwa wo ethimbo lyokuvululukwa po lya gwana. Mbela omathimbo gamwe ohashi kala oshidhigu kungoye okukala wu na ondjele ngele tashi ya piilonga yokwiikongela omboloto, okuya muukalele nenge okumona ethimbo lyokuvululukwa po? Ongiini tatu vulu okutseya kutya otu na okulonga nokuvululukwa ethimbo li thike peni?

6. Markus 6:30-34, okwa ulika ngiini kutya Jesus okwa li a tala ko pandjele iilonga nokuvululukwa po?

⁶ Osha simana tu kale tu na ondjele, ngele tashi ya piilonga. Omukwaniilwa Salomo okwa li a nwethwa mo a nyole ta ti: “Ayihe oyi na otundi yayo noshaa shoka . . . oshi na ethimbo lyasho.” Okwa popi wo ethimbo lyokutsika, lyokutunga, lyokulila, lyokuyola, lyokudhana nolyashaa shoka. (Omuuv. 3:1-8) Osha yela kutya okulonga nokuvululukwa po, oyimwe yomiinima iyali ya simanenena monkalamwenyo. Jesus okwa li a tala ko pandjele iilonga nokuvululukwa po. Oshikando shimwe, aayapostoli oya li ya galuka molweendo lwokuuvitha. Oya li yi ipyakidhila noonkondo, ‘nokaya li ye na ethimbo lyokulya.’ Jesus okwa li e ya lombwele a ti: “Ileni, tu yeni, tu ki ikalele, opo mu vululukwe kashona.” (Lesha Markus 6:30-34.) Nonando haaluhe ya li haya mono ethimbo lyokuvululukwa po, Jesus okwa li e shi kutya ayehe oya pumbwa okuvululukwa po.

7. Okwiilonga kombinga yEsabati otaku vulu oku tu kwathela ngiini?

⁷ Omathimbo gamwe, osha pumbiwa atuheni tu kale hatu vululukwa po nenge tu ninge omalunduluko ge na ko nasha nomaipyakidhilo getu. Shoka oshi iwetikile kelongekidho lyEsabati lyokoshiwike, ndyoka Kalunga a li a tulile po oshigwana she shonale. Katu li kohi yOmpango yaMoses, ihe otatu vulu okumona mo uuwanawa, mokutala kwaashoka ya ti kombinga yEsabati. Shoka tatu ilongo mo, otashi vulu oku tu kwathela tu talulule etaloko lyetu kombinga yiilonga nosho wo yokuvululukwa po.

8. Shi ikolelela kuEksodus 31:12-15, Esabati olya li esiku lyokuninga shike?

⁸ Oohapu dhaKalunga otadhi ti kutya Kalunga okwa li a vululukwa po kiilonga ye yokushita iinima yokombanda yevi konima ‘yomasiku’ gahamano. (Gen. 2:2) Ihe Jehova oku hole okulonga, niitya yilwe, “ota longo aluhe.” (Joh. 5:17) Esiku moka Esabati lyokoshiwike lya li hali ningwa, olya faathana nesiku moka Jehova a li a vululukwa po, ndyoka lya popiwa muGenesis. Kalunga okwa li a ti kutya Esabati oli li endhindhiliko pokati ke naIsraeli. Olya li “esiku lyevululuko lya yapulilwa [Jehova].” (Lesha Eksodus 31:12-15.) Kapwa li ngoka a pitikwa a longe mesiku ndyoka, kutya nduno okanona, omupika nenge oshimuna. (Eks. 20:10) Aantu  mesiku ndyoka oya li haya mono ompito yokugandja eitulomo kiinima yopambepo.

9. Pethimbo lyaJesus, aantu yamwe oya li ye na etaloko lya puka lini?

⁹ Esabati olya li lyi lile po uuwanawa woshigwana shaKalunga. Nonando ongawo, aawiliki yomalongelokalunga yopethimbo lyaJesus oya li ya tula po oompango dha kwata miiti kombinga yankene li na okutalika ko. Oya li yi itaala kutya inashi opala okupolola omaha mEsabati nenge okwaaludha omuntu ngoka ta ehama. (Mark. 2:23-27; 3:2-5) Etaloko lya tya ngawo kalya li metsokumwe nokudhiladhila kwaKalunga, na Jesus okwa li e shi yelithile mboka ya li ya hala oku mu pulakena.

10. Oshike tatu ilongo muMateus 12:9-12, kombinga yankene Jesus a li a tala ko Esabati?

¹⁰ Jesus naalanduli ye Aajuda oya li haya dhiginine Esabati, molwaashoka oya li kohi yOmpango yaMoses. * Ihe Jesus okwe shi ulike moohapu nomiilonga kutya inashi puka okuulukila yalwe olukeno noku ya kwathela mEsabati. Okwe shi popi sha yela a ti: “Osho opala okulonga uuwanawa mesiku IyEsabati.” (Lesha Mateus 12:9-12.) Ka li e shi tala ko sha puka okuulukila yalwe olukeno noku ya kwathela mEsabati. Iilonga yaJesus oye shi ulike kutya okwa li e shi nawa elalakano lyEsabati. Molwaashoka mesiku ndyoka oshigwana shaKalunga osha li hashi thuwa po kiilonga yasho yakehe esiku, osha li hashi vulu okugandja eitulomo kokulongela Kalunga. Jesus okwa putukila muukwanegumbo mboka tashi vulika wa li hawu longitha esiku lyEsabati wu longele Kalunga.  Shoka oshi iwetikile uuna tatu lesha kombinga yaJesus sho a li moshilando moka a putukila, Nasareti. Ombiimbeli otayi ti: “[Jesus] mEsabati okwa yi mosinagoga, ngaashi i igilila. Oye okwa thikama, a leshe Omanyolo omayapuki.” — Luk. 4:15-19.

11. Olye a li a tulila po Jesus oshiholelwa oshiwanawa kombinga yokulonga?

¹¹ Osha yela kutya Josef okwa li ha tala ko iilonga ngaashi Kalunga, sho a li ta longo Jesus okuhonga iipilangi, ngoka a li ongomwanamati. (Mat. 13:55, 56) Shimwe ishewe, Jesus otashi vulika a li ha mono nkene Josef ta longo nuudhiginini esiku nesiku, a kwathele aanegumbo lye mboka ya li oyendji. Oshihokithi sho Jesus lwanima a lombwele aalanduli ye a ti: “Nakulonga kehe oku na okupewa ondjambi ye.” (Luk. 10:7) Odhoshili kutya Jesus okwa za ha longo nuudhiginini.

12. Omanyolo geni ga yelitha shoka Ombiimbeli tayi longo kombinga yokulonga nuudhiginini?

¹² Omuyapostoli Paulus naye okwa li ha longo nuudhiginini. Oshilonga shoka sha li sha simanenena kuye, okugandja uunzapo kombinga yaJesus nomalongo ge. Nonando ongawo, Paulus okwa li ha longo, opo i ikwathe. Aatessalonika oya li ye shi kutya okwa li ha “longo nokwiihepeka,” “uusiku nomutenya,” opo kaa etele nando ogumwe gwomuyo “uupyakadhi.” (2 Tes. 3:8; Iil. 20:34, 35) Paulus otashi vulika a li ta popi kombinga yiilonga ye yokutunga ootenda. Sho a li muKorinto, okwa li ha kala naAkula naPriskila “nokulonga pamwe nayo, oshoka nayo oya li aatungi yootenda.” Sho Paulus a ti kutya okwa li ha longo “uusiku nomutenya,” itashi ti kutya ka li ha thuwa po. Sho a li ha ningi ootenda, kwa li ha thuwa po, ngaashi mEsabati. Esiku ndyoka olya li hali mu pe ompito a uvithile Aajuda mboka nayo kaaya li haya longo mesiku lyEsabati. — Iil. 13:14-16, 42-44; 16:13; 18:1-4.

13. Oshike tatu ilongo koshiholelwa shaPaulus?

¹³ Omuyapostoli Paulus okwe tu tulila po oshiholelwa oshiwanawa. Okwa li e na okulonga iilonga yokwiikongela omboloto, ihe nonando ongawo, okwa li ha shilipaleke aluhe kutya ota “longele Kalunga mokuuvitha elaka etoye lya zi kuye.” (Rom. 15:16; 2 Kor. 11:23) Okwa li a ladhipike yalwe ya ninge sha faathana. Akula naPriskila oya li ‘aayakuli ooyakwawo moshilonga shaJesus Kristus.’ (Rom. 12:11; 16:3) Paulus okwa li a ladhipike Aakorinto ya kale yi “ipyakidhila aluhe niilonga yOmuwa.” (1 Kor. 15:58; 2 Kor. 9:8) Jehova okwa li nokuli a nwetha mo omuyapostoli Paulus a nyole ta ti: “Ngoka inaa hala okulonga, ina ethiwa a lye.” — 2 Tes. 3:10.

14. Jesus okwa li a hala okutya shike sho a popi oohapu ndhoka dhi li muJohannes 14:12?

¹⁴ Iilonga mbyoka ya simanenena momasiku ngaka gahugunina, okuuvitha nokuninga aantu aalongwa. Shimwe ishewe, Jesus okwa li a hunganeke kutya aalongwa ye otaya ka longa iilonga iinene yi vule ye. (Lesha Johannes 14:12.) Ka li a hala okutya otatu ka longa iikumithalonga ngaashi ye. Pehala lyaashono, aalanduli ye oya li taya ka uvitha nokulonga aantu oyendji, miitopolwa iinene notaye ke shi ninga ethimbo ele li vule lye.

15. Omapulo geni tu na okwiipula, nomolwashike?

¹⁵ Ngele oho longo iilonga yokwiikongela omboloto, ipula omapulo taga landula: ‘Mbela kiilonga onda talika ko handi longo nuudhiginini? Mbela ohandi mana ngaa iilonga yandje pethimbo noku yi longa ngaashi tandi vulu?’ Ngele osho ho ningi, nena omuhona gwoye ota ka kala e ku inekela. Aaniilonga pamwe nangoye otaya ka kala wo ya hala okupulakena ketumwalaka lyUukwaniilwa. Ngele tashi ya kiilonga yokuuvitha noyokulonga aantu, ipula omapulo taga landula: ‘Mbela aantu oya tala ndje ko handi longo nuudhiginini muukalele? Mbela ohandi ilongekidhile ngaa omatalelopo gotango nawa? Ohandi galukile ngaa mbala kumboka  ya ulika ohokwe? Ohandi kutha ngaa ombinga miilonga yi ili noyi ili yuukalele?’ Ngele shoka osho ho ningi, nena oto ka nyanyukilwa uukalele woye.

16. Eyooloko lini li li pokati kankene Jesus naayapostoli ye ya li ya tala ko okuvululukwa po nankene aantu oyendji ye ku tala ko kunena?

¹⁶ Jesus okwa li e shi kutya omathimbo gamwe ye naayapostoli ye, oya li ya pumbwa okuvululukwa po. Nonando ongawo, aantu oyendji yopethimbo lye nosho wo kunena, oya fa omulumentu omuyamba gwomeyele lyaJesus. Omulumentu ngoka okwa li i ilombwele ta ti: “Fudha ihe lya, nwa e to inyanyudha!” (Luk. 12:19; 2 Tim. 3:4) Okukala itaa longo sha nosho wo okwiinyanyudha, oyo ya li iinima ya simanenena kuye. Mepingathano naashono, Jesus naayapostoli ye kaya li ya pititha komeho uuwanawa wawo yene.

17. Ohatu longitha ngiini ethimbo lyetu, uuna tu li mefudho?

¹⁷ Kunena, ohatu kambadhala okuholela Jesus, mokulongitha omasiku getu gefudho tu uvithile yalwe nokukala pokugongala kwopaKriste, pehala owala lyokufudha po. Odhoshili kutya kutse, okuninga aantu aalongwa nokukala pokugongala oyi li iinima ya simanenena, nomolwaashono hatu ningi ngaashi tatu vulu tu kuthe ombinga pandjigilile miilonga mbika iiyapuki. (Heb. 10:24, 25) Uuna twa ya mefudho, ohatu tsikile okuya kokugongala kutya nduno otu li peni, nohatu kongo oompito tu kundathane naantu mboka tatu tsakaneke kombinga yOmbiimbeli. — 2 Tim. 4:2.

18. Omukwaniilwa gwetu, Kristus Jesus, okwa hala tu kale hatu ningi shike?

¹⁸ Otwa pandula noonkondo sho Omukwaniilwa gwetu, Kristus Jesus, he tu pula tu ninge shi thike pokuvula kwetu nohe tu kwathele tu kale tu na etaloko li li pandjele kombinga yiilonga nosho wo yokufudha po. (Heb. 4:15) Okwa hala tu kale hatu vululukwa po. Okwa hala wo tu kale hatu longo nuudhiginini, opo tu ikwathele notu kuthe ombinga miilonga yokuninga aantu aalongwa, mbyoka hayi talaleke. Moshitopolwa tashi landula, otatu ka kundathana kombinga yaashoka Jesus a ninga, opo e tu mangulule mo muupika uuwinayi noonkondo.