Oto vulu okuyamukula omapulo ngaka ga kankamena kOoshungolangelo dhomo 2019?

Euvaneko lyaKalunga ndyoka tali ti: “Oshikondjitho kehe tashi hambulwa shi ku kondjithe, itashi tompola sha,” otali ti shike? (Jes. 54:17)

Otatu vulu okukala tu na einekelo kutya Kalunga ote ke tu gamena kaahanaguli mboka ya fa ‘aadhudhu ya ponoka.’ (Jes. 25:4, 5) Aatondi yetu itaya ka vula oku tu etela oshiponga tashi kalelele. — w19.01, ep. 6-7.

Ongiini omukalo moka Kalunga a li a ungaunga nAakaanana nosho wo nAaisraeli mboka ihaaya vulika, tagu holola uuyuuki we?

Kalunga okwa li a pangula mboka ya li ya kutha ombinga muuholume nenge mokuhepeka aakiintu nuunona. Okwa li a yambeke aantu mboka haya vulika kuye nohaya ungaunga nayalwe pauyuuki. — w19.02, ep. 22-23.

Oshike tu na okuninga, uuna omuntu ngoka kee shi omwiitaali ta galikana?

Otatu vulu okukala twa mwena, tatu shi ningi nesimaneko, ihe katu na okutya “amen” nenge tu ikwate miikaha nayalwe. Otatu vulu okugalikana paumwene momutima. — w19.03, ep. 31.

Ehepeko lyaanona eyono lya kwata miiti shi thike peni?

Ehepeko lyaanona eyono kwaangoka a hepekwa, kegongalo, kaapangeli nokuKalunga. Mpoka ompango yoshilongo ya pitika ehepeko lyaanona lyi lopotwe, aakuluntugongalo ohaya vulika kuyo. — w19.05, ep. 9-10.

Ongiini to vulu okulundulula nenge okuhwepopaleka uuntu woye womeni?

Iinima ya simanenena mbyoka wu na okuninga ongaashi: Popya naJehova megalikano. Tedhatedha nelalakano lyokuninga omalunduluko. Hogolola ookuume koye pandunge. — w19.06, ep. 11.

Oshike tu na okuninga ngashingeyi tu ilongekidhile omapataneko?

Otwa pumbwa okukoleka ekwatathano lyetu naJehova. Kala wu na einekelo kutya oku tu hole noite ke tu etha nando. Lesha Ombiimbeli esiku kehe nokugalikana pandjigilile. Kala wa tompwa kutya omayambeko ngoka tatu ka etelwa kUukwaniilwa, otage ke ya shili. Koneka momutse Omanyolo nosho wo omaimbilo ngoka wu hole. — w19.07, ep. 2-4.

Oshike tu na okuninga tu kwathele aapambele yetu ya hupithwe?

Osha simana okuulika ondjaalela, okweetha eihumbato lyetu li gandje uunzapo uuwanawa, okukala aaidhidhimiki naanambili. — w19.08, ep. 15-17.

Omomukalo guni hatu pewa evululuko nenge tu tye etalaleko, ngaashi Jesus e shi hunganeka muMateus 11:28?

Otu na aakwatelikomeho aanahole, ookuume aawanawa nosho wo iilonga dhingi. — w19.09, ep. 23.

Kalunga ota vulu ngiini oku tu pa ehalo noonkondo tu katuke oonkatu? (Fil. 2:13)

Sho tatu lesha Oohapu dhaKalunga nokutedhatedha kudho, Kalunga ota vulu oku tu nkondopaleka, oku tu pa ehalo tu longe ehalo lye noku tu pa oonkondo tu katuke oonkatu. Ombepo ye otayi vulu oku tu kwathela tu ninge ngaashi tatu vulu. — w19.10, ep. 21.

Oonkatu dhopandunge dhini tu na okukatuka, manga inaatu ninga etokolo lya kwata miiti?

Oonkatu ntano odho: Ninga omapekapeko gomuule. Galikana wu pewe uunongo. Talulula omainyengotompelo goye. Kala wu na omalalakano gokondandalunde. Kala wu na ondjele. — w19.11, ep. 27-29.

Mbela eitaalo kombinga yomwenyo ihaagu si, olya tamekela pwaashoka Satana a lombwele Eva?

Hasho nando. Satana okwa li a lombwele Eva kutya ita si shili, ihe ine mu lombwela kutya olutu lwe olwo owala talu ka sa. Omalongo gomalongelokalunga giifundja oga li ga hulithwa po pethimbo lyEyelu. Eitaalo momwenyo ihaagu si, otashi vulika lya tameke manga Kalunga inaa halakanitha aantu mboka ya li taya tungu oshungo yaBabel. — w19.12, ep. 15.