OSHITOPOLWA SHOKUKONAKONWA 51
Jehova “ota hupitha mbo ya kanitha etegameno”
“Omuwa oku li popepi naamboka ya dhengwa pevi; ota hupitha mbo ya kanitha etegameno.” — EPS. 34:18.
EIMBILO 30 Tate, Kalunga kandje naKuume kandje
ELALAKANO LYOSHITOPOLWA *
1-2. Oshike tatu ka kundathana moshitopolwa shika?
OMATHIMBO nomathimbo ohatu dhiladhila kuufupi wonkalamwenyo yetu nankene ‘yu udha uupyakadhi.’ (Job 14:1) Shoka osho hashi tu ningitha tu kale twa teka omukumo omathimbo gamwe. Opu na aapiya yaJehova oyendji ya popiwa mOmbiimbeli nayo ya li yu uvite ngawo. Yamwe yomuyo oya li nokuli ya hala okusa. (1 Aak. 19:2-4; Job 3:1-3, 11; 7:15, 16) Ihe Jehova Kalunga kawo, ngoka yi inekela, okwa li aluhe e ya hekeleke noku ya tsa omukumo. Omahokololo gawo oga nyolwa mOmbiimbeli, opo getu hekeleke noku tu tsa omukumo. — Rom. 15:4.
2 Moshitopolwa shika, otatu ka kundathana iiholelwa yaapiya yaJehova yamwe, mboka ya li yi idhidhimikile omamakelo ngoka taga teya omukumo. Gumwe omwanamati gwaJakob, Josef, omuselekadhi Naemi noshitenya she Rut, omuyapostoli Petrus nosho wo Omulevi ngoka a nyola Episalomi 73. Ongiini Jehova a li e ya tsu omukumo? Oshike kehe gumwe gwomutse ta vulu okwiilonga koshiholelwa shawo? Omayamukulo komapulo ngoka otage tu shilipaleke kutya Jehova “oku li popepi naamboka ya dhengwa pevi” nota “hupitha mbo ya kanitha etegameno.” — Eps. 34:18.
JOSEF OKWA LI I IDHIDHIMIKILE OKWAANUUYUUKI
3-4. Josef okwa li a piti moonkalo dhini sho e li omugundjuka?
3 Josef okwa li e na omimvo 17 lwaampono, sho a yaguma oondjodhi mbali, dha za kuKalunga. Oondjodhi ndhoka odha li dhu ulike kutya esiku limwe Josef ota ka kala e na ondondo ya simana mokati kaantu yaandjawo. (Gen. 37:5-10) Konima owala yoondjodhi ndhoka, onkalamwenyo yaJosef oya lunduluka mepathimo lyeho. Pehala lyoku mu simaneka, aamwahe oya li ye mu landitha po. Okuza mpono, okwa ka ninga omupika gwaPotifar, elenga lyomukwaniilwa gwaEgipiti. (Gen. 37:21-28) Muule wethimbo efupi, onkalamwenyo yaJosef oya lunduluka. Ka li we pamwe nahe ngoka e mu hole. Ihe okwa ningi omupika gwelenga lyomuEgipiti ndyoka ihaali longele Jehova. — Gen. 39:1.
4 Onkalo yaJosef oya tsikile owala nokunayipala. Omukulukadhi gwaPotifar okwe mu lundile kutya okwa li ta kambadhala oku mu kwata onkonga. Potifar ka li a konakona ngele oohapu dhomukadhi odhi na na tuu uushili washa. Pehala lyaashono, okwa tulitha Josef mondholongo, moka a kala a mangwa nomalyenge. (Gen. 39:14-20; Eps. 105:17, 18) Pethimbo iinima ayihe mbyono tayi ningwa Josef okwa li omugundjuka lela. Dhiladhila owala kutya okwa li u uvite ngiini sho ta lundilwa komukulukadhi gwaPotifar. Mboka ye shi uvu otashi vulika ya li ya sheke Kalunga ke, Jehova. Iinima ayihe mbyoka oya li yi na okukala ya teya Josef omukumo.
5. Oshike sha kwathele Josef kaa kale a teka omukumo?
5 Sho Josef a li omupika naasho a tulwa mondholongo, ka li e na sho ta vulu okuninga, opo a lundulule onkalo ye. Mbela oshike sha li she mu kwathele kaa kale a teka omukumo? Pehala lyokudhiladhila kwaashoka itaa vulu okuninga, oshilonga kehe a pewa okwe shi longo nuudhiginini. Komeho giinima ayihe, Josef okwa kala ta nyanyudha Jehova, Omuntu ngoka a simanenena monkalamwenyo ye. Okuza mpono, Jehova okwa laleke nuuyamba kehe shimwe shoka Josef a ningi. — Gen. 39:21-23.
6. Oondjodhi dhaJosef otashi vulika dha li dhe mu hekeleke ngiini?
6 Josef otashi vulika wo a li a tsuwa omukumo sho a dhiladhila koondjodhi dhe dhopahunganeko. Odha li dhu ulike kutya ota ka mona ishewe yaandjawo nonkalo ye otayi ka hwepopala. Shoka osho naanaa sha ka ningwa. Sho Josef e na omimvo 37 lwaampono, oondjodhi dhe odha gwanithwa momukalo omukumithi. — Gen. 37:7, 9, 10; 42:6,9.
7. Ngaashi sha popiwa muPetrus gwotango 5:10, oshike tashi ke tu kwathela tu idhidhimikile oonkalo oondhigu?
7 Iiyilongomwa kutse. Ehokololo lyaJosef otali tu dhimbulukitha kutya otu li muuyuni moka hamu longwa iihuna naantu otaya vulu okuungaunga natse kaashi li pauyuuki. Aakriste ooyakwetu nayo otaya vulu nokuli oku tu ehameka komwenyo. Ihe ngele otwa tala ko Jehova e li Emanya lyetu nenge Epopilongulu lyetu, itatu ka teka omukumo nenge tu ethe po oku mu longela. (Eps. 62:6, 7; lesha 1 Petrus 5:10.) Dhimbulukwa kutya Josef otashi vulika a li e na omimvo 17 lwaampono, sho a tsu oondjodhi ndhoka dha za kuJehova. Shoka osha yela kutya Jehova okwi inekela aapiya ye aagundjuka. Oyendji yomuyo kunena, oye na eitaalo muJehova, ngaashi Josef. Yamwe yomuyo oya tulwa nokuli mondholongo kaashi li pauyuuki, molwaashoka ye li aadhiginini kuJehova. — Eps. 110:3.
AAKIINTU YAALI MBOKA YA LI YA GWILILWA PO KOLUHODHI
8. Oshike sha li sha ningilwa Naemi naRut?
8 Elimelek nomukadhi Naemi noyana oya li ya tembuka mo muJuda omolwondjala, e taya yi ya ka kale aakwiilongo kuMoab. Manga ye li hoka, omusamane gwaNaemi, Elimelek, okwa si. Naemi okwa thigala po owala noyanamati yawo yaali. Mokweendela ko kwethimbo, oyanamati oya hokana aakadhona Aamoabi, Rut naOrpa. Konima yomimvo omulongo, oyanamati yaNaemi nayo oya si, ihe inaya thiga po oluvalo. (Rut 1:1-5) Dhiladhila owala kutya aakiintu mboka yatatu oya li ya nika oluhodhi shi thike peni. Rut naOrpa oya li taya vulu okuhokanwa ishewe, ihe mbela olye a li ta ka sila oshimpwiyu Naemi, ngoka a kulupa? Naemi okwa li a polimana unene. Okwa popi a ti: “Inamu tya ndje we Naemi, tyeni shila Mara, oshoka Kalunga Omunankondoawike okwa monitha ndje uululu.” Naemi okwa li a teka omukumo nokwa ziyalala, nokwa tokola a shune kuBetlehem. Rut okwa yi wo pamwe naye. — Rut 1:7, 18-20.
Kalunga oku ulukile Naemi naRut kutya ota vulu okukwathela aapiya ye kaaya kale we ya teka omukumo noya nika oluhodhi. Mbela ota vulu oku ku ningila oshinima sha faathana?(Tala okatendo 8-13) *
9. Ngaashi sha popiwa muRut 1:16, 17, 22, Rut okwa tsu ngiini Naemi omukumo?
9 Oshike sha li sha kwathele Naemi? Ohole ndjoka a li u ulukilwa. Pashiholelwa, Rut okwa li u ulike kutya oku mu hole noonkondo, sho a tokola a kale pamwe naye. (Lesha Rut 1:16, 17, 22.) Sho ye li muBetlehem, Rut okwa li a longo nuudhiginini mokupupula momapya, opo ya mone sha shokulya naNaemi. Oshizemo, Rut okwi iningile edhina ewanawa e li omukiintu ngoka ha longo nuudhiginini. — Rut 3:11; 4:15.
10. Jehova okwa li u ulike ngiini kutya oku na ko nasha noohepele, ngaashi Naemi naRut?
10 Jehova okwa li a pe Aaisraeli ompango ndjoka tayi ulike kutya oku na ko nasha noohepele, ngaashi Naemi naRut. Okwa li a lombwele Aaisraeli kutya uuna taya teya omapya gawo, inaye ga teya sigo okominkulo, opo oohepele dhi pupule shoka ya hupitha mo. (Lev. 19:9, 10) Onkee ano, Naemi naRut kaya li ya pumbwa okuhehela nando omuntu, opo ya mone iikulya.
11-12. Boas okwa li ngiini a nyanyudha Naemi naRut?
11 Mwene gwepya moka Rut a li ha pupula, okwa li omulumentu omuyamba gwedhina Boas. Okwa li a kuminwa uudhiginini waRut kuyinamweno, Naemi, nohole ya tsa kesipa ndyoka ya li pokati kawo. Onkee ano, Boas okwa hokana po Rut, e ta landulula po epya ndyoka lya li lyaElimelek, opo oyana yaRut ya vule oku li thigulula po. (Rut 4:9-13) Boas naRut oya vala okanona, edhina lyako Obed, ngoka a ka ninga hekulululwa yomukwaniilwa David. — Rut 4:17.
12 Dhiladhila owala kutya enyanyu olya li lyi thike peni kuNaemi sho u ukata okahanona, Obed. Okwa li wo a pandula Jehova megalikano. Naemi naRut otaya ka kala ya nyanyukwa inaashi monika nale sho taya ka yumudhwa. Oshike tashi ke ya nyanyudha? Otaya ka uva kutya Obed okwa ka ninga hekulululwa yaMesiasa Omuuvanekwa, Jesus Kristus.
13. Iiyilongomwa yini ya simana tatu ilongo mehokololo lyaNaemi naRut?
13 Iiyilongomwa kutse. Uuna tu li momamakelo, omitima dhetu ohadhi kala dha dhengwa pevi nohatu kala twa teka omukumo. Otashi vulika nokuli tu kale tu uvite tu li muudhigu wu vule oonkondo dhetu. Ngele twi iyadha moonkalo ndhoka, otwa pumbwa okwiinekela thiluthilu Tate yetu gwomegulu e tatu kala popepi nooitaali ooyakwetu. Oshoshili kutya Jehova iha kutha po aluhe omashongo getu. Pashiholelwa, ka li a yumudha omusamane gwaNaemi nosho wo oyanamati. Ihe Jehova ote ke tu kwathela tu idhidhimike okupitila mohole ndjoka tatu ulukilwa kaamwatate naamwameme. — Omayel. 17:17.
OMULEVI NGOKA KONYALA E ETHE PO OKULONGELA JEHOVA
Omunyoli gwEpisalomi 73 okonyala a pundukithwe, sho a mono iinima ya fa tayi endele nawa mboka ihaaya longele Jehova. Natse otatu vulu okwiiyadha monkalo ya faathana (Tala okatendo 14-16)
14. Oshike sha li sha teya Omulevi gumwe omukumo?
14 Episalomi 73 olya nyolwa kOmulevi, ngoka a li e na uuthembahenda wokulonga mongulu yaJehova. Ihe naye opu na oshikando shimwe a li a teka omukumo. Oshe ende ngiini? Okwa li a sila efupa aakaanakalunga naainenepeki, hamolwiilonga yawo iiwinayi, ihe oosho onkalamwenyo yawo ya li tayi monika ya fa ombwanawa yi vule ye. (Eps. 73:2-9, 11-14) Iinima oya li ya fa tayi ya endele nawa, oshoka oya li aayamba, ihaye ehama nokaya li ye na iimpwiyu. Sho Omupisalomi a tala kiinima mbyoka, osha li she mu teya omukumo e ta ti: ‘Itashi kwatha sha nani, sho ndi ikeelele kuuwinayi nonda kala inee yona.’ Osha yela kutya onkalo ndjono oyaale yi mu ethithe po okulongela Jehova.
15. Oshike sha li sha kwathele Omulevi ngoka a nyola Episalomi 73:16-19, 22-25, kaa kale we a teka omukumo?
15 Lesha Episalomi 73:16-19, 22-25. Omulevi okwa li a yi “mongulu yaKalunga,” moka a kala pamwe nooitaali ooyakwawo. Shoka oshe mu kwathele a kale a ngungumana, a dhiladhile nawa noku galikane kombinga yonkalo ye. Oshe mu kwathele wo a mone kutya ka li ta dhiladhila pandunge nonokutya oku li pokukanitha ekwatathano lye naJehova. Shimwe ishewe, okwa mono kutya aakolokoshi otaye ende “pehala tali pundukitha” notaya ka ‘kulukila mehanagulo.’ Opo kaa kale we a sa efupa nokwa teka omukumo, Omulevi okwa li e na okutala ko iinima ngaashi Jehova he yi tala ko. Shoka osha li she mu kwathele a kale e na ombili noku kale a nyanyukwa ishewe. Okwa ti: “Kaku na we gulwe e ku vulile ndje [Jehova], . . . kombanda yevi.”
16. Oshike tatu ilongo kOmulevi?
16 Iiyilongomwa kutse. Inatu sila nando efupa aakolokoshi mboka ya fa taya li nawa niinima otayi ya endele nawa. Enyanyu lyawo olyopakathimbo noitaya ka kala nomwenyo sigo aluhe. (Omuuv. 8:12, 13) Ngele otwa kala twe ya sila efupa, otatu ka teka owala omukumo notatu ka yona po ekwatathano lyetu naJehova. Ngele owi iyadha wu uvite ngaashi Omulevi, landula oshiholelwa she. Vulika komayele gaKalunga gopahole e to kala ho endathana naamboka haya longo ehalo lye. Ngele owa kala wu hole Jehova shi vulithe kehe shimwe, oto ka kala wa nyanyukwa shili. Oto ka kala wo mondjila ndjoka tayi ku fala ‘kokukalamwenyo kwashili.’ — 1 Tim. 6:19.
OMAPUKO GAPETRUS OGA LI GE MU TEYA OMUKUMO
Okutedhatedha koshiholelwa shaPetrus otaku vulu oku tu kwathela, opo kaatu kale we twa teka omukumo, notu tsikile okulongela Jehova. Otatu vulu wo oku shi longitha tu kwathele yalwe (Tala okatendo 17-19)
17. Iinima yini ya li ya teya Petrus omukumo?
17 Omuyapostoli Petrus okwa li omulumentu omulaadhi. Ihe omathimbo gamwe okwa li ha popilile noha ningi iinima inaa dhiladhila nawa, nokonima ohe ki ipa ombedhi. Pashiholelwa, sho Jesus a lombwele aayapostoli ye kutya ota ka hepekwa nokudhipagwa, Petrus okwe mu ganda a ti: “Omuwa, shi valelwe, u ningwe ngaaka!” (Mat. 16:21-23) Jesus okwa li e mu pukulula. Sho ongundu yaantu ye ya okukwata po Jesus, Petrus okwa li a katuka meendelelo nopwaa na okudhiladhila, e ta tete ko okutsi kwomupiya gwomuyambi omukuluntu. (Joh. 18:10, 11) Natango, Jesus okwa li e mu pukulula. Oshikando shimwe, Petrus okwa li i itadha kutya nando aayapostoli yalwe oya ye Kristus ontuku, ye kapu na esiku e shi ninge. (Mat. 26:33) Molwaashoka okwa li i inekela muye mwene, okwa kwatwa kuumbanda e ti idhimbike Jesus lutatu. Shoka osha li sha teya Petrus omukumo noonkondo, e ta “yi pondje nokwa lili nokulililila.” (Mat. 26:69-75) Otashi vulika a li ti ipula ngele Jesus opu na ngaa esiku e mu dhimine po.
18. Jesus okwa li a kwathele ngiini Petrus, opo kaa kale we a teka omukumo?
18 Petrus ka li e etha a teke omukumo unene sigo oposhitsa shokweetha po okulongela Jehova. Konima yomapuko ge, okwa tsikile okulongela Jehova pamwe naayapostoli ooyakwawo. (Joh. 21:1-3; Iil. 1:15, 16) Oshike sha li she mu kwathele? Okwa li a dhimbulukwa kutya Jesus okwa li e mu galikanene, opo eitaalo lye lyaa nkundipale. Jesus okwa li wo e mu ladhipike a galukile kuye nokutse aamwahe omukumo. Jehova okwa li a yamukula egalikano lyaJesus tali zi komutima. Lwanima, Jesus okwi ihololele Petrus, opo e mu tse omukumo. (Luk. 22:32; 24:33, 34; 1 Kor. 15:5) Jesus okwa li wo i iholele aayapostoli ayehe, konima sho ya kambadhala uusiku awuhe okukwata oohi, ihe inaya kwata sha. Esiku ndyoka, Jesus okwa li a pe Petrus ompito yokuulika kutya oku mu hole shi thike peni. Jesus okwa li a dhimine po kuume ke nokwa li e mu inekelele iinakugwanithwa ya gwedhwa po. — Joh. 21:15-17.
19. Episalomi 103:13, 14 otali tu kwathele ngiini tu kale hatu itala ko ngaashi Jehova he tu tala ko uuna twa yona?
19 Iiyilongomwa kutse. Omukalo moka Jesus a li u ungaunga naPetrus otagu ulike kutya Jesus oku na ohenda, ngaashi naanaa He. Ano uuna twa ningi omapuko, inatu kala tu uvite kutya Jehova kapu na esiku e tu dhimine po. Natu dhimbulukwe kutya Satana oye a hala tu dhiladhile ngawo. Ashike tse, natu kale hatu dhiladhila kohole onene ndjoka Jehova he tu ulukile, nkene e shi nawa omaunkundi getu nankene he tu dhimine po. Tse tatu kambadhala wo oku mu holela, uuna yalwe ye tu uvitha nayi. — Lesha Episalomi 103:13, 14.
20. Oshike tatu ka kundathana moshitopolwa tashi landula?
20 Oshiholelwa shaJosef, shaNaemi naRut, shomuyapostoli Petrus nosho wo shOmulevi, otashi tu shilipaleke kutya Jehova “oku li popepi naamboka ya dhengwa pevi.” (Eps. 34:18) Omathimbo gamwe, ohe etha omaudhigu getu adhe nohe etha tu teke omukumo. Ihe uuna twi idhidhimikile oonkalo ndhoka e tatu piti mo kekwatho lye, eitaalo lyetu ohali kolo. (1 Pet. 1:6, 7) Moshitopolwa tashi landula, otatu ka kundathana nkene Jehova ha kwathele aapiya ye mboka ya teka omukumo, tashi vulika molwokwaagwanenena kwawo nenge molwoonkalo oondhigu.
EIMBILO 7 Jehova oonkondo dhetu
^ okat. 5 Josef, Naemi naRut, omuyapostoli Petrus nosho wo Omulevi gumwe oya li ya piti moonkalo oondhigu ndhoka dhe ya teya omukumo. Moshitopolwa shika otatu ka tala nkene Jehova a li e ya hekeleke noku ya tsa omukumo. Otatu ka tala wo kutya oshike tatu ilongo kiiholelwa yawo nokomukalo moka Jehova u ungaunga nayo nolukeno.
^ okat. 56 ETHANO: Naemi, Rut naOrpa oya li ya nika oluhodhi noya teka omukumo sho aasamane yawo ya si. Rut naNaemi ya nyanyukwa pamwe naBoas, sho Obed a valwa.
