OSHITOPOLWA SHOKUKONAKONWA 48
“Kaleni aayapuki”
“Kaleni aayapuki mwaayihe mbyoka tamu yi ningi.” — 1 PET. 1:15.
EIMBILO 34 Enda muudhiginini
ELALAKANO LYOSHITOPOLWA *
1. Omuyapostoli Petrus okwa pa Aakriste omayele geni, nomolwashike tashi vulika shi kale tashi monika oshidhigu oku ga tula miilonga?
KUTYA nduno otu na etegameno lyoku ka kala nomwenyo megulu nenge kombanda yevi, atuheni otatu vulu okumona mo uuwanawa mokukundathana omayele ngoka omuyapostoli Petrus a li a pe Aakriste yomethelemumvo lyotango. Petrus okwa nyola a ti: “Kaleni aayapuki mwaayihe mbyoka tamu yi ningi, ngaashi Kalunga ngoka e mu ithana, omuyapuki. Oshoka enyolo otali ti: ‘Omu na okukala aayapuki, oshoka ongame omuyapuki.’” (1 Pet. 1:15, 16) Oohapu ndhoka otadhi tu longo kutya otatu vulu okuholela Jehova, ngoka e li omuyapuki kaaku na we. Otatu vulu okukala aayapuki mwaayihe mbyoka tatu ningi. Molwaashoka inatu gwanenena, shoka otashi vulika shi kale tashi monika sha fa itaashi vulika. Nonando Petrus poompito dhimwe okwa li a ningi omapuko, oshiholelwa she otashi ulike kutya otatu vulu “okukala aayapuki.”
2. Omapulo geni tatu ka yamukula moshitopolwa shika?
2 Moshitopolwa shika, otatu ka yamukula omapulo taga landula: Oshike shoka Ombiimbeli tayi tu longo kombinga yuuyapuki waJehova? Ongiini tatu vulu okukala aayapuki mwaayihe mbyoka tatu ningi? Ekwatathano lini li li pokati kuuyapuki nekwatathano lyetu naJehova?
UUYAPUKI OSHIKE?
3. Aantu oyendji ohaya kala ya tala ko uuyapuki ngiini, ihe openi tatu vulu okumona uuyelele wu shi okwiinekelwa kombinga wuuyapuki?
3 Uuna aantu taya dhiladhila omuntu ngoka omuyapuki, oyendji momadhiladhilo gawo ohamu ya omuntu ngoka ha kala aluhe a zala oonguwo dhopalongelokalunga noihi imemeha. Ihe shoka kashi shi shoshili. Jehova, ngoka e li omuyapuki, okwa popiwa mOmbiimbeli kutya oku li “Kalunga omunyanyukwi.” (NW) (1 Tim. 1:11) Mboka haye mu longele ohaya kala ya “nyanyukwa.”(NW) (Eps. 144:15) Jesus ka li nokuli a popile muuwanawa mboka ya li haya zala oonguwo dhokwiiyulika kutya oye li aayuuki noya li wo haya kambadhala okulonga uuwanawa, opo ya monike kaantu. (Mat. 6:1; Mark. 12:38) Tu li Aakriste yashili, otu shi kutya okukala omuyapuki otaku ti shike, mokutala kwaashoka Ombiimbeli tayi ti. Otwa tompwa kutya Kalunga ketu omuyapuki nomunahole ke na siku e tu pe ompango ndjoka itaatu vulu okugwanitha po. Onkee ano, ngele Jehova ote tu lombwele ta ti: “Omu na okukala aayapuki,” kapu na omalimbililo kutya otatu vulu oku shi ninga. Nonando ongawo, opo tu kale aayapuki mwaayihe mbyoka tatu ningi, tango otwa pumbwa okuuva ko kutya uuyapuki oshike.
4. Oshitya “uuyapuki” otashi ti shike?
4 Uuyapuki oshike? MOmbiimbeli oshitya “uuyapuki,” otashi ti okukala omuyogoki pamikalo nosho wo palongelokalunga. Otashi vulu wo okuyelithwa kutya okwiikalekelwa wu longithwe mokulongela Kalunga. Niitya yimwe, otatu ka talika ko tu li aayapuki, ngele ohatu longele Kalunga pamukalo ngoka a hokwa notu na wo ekwatathano lyopothingo naye. Oshikumithi noonkondo okutseya kutya Jehova ngoka e li omuyapuki kaaku na we okwa hala okupanga uukuume natse, nonando inatu gwanenena.
“OMUYAPUKI, OMUYAPUKI, OMUYAPUKI, OMUWA OMUNANKONDOAWIKE OMUYAPUKI”
5. Oshike tatu vulu okwiilonga kaayengeli aadhiginini kombinga yaJehova?
5 Jehova omuyogoki thiluthilu. Shoka oshi iwetikile mokutala kwaashoka sha li sha popiwa kaaserafi, ano aayengeli mboka haya kala popepi noshipangelapundi nohaye mu yakula. Yamwe yomuyo oya li yi igidha ya ti: “Omuyapuki, omuyapuki, omuyapuki, omuwa omunankondoawike omuyapuki.” (Jes. 6:3) Odhoshili kutya opo aayengeli mboka ya kale ye na ekwatathano lyopothingo naJehova ngoka e li omuyapuki, nayo oye na okukala aayapuki. Nokuli uuna omuyengeli e ya kombanda yevi a gandje etumwalaka lyontumba okuza kuJehova, ehala mpoka e li gandjela olya li hali talika ko eyapuki. Shoka osho sha li sha ningwa po sho Moses a li a thikama poshihwa sha hwama. — Eks. 3:2-5; Jos. 5:15.
Kepapa lyegala lyomuyambi omukuluntu okwa li kwa nyolwa oohapu ndhika tadhi ti “Osha yapulilwa Omuwa” (Tala oshitopolwa shokukonakonwa 48, okatendo 6-7)
6-7. (a) Shi ikolelela kuEksodus 15:1, 11, Moses okwa li a tsu ngiini omuthindo uuyapuki waKalunga? (b) Oshike sha li hashi dhimbulukitha Aaisraeli kutya Kalunga omuyapuki? (Tala ethano lyokombanda.)
6 Konima sho Aaisraeli ya taagaluka Efuta Etiligane, Moses okwa kala ta tsu omuthindo nkene Kalunga kawo, Jehova, omuyapuki. (Lesha Eksodus 15:1, 11.) Aaegipiti mboka ya li haya longele iikalunga kaya li nando aayapuki. NAakaanana mboka ya li haya longele iikalunga kaya li aayapuki. Elongelokalunga lyawo olya li lya kwatela mo okuyamba aanona omafikilondjambo nosho wo omilalo dha nyata. (Lev. 18:3, 4, 21-24; Deut. 18:9, 10) Mepingathano naashono, Jehova ke na siku a pule aalongeli ye ya longe iihuna yi thike mpoka. Oku li omuyapuki thiluthilu. Opo a dhimbulukithe Aaisraeli kombinga yoshinima shono, okwa gandja elombwelo pu hambulwe epapa lyoshishani lyoshingoli sho shene, shoka sha li shi na okumangelwa kegala lyomuyambi omukuluntu. Kepapa ndyoka okwa li kwa nyolwa oohapu tadhi ti: “Osha yapulilwa Omuwa.” — Eks. 28:36-38.
7 Oohapu ndhoka dha li dha nyolwa kepapa ndyoka odha li dhi na okudhimbulukitha kehe ngoka te dhi lesha kutya Jehova omuyapuki shili. Ihe ongiini kombinga yaamboka ya li itaaya vulu okumona shoka sha nyolwa kepapa ndyoka, molwaashoka itaaya vulu okuya popepi nomuyambi omukuluntu? Mbela otaya ka tsikila owala okukala momilema kombinga yoohapu ndhoka dha simanenena? Hasho! Kehe Omuisraeli okwa li ha uvu kombinga yankene Jehova omuyapuki sho Ompango tayi leshelwa aalumentu, aakiintu naanona. (Deut. 31:9-12) Andola nangoye opo wa li, ando otashi vulika wu uve po oohapu tadhi ti: “Ongame Omuwa Kalunga keni. Kaleni aayapuki, oshoka ngame omuyapuki.” “Kaleni aayapuki yandje awike, oshoka ongame Omuwa, ngame omuyapuki.” — Lev. 11:44, 45; 20:7, 26.
8. Oshike tatu ilongo muLevitikus 19:2 nosho wo muPetrus gwotango 1:14-16?
8 Natu gandjeni eitulomo koohapu ndhoka dhi li muLevitikus 19:2, ndhoka dha li hadhi leshelwa oshigwana ashihe. Jehova okwa li a lombwele Moses a ti: “Lombwela egongalo alihe lyaIsrael to ti: ‘Kaleni aayapuki, oshoka ngame Omuwa Kalunga keni omuyapuki.’” Petrus otashi vulika a li ta totha oohapu ndhoka, sho a ladhipike Aakriste ‘ya kale aayapuki.’ (Lesha 1 Petrus 1:14-16.) Odhoshili kutya katu li kohi yOmpango yaMoses. Nonando ongawo, shoka sha nyolwa kuPetrus otashi tsu kumwe naashoka tatu ilongo muLevitikus 19:2, ano kutya Jehova omuyapuki, naamboka ye mu hole oye na okulalakanena okukala aayapuki. Atuheni shoka osho tu na okulalakanena okuninga kutya nduno otu na etegameno lyoku ka kala nomwenyo megulu nenge omoparadisa kombanda yevi. — 1 Pet. 1:4; 2 Pet. 3:13.
“KALENI AAYAPUKI MWAAYIHE MBYOKA TAMU YI NINGI”
9. Okukonakona shoka sha popiwa muLevitikus ontopolwa 19 otaku vulu ngiini oku tu etela uuwanawa?
9 Molwaashoka otwa hala okunyanyudha Kalunga ketu omuyapuki, otwa halelela okwiilonga nkene tatu vulu okukala aayapuki. Jehova okwe tu pa omayele taga longo kombinga yankene tatu vulu oku shi ninga. Omayele gamwe ngoka otatu ga adha muLevitikus ontopolwa 19. Omulongwantu gumwe gwelaka lyOshihebeli gwedhina Marcus Kalisch, okwa nyola a ti: “Ontopolwa 19 otashi vulika oyo ya simana koontopolwa adhihe dhembo lyaLevitikus, mwa kwatelwa wo omamboMbiimbeli gatano gopetameko lyOmbiimbeli.” Dhimbulukwa kutya Levitikus 19 okwa tameka noohapu tadhi ti: “Kaleni aayapuki.” Ngashingeyi natu ka kundathaneni dhimwe dhomoovelise dhomontopolwa ndjoka, ndhoka tadhi tu longo kombinga yankene tatu vulu okukala aayapuki mokukalamwenyo kwetu kwakehe siku.
Shoka sha popiwa kombinga yaavali muLevitikus 19:3 oshi na oku ya inyengitha ya ninge shike? (Tala okatendo 10-12) *
10-11. Montopolwa 19 yaLevitikus otatu lombwelwa tu ninge shike, nomolwashike sha simana?
10 Konima sho Jehova a lombwele Aaisraeli kutya oye na okukala aayapuki, okwa gwedha ko a ti: “Shaa ngoka na simaneke yina nahe . . . Ongame Omuwa Kalunga keni.” — Lev. 19:2, 3.
11 Osha yela kutya osha simanenena tu kale hatu vulika kelombwelo lyaKalunga kombinga yokusimaneka aavali yetu. Oshikando shimwe omulumentu gumwe okwa pula Jesus a ti: “Nandi longe uuwanawa washike, ndi mone omwenyo gwaaluhe?” Jesus meyamukulo lye komulumentu ngoka okwa li a kwatele mo elombwelo kutya oku na okusimaneka he nayina. (Mat. 19:16-19) Jesus okwa li nokuli a shadha Aafarisayi, molwaashoka oya li haya ningi ashihe shoka taya vulu ya yande okusila oshimpwiyu aavali yawo. Kungawo oya li haya “kutha oohapu dhaKalunga oonkondo.” (Mat. 15:3-6) “Oohapu dhaKalunga” odha li dha kwatela mo Iipango Omulongo nosho wo oohapu ndhoka dhi li muLevitikus 19:3. (Eks. 20:12) Natango, ndhindhilika kutya oohapu ndhoka tadhi adhika muLevitikus 19:3, ndhoka tadhi popi kombinga yokusimaneka aavali yetu odha landula oohapu ndhoka tadhi ti: “Kaleni aayapuki, oshoka ngame Omuwa Kalunga keni omuyapuki.”
12. Ongiini tatu vulu okutula miilonga omayele ngoka taga adhika muLevitikus 19:3?
12 Uuna tatu dhiladhila komayele gaJehova kombinga yokusimaneka aavali yetu, otashi vulika tu ipule tatu ti, ‘Mbela otandi shi enditha ngiini moshinima shono?’ Ngele owu wete kutya owa li wu na okuninga oshindji, oto vulu okuninga omalunduluko ngashingeyi. Ito vulu okulundulula shoka wa ninga monakuziwa, ihe ngashingeyi oto vulu okukala wa tokola toko wu konge ethimbo wu kale pamwe naavali yoye noku ya kwathela gaashi tashi vulika. Ongiini ngele owa tameke oku ya kwathela pashimaliwa, pambepo nosho wo pamaiyuvo? Okuninga ngawo oku li metsokumwe naashoka Levitikus 19:3 a popya.
13. (a) Omayele galwe geni tatu adha muLevitikus 19:3? (b) Ngaashi sha popiwa muLukas 4:16-18, kunena ongiini tatu vulu okuholela Jesus?
13 Levitikus 19:3 ote tu longo wo oshinima shilwe kombinga yokuninga aayapuki. Movelise ndjoka omwa popiwa Esabati. Aakriste kaye li kohi yOmpango yaMoses, onkene inatu pumbwa okukala hatu dhiginine Esabati. Nonando ongawo, otatu vulu okwiilonga oshindji kunkene Aaisraeli ya li haya dhiginine Esabati nankene ya li haya mono mo uuwanawa. Esabati olya li hali kala ethimbo lyokuthuwa po komaipyakidhilo gakehe esiku nokugandja eitulomo kokulongela Jehova. * Nomolwaashono mesiku lyEsabati Jesus a li ha yi kosinagoga yokoshilando hoka a putukila a ka leshe Oohapu dhaKalunga. (Eks. 31:12-15; lesha Lukas 4:16-18.) Elombwelo lyaKalunga ndyoka tali adhika muLevitikus 19:3, ndyoka tali popi kombinga ‘yokudhiginina Esabati lye,’ oli na oku tu inyengitha tu kale hatu itulile po ethimbo tu mu longele. Mbela owu uvite kutya owa pumbwa okuninga oshindji wu vulike kuJehova moshinima shono? Ngele owa kala ho itulile po ethimbo pandjigilile wu longele Jehova, oto ka kala wu na ekwatathano lyopothingo naye, oshinima shoka sha pumbiwa, opo wu kale omuyapuki.
KOLEKA EKWATATHANO LYOYE NAJEHOVA
14. Oshili yini ya simanenena ya tsuwa omuthindo muLevitikus ontopolwa 19?
14 Levitikus ontopolwa 19 okwa popya lwiikando kombinga yoshili yimwe ya simanenena ndjoka tayi vulu oku tu kwathela tu kale aayapuki. Ovelise 4 oya hula noohapu tadhi ti: “Ongame Omuwa Kalunga keni.” Etumbulo ndyoka nenge oohapu dhu ukila ko odha holoka mo montopolwa ndjoka lwiikando 16. Oohapu ndhoka otadhi tu dhimbulukitha oshipango shotango, shoka tashi ti: “Ongame Omuwa, Kalunga koye . . . Ino kala u na ookalunga yalwe koshipala shandje.” (Eks. 20:2, 3) Kehe Omukriste ngoka a hala okukala omuyapuki momeho gaJehova oku na okushilipaleka kutya ita ka etha nando osha shi teye po ekwatathano lye naye. Shimwe ishewe, molwaashoka otwa humbata edhina lyaJehova, otwa tokola toko kaatu ethe oonkatu dhetu dhi shekithe edhina lye eyapuki. — Lev. 19:12; Jes. 57:15.
15. Oovelise dhomontopolwa 19 yaLevitikus ndhoka tadhi popi kombinga yomayambo odhi na oku tu inyengitha tu ninge shike?
15 Aaisraeli oya li haya ulike kutya oya taamba ko Jehova e li Kalunga kawo, mokuvulika koompango dhe. Levitikus 18:4 ota ti: “Vulikeni koompango dhandje, mu ninge shoka tandi mu lombwele. Ongame Omuwa Kalunga keni.” Montopolwa 19 omwa popiwa ‘oompango’ ndhoka oshigwana shaIsraeli sha li shi na okuvulika kudho. Pashiholelwa, ovelise 5-8, 21, 22 otadhi popi kombinga yomayambo giinamwenyo. Omayambo ngoka oga li ge na okugandjwa momukalo moka itaagu “shundula shoka oshiyapuki shOmuwa.” Okulesha oovelise ndhoka oku na oku tu inyengitha tu opalele Jehova noku mu longela momukalo ngoka a hokwa, ngaashi Aahebeli 13:15 taye tu ladhipike tu ninge.
16. Ekotampango ndyoka tali adhika muLevitikus 19 otali tu dhimbulukitha shike kombinga yeyooloko ndyoka li li pokati kaalongeli yaJehova naamboka ihaaye mu longele?
16 Opo tu kale aayapuki, otwa pumbwa okukala tu na ehalo lyokukala twa yooloka ko kaantu mboka ye tu dhingilila. Shoka ihashi kala aluhe oshipu. Omathimbo gamwe, aanasikola ooyakwetu, aaniilonga pamwe natse, aapambele mboka kaaye shi Oonzapo nosho wo yalwe, otashi vulika ya kale taye tu thiminike tu kuthe ombinga miinima mbyoka yi li ompinge nomakotampango gOmbiimbeli. Uuna twi iyadha monkalo ndjoka, otwa pumbwa okuninga etokolo. Oshike tashi vulu oku tu kwathela tu ninge etokolo lyopandunge? Ekotampango ndyoka tali adhika muLevitikus 19:19 otali vulu oku tu kwathela. Ovelise ndjoka oya ti: “Inamu zala oonguwo dha tungithwa oongodhi dhomaludhi gaali.” Okwaaninga ngawo okwa li haku kwathele oshigwana shaIsraeli shi kale sha yooloka ko kiigwana mbyoka ye shi dhingilila. Molwaashoka katu li we kohi yOmpango, inashi puka Omukriste a zale oonguwo dha hondjwa niiyata yomaludhi ga yoolokathana. Ihe ohatu yanda okukala twa fa aantu mboka ye na omaitaalo nosho wo omikalondjigilile ndhoka dhi li ompinge naashoka Ombiimbeli tayi longo, nonando oye li aanasikola ooyakwetu, aaniilonga pamwe natse nenge aapambele. Odhoshili kutya otu hole aapambele yetu nosho wo aantu ooyakwetu. Nonando ongawo, ngele tashi ya kiinima mbyoka ya pamba okulongela kwetu Jehova, katu na okukala twa tila okukala twa yooloka ko kaantu. Shoka osha simanenena, molwaashoka ngele otwa hala okuninga aayapuki, otwa pumbwa okukala twi ikalekelwa tu li aalongeli yaJehova. — 2 Kor. 6:14-16; 1 Pet. 4:3, 4.
Oshike shoka Aaisraeli ya li taya vulu okwiilonga muLevitikus 19:23-25, noshike to ilongo moovelise ndhoka? (Tala okatendo 17-18) *
17-18. Iiyilongomwa yini ya simanenena tatu vulu okwiilonga muLevitikus 19:23-25?
17 Etumbulo “Ongame Omuwa Kalunga keni” olya li li na okukwathela Aaisraeli ya mone kutya oya pumbwa okukala ya pititha komeho ekwatathano lyawo naJehova. Ngiini mbela? Levitikus 19:23-25 ote tu kwathele moshinima shono. (Lesha.) Dhiladhila kwaashoka oohapu ndhoka dha li tadhi ti koshigwana shaIsraeli sho sha taagulukile mEvi lyEuvaneko. Uuna omuntu a kunu omuti gwiiyimati, ka li a pitikwa a lye iiyimati yagwo uule womimvo ndatu. Momumvo omutine, iiyimati mbyoka oya li hayi yoololelwa Kalunga yi ka longithwe metsalihangano. Mwene gwayo okwa li owala a pitikwa e yi lye momumvo omutitano. Ompango ndjoka oya li yi lile po okukwathela Aaisraeli ya uve ko kutya kaye na okukala ya pititha komeho omahalo gawo yene. Jehova okwa li a hala ya kale ye na einekelo muye kutya ote ke ya sila oshimpwiyu nokukala ya pititha komeho oku mu longela. Jehova okwa li ta ka shilipaleka kutya oye na aluhe iikulya. Jehova okwa li wo e ya ladhipike ya kale haya gandja omayambo ketsalihangano.
18 Ompango ndjoka ya popiwa muLevitikus 19:23-25 otayi tu dhimbulukitha oohapu ndhoka Jesus a li a popi meuvitho lye lyokondundu. Jesus okwa tile: ‘Inamu sa oshimpwiyu shokulya nokunwa.’ Okwa li wo a gwedha ko a ti: “Ho yeni yomegulu oku shi shi kutya omwa pumbwa mbika ayihe.” Kalunga ote ke tu sila oshimpwiyu, ngaashi owala ha ningile oondhila dhokegulu. (Mat. 6:25, 26, 32) Otu na einekelo kutya Jehova ota ka shilipaleka aluhe kutya otu na ashihe shoka twa pumbwa. Shimwe ishewe, ohatu gandja “omagano” kuyalwe mboka ye li mompumbwe, kaapu na oku shi tseyithila yalwe. Ohatu gandja wo omayambidhidho megongalo nehalo ewanawa. Jehova oha kala e wete nkene tatu ambidhidha elongelokalunga lye lyashili, note ke tu futa. (Mat. 6:2-4) Ngele ohatu gandja, kungawo otatu ulike kutya otu uvite ko shoka Levitikus 19:23-25 te tu longo.
19. Uuwanawa wuni wa mona mokukonakona oovelise dhimwe dhaLevitikus?
19 Oovelise ndhoka twa kundathana muLevitikus ontopolwa 19, odhe tu kwathela tu mone omikalo moka tatu vulu okukala aayapuki, ngaashi Kalunga ketu omuyapuki. Ngele otwa kala tatu ningi ashihe shoka tatu vulu tu mu holele, kungawo otatu ulike kutya otwa tokola toko ‘okukala aayapuki mwaayihe tatu ningi.’ (1 Pet. 1:15) Aantu oyendji mboka ihaaya longele Jehova ohaya kala ye wete eihumbato lyetu ewanawa. Shoka ohashi ningitha nokuli yamwe yomuyo ya hambelele Jehova. (1 Pet. 2:12) Ihe opu na oshindji shoka tatu vulu okwiilonga muLevitikus ontopolwa 19. Oshitopolwa tashi landula otashi ka kundathana oovelise dha gwedhwa po dhomontopolwa ndjoka notashi ke tu kwathela tu mone omikalo dhilwe moka tatu vulu ‘okukala aayapuki,’ ngaashi Petrus e tu ladhipika tu ninge.
EIMBILO 80 “Konakona mwene, u mone, nkene Omuwa omwaanawa”
^ okat. 5 Otu hole Jehova noonkondo, notwa hala oku mu nyanyudha. Jehova omuyapuki nokwa tegelela aalongeli ye nayo ya kale aayapuki. Mbela aantu inaaya gwanenena otaya vulu ngaa okukala aayapuki? Eeno, otashi vulika. Okukundathana kombinga yomayele gomuyapostoli Petrus ngoka a pe ooitaali nosho wo omalombwelo gaJehova koshigwana she, Israeli, otage ke tu kwathela tu mone nkene tatu vulu okukala aayapuki mwaayihe mbyoka tatu ningi.
^ okat. 13 Ngele owa hala okutseya oshindji kombinga yEsabati nosho wo iiyilongomwa mbyoka tali tu longo, tala oshitopolwa “‘Opu na ethimbo’ lyokulonga nolyokuvululukwa” mOshungolangelo yaDesemba 2019.
^ okat. 57 ETHANO: Omumwatate a konga ethimbo a kale pamwe naavali ye nokwe ya pamwe nomukadhi noyana, nokwa tokola a kale he ya talele po pandjigilile.
^ okat. 59 ETHANO: Omunepya Omuisraeli ta tala nawa iiyimati yimwe yomuti ngoka a kuna.
