ESIKU limwe onda lombwele omunambelewa kutya onda li nale mondjedhililo, oshoka ihandi kutha ombinga miita. Onde mu pula nda ti: “Ngoye owa hala ndi shune mo ishewe?” Shika osho sha li oshikando oshitiyali te lombwelwa ndi ye metangakwiita lyaAmerika.

Pethimbo mpono, omushiinda shetu meme Margaret Walker, Onzapo yaJehova, okwa tameke okutalela po meme nokupopya naye kombinga yOmbiimbeli. Esiku limwe, onda tokola oku ya wayimina. Meme okwa li ta dhiladhila kutya otandi piyaganeke ekonakono lye, nokwa lombwele ndje ndi ye pondje. Pehala lyokuya, onda kala te pulakene koonkundathana dhawo. Margaret okwa kala ha talele po meme olundji. Mokweendela ko kwethimbo, Margaret okwa pula ndje a ti: “Owu shi edhina lyaKalunga?” Onda ti: “Kehe gumwe oku shi kutya olyo Kalunga.” Okwa ti: “Kwatha ndje wu kuthe Ombiimbeli yoye, e to tala mEpisalomi 83:18, NW.” Onda tala mo nonda mono kutya edhina lyaKalunga oJehova. Sho nda ka tsakanena nookuume kandje, onde ya lombwele kutya: “Sho tamu shuna komagumbo nena, ka taleni mOmbiimbeli mEpisalomi 83:18, NW, mu mone kutya edhina lyaKalunga olye.” Otashi vulika wu tye kutya mesiku ndyono omo onda tameke okuuvitha.

Onda konakona Ombiimbeli nonda ninginithwa mo 1941. Lwanima, onda pewa oshinakugwanithwa shokukwatela komeho ekonakono lyembo lyegongalo. Onda li nda tsu meme naamwameme omukumo ye ye kokugongala. Ayehe oya tameke okuya, kakele katate.

Onda li nda pewa iinakugwanithwa oyindji megongalo. Onda li ndi na omambo ogendji ngoka ga nyanyangidhwa kOonzapo dhaJehova. Esiku limwe, tate oku ulike omambo gandje, e ta ti: “Owu wete iipolopolo yoye mbino? Onda hala yi yele mo megumbo mu, e to yi nayo.” Onda zi mo megumbo nonda kala handi zi popepi noshilando shedhina Zanesville, muOhio. Onda kala handi talele po meme naamwameme ndi ya ladhipike.

Tate okwa kala ha keelele meme kokugongala. Omathimbo gamwe sho meme e li mondjila, tate ohe mu tidha. Uuna e mu adha ohe mu hili ya shune kegumbo. Nonando meme oku shunithwe megumbo, iha kala mo, oha pitile owala komweelo gulwe, e ta yi kokugongala. Onda lombwele meme nda ti: “Ino ipula naashoka. Ona  ka vulwe ngaa oku ku tidha.” Mokweendela ko kwethimbo, tate okwa sholola. Okuza mpono, meme okwa kala ha yi kokugongala a manguluka.

Sho Osikola yOkudheula Aauvithi ya totwa po momumvo 1943, onda tameke okukutha ombinga muyo. Omayele ngoka nda kala te pewa sho tandi kutha ombinga mosikola oga kwathela ndje ndi hwepopaleke okupopya kwandje.

Mo 1944, pethimbo lyIita Iitiyali yUuyuni, onda li nda lombwelwa ndi ye muukwiita. Onde ki ilopota kokamba yedhina Fort Hayes, moColombus, muOhio, hono nda ka konakonwa e tandi udhitha ofooloma yiilonga. Onda lombwele aanambelewa kutya itandi yi muukwiita. Oye etha ndje ndi ye kegumbo. Konima yomasiku omashona, omunambelewa okwe ya pondunda yandje, e ta ti: “Corwin Robison, ondi na ombapila yoku ku mangitha po.”

Konima yiiwike iyali, onda yi kompangu. Omupanguli okwa ti: “Ando ongame nda li omutokoli, ando otandi tokola wu kale mondjedhililo onkalamwenyo yoye ayihe. Oto ti ngiini?” Onda ti: “Omusimanekwa, ngame ondi li omuuvithi. Ohandi yi egumbo negumbo tandi uvithile aantu onkundana ombwanawa yUukwaniilwa.” Omupanguli okwa lombwele aatokoli a ti: “Itamu tokola ngele omulumentu nguka omugundjuka omuuvithi nenge hasho. Otamu tokola kutya ota yi muukwiita nenge hasho.” Muule owala wowili netata, aatokoli oya tokola kutya ondi na ondjo. Oya tokola ndi ka patelwe mokakuma uule womimvo ntano moshilando Ashland, moshilongo shedhina Kentucky.

Iiwike iyali yotango, onda kala mondjedhililo moColumbus, muOhio. Esiku lyotango onda tulwa mokandunda moka hamu kala owala omuntu gumwe. Onda galikana kuJehova nda ti: “Itandi vulu okukala mokandunda haka omimvo ntano. Kandi shi kutya nandi ninge shike.”

Esiku lya landula, aapolisi oye egulula ndje mo. Sho nda zi mo onda yi pomulumentu gumwe omule ye omunene molutu, ngoka naye a li e edhililwa mondholongo. Otwa kala twa thikama naye tatu talele momakende. Shaashi ngame omufupi, okwa pula ndje a ti: “Shoti, owa kwatelwa shike?” Onda ti: “Omolwaashono ngame Onzapo yaJehova.” Okwa ti: “Onzapo yaJehova? Owa ninga shike?” Onda ti: “Oonzapo dhaJehova ihadhi kutha ombinga miita dhi ka dhipage aantu.” Okwa ti: “Oye ku tula mondjedhililo sho inoo hala oku ka dhipaga aantu! Yo haya tula aantu yalwe mondjedhililo uuna ya dhipaga aantu. Mbela oshi li ngaa pauyuuki?” Onda ti: “Aaye, kashi li nando pauyuuki.”

Opo nduno okwa ti: “Onda kala mondholongo yimwe uule womimvo 15, mono nda li nda lesha iileshomwa yeni yimwe.” Sho nde shi uvu, onda galikana ngeyi: “Jehova, kwatha ndje omulumentu nguno a game kombinga yandje.” Pompito mpono omunandholongo gwedhina Paulus okwa ti: “Ngele opu na omunandholongo te ku hindi, igidha ndje owala. Otandi ya ndi mu talithe  nawa.” Sho nda kala pamwe naanandholongo ooyakwetu mboka 50, inaya longela ndje uushadha washa.

Sho aanambelewa ya lundulile ndje kondjedhililo yokuAshland, onda adha ko ku na aamwatate yamwe. Oya kwathele ndje nosho wo aantu yalwe tu hedhe popepi naJehova. Oye tu pe oshinakugwanithwa shokulesha Ombiimbeli koshiwike. Ohatu ilongekidha omapulo nomayamukulo ngoka taga ka kundathanwa pokugongala hoka twa li hatu ithana Ongundumbiimbeli. Otwa li hatu lala mondunda onene mu na oombete odhindji. Okwa li pu na omumwatate ngono he tu longekidhile oshitopolwa shono tu na okulonga mondholongo. Okwa lombwele ndje a ti: “Robison, uvithila aantu mbaka haya lala koombete ndhika. Oombete ndhoka wa pewa odho oshitopolwa shoye. Uvithila aantu mbono manga inaaya mangululwa.” Osho twa kala tatu uvitha momukalo gu unganekwa nawa ngawo.

Iita Iitiyali yUuyuni oya hulu mo 1945. Konima sho ya hulu onda kala natango mondholongo uule wethimbo lyontumba. Tate okwa lombwelele ndje a ti: “Ngele owa zi mo megumbo, nena ayehe itaya nyenge ndje.” Onkee ano, onda kala tandi ipula unene nameme naamwameme. Sho nda mangululwa, onda li nda kumwa nonda nyanyukwa noonkondo, molwaashono onda adha aantu yaheyali maandjetu haya yi kokugongala. Omumwamemekadhona gumwe onda adha a ninginithwa, nonando tate okwa kala te mu pataneke.

Sho Iita ya tameke muKorea mo 1950, onda li nda lombwelwa oshikando oshitiyali ndi ye metangakwiita. Onda lombwelwa ndi ki ilopote kokamba yaFort Hayes. Sho nda pulwapulwa, omunambelewa okwa lombwele ndje a ti: “Ongoye wa pita wu vulithe aantu ayehe mongundu yeni.” Onda ti: “Eewa, ihe ngame itandi yi muukwiita.” Ngaashi sha nyolwa muTimoteus omutiyali 2:3, onda ti: “Ngame omukwiita ofule gwaKristus.” Opwa piti ethimbo ele a mwena, e ta ti: “Inda kegumbo.”

Konima yaashono, onda yi koshigongi shoshitopolwa moCincinnati, muOhio, nonda li nda kala pokugongala kwaamboka ya hala okuya koBetel. Omumwatate Milton Henschel okwe tu lombwele kutya koBetel oku na ompumbwe yaamwatate, mboka ya hala okulonga nuudhiginini miilonga yUukwaniilwa. Onda ningile eindilo koBetel nonda li nda taambwa. MuAuguste 1954, onda tameke okulonga moBrooklyn nonda kala miilonga yaBetel okuza momumvo ngono okuuka komeho.

MoBetel onda kala aluhe ndi na iilonga oyindji. Uule womimvo dhontumba, onda kala handi pangele omashina moshinyanyangidho nomoombelewa nosho wo omakumba. Onda li wo nda longo mIinyanga yIigongi, moNew York City.

MoBetel ondi hole mo oonkundathana dhenyolo lyesiku, Ekonakono lyOshungolangelo nosho wo okuuvitha pamwe negongalo. Onzapo yaJehova kehe oyi na andola okuninga iinima mbyoka pandjigilile. Ngele aavali naanona ohaya kundathana enyolo lyesiku pamwe, ohaya  ningi elongelokalunga lyuukwanegumbo pandjigilile, ohaya gandja omatyokosha pokugongala kehe noye li aalaadhi mokuuvitha onkundana ombwanawa, egumbo alihe otali ka kala lya hedha popepi naJehova.

Onda panga uukuume naantu oyendji moBetel nosho wo megongalo. Yamwe yomuyo aagwayekwa noya ya nale megulu, ihe yamwe oonzi dhilwe. Aapiya yaJehova ayehe inaya gwanenena mwa kwatelwa Aabetel. Uuna nda ningathana nomumwatate, ohandi kambadhala okweeta po ombili pokati ketu. Ohandi kaleke Mateus 5:23, 24 momadhiladhilo nosho wo nkene ndi na okuungaunga okwaahauvathana hoka haku holoka mokati ketu. Kashi shi oshipu okutya: “Ombili,” ihe oshitya shono olundji ohashi kandula po okwaahauvathana.

Ngashingeyi oshidhigu okuuvitha egumbo negumbo omolwuukulupe, ihe otandi pula komeho. Ondi ilongo kashona Oshichiina shOshimandarin, notandi nyanyukilwa okupopya nAachiina sho tandi tsakanene nayo mepandaanda. Omasiku gamwe ongula onene ohandi gandja iifo 30 nenge 40 kumboka ye na ohokwe.

MoChiina onda kala ndi na mo omaishunoko. Esiku limwe, okakadhona kamwe hoka ka li taka landitha iiyimati oke ende pungame taki imemeha. Ondi imemeha, e tandi ka pe oshifo shOshungolangelo no-Awake! mOshichiina. Oke yi taamba, noka lombwele ndje kutya edhina lyako oKatie. Okuza mpono, aluhe taka mono ndje, ohaka popitha ndje. Onde ka lombwele omadhina giiyimati nogiikwamboga mOshiingilisa, e take ge endulula. Onde ka yelithile wo omanyolo mOmbiimbeli, nonde ka pe embo Omalongo gOmbiimbeli. Konima yiiwike yontumba, inandi ka mona we.

Konima yoomwedhi dhontumba, opwe ende ishewe okakadhona kamwe taka landitha. Onde ka pe iifo, noke yi taamba. Oshiwike sha landula ko, oka pe ndje ongodhi yako, e taka ti: “Taamba wu popye nomuntu e li koChiina.” Ngame onda ti: “KoChiina kandi shi ko omuntu.” Ihe oka kondjitha ndje, sigo nde yi taamba, e tandi ti: “Halowu, ongame Robison.” Ngoka tatu popi naye okwa yamukula a ti: “Robby, oKatie. Onda shuna koChiina.” Onda ti: “KoChiina?” Katie okwa yamukula a ti: “Eeno. Robby, owu shi okakadhona hono ke ku pe ongodhi? Okamwameme. Owa longa ndje iinima oyindji iiwanawa. Otandi ku indile nesimaneko enene, nako wu ka longe ngaashi wa longa ndje.” Onda ti: “Katie, otandi kambadhala oku shi ninga ngaashi te vulu. Tangi sho wa tseyithile ndje mpoka wu li.” Konima yaashono, onda popi nokamwayina kaKatie oshikando sha hugunina. Mpoka pu na uukadhona mboka uyali ngashingeyi, ondi inekela kutya owi ilonga oshindji kombinga yaJehova.

Onda longela Jehova uule womimvo 73. Onda nyanyukwa sho a kwathele ndje ndi kale omudhiginini sho ndi li mondjedhililo nosho wo ndaa ha kuthe ombinga miita. Shimwe ishewe, aamwameme oya lombwele ndje kutya oya kumikwa, sho nda kala tandi patanekwa kutate, ihe inandi sholola. Hugunina, meme naamwameme yahamano, aamati naakadhona oya ninginithwa. Tate naye okwa lundulula iikala ye kashona, nokwa kala ha yi kokugongala omathimbo gamwe manga e li momwenyo.

Kalunga ngele okwe shi hala, aantu yaandjetu nosho wo ookuume kandje mboka ya sa, otaya ka kala nomwenyo muuyuni uupe. Enyanyu otali ka kala li thike peni uuna tatu ka longela Jehova sigo aluhe pamwe naamboka tu hole. * — Tala enyolo lyopehulilo.