1, 2. Konima sho Jesus a yi megulu, otashi vulika aayapostoli ye ya li tayi pula nashike?

AAYAPOSTOLI yaJesus oya li ya thikama kOndundu yomiolivi taya tala kegulu. Oya adhika owala opo ya mono omuwa gwawo, ngoka e li kuume kawo, Jesus, a yeluthwa pombanda e ta yi moshikogo. (Iil. 1:9, 10) Omimvo mbali lwaampono, Jesus okwa kala te ya longo, te ya tsu omukumo note ya wilike. Ihe sho Jesus kee po we, oshike ya li taya ka ninga po?

² Manga Jesus inaa ya megulu okwa li a lombwele aalanduli ye a ti: “One otamu ka ninga oonzapo dhokuhokolola ndje paantu ayehe mboka ye li muJerusalem, muJudea alihe nomuSamaria sigo omiilongo ayihe yokombanda yevi.” (Iil. 1:8) Mbela oya li taya ka mana ngiini iilonga yawo? Osha yela kutya Jesus okwa li e ya shilipaleke kutya otaya ka tuminwa mbala ombepo ondjapuki. (Iil. 1:5) Niishewe, oshikonga shopaigwana shokuuvitha osha li sha pumbwa okuwilikwa nokukala shu unganekwa. Jehova okwa li ha longitha aakalelipo ye yopantu ya wilike nokuunganeka oshigwana she  shopethimbo lyonale. Aayapostoli otashi vulika ya li tayi ipula ngeyi: ‘Mbela ngashingeyi Jehova ota ka langeka po omuwiliki omupe?’

3. (a) Konima sho Jesus a yi megulu, etokolo lini lya simana aayapostoli aadhiginini ya li ya ningi? (b) Oshike tatu ka kundathana moshitopolwa tashi landula?

³ Meni lyiiwike iyali, aalongwa yaJesus Kristus oya li ya konakona Omanyolo, ya galikana Jehova e ya kwathele noya li ya hogolola Matias e li omuyapostoli omutimulongo nomutiyali a pingene po Judas Iskariot. (Iil. 1:15-26) Omolwashike ehogololo ndika lya li lya simanenena kuyo nokuJehova? Matias okwa li ta ka longa oshilonga sha simanenena shi na ko nasha nokuunganeka. * Jesus ina hogolola owala aayapostoli ye ya kale taya longo pamwe naye muukalele, ihe okwe ya dheulile oshilonga sha simama mokati koshigwana shaKalunga. Oshilonga shoka sha simana osha li shini, nongiini Jehova naJesus ya li ye shi ya dheulile? Elongekidho lini lya faathana li li mokati koshigwana shaKalunga kunena? Ongiini tatu vulu ‘okudhimbulukwa aawiliki yetu mboka ye tu uvithile oohapu dhaKalunga’ unene tuu “omumati omwiinekelwa nomunandunge” nenge omupiya omudhiginini nomunandunge. —  Heb. 13:7; Mat. 24:45.

4. Aayapostoli nosho wo akuluntugongala yamwe muJerusalem oya li ya dhana onkandangala yini methelemimvo lyotango?

⁴ POpentekoste yomo 33, konima yokuvalwa kwaKristus, aayapostoli oya li ya tameke okukwatela komeho megongalo lyopaKriste. Poshiningwanima shoka “Petrus okwa thikama pamwe naayapostoli ooyakwawo omulongo nagumwe,” noya longo ongundu onene yAajuda naamboka kaaye shi Aajuda oshili tayi hupitha oomwenyo. (Iil. 2:14, 15) Oyendji yomuyo oya ningi Aakriste. Onkee ano, Aakriste mbaka ape “oya kala taa longwa kaayapostoli.” (Iil. 2:42) Aayapostoli oya li yu ungaunga niiniwe yegongalo. (Iil. 4:34, 35) Oya li ya sile oshimpwiyu ompumbwe yopambepo yoshigwana shaKalunga. Oya popi ya ti: “Tse yene polwetu otwa hala okwiitula lela megalikano nomoshilonga sheuvitho lyoohapu dhaKalunga.” (Iil. 6:4) Aayapostoli oya li wo ya langeke po Aakriste ya pyokoka ya tamunune mo iilonga yokuuvitha miitopolwa mbyoka inaayi longwa nale. (Iil. 8:14, 15) Mokweendela ko kwethimbo, aakuluntugongalo yamwe oya li ya kwathele aayapostoli mokukwatela komeho momagongalo. Ye li Olutuwiliki, oya li ya gandja omalombwelo komagongalo agehe. —  Iil. 15:2.

5, 6. (a) Ombepo ondjapuki oya li ya nkondopaleke ngiini Olutuwiliki? (Tala kethano lyopetameko.) (b) Aayengeli oya li ya kwathele ngiini Olutuwiliki? (c) Oohapu dhaKalunga odha li dha wilike ngiini Olutuwiliki?

⁵ Aakriste yomethelemimvo lyotango oya li ya dhimbulula kutya Olutuwiliki otalu wilikwa kuJehova Kalunga okupitila muJesus, omuwiliki gwalwo. Oye shi tseya ngiini? Shotango, ombepo ondjapuki oya li ya nkondopaleke Olutuwiliki. (Joh. 16:13) Aakriste ayehe aagwayekwa oya li ya tililwa ombepo ondjapuki. Oyo unene ya li ya kwathele aayapostoli naakuluntugongalo yalwe muJerusalem ya gwanithe po iilonga yawo ye li aatonateli. Pashiholelwa, momumvo 49 E.N., ombepo ondjapuki oya li ya wilike Olutuwiliki lu ninge omatokolo gokupongolola po uupyakadhi wepitotanda. Omagongalo oga li ga landula omalombwelo galwo ‘noga kolekelwa meitaalo nomwaalu gwooitaali ogwi indjipala esiku kehe.’ (Iil. 16:4, 5) Ontumwafo ndjoka ya li tayi popi kombinga yetokolo ndyoka oya li wo ya holola kutya Olutuwiliki olu ulika iiyimati yombepo yaKalunga ngaashi, ohole neitaalo. —  Iil. 15:11, 25-29; Gal. 5:22, 23.

⁶ Oshitiyali, aayengeli oya li ya kwathele Olutuwiliki. Manga Kornelius ngoka kee shi Omujuda  nokaa li a pita etanda inaa ninga Omukriste, omuyengeli okwa li e mu wilike a ye komuyapostoli Petrus. Konima sho omuyapostoli Petrus u uvithile Kornelius naanegumbo lye, ombepo ondjapuki oya tililwa muyo, nonando aalumentu mbaka kaya li ya pita etanda. Oshinima shika osha li sha tsu omukumo aayapostoli nosho wo aamwatate yalwe ya vulike kehalo lyaKalunga noya taambe ko aapagani mboka inaaya pita etanda megongalo lyopaKriste. (Iil. 11:13-18) Shimwe ishewe, aayengeli oya li ya humitha komeho nokweendelelitha iilonga yokuuvitha mbyoka ya li tayi tonatelwa kOlutuwiliki. (Iil. 5:19, 20) Oshititatu, Oohapu dhaKalunga odha li dha wilike Olutuwiliki. Aakuluntugongalo aagwayekwa oya li haya wilikwa kOmanyolo uuna tayu ungaunga niinima yi na ko nasha nomalongo goshili nenge taya gandja ewiliko lya za kehangano. —  Iil. 1:20-22; 15:15-20.

7. Omolwashike tatu vulu okutya Jesus oye a li a wilike Aakriste yonale?

⁷ Nonando Olutuwiliki olwa li halu kwatele komeho megongalo lyonale, olwa li lwe shi zimine kutya Omuwiliki galwo oJesus. Omuyapostoli Paulus okwa nyola a ti: ‘Kristus oku utha, yamwe ya ninge aayapostoli.’ Okwa gwedha ko a ti: “Ihe mokupopya oshili tayi pangelwa kohole, otu na okukoka muKristus, ngoka e li omutse.” (Ef. 4:11, 15) Pehala lyokwiiluka yo yene omadhina gaayapostoli mboka ya simana, ‘aalongwa oya lukwa lwotango Aakriste.’ (Iil. 11:26) Odhoshili kutya Paulus okwa li a mono kutya osha simana ‘okudhiginina elongo’ lya kankamena kOmanyolo, ndyoka lya li lya gandjwa kaayapostoli nokaalumentu yalwe mboka ya li taya kwatele komeho. Okwa gwedha ko a ti: ‘Onda hala, mu kale mwa tseya kutya Kristus oye omutse gwomulumentu kehe naKalunga oye omutse gwaKristus.’ (1 Kor. 11:2, 3) Eeno, Jehova Kalunga okwa hogolola Omwana, Jesus Kristus, ngoka ihaa monika a kale omuwiliki gwegongalo.

8, 9. Okuza pehulilo lyethelemimvo eti-19, omumwatate Russell okwa li a longo iilonga ya simana yini?

⁸ Pehulilo lyethelemimvo eti-19, Charles Taze Russell naalanduli ye yamwe oya li ya kambadhala okutotulula po elongelokalunga lyashili. Sho ehangano lyoZion’s Watch Tower Tract Society lya totwa po paveta momumvo 1884, omumwatate Russell oye a li omutonateli gwalyo. Shika osha li she ya kwathele ya vule okutaandelitha oshili yOmbiimbeli momalaka gi ili nogi ili. * Omumwatate Russell okwa li omukonakonimbiimbeli a pyokoka, nokwa li a aneke pomutenya elongo lyiifundja ngaashi, uukwatatu nomwenyo ihaagu si kee na nando uumbanda washa. Okwa li a mono kutya Kristus ota ka galuka molupe lwokwaamonika nonokutya ‘ethimbo lyaapagani otali ka hula po’ mo 1914. (Luk. 21:24) Omumwatate Russell okwa li a longitha ethimbo lye, onkondo dhe niimaliwa ye, opo a vule okulonga yalwe oshili yOmbiimbeli. Osha yela kutya pethimbo ndyoka lya simanenena, omumwatate Russell okwa li a longithwa kuJehova nokomutse gwegongalo, Jesus.

⁹ Omumwatate Russell ka li a kongo esimano kaantu. Momumvo 1896 okwa nyola a ti: “Inatu hala okusimanekwa nenge shoka twa nyola shi simanekwe; noinatu hala okwiithanwa Omusimanekwa nenge Omuhongi. Inatu tegelela nando ogumwe i ithanwe omadhina getu.” Lwahugunina okwa ti: “Mbika kayi shi iilonga yomuntu, ihe oyaKalunga.”

10. (a) Unake Jesus a li a langeke po “omumati omwiinekelwa nomunandunge”? (b) Hokolola nkene Olutuwiliki lwe ende talu yooloka ko kehangano lyoWatch Tower Society.

¹⁰ Momumvo 1919, sho pwa piti omimvo ndatu konima yeso lyomumwatate Russell, Jesus okwa li a langeke po “omumati omwiinekelwa  nomunandunge.” Okwa li e shi ningi nelalakano lyashike? Olyokupa aalanduli ye “iikulya pethimbo lyayo.” (Mat. 24:45) Nokuli momimvo dhonale, okangundu okashona kaamwatate aagwayekwa mboka ya li haya longo koombelewa oonene moBrooklyn, moNew York, oya li ya longekidhile aalanduli yaJesus iikulya yopambepo noku yi taandelitha. Uutumbulilo “Olutuwiliki” owa li wa tameke okulongithwa miileshomwa yetu mo 1940 nasha, sho shu uviwa ko kutya olwa pambathana lela noWatch Tower Bible and Tract Society. Mo 1971 osha li sha yelithwa nawa kutya Olutuwiliki olwa yooloka ko kehangano lyoWatch Tower Society, ndyoka lya li owala li na ko nasha niikwaveta. Olutuwiliki olwa li lwa kwatela mo aamwatate aagwayekwa mboka kaaya li a aawiliki yehangano. Omimvo opo dha zi ko, aakuluntugongalo mboka ye li oshitopolwa shoonzi dhilwe oya li haya longo ye li aawiliki yEhangano lyopaveta noyomahangano galwe ngoka ga li haga longithwa koshigwana shaKalunga. Oshizemo, shika osha li sha pe Olutuwiliki ompito lu gandje eitulomo kokugandja ewiliko nokomalombwelo gopaMbiimbeli koshigwana shaKalunga. (Joh. 10:16; Iil. 6:4) Oshungolangelo yo 15 Juli 2013 oya yelitha kutya “omumati omwiinekelwa nomunandunge” nenge omupiya omudhiginini nomunandunge, oye okangundu okashona kaamwatate aagwayekwa mboka ya thikama po mOlutuwiliki.

11. Olutuwiliki ohalu longo ngiini?

¹¹ Olutuwiliki ohalu ningi omatokolo ga simana lu li ongundu. Shika ohalu shi ningi ngiini? Iilyo yOlutuwiliki ohayi gongala oshiwike kehe, naashoka ohashi yi kwathele yi kale hayi popi ya mangulukilathana noya hangana. (Omayel. 20:18) Omumvo kehe ohayi ningi omalufo gokukala omunashipundi gwokugongala hoka, molwaashoka kapu na oshilyo shimwe shOlutuwiliki sha simana shi vulithe iikwawo. (1 Pet. 5:1) Ookomitiye adhihe hamano dhOlutuwiliki kehe yimwe ohayi hogolola kutya olye ta kala omunashipundi omumvo kehe. Kapu na oshilyo shimwe mookomitiye ndhoka shi itala ko shi li omuwiliki gwaamwahe, ihe kehe gumwe okwi itala ko e li gumwe ‘gwomaamati’ nenge gwomaalanduli yaJesus noha pewa iikulya yopambepo komupiya omudhiginini nokuvulika kuye.

12. Molwashoka Olutuwiliki inalu gwanenena, omapulo geni haga holoka po?

¹² Olutuwiliki inalu gwanenena. Otalu vulu okuninga omapuko miinima yi na ko nasha nomalongo goshili nenge nomalombwelo ga za kehangano. Onkee ano, moWatch Tower Publications Index omwa kala hamu kala oshipalanyolo “Beliefs Clarified” (Iinima mbyoka twi itaala ya yelithwa) shi na omusholondondo gwomanyolo ngoka ga kala nokuyelithwa okuza mo 1870. Odhoshili kutya Jesus ine tu lombwela kutya omupiya omudhiginini ota ka gandja iikulya yopambepo ya gwanenena. Mbela otatu ka yamukula ngiini epulo lyaJesus ndyono tali ti: “Olye ano omumati omwiinekelwa nomunandunge”? (Mat. 24:45) Uuyelele wuni tawu ulike kutya Olutuwiliki olwo talu gwanitha po oshinakugwanithwa shono? Natu taleni kiinima ya faathana itatu mbyoka ya li ya kwathele Olutuwiliki methelemimvo lyotango.

13. Ombepo ondjapuki oya li ya kwathele ngiini Olutuwiliki?

¹³ Ombepo ondjapuki oya li ya kwathele Olutuwiliki. Ombepo ondjapuki oya kwathela Olutuwiliki lu uve ko oshili yOmbiimbeli ndjoka kaaya li yu uviwa ko nawa petameko. Pashiholelwa, natu taleni kiinima yimwe mbyoka ya li yi itaalwa kaantu nkene ya yelithwa muutendo wa tetekele. Odhoshili kutya kapu na omuntu a li ta vulu okuuva ko nokuyelitha iinima ‘yomuule womadhiladhilo gaKalunga’ kuye mwene. (Lesha 1 Aakorinto 2:10.) Olutuwiliki olwa li lwu uvite ngaashi omuyapostoli Paulus ngoka a nyola a ti: “Itatu popi oohapu dha za melongo lyopaunongo waantu, ihe otatu popi oohapu  dha za melongo lyOmbepo yaKalunga.” (1 Kor. 2:13) Konima yomimvo omathele sho pwa li uushunimonima nomilema dhopambepo, mbela okuza mo 1919 opwa li ngaa ngoka ta vulu okuyelitha nokuuva ko iinima yopambepo kaaku shi kekwatho lyombepo ondjapuki?

14. Shi ikolelela kEhololo 14:6, 7, aayengeli ohaya kwathele ngiini oshigwana shaKalunga kunena?

¹⁴ Aayengeli oya li ya kwathele Olutuwiliki. Kunena Olutuwiliki olu na oshinakugwanithwa shokutonatela iilonga yokuuvitha mbyoka tayi longwa kaantu ya konda pomamiliyona gahetatu muuyuni awuhe. Omolwashike iilonga mbyono tayi pondola? Omolwaashoka aayengeli nayo oye na mo ombinga muyo. (Lesha Ehololo 14:6, 7.) Poompito odhindji aayengeli ohaya wilike aauvithi ya ye kaantu mboka ya adhika owala opo ya li taya galikana Kalunga e ya kwathele. * Iilonga yokuuvitha noyokuninga aantu aalongwa oya tsikile nokuhuma komeho miilongo yimwe kekwatho lyaayengeli, nonando opwa li omapataneko.

15. Eyooloko lini li li pokati kOlutuwiliki naawiliki yomalongelokalunga? Gandja oshiholelwa.

¹⁵ Olutuwiliki olwa li lwa wilikwa kOohapu dhaKalunga. (Lesha Johannes 17:17.) Tala kwaashoka sha li sha holoka po mo 1973. Oshungolangelo ye 1 Juni 1973 oya li ya pula epulo tali ti: ‘Mbela omuntu ngoka a pikwa komakaya noina hala oku ge etha ota vulu ngaa okuninginithwa?’ Eyamukulo: “Omanyolo oge shi ulika sha yela nawa kutya ke na okuninginithwa.” Oshungolangelo oya totha mo Omanyolo gontumba e tayi yelitha nawa kutya omolwashike  omuntu ngoka ha hili omakaya ini iyela ombedhi e na okukondwa. (1 Kor. 5:7; 2 Kor. 7:1) Oya gwedha ko ya ti: “Etokolo ndyoka olyi ikolelela komakotampango, lyo inali ningwa omolwuukayamukulwa. Etokolo ndyoka lya kwata miiti olya za shili kuKalunga ye mwene okupitila mOohapu dhe.” Mbela opu na ngaa elongelokalunga limwe li inekela lela mOmbiimbeli, nonando iilyo yalyo yimwe otashi vulika shi li oshidhigu noonkondo kuyo oku yi tula miilonga? Embo limwe opo lya piti tali popi kombinga yomalongelokalunga moAmerika olya ti: “Aawiliki yomalongelokalunga oya kala aluhe nokulundulula omalongo gawo ga tse kumwe naashoka shi itaalwa kiilyo yago nosho wo nomadhiladhilo ngoka taga yambidhidhwa kiilyo yago nokaantu oyendji momudhingoloko.” Ando Olutuwiliki olwe ethele okulandula Oohapu dhaKalunga e talu etha omadhiladhilo gopantu ga wilike omatokolo galwo, mbela ando olye lela ta wilike oshigwana shaKalunga kunena?

16. Omomukalo gumwe guni tatu vulu okudhimbulukwa Olutuwiliki?

¹⁶ Lesha Aahebeli 13:7. Oshitya shoka sha tolokwa “dhimbulukweni” otashi vulu wo okutolokwa “tumbuleni.” Onkee ano, omukalo gumwe to vulu ‘okudhimbulukwa aawiliki mboka ye ku uvithile oohapu dhaKalunga,’ omokukala ho tumbula Olutuwiliki momagalikano goye. (Ef. 6:18) Olutuwiliki olu na iinakugwanithwa oyindji mbyoka ya kwatela mo okugandja iikulya yopambepo, okutonatela iilonga yokuuvitha muuyuni awuhe nosho wo okuungaunga nomayambidhidho ngoka ehangano lya pewa. Osha yela kutya otwa pumbwa oku lu kwatela aluhe momagalikano getu.

17, 18. (a) Ohatu longele ngiini kumwe nOlutuwiliki? (b) Ohatu ambidhidha ngiini omupiya omudhiginini nosho wo Jesus?

¹⁷ Okudhimbulukwa Olutuwiliki inaku kwatela mo owala oku shi popya mokana, ihe osha kwatela mo okuvulika komalombwelo galwo. Olutuwiliki ohalu gandja omalombwelo okupitila miileshomwa yetu, pokugongala nosho wo piigongi iishona niinene. Niishewe, Olutuwiliki olwo halu langeke po aatonatelishikandjo, mboka oyo haya langeke po aakuluntugongalo. Aatonatelishikandjo naakuluntugongalo ohaya dhimbulukwa Olutuwiliki mokukala taya landula lelalela omalombwelo ngoka talu ya pe. Atuheni ohatu simaneke Omuwiliki gwetu, Jesus, mokukala hatu vulika kaalumentu mboka ta longitha oku tu wilika. —  Heb. 13:17.

¹⁸ Omukalo gulwe ngoka hatu dhimbulukwa Olutuwiliki omokukala hatu kutha ombinga miilonga yokuuvitha. Paulus okwa ladhipike Aakriste ya holele eitaalo lyaamboka taye ya wilike. Omupiya omudhiginini oku ulika lela eitaalo lya kola mokuhumitha komeho nomokutaandelitha onkundana ombwanawa yUukwaniilwa. Mbela owu li gumwe gwomoonzi dhilwe ndhoka tadhi ambidhidha aagwayekwa miilonga ya simanenena? Ito ka kala tuu wa nyanyukwa uuna Omuwiliki gwoye, Jesus, ta ti: “Ayihe mbyoka mwe yi ningile gumwe gwaamwatate mbaka aashuushuka, ongame mwe yi ningile”! —  Mat. 25:34-40.

19. Omolwashike wa tokola toko okulandula Omuwiliki gwetu, Jesus?

¹⁹ Sho Jesus a shuna megulu, ina dhimbwa aalanduli ye. (Mat. 28:20) Okwa li e shi shi kutya ombepo ondjapuki, aayengeli nosho wo Oohapu dhaKalunga oye mu kwathela a kwatale komeho sho a li kombanda yevi. Onkee ano, kunena ota kwathele omupiya omudhigini nekwatho lya faathana. Iilyo yomupiya yi li Aakriste aagwayekwa, ‘ohayi landula Onzigona shaa mpoka ta yi.’ (Eh. 14:4) Onkee ano, uuna tatu landula omalombelo gawo, nena otatu landula Omuwiliki gwetu, Jesus. Masiku Jesus ote ke tu wilika noku tu fala momwenyo gwaaluhe. (Eh. 7:14-17) Kapu na omuwiliki gwopantu ta vulu okuuvanekela aantu ngawo.