1-2. Omumwatate gumwe okwi ilongo shike kombinga yokugandja omayele?

OMIMVO odhindji dha ka pita, aakuluntugongalo yaali oya li ya talele po omumwameme gumwe ngoka a kala ethimbo ele ha gongala owala omalupita. Gumwe gwomaakuluntugongalo mboka okwa ulikile omumwameme ngoka omanyolo gamwe kombinga yokukala pokugongala. Omumwatate ngoka okwa li ta dhiladhila kutya etalelopo lyawo olye enda nawa, ihe sho ya thikama ya ye, omumwameme okwa ti: “Aamwatate, kamu shi kutya ondi li monkalo ya tya ngiini kaya.” Aamwatate mboka oya pe omumwameme omayele, ihe inaye mu pula tango kutya oku na uupyakadhi washike nosho wo kutya onkalo ye oyi li ngiini. Oshizemo osha li shini? Ka li e wete omayele gawo ge mu kwathela.

² Sho omumwatate ngoka a li a ulukile omumwameme omanyolo a tala kwaashoka sha ningilwe po, okwa ti: “Pompito ndjoka, onda li tandi dhiladhila kutya omumwameme ngoka ke na esimaneko. Ihe sho nde shi dhiladhila muule, onda mono kutya onde mu ulukile owala omanyolo taga opalele, pehala lyoku mu pula omapulo ngoka taga opalele, ngaashi: ‘Oshike sha kala tashi ningwa monkalamwenyo yoye?’ ‘Nandi ku kwathele ngiini?’” Omukuluntugongalo ngoka okwi ilonga oshiilongomwa sha simana moshimoniwa shoka. Ngashingeyi omumwatate ngoka oku li omusita omunalukeno noha kwathele egongalo nawa.

3. Oolye megongalo taya vulu okugandja omayele?

 ³ Ye li aasita yoshigunda, aakuluntugongalo oye na oshinakugwanithwa shokugandja omayele uuna sha pumbiwa. Ihe omathimbo gamwe, yalwe megongalo nayo otashi vulika ya kale ya pumbwa oku ga gandja. Pashiholelwa, omumwatate nenge omumwameme  otashi vulika a pe kuume ke omayele ga kankamena kOmbiimbeli. (Eps. 141:5; Omayel. 25:12) Nenge omumwameme omukokele otashi vulika a “ulukile aakiintu aagundjuka” nenge tu tye e ya pe omayele miinima mbyoka ya tumbulwa muTitus 2:3-5. Shimwe ishewe, aavali nayo oya pumbwa okupa oyana omayele pandjigilile noku ya pukulula. Osha yela kutya nonando oshitopolwa shika osha nuninwa aakuluntugongalo, atuheni otatu vulu okumona mo uuwanawa sho tatu ka taleni komikalo moka tatu vulu okugandja omayele kuyalwe ngoka taya vulu okutula miilonga, taga tsu omukumo notaga “nyanyudha omitima.” — Omayel. 27:9.

4. Oshike tatu ka kundathana moshitopolwa shika?

⁴ Moshitopolwa shika otatu ka kundathana omapulo gane kombinga yankene tu na okugandja omayele: (1) Omolwetompelo lini ewanawa hatu pe yalwe omayele? (2) Mbela omayele ngoka wa hala okugandja oga pumbiwa ngaa? (3) Olye e na okugandja omayele? (4) Ongiini to vulu okugandja omayele ngoka taga vulu okukwathela yalwe?

5. Omolwashike aantu haya taamba ko omayele nuupu ngele omukuluntugongalo ngoka te ga gandja ote shi ningi pahole? (1 Aakorinto 13:4, 7)

⁵ Aakuluntugongalo oye hole aamwatate naamwameme. Omathimbo gamwe ohole ndjoka ohaye yi ulike mokugandja omayele kugumwe ngoka e li pokuninga oshinima sha puka. (Gal. 6:1) Ihe manga omukuluntugongalo inaa popya nomuntu ngoka, okwa pumbwa okutala kwaashoka omuyapostoli Paulus a popi kombinga yohole. Okwa ti: “Ohole ohayi idhidhimikile ayihe noyi na olukeno. . . . Ohole ihayi tonyala, ihe otayi itaale, tayi tegamene e tayi idhidhimike sigo okehulilo.” (Lesha 1 Aakorinto 13:4, 7.) Ngele omukuluntugongalo okwa tedhatedha muule koovelise ndhoka, otashi ke mu kwathela a konakone kutya omolwashike a hala okugandja omayele, opo nduno ota vulu oku ga gandja komumwahe momukalo omwaanawa. Ngele ngoka ta pewa omayele okwa mono kutya omukuluntugongalo ngoka oku na ko nasha naye, otashi vulika a taambe ko lela omayele ngoka nuupu. — Rom. 12:10.

6. Oshiholelwa shini oshiwanawa omuyapostoli Paulus a tula po?

⁶ Omuyapostoli Paulus okwe tu tulila po oshiholelwa oshiwanawa sho a li omukuluntugongalo. Pashiholelwa, sho aamwatate yokuTessalonika ya li ya pumbwa omayele, Paulus ina ongaonga oku ge ya pa. Ihe manga inee shi ninga, okwe ya pandula omolwiilonga yawo yuudhiginini, ohole yawo neidhidhimiko lyawo. Okwa tala wo koonkalo dhawo, e te ya lombwele kutya oku shi kutya onkalamwenyo yawo kayi shi ompu nosho wo kutya otayi idhidhimikile omahepeko. (1 Tes. 1:3; 2 Tes. 1:4) Okwa li wo a lombwele aamwatate mboka kutya oye li oshiholelwa oshiwanawa kAakriste yalwe. (1 Tes. 1:8, 9) Osha yela kutya oya li lela ya nyanyukwa sho Paulus e ya pandula! Onkee kapu na omalimbililo kutya Paulus okwa li e hole aamwahe mboka yomuTessalonika noonkondo, oshoka okwa li a vulu oku ya pa omayele tage ya kwathele moontumwafo ndhoka e ya nyolele. — 1 Tes. 4:1, 3-5, 11; 2 Tes. 3:11, 12.

7. Omolwashike tashi vulika omuntu kaa taambe ko omayele?

⁷ Oshike tashi ka ningwa po ngele inatu gandja omayele momukalo tagu opalele? Omukuluntugongalo gumwe a pyokoka okwa ti: “Yamwe ihaye ga taamba ko molwaashoka tashi vulika ga puka, ihe omolwaashoka inaye ga pewa pahole.” Oshike tatu ilongo mwaashoka a popi? Omuntu oha taamba ko omayele nuupu ngele okwe ga pewa momukalo gwopahole, ihe hangele ta ngwanyaukilwa.

8. Omukuluntugongalo oku na okwiipula kombinga yashike, uuna a hala okupa gumwe omayele?

⁸ Aakuluntugongalo inaya kala haye endelele okugandja omayele. Manga inee ga gandja,  omukuluntugongalo oku na okwiipula ta ti: ‘Mbela onda pumbwa ngaa okupopya sha? Ondi na ngaa uushili kutya shoka omuntu ta ningi osha puka? Mbela okwa taaguluka oshipango shontumba shomOmbiimbeli? Nenge pamwe shoka omuntu ta ningi osho owala sha yooloka ko kwaashoka ngame andola nda ninga?’ Aakuluntugongalo ohaya yanda ‘okusa ompiya okupopya’ nenge tu tye okweendelela okupopya. (Omayel. 29:20) Ngele omukuluntugongalo ke shi wo nawa ngele okwa pumbwa okupa gumwe omayele, ota vulu okukundathana nomukuluntugongalo omukwawo ya tale ngele omumwatate gwontumba ota ningi oshinima kaashi li metsokumwe nOmanyolo. — 2 Tim. 3:16, 17.

9. Oshike tatu ilongo kuPaulus shi na ko nasha nankene tu na okugandja omayele kombinga yokuzala nokwiiyopaleka? (1 Timoteus 2:9, 10)

⁹ Natu tale koshiholelwa shika. Natu tye andola omukuluntugongalo gumwe oti ipula kombinga yokuzala nokwiiyopaleka kwomwiitaali omukwawo. Omukuluntugongalo ngoka ota vulu okwiipula ngeyi, ‘Mbela opu na etompelo lyopamanyolo ndyoka tali ningitha ndje ndi popye sha?’ Molwaashoka ina hala okugandja omayele ta kutha momutse gwe mwene, ota vulu okupula omukuluntugongalo gulwe nenge omuuvithi a pyokoka kombinga yoshinima shoka. Ayehe otaya vulu okutala komayele gaPaulus kombinga yokuzala nokwiiyopaleka. (Lesha 1 Timoteus 2:9, 10.) Paulus okwa tumbula omithikampango dhontumba nokwa yelitha kutya Omukriste oku na okuzala oonguwo dho opala, dhi shi okutalwa nodha yogoka. Ihe ina tula po oompango kutya omuntu na zale shike nenge shoka kee na okuzala. Okwa li e shi kutya aamwatate naamwameme otaya vulu okuzala kehe shoka ya hala, shampa owala kaashi li ompinge naashoka Ombiimbeli tayi ti. Onkee ano, ngele aakuluntugongalo otaya tala ngele omuntu okwa pumbwa okupewa omayele, oye na okutala tango ngele shoka omuntu ngoka ha zala oshi shi ngaa okutalwa notashi opalele.

10. Oshike tu na okukaleka momadhiladhilo kombinga yomatokolo gayalwe?

¹⁰ Osha simana tu dhimbulukwe kutya Aakriste yaali otaya vulu okuhogolola ya zale oonguwo dha yoolokathana, ihe adhihe odhi shi okutalwa. Inatu kondjithila aamwatate naamwameme shoka tu wete kutya osho shi li mondjila nenge kaashi li mondjila. — Rom. 14:10.

11-12. Ngele omuntu gumwe okwa pumbwa okupewa omayele, omapulo geni omukuluntugongalo e na okwiipula tango, nomolwashike?

¹¹ Ngele otwa mono kutya gumwe okwa pumbwa lela okupewa omayele, epulo ndyoka tu na okwiipula olyo kutya olye e na oku ge mu pa? Manga omukuluntugongalo inaa gandja omayele komumwameme a hokanwa nenge kokanona, tango oku na okupopya nomutse gwuukwanegumbo mboka, ngoka tashi vulika ogwo gwene gu tokole okuungaunga noshinima shoka. * Nenge otagu vulu gu pule gu kale po, sho omukuluntugongalo  ngoka ta gandja omayele. Shimwe ishewe, ngaashi sha popiwa  mokatendo 3, omathimbo gamwe otashi vulika shi kale shi li nawa omumwameme omukokele oye a gandje omayele komumwameme omugundjuka.

¹² Opu na ishewe oshinima shimwe aakuluntugongalo ye na okudhiladhila kusho. Omukuluntugongalo gumwe ota vulu okwiipula ngeyi: ‘Ongame ngaa nda gwana okugandja omayele ngano, nenge omuntu ote ke ga taamba ko ngele okwe ga pewa kugumwe i ili?’ Pashiholelwa, omuntu ngoka ha kala i iwete kee na oshilonga, otashi vulika a taambe ko omayele gontumba ngele okwe ga pewa komukuluntugongalo ngoka naye a li ha kala e uvite ngaashi ye. Omukuluntugongalo ngoka a li monkalo ndjoka otashi vulika a popye lela naye nohenda, naashoka te mu lombwele otashi vulika e shi taambe ko nuupu. Nonando ongawo, aakuluntugongalo ayehe oye na oshinakugwanithwa shokutsa omukumo aamwatate naamwameme ya ninge omalunduluko ngono Ombiimbeli tayi ti naya ninge. Onkee ngele omuntu okwa pumbwa okupewa omayele, shoka sha simanenena oku ga pewa, kutya nduno omukuluntugongalo ngoka te ge mu pe ina enda monkalo ya fa ye.

13-14. Omolwashike sha simana komukuluntugongalo a kale ha pulakene?

¹³Kala wi ilongekidha okupulakena. Uuna omukuluntugongalo ti ilongekidhile okugandja omayele, oku na okwiipula ngeyi: ‘Oshike ndi shi kombinga yonkalo yomumwatate? Oshike tashi inyenge monkalamwenyo ye? Mbela oku na omaupyakadhi ngoka kaandi shi? Oshike unene a pumbwa ngashingeyi?’

¹⁴ Ekotampango ndyoka li li muJakob 1:19 otali kwathele lela mboka haya gandja omayele. Jakob okwa nyola a ti: “Kehe gumwe na kale ha pulakene mbala, ihe ohi ikwata mokupopya ye iha geye mbala.” Omukuluntugongalo gumwe otashi vulika a tye kutya oku shi uuyelele awuhe kombinga yonkalo yontumba, ihe mbela osho ngaa? Omayeletumbulo 18:13 otaga ti: “Ngoka ta yamukula, manga inaa uva, otashi mu nikile uugoya notashi mu sitha ohoni.” Oshi li nawa lela omukuluntugongalo a uve uuyelele awuhe komuntu ye mwene. Onkee oku na okupulakena nawa tango manga inaa popya sha. Dhimbulukwa shoka omukuluntugongalo ngoka a popiwa petameko lyoshitopolwa shika i ilongo. Okwa mono kutya pehala lyokuthikila owala ta gandja uuyelele mboka a longekidha, okwa li e na tango okupula omumwameme omapulo ngaashi: “Oshike sha kala tashi ningwa monkalamwenyo yoye?” “Ongiini tandi vulu oku ku kwathela?” Ngele omukuluntugongalo oha kutha ethimbo a konge uuyelele kombinga yonkalo yontumba, otashi vulika a kwathele lela nokutsa omukumo aamwatate naamwameme.

15. Aakuluntugongalo otaya vulu ngiini okutula miilonga ekotampango ndyoka li li mOmayeletumbulo 27:23?

¹⁵Tseya nawa oshigunda. Ngaashi sha popiwa petameko, okugandja omayele taga kwathele yalwe okwa kwatela mo oshindji kaashi shi owala oku ya pa omanyolo gontumba nenge omaetopo. Aamwatate naamwameme oya pumbwa okumona kutya otu na ko nasha nayo, otwa hala oku ya kwathela nosho wo kutya onkalo yawo otu yi shi. (Lesha Omayeletumbulo 27:23.)  Aakuluntugongalo oye na okuninga ashihe shoka taya vulu, opo ya pange uukuume wa kola naamwatate naamwameme.

16. Oshike tashi kwathele aakuluntugongalo ya gandje omayele ngoka taga kwathele yalwe?

¹⁶ Aakuluntugongalo oye na okuyanda okuningitha aamwatate naamwameme ya dhiladhile kutya ohaya kala owala ye na ethimbo lyokupopya nayo uuna ya pumbwa okupewa omayele. Pehala lyaashono, oye na okukala haya popi nayo pandjigilile noku ya ulukila kutya oye na ko nasha nayo. Omukuluntugongalo gumwe a pyokoka okwa ti: “Ngele osho wa ningi, oto ka panga uukuume nayo. Nuuna to ka kala wa pumbwa oku ya pa omayele, otashi ka kala oshipu oku shi ninga.” Omuntu ngoka to ka pa omayele otashi ka kala wo oshipu kuye oku ga taamba ko.

17. Uunake omukuluntugongalo a pumbwa unene okwiidhidhimika nokuulika ohenda?

¹⁷Kala omwiidhidhimiki nomunahenda. Eidhidhimiko nohenda owo uukwatya wa pumbiwa unene uuna gumwe petameko a tindi okutula miilonga omayele ga kankamena kOmbiimbeli. Omukuluntugongalo ke na okuuva nayi ngele omumwatate nenge omumwameme ina taamba ko nenge ina tula miilonga omayele ngoka e mu pa. Ombiimbeli oya popya kombinga yaJesus ya ti: “Oshihenguti sha tanduka ite shi nyanyagula. Onyeka tayi tsina ite yi dhimi po.” (Mat. 12:20) Onkee megalikano lye lyopaumwene, omukuluntugongalo ngoka ota vulu okupula Jehova a yambeke ngoka a pumbwa okupewa omayele, noku mu kwathele a uve ko kutya omolwashike te ga pewa, e te ga tula miilonga. Omumwatate ngoka ta pewa omayele otashi vulika a kale a pumbwa okudhiladhila kombinga yaashoka sha popiwa. Ngele omukuluntugongalo omwiidhidhimiki noku na ohenda, omuntu ngoka ta kambadhala okukwathela ita ka piyaganekwa komukalo moka omayele ngoka e ga pewa, ihe ota ka vula okugandja eitulomo kugo. Odhoshili kutya omayele ngoka oge na aluhe okukala ga kankamena kOohapu dhaKalunga.

18. (a) Uuna tatu gandja omayele, oshike tu na okukaleka momadhiladhilo? (b) Ngaashi ethano lyoshimpungu tali ulike, aavali otaya kundathana shike?

¹⁸Ilonga komapuko goye. Molwaashoka inatu gwanenena, itatu ka vula okutula miilonga thiluthilu omaetopo agehe ngoka ge li moshitopolwa  shika. (Jak. 3:2) Otatu ka ninga omapuko, ihe natu kambadhaleni okwiilonga mo sha mugo. Ngele aamwatate naamwameme oyu uvite kutya otu ya hole, otashi vulika ye ke shi mone oshipu oku tu dhimina po uuna twa popi nenge twa ningi sha shoka she ya uvitha nayi. — Tala wo oshimpungu “ Omalombwelo kaavali.”

19. Ongiini tatu vulu okunyanyudha omitima dhaamwatate naamwameme?

¹⁹ Ngaashi twe shi mono, kashi shi oshipu okugandja omayele kuyalwe tage ya kwathele. Mboka hatu pe omayele inaya gwanenena ngaashi owala tse. Natu kaleke momadhiladhilo omakotampango ngoka twa zi nokukundathana moshitopolwa shika. Shilipaleka kutya oto gandja omayele omolwetompelo ewanawa. Shilipaleka wo kutya oga pumbiwa lela nosho wo ngele ongoye ngaa wa gwana oku ga gandja. Manga inoo pa omuntu omayele, tango mu pula omapulo e to kala wa shoka okutsi, opo wu uve kutya oku na uupyakadhi wuni. Itula moongaku dhe. Kala wu na olukeno e to panga wo uukuume wopothingo naamwatate naamwameme. Dhimbulukwa kutya elalakano lyetu kali shi owala okupa yalwe omayele tage ya kwathele, ihe otaga ‘nyanyudha wo omitima’ dhawo. — Omayel. 27:9.